雖然主要炒舊經濟，但我個垃圾倉升2%！風險胃納返晒嚟。早兩日買嗰隻期權，彈返三成，順手解埋點解睇好隻正股。 美股盈利反彈絶對唔止因為低基數。做零售利錢十分低。人人想做KOL。百萬富翁話投資只得一種方法。 (Patreon)

雖然主要炒舊經濟，但我個垃圾倉升2%！風險胃納返晒嚟

早兩日買嗰隻期權，彈返三成，順手解埋點解睇好隻正股

每日一圖— 美股盈利反彈絶對唔止因為低基數。做零售利錢十分低

Good Read — 人人想做KOL。百萬富翁話投資只得一種方法。

FB Post Summary — 結婚周年食椰林閣。口服新冠肺炎藥。今期信報月刊有我

去到十月，歡迎各位新讀者，多謝所有舊讀者。今日嘅Good Read十分好睇（唔係次次講呢句的）

雖然主要炒舊經濟，但我個垃圾倉升2%！風險胃納返晒嚟

1. 港股就休市，美股方面就靚仔，雖然一度倒跌（留意條虛線係星期四收市位），但尾段越升越有，道指升近500點收市（一度升600）。

2. 升乜？首先係默克藥廠有隻新冠肺炎新藥，口服咋喎（我Facebook有講）。所以你見升嘅除咗默克本身，就主要係啲舊經濟股，迪士尼VISA LVMH（都在　core list 上面），仲有特別係啲reopening 股，airline同郵輪之類．

3. 而雖然納指冇道指標指升咁多，但至少都扭轉咗5連跌。而我個垃圾倉（新讀者睇呢度，同呢度）升1.8%，十隻有九隻升（真係十隻入面九隻！），唔多唔少都代表啲風險胃納返嚟。

4. 另外？啲政治嘢，同你快手講下。首先係星期四收市後通過咗個臨時方案，唔使停擺（次次都係咁架啦）。另外，亦都預期個基建撥款方案星期五收市後會過到（暫時未知）。結果美國通脹（PCE計）30年新高（亦高過預期），或者德國通脹29年新高，暫時都未有人理。

早兩日買嗰隻期權，彈返三成，順手解埋點解睇好隻正股

5. Reopening股升，當然包埋波音飛機。咁早兩日我買咗啲期權（呢度詳解），獻出第一次，呢度跟進下。

6. 當然了，隻波音彈返2.8%，我隻期權就彈返28%。見到個槓杆真係相當大的，膽細唔好玩，亦唔好買得大（亦因為咁，我係好少買嘅）。暫時我仲要蝕少少錢，但已經差不多返返成本價。另外，你睇yahoo都可以睇到晒啲期權報價同資料，包括我嗰隻。

7. 至於點解買波音嘅期權？當然睇好佢短期至中期會升，但我又唔想長期持有。咁你話，咪好似你舊年買Tesla咁咯？係，都相當類似。但小小唔同，Tesla我幾明確估入埋標普指數就散水，雖然最後我仲坐耐咗陣先走，但至少個time frame大約心中有數，今次呢？就真係唔知。可能一個月，可能幾個月。

8. 咁既然上次都買正股，點解今次唔買？首先因為冇錢！只係短炒，我亦唔預波音真係升好多好多，如果買得太少，就冇乜意思。二來，亦因為想累積下經驗。我本人就都係唔多鍾意買衍生工具嘅（你見我咁耐有冇買過？），但，識多啲嘢嘛，我估我第時都冇用，但可能你地有用嘛，或者第時你會問我。所以真係實驗性質。仲有，如果中咗，當然就出去Facebook打鑼打鼓啦

9. 因為呢件事都未知幾時發生，所以你見我都揀一隻下年1月先到期嘅。至於點解揀呢隻？最主要係因為見成交比較多，夠膚淺。咁當然都因為槓杆算大嘅，呢啲點計就遲啲講了，深啲。

10. 咁講到尾，點解覺得波音飛機會升？有啲人以為我買係因為737 Max在中國試飛成功，解禁有望。錯，我買嗰日就係因為出呢單嘢而升咗唔少，激死。但我睇再長遠啲嘅嘢。

11. 就係我估中國好快會大手買波音飛機。

12. 點解咁估？你大約可以諗下近期發生嘅事。首先係之前習近平同拜登講電話（之前我已經講相當重要），然後放咗孟晚舟。背後當然係政治，唔使太陰謀論，但幾肯定中美想適度改善返關係。再然後？美國疑似係放生咗商湯科技。

13. 睇到呢度，美國咪好笨？點會冇嘢拎返？在情在理，為面子為實質乜都好，中國點都要有啲嘢回敬。然後你見美國商務部長就提咗中國阻止航空公司買波音。

14. 咁，中國之後買返波音，應該就大家都開心。反正中國一直有買，有何問題？我估到真係宣佈嗰時，波音會再炒一轉。幾時？我估幾個月內（所以我買隻期權係下年1月27日到期）

15. 呢個就係我嘅想法，當然未必一定發生！咁但，即使唔發生，可能波音都有得升嘅。當然亦都可能跌，甚至發生咗都照跌，冇得包生仔。但就畀你見到點解我會去買期權，背後成個諗法係乜。結果都唔係最重要，到時再檢討下。但政治是咁trade的，唔係你啲網友咁講風水，係咪都當講中。

16. 當然，如果中咗就又可以大攞大鼓，呢個亦係我嘅考慮。難聽啲講句，輸晒咪一萬港紙，但中咗嘅，除咗賺到錢，仲應該可以省靚個招牌。我作為半個公眾人物，做嘢考慮又會再多咗的，下面FB Post Summary都有講。所以好多人只係學好多硬知識（包括以前嘅我），忽略咗了解「人性」。

每日一圖— 美股盈利反彈絶對唔止因為低基數。做零售利錢十分低

17. 美股盈利反彈絶對唔止因為低基數—類似嘅嘢之前寫過，另一角度再睇。美股啲業績幾強勁，至少你睇啲盈利增長幾強，咁好多唔識嘅人又會話，只係因為舊年疫情打擊，個基數低。當然有呢個因素，但係咪主要？計下數咪知，你睇下2021同2019（疫情前）咪睇到！你見到盈利都升咗36%—而家講好多人人都唔意外，但記唔記得初爆疫情時講到話好大打擊要好多年先回復到？係咩？

18. 做零售利錢十分低—亦都應該係常識，但有埋個圖更加震憾。你睇Walmart係一間一季收入過1000億美金嘅公司（冇記錯應該只有蘋果同亞馬遜試過），但賺嘅純利？一季40億咋。所以好多時你睇啲人講營收（台灣人特別鍾意），實在冇乜意思，特別係唔同行業唔可比。同樣地你亦見到點解啲科技股咁貴又長升長有，因為利錢實在好高。你睇Google之類，收入係Walmart一半，但純利係幾倍。

Good Read — 人人想做KOL。百萬富翁話投資只得一種方法。

19. 人人想做KOL—香港地聽聞個個想做Youtuber 或ig網紅（但你好少聽人話想搞Facebook Page，可能真係老化？），外國就唔叫KOL，叫Influencer（我成日以為係感冒），但差不多嘅嘢。講返，美國就忽然多咗好多人想做網紅。當然只係「想」好抽象，我都想做英超球星。所以真係有實質數據支持，啲網紅經理人公司，收多咗好多申請。點解會咁？唔多唔少同疫情有關，亦都可能有啲人畀人炒咗。但呢個亦係大趨勢，網紅marketing 呢樣嘢仲有排玩。況且你亦可以直接同訂戶收錢，例如你而家睇緊嘅嘢。

20. 百萬富翁話投資只得一種方法—叫你慳啲洗呢啲不用講，但講返投資方法。好多人成日問我幾時沽，幾時take profit，呢篇文答到你。你並唔係走去估頂估底，10蚊嘅嘢9蚊買8蚊止蝕11蚊止賺，而係都係長期持有。Buy low, never sell．我唔明點解有人覺得冇賣到就唔係profit，即係例如你100蚊買咗8號仔，跌到5蚊，唔通你唔賣就冇輸錢？唯一幾時要賣？舊文我都講過，你真係要大錢嗰時，例如買樓之類（然後我都有寫過，有幾次要用錢我沽咗股票，其實都係笨咗，加按層樓咪得。呢個買樓嘅好處好多冇買樓嘅人冇留意）

FB Post Summary — 結婚周年食椰林閣。口服新冠肺炎藥。今期信報月刊有我

21. 呢排真係寫多咗FB文，特別係非金融嘅，可能因為市況唔多好。

22. 結婚周年食椰林閣—冇錯，我結婚9周年，同埃汾太食嘅係劣食之中嘅劣食，椰林閣。呢間嘢絶對係惡名昭彰十惡不赦人人得以誅之，如果住屯門嘅更加可以聽我講多啲故事。但，點解我會結婚周年同埃汾太去食？你諗下，如果冇Facebook Page冇ig，我會唔會做咁嘅嘢？正如好多餐廳景點都要考慮有冇打卡位，正如明顯地有咗Facebook ig先多咗人跑馬拉松，同埋多女人整大自己個籮。社交媒體改變咗好多嘢，好多社會上你見到嘅嘢，都係有原因嘅。

23. 口服新冠肺炎藥— 就係Merck隻新藥。同場加映講下美國Merck同歐洲Merck，仲有好多同名但冇關（或者以前有關而家冇關）嘅公司。金融冷知識

24. 今期信報月刊有我—如題，記得買返本。又，如果有咩想我在嗰邊寫嘅都話我知，最好係啲夠長篇又唔使好用腦嘅。

================================================================

我本書：各大書局均有代售，或者上HomeBlogger網頁買，自己上尖沙嘴拎或者加廿蚊叫順豐畀你。HKTVMall都有但唔包日日有貨

Facebook Page：「君子馬蘭頭」ivanliresearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

勞蘇基金：50萬港紙入場，暫定2%管理費 20%表現費，應該隨時可以拎錢走。歡迎PM我報名，現階段冇任何commitment，絶對唔使畀錢住，到時你亦可以反口唔畀。亦都唔使怕答應咗到時反口，絶冇問題，純粹等我知道有幾多人有興趣。我預會有好多人到時因為種種理由唔加入的。

聲音版/錄影版：慎防有人唔知，係有樣咁嘅嘢的。方便唔想睇字/坐車聽/公司聽。一個Post有齊純聲音（mp3）同埋影像版（我朋友碌住電話畫面讀）。 20蚊或40蚊會員限定。Sample呢度，免費試聽。