北水買咗10日買咗500萬 1137（有Excel）．美股期權101，兼且教你睇報價（又有Excel） (Patreon)

北水買咗10日買咗500萬  1137（有Excel）

美股期權101，兼且教你睇報價（又有Excel）

市況麻麻地，聽日（十月一日）放假，加上結婚周年紀念，所以今日寫啲冇咁大路嘅嘢。但放心，十月一日照樣係有文的，週末都會有。

北水買咗10日買咗500萬  1137（有Excel）

1. 見到王維基隻HKTV 1137 近排表現算幾好，5日升咗8%，就再講下。

2. 另外我唔記得有冇講過，如果香港有人炒啲網紅股meme stock，除咗毛記1716，可能1137都會係其中一隻（因為一仔282已經摺埋咗）。當然我從來唔會鼓勵人買網紅股，亦唔會只係因為嗰隻嘢有機會變網紅股就推介或者自己買。反正香港好似都唔多搞得起（除咗282）。叫做多一個angle咁解，最後都係返去公司實力

3. 咁所以，北水呢樣嘢，性質都有啲類似，當然北水嘅力度可以大好多。而1137月頭就入咗港股通名單（但只係深圳，上海冇的，兩個名單唔一樣）。呢啲之前都有寫。

4. 大陸佬冇興趣買1137？呢個唔係一個問題。你可以話好似非洲賣鞋嘅故事咁，正係因為冇乜大陸佬買，到第時如果一個唔該變咗多人關注，更不得了（你睇下隻東岳189？我懷疑理文化工746都係咁間接受惠，理文本身未入港股通，但可能東岳升得多啲大陸佬就會留意埋理文）。況且，1137實在太細，成交唔多，一日兩三千萬港紙，十幾億人有一條村買都夠。

5. 之前在Facebook 都有寫過，北水在每一隻港股嘅總持倉，係可以每日在港交所睇到嘅。留意係總持倉，即係可能入面有N咁多人，亦可能只係一個人。

6. 咁所以，我比較每一日嘅持倉，同返之前嗰日比，咪可以睇得到北水買咗幾多咯。當然你要留意，只係北水as a whole嘅淨買入，例如你見有一日多咗1000股，可能係呀李總沽咗3000股，蘇總又沽咗4000股，但謝總買咗8000股

7. 理論上大約係咁，呢度就係教你點睇。

8. 首先很重要，第一樣嘢，日曆。港交所有。我幫你整理埋。9月6日之前1137未入北水，唔使睇。咁啱上個月有中秋節，多假期，香港又放大陸又放，仲要唔同日子。你要睇埋邊啲日子冇北水。原則上呢，香港或大陸是但一度放假，就固然冇北水（20，21，22號都係）。但仲有，因為香港十分老套嘅T+2，你今日買股票，後日先結算。咁我當今日兩邊都放假，但兩日後結算是但一邊放咗假，咪出事？所以只要兩日後係是但一度嘅假期，都係冇北水嘅（16，17，29，30都係）。以上呢啲幫你整理晒。好重要

9. 然後只要上港交所個網，每日去睇（我做咗嘅嘢），就睇到咁多日嘅北水持倉有幾多股啦。（Column F）．兩日一減，就睇到加減咗幾多股（Column G）．

10. 但記住，T+2嘛！例如9月29日你見到多咗9000股，但個交易係兩日前，即係9月27日做的。所以你要將啲變動推返前兩日，就見到係邊日買。（Column H）。最後我在Column I放埋每日1137嘅成交（股數），Yahoo有

11. 咁你大約見到了，北水基本上都係不停增持。有兩日買咗超過10萬股（14號30萬股，28號11萬股）。另外，如果以佔當日成交嚟計，14號係佔咗19%成交，另外24同28號都佔咗5%成交。

12. 總數，買咗56萬股，而留意當中好多日都冇北水，計有得買嘅日子只係11日。差不多一日買5萬股咁咯。

13. 唔使諗到咩收購呀拎控制權呀之類，不過至少數字畀你見到，肯定北水唔係冇興趣買嘅。

14. 另外，睇完呢一篇，咁其他股票你都識自己去搵自己去填表了。送埋個Excel畀你玩。

美股期權101，兼且教你睇報價（又有Excel）

15. 昨日講咗，獻出美股第一次，買咗波音飛機（BA）嘅期權，call option，行使價260，下年1月21日到期．已經輸咗25%．買咗10000港紙

16. 首先試下用人話解咩係期權option．期權係一個權利（但唔係義務，留意），在未來我可以用特定價格（行使價），去買或賣一樣東西。在呢個情況就係波音股票。記住係一個權利，唔係義務，你買咗個期權，到時情況對你不利嘅，你可以唔行使。相反如果你係沽畀人嗰個（所謂write一個option），決定權就在對家上。順手講定，我就唔會做sell option呢啲咁煩嘅嘢

17. 期權有call 有put，前者係認購（睇升），後者係認沽（睇跌）。咁加埋上面講嘅買同沽（即係write），你可以由四種組合．Buy call buy put sell call sell put．由於本人長期大好友，所以只同你討論buy call，就係之前做嘅嘢

18. 咁你見到，波音飛機220蚊左右，我隻option行使價260蚊，1月21日到期。咁如果隻嘢升到300蚊，我咪好著數，可以260蚊買街度值300蚊嘅嘢，減返我買期權嘅成本就係我利潤。但如果隻嘢跌到200蚊呢？咁我到時就唔行使（記住，係權利，唔係義務），當然我買返嚟嘅期權就變廢紙，嗰10000港紙就輸晒，但唔會倒嘔。買call或買put都係咁，你可以輸晒，但唔會輸突。

19. 咁你話，波音要升到260蚊你先獲利喎（行使價）。錯！佢唔使升到嗰個位。因為，只要波音嘅股價再升（唔使去到260），我隻期權就會越嚟越值錢嘛（因為越嚟越接近可以行使）。所以唔一定要升到260蚊我先可以獲利。

20. 講得簡單啲，其實就係賭佢升定跌，波音升我就應該可以獲利，佢跌我就輸錢。而用咗期權，就係放大咗我嘅輸贏。你見波音跌少少，我隻嘢已經跌一截。

21. 然後用個例子，教大家睇睇期權嘅表，富途呢個幾好，IB嗰個睇到我都一頭煙（都係嗰啲嘢，但個界面差）。最簡單啲咩bid ask 成交幾多唔講啦，咩引伸波幅Delta之類又太深。我地特別睇圖中嘅幾樣嘢—留意，我買嗰隻唔在圖中！

22. 首先你搵波音，佢就可以畀你睇埋啲期權。見到有call同put。下面你再要揀日期，我個情況，都未知件事幾時發生，可能一兩個月，所以揀遠少少，揀到下年1月。留意去到一兩星期甚至幾日都有嘅，咁記住如果到時行使唔到就變廢紙，但當然如果尾班車畀你扑中就回報好多，我就唔買呢啲嘅。

23. 呢度嘅例子，全部係12月17日到期嘅，我地用最頂嗰隻做例，行使價205。留意波音而家都221.7（最頂寫住）。咁，即時已經可以行使的，術語叫in the money．我張圖冇貼，但呢隻期權，交易價係24。

24. 個「內在價值」係乜？就係波音現價減行使價，221.7 -205= 16.7。你一買返嚟，即時行使，就賺到16.7蚊，因為街邊波音221.7，而你可以用205去買。

25. 咁但，個期權交易價係24喎，唔係16.7。多咗嘅係乜？多咗24-16.7=7.3，就係時間值。你買咗返嚟，仲可以搏波音之後升多啲，所以隻期權一定唔只值16.7（否則個個都買返嚟即時賺錢）。記住永遠就係期權價＝內在值＋時間值。實務上，個時間值係迫出嚟，imply出嚟的

26. 貼多次張圖，另外見唔見，最底嗰隻行使價225嘅，內在價值係0？因為波音221.7嘛，都未到行使價，呢啲我地叫out of money．Out of money嘅，內在值就係零，亦即係個期權價就100%係時間值，你買希望。我嗰隻都係，260蚊行使，有排未到（但記住，唔使一定要去到260我先賺到錢）

27. 返返去最頂，205行使嗰隻，記住個期權價係24（16.7+7.3），中間個「盈虧平衡點」229係乜？好簡單，波音升呢個位你就打和（未計佣）。點計？波音去到229，你隻嘢205行使嘛，就可以賺229-205 = 24，即係你拎返個期權嘅成本。

28. 咁「到盈虧平衡」，好簡單，波音而家221.7，要升多3.3%先去到「盈虧平衡點」229。

29. 最後個「盈利概率」，就係你可以去到「盈虧平衡點」嘅機會。點計？我都唔知，但應該係用數學公式計。咁好明顯，離「盈虧平衡點」越遠（圖中越底嘅），「盈利概率」就越低，因為越難中。但，可以話你知，你睇呢樣嘢冇乜意思。大機會贏錢又點？但冇話你知贏到幾多。我揀嗰隻（再講一次，唔在圖中）「盈利概率」低的，但中的話就回報幾勁。

30. 暫時講住咁多，如果想講多啲嘅話我知，等我睇下會唔會週末專題再寫多篇（但呢度都寫咗大半）

31. 至於點解睇好波音，又點解唔買正股，就聽日先講了。

================================================================

我本書：各大書局均有代售，或者上HomeBlogger網頁買，自己上尖沙嘴拎或者加廿蚊叫順豐畀你。HKTVMall都有但唔包日日有貨

Facebook Page：「君子馬蘭頭」ivanliresearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

勞蘇基金：50萬港紙入場，暫定2%管理費 20%表現費，應該隨時可以拎錢走。歡迎PM我報名，現階段冇任何commitment，絶對唔使畀錢住，到時你亦可以反口唔畀。亦都唔使怕答應咗到時反口，絶冇問題，純粹等我知道有幾多人有興趣。我預會有好多人到時因為種種理由唔加入的。

聲音版/錄影版：慎防有人唔知，係有樣咁嘅嘢的。方便唔想睇字/坐車聽/公司聽。一個Post有齊純聲音（mp3）同埋影像版（我朋友碌住電話畫面讀）。 20蚊或40蚊會員限定。Sample呢度，免費試聽。