恒指果然又係1倍book 左右就反彈，但係咪真係咁簡單？完美風暴：債息升，債務上限有排拗，鮑威爾連任有變數。 (Patreon)

恒指果然又係1倍book 左右就反彈，但係咪真係咁簡單？

完美風暴：債息升，債務上限有排拗，鮑威爾連任有變數。

恒指果然又係1倍book 左右就反彈，但係咪真係咁簡單？

1. 港股嘅，都唔係十分靚仔。恒指一度升近500點，最後升300點不夠。留意美股時段啲中概股又大跌，應該都係受美股拖累。

2. 但留意科指繼續跑贏恒指同國企指數。而ATMX居然齊齊有得升，仲要阿里巴巴久違了嘅反彈（之前創咗新低）。正如吾友盧志威話齋，你去到一個臨界點，忽然間政策又會由加強監管變咗谷經濟，啲中資股一樣可以大反彈。當然呢個點幾時出現好難估，但真係唔存在咩「不能量化」，夠殘就有人肯搏。騰訊低位都彈咗15%啦，年初至今跌18%之嘛，好多咩？

3. 另外仲想講一樣嘢，之前都貼過，大約畀個底位你，就睇恒指個Price to book value，但始終係難捉的。都講過多次，轉角位啲嘢郁得好快，好似你化學實驗睇轉色咁，半滴之間嘅事。

4. 呢個圖在明報搵返嚟，係昨日（星期二）反彈之前。咁你見真係好似去到1倍book嘅位就反彈。於是亦都有讀者問，點睇到恒指嘅Book value？

5. 詳情嘅，你可以睇舊文，都寫得幾詳細。有埋個Excel的。但我想講幾樣嘢

6. 恒指嘅book value 去邊搵，簡單答案：唔易搵。公司有Bloomberg嘅就搵得到，冇就惡搞啲。理論上可以搵晒咁多隻成份股嘅statement 自己計，但我勸你慳返啖氣。因為……

7. Book value，有分歷史同預期，咁在呢一刻，歷史就係2020年尾嗰個（仲要有啲公司唔係12月結喎，更煩）。預期就2021年尾。歷史嗰個好易搵，你睇我舊文都有2020嗰個，咁唔會再變的，所以亦唔使自己去搵成份股計一次。問題係講過多次股票炒將來，咁你理應該睇預期嗰個，而呢個數就真係Bloomberg先有（而你自己去由啲成份股估返都係冇用，因為成份股嘅2021年尾book 你都估唔到）

8. 仲有，你可以留意返明報張圖，條線劃在1倍，但明顯2020年跌穿過。你話唔係好多？由1倍去到0.9倍，講緊2400點咁滯，夠嚇死好多人。

9. 又有一個問題，唔少人都提出。喂，咁嘅環境，咁嘅政策，你分析員估啲數會下調嘛（是真的），今日1倍book，聽日個book value 下調20%，你咪變1.25倍book。呢個問題可以分幾個層面睇，首先，book value嘅變動冇盈利咁快，下調幅度冇咁誇的。第二，照計啲下調都做得比較快，而家應該七七八八。第三，真係覺得有呢種問題嘅，咁你用歷史price to book又得。第四，喂，係咁架喎，邊有得包生仔？

10. 更加深嘅係，想像下你而家在2015年，在跌浪中間。你睇個圖，會覺得去到1.2倍就見底的。因為你用嘅時間唔夠長！我舊文就有去到2008年（其實去到1993年都有）

11. 更更深嘅係，差不多所有投資上計數都會遇到嘅問題：時間拎得太短，唔全面（上一段嘅例子）。但時間拎得太長，會唔會根本個本質都唔同咗？直接啲講，China discount 嘛，而家會唔會返返得去當年嘅估值？

12. 又或者另一個例子睇，以前啲內銀股幾十倍PE的，而家得返4/5倍，咁係咪好抵買，股價會升好多倍？又好似唔係。

13. 事實上，有理由相信恒指係de-rated嘅，個「合理」估值，好似隨歷史而變而越嚟越低咁（可以諗返以上內銀股嘅例子）。原因可能係外資擔心風險，又可能係高增長已過，或者任何嘢。正如掉返轉講，你見美股嘅估值，近N年都長期高過歷史平均

14. 更更更煩嘅係，唔好忘記，恒指成份股都有啲唔同咗。五年前可能好多係內銀，咁全世界嘅銀行股估值都得，好多都係below book。但而家嘅恒指，多咗好多科技股。咁科技股，又全世界都係price to book極高（因為唔靠啲資產賺錢），你睇騰訊跌咗咁多又講到冇人買，但，price to book 仲係超過5倍。

15. 當然了，你都知道，科技股同銀行股不可直接相比，PE都爭得遠（用PE比就冇爭咁遠），何況price to book？但個重點係，咁既然恒指而家多咗咁多科技股，係咪個合理嘅price to book 應該又高過以前？

16. 寫咗一輪，應該都會有人覺得幾亂。但冇法，事實就係咁。你應該去思考，唔係期望我畀個答案你。所以你以為真係計個數出嚟，然後就答到你XXXXX見底？呢啲呃細佬啫。入面有幾咁多嘅嘢要考慮。

17. 講白少少，如果係2005-2006年嗰時，我當內銀股可能過去幾年係15-20倍市盈率之間走，咁到跌到15倍，似乎係抵買。但，去到2008年後，你見嗰幾年啲內銀股係5-10倍之間走，咁10倍嗰時，就唔係抵買啦！你不能拎2008年之前嘅美好估值嚟比嘛。

18. 但，點判斷？唔係咁易的。而家我當然可以話你知，金融海嘯後銀行監管嚴格好多，銀行槓杆太降。而大陸又因為其他行業唔掂，希望銀行讓下利，貸款息唔好收咁貴，存款息畀高啲。再加上個市場已經極之成熟（即使在2005，中國已經係一個fully banked，if not overbanked嘅社會）。再加上2010年後，中國唔再玩大放水，貸款增長慢咗好多。以上種種，全部都令到銀行獲利能力大跌。咁所以市盈率咪低咗好多。但，事後講就易。身處其中，都仲係好多人覺得只係周期問題，可以返返去以前20倍甚至30倍嘅市盈率

19. 幾時啲數字先會迴歸平均，幾時係成個trend變咗，係最難判斷嘅一樣嘢，仲會有時兩樣嘢一齊（股市指數咪就係咁，長線向上，但有周期）。唔會有公式教到你，靠你自己去感受。但係要通過經驗，同埋計過N咁多數，你先會有好嘅判斷。

20. 嘩，結果寫到極長，好似周末專題咁。其實仲有幾隻個股想講，港股美股都有但反正不急在一時，可能星期四，或者週末講。

完美風暴：債息升，債務上限有排拗，鮑威爾連任有變數。

21. 美股方面，就真係風水輪流轉。真係咪講笑，出面講咩中國爆煲，中秋節雷曼時刻，「歷史驚人地相似」。但你睇，根本就係A股跑贏美股。固然我估都只係暫時，成個制度都係美國對企業對股東比較友善。

22. 美股跌乜？就幾樣嘢都齊，但冇乜邊樣真係好新鮮嘅嘢。首先，昨日都有講啦，債息抽咗上去。科技股大幅下跌，銀行股都照跌，但跌少啲。

23. 整體亦見到係啲增長股大跌，價值股相對好啲。咁你睇指數都見納指跌得多過標普指數。之前都好多文講過，唔多唔少美股（仲有其他股市）嘅高估值，都係多得債息低迷，咁如果債息一路升，股票就更加貴了。

24. 當然仲有例牌嘅政治大爭拗，首先個債務上限問題，一如所料，上到去參議院（Senate），共和黨當然同你慢慢玩，死都唔同意放畀你。雖然呢，呢啲都係例牌菜，意料之中，game of chicken，去到某個位總係又會講掂數嘅。我就真係驚都冇驚過，最好玩大啲。

25. 再加多樣，之前略講過，而家成真。民主黨嘅Elizabeth Warren（出晒名幾左），話現任聯儲局主席鮑威爾係危險人物，唔會支持佢連任喎。係咪靠嚇我就唔知，相信都係。但即使換人，照計政客都不可能直接干預聯儲局。你諗下Donald Trump咁惡，當年都要係咁鬧聯儲局，反過來證明真係唔容易影響到。所以你話會換個不停加息嘅主席，應該諗多咗（況且，聯儲局仲有好多委員的）

26. 咁本身美股貴都講咗好耐，呢啲東西加埋加埋，就拖低大市了。但驚？完全冇驚過，實情都有幾隻股票留意緊，星期四或者星期六講下。

================================================================

我本書：各大書局均有代售，或者上HomeBlogger網頁買，自己上尖沙嘴拎或者加廿蚊叫順豐畀你。HKTVMall都有但唔包日日有貨

Facebook Page：「君子馬蘭頭」ivanliresearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

勞蘇基金：50萬港紙入場，暫定2%管理費 20%表現費，應該隨時可以拎錢走。歡迎PM我報名，現階段冇任何commitment，絶對唔使畀錢住，到時你亦可以反口唔畀。亦都唔使怕答應咗到時反口，絶冇問題，純粹等我知道有幾多人有興趣。我預會有好多人到時因為種種理由唔加入的。

聲音版/錄影版：慎防有人唔知，係有樣咁嘅嘢的。方便唔想睇字/坐車聽/公司聽。一個Post有齊純聲音（mp3）同埋影像版（我朋友碌住電話畫面讀）。 20蚊或40蚊會員限定。Sample呢度，免費試聽。