港股有力美股冇力，結果雷曼時刻9月美股跑輸A股。獻出第一次美股期權． 美股一日跌2/3%有幾常見？世界100大企業嚟自邊度？有舊大錢未入市點算好？低位打靶嘅多數係有資投資經驗嘅已婚老豆 (Patreon)

港股有力美股冇力，結果雷曼時刻9月美股跑輸A股。

獻出第一次美股期權

每日一圖— 美股一日跌2/3%有幾常見？世界100大企業嚟自邊度？

Good Read — 有舊大錢未入市點算好？低位打靶嘅多數係有資投資經驗嘅已婚老豆

FB Post Summary — Mox優惠最後召集。奧園希望。Take the money and run

港股有力美股冇力，結果雷曼時刻9月美股跑輸A股。

1. 港股嘅，昨日（星期三）夠晒靚仔啦，由跌超過400點，倒升160點收市，低位彈返近600點，好耐冇見。當然美中不足係成交比較細，得1200億。但唔好忘記因為星期五放假，所以星期三已經冇北水（兩日結算嘛）。

2. 另外又見到，啲香港地產股全線反彈。仲有隻新世界17張圖冇，但升4%，舊文都叫你可以撈底諗呢隻的。正如我所講，事隔幾日，仲有冇人講咩鬥地主？證明你啲網友全部係危言聳聽乜都講到世界末日。發咗達未？

3. 美股方面，叫做反彈返，但力度唔強，同埋亦都繼續係舊經濟股跑贏。

4. 結果所謂嘅咩「中國雷曼時刻」呢個中秋月，A股仲要跑贏美股，夠唔夠搞笑？證明你啲網友全部係危言聳聽乜都講到世界末日。發咗達未？

獻出第一次美股期權

5. 波音飛機call option，行使價260，下年1月21日到期。聽日慢慢解。落盤時5.3，後來放到5.5先買到。

6. 但講明先：首先，已經買咗。第二，只係買少少，1100美金，你千其唔好買得大。第三，當然係短炒，但幾短未知（不過下年1月21日隻嘢都到期），聽日解。第四，係預可以輸晒的，買期權就預可以輸晒，否則你唔好買。但第五，最多我就係輸晒呢1100美金，唔存在會有倒輸嘅問題，因為我只係買option．第六，呢啲東西絶對唔係我常態，純粹手痕，同埋叫做試多啲新嘢，等自己識多啲嘢。同我買日本股差不多。或者同舊年短炒Tesla差不多。記住唔好本末倒置，我只係拎1100美金去玩。最後，雖然我Master讀Financial Maths，做derivative pricing，但都話從未買過期權（香港美國都冇，輪我就買過），所以有咩買錯咗呀，點解買呢隻唔買嗰隻呀之類，就唔好問我了。

每日一圖— 美股一日跌2/3%有幾常見？世界100大企業嚟自邊度？

7. 美股一日跌2/3%有幾常見？—非常好嘅表。每次啲友幾百點就股災，可以用呢個圖畀佢。你特別留意2009-2019年呢十年牛市，一樣唔少一日跌3%嘅日子，你睇2010同2011年都仲每年5/6次，差不多個兩個月就一次。而留意，今年美股都仲未試過一日跌3%—3%等於道指跌1000點，又話股災了

8. 世界100大企業嚟自邊度？—就係過去20年，世界頭100大企業（市值計）嘅分佈，其實可能做30年或40年更好。首先見到所謂美國衰落絶對冇咁嘅事，特別留意金融海嘯後反而美國佔得仲多，可能因為印錢，亦可能因為科技股。另外歐洲（包埋英國）同日本嘅衰落亦都好明顯。中國嘅冒起亦都見到，但留意近10年已經冇乜進步。有人話資本主義只係中共嘅手段，玩夠就可以變。前半我同意，但後半，咁快夠皮？如果根據「利用資本主義壯大自己先收網」嘅講法，冇理由而家咁早就收網。

Good Read — 有舊大錢未入市點算好？低位打靶嘅多數係有資投資經驗嘅已婚老豆

9. 有舊大錢未入市點算好？ — 如題，都係唔少人嘅問題，耐唔耐都有啲讀者問我，我拎住一千幾百萬（我啲讀者層幾富貴！），但之前冇買股票，而家想買又驚，應該點。首先，都係要講返，我都係好奇怪點解有人拎住一大舊錢。如果係啲意外之財（例如中咗頭獎）都明，但如果係一路儲住冇投資嘅，咁之前你嘅做法都要檢討下。但，唔講以往只講將來又點算？舊文都寫過呢個課題。首先，你點都係要瞓晒落去架啦，stay invested，你最多都只係等幾個月，不能幾年渣現金，呢個不用討論。問題係應該即時買晒落去，定係分段買？即時買晒，心理上唔容易，但似乎都係比較好嘅方法。呢篇文話你知，股票嘅話，即時買晒嘅，75%機會跑贏慢慢分段（如果係債券更加係90%）。當然我要提醒你，係因為過去N年美股基本上不停升先係咁啫。退而求其次嘅，咪可能分三五七份？一季買一次？類似咁。總之冇可能長期等。

10. 低位打靶嘅多數係有資投資經驗嘅已婚老豆—亦係CNBC嘅文。美國研究見到，股災時Panic sell嘅人，就往往係45歲以上男人，或者結咗婚有小朋友嘅男人。仲往往係有投資經驗嘅人。個研究冇畀原因，但另外有人演繹，我覺得都合理。首先，男人係比女多Trade，亦都比較有自信（特別係有投資經驗嘅人），以為可以time the market。另外，你亦可以諗下呢個背景嘅男人，應該怕輸，當然想快手「止蝕」。例如我而家雖然失業（好聽啲就係「做自己生意」），但都叫做有OK穩定嘅收入（多謝大家先！），但如果我係冇工開，又有老婆仔女養有樓要供（埃汾太有做嘢，唔使全部靠我，另外我冇小朋友，仲有我層樓買得平），仲係咪咁老定股票跌都唔驚？唔同的。篇文最後仲有講，好多人越係想「穩定」，就適得其反。跌市根本你同我都控制唔到，但總有啲人性係會想去 Do something，而呢啲人往往亦係男性（你想像下，電梯未到，係咁狂撳掣嘅係男人定女人多？）

FB Post Summary — Mox優惠最後召集。奧園希望。Take the money and run

11. Mox優惠最後召集 — 今日最後一日，真係未開嘅開埋佢，即時消費埋。仲有呢個Post都有講一啲關於Mox或Virtual Bank嘅FAQ。

12. 奧園希望 — 冇乜特別，內房股奧園3883引入李兆基個仔李家傑做投資者，都4億嘢。咁內房當然等錢使，但點解李家傑肯落疊？係趁人病執平貨，定係交保護費？應該兩樣都唔係，純粹幫下朋友。

13. Take the money and run—同金融無關，丹麥藝術家問博物館借咗幾十萬現金去「創作」。點知交返嚟嘅作品係白布一塊，個作品就叫take the money and run，佢話佢嘅「創作」就係拎咗你啲錢喎。博物館話追究云云。但我點都覺得係炒作宣傳，一早夾埋。

================================================================

我本書：各大書局均有代售，或者上HomeBlogger網頁買，自己上尖沙嘴拎或者加廿蚊叫順豐畀你。HKTVMall都有但唔包日日有貨

Facebook Page：「君子馬蘭頭」ivanliresearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

勞蘇基金：50萬港紙入場，暫定2%管理費 20%表現費，應該隨時可以拎錢走。歡迎PM我報名，現階段冇任何commitment，絶對唔使畀錢住，到時你亦可以反口唔畀。亦都唔使怕答應咗到時反口，絶冇問題，純粹等我知道有幾多人有興趣。我預會有好多人到時因為種種理由唔加入的。

聲音版/錄影版：慎防有人唔知，係有樣咁嘅嘢的。方便唔想睇字/坐車聽/公司聽。一個Post有齊純聲音（mp3）同埋影像版（我朋友碌住電話畫面讀）。 20蚊或40蚊會員限定。Sample呢度，免費試聽。