美國通脹數字低於預期。加乜息？蘋果新iPhone照舊冇創意，正如過去十年一樣，你啲網友最有創意。日經指數9月升咗2600點！31年新高。三星亞太房託3187派息，全年應該4.3%股息率冇問題吧？ (Patreon)

美國通脹數字低於預期。加乜息？

蘋果新iPhone照舊冇創意，正如過去十年一樣，你啲網友最有創意

日經指數9月升咗2600點！31年新高

三星亞太房託3187派息，全年應該4.3%股息率冇問題吧？

小版務：普通重要

美國通脹數字低於預期。加乜息？

1. 美股嘅，麻麻地，上星期五連跌後，星期一反彈，星期二又跌過。不過你都真係唔使問我，亦知道我會講乜。之前又嫌貴嘅，而家可以係機會。就唔好問我幾時見底，會唔會買完又點。點知？你永遠想跌落嚟畀你買，你買完就反彈，係不可能的（唔止，仲要想你沽完就股災嘛）。

2. 美股講返兩樣嘢。留意返星期二原本大家嘅焦點係個CPI數字，擔心通脹壓力嘛。結果？聯儲局主席似乎係啱嘅，亦係我估嘅嘢，啲通脹壓力冇一路惡化。個CPI，按年升5.3%，按月就升0.3%。首先個按月升幅已經低咗。另外，市場係估按年升5.4%，按月升0.4%嘅，可見數字已經比預期低。

3. 當然仲有最重要嘅：如果計核心CPI（撇除食品同通脹，留意呢個計法一直都有，唔係而家先嚟搬龍門），按月只係升0.1%，而市場預按月升0.3%。

4. 不過，講咗N次，市場永遠唔係直線思維咁運作，亦從來唔只係睇一個因素。美股照樣係跌。但唔好因為市場跌，就反過嚟咁夾話啲通脹數字令市場失望。

蘋果新iPhone照舊冇創意，正如過去十年一樣，你啲網友最有創意

5. 第二樣嘢，當然係新iPhone，有冇創意呀之類留返畀你啲網友討論。初步我望啲人嘅反應，並不是覺得嘩嘩聲，都係話冇乜驚喜呀咁（但想點？係咪想Steve Jobs返生出返嚟？）。

6. 而呢啲反應，並不能代表之後多唔多人買，蘋果冇創意，我至少聽咗十年，Steve Jobs死咗十年就講足十年，但呢十年股價升咗十倍。

7. 我知昨晚（星期二晚）股價仲要跌，印象中（應該有人有統計），多數發佈會後係跌的，但我對之後嘅銷量相當有信心。當然公司股價絶對唔平（美股有乜係平？），高位只係跌咗5%。而我係一直持有嘅。

日經指數9月升咗2600點！31年新高

8. 市況，就梗係麻麻。美股就固然差，港股就更唔好講。但你見日經指數呢，威威，升到31年新高了（雖然仲未歷史新高，但只係話題嚟啫，40年前指數咩位，同你有關乜呢？）

9. 更難得嘅係，升勢都幾全面，見到7成以上嘅公司（東證指數成份股，咪即係所有公司！），都在200天平均線上，亦即係唔止係幾隻帶起。事實你睇東證嘅指數嘅組成都知，好難只係幾隻就拉到個指數升。

10. 成個故事係咁的，講日本股我就講咗好耐，但講係冇用的。真係集思廣益問朋友，就係8月31號嘅事，有讀者可以做證。點解8月31號先問？其中一個原因係，月尾寫啲嘢冇乜新讀者會睇。點知就8月31日開始，日本股市就狂升，到9月3日首相辭職就升得仲勁，只係9月就升咗2600點，死未。然後我係上星期五9月10日先買日本股的。

11. 但又如何？邊個話升咗就唔追得？一向我都係咁做。ASML 兩年前買，升咗250%，當時一樣係歷史高位（剛剛又新高了）。反正我會可以睇遠啲，即使一買就跌都冇乜所謂。最初買SPGI 都係買咗冇耐就即跌。覺得公司係好嘅，就要有耐性（我指買完後，唔係叫你等等等跌先買），唔好貪心想等回調先買，買完唔好亂咁止蝕止賺。

12. 咁你見到，三隻日本股，只係買咗三日。還好啦。銀碼同回報都細，但至少一開始買就有錢贏係開心嘅（雖然呢啲只係睇彩數）。順帶提埋，點解買日本股呀，27隻名單呀，週末篇文寫咗。

13. 買得嗰少少，雖然已經係有剩嘅所有錢，升亦唔多，都話點都睇五成甚至幾個開，但要時間。所以重點係我自吹自擂，而係你真係睇到，港股又唔得美股又唔得時，仲有啲第三路線的。唔貴就已經係一個幾好嘅理由，始終游資太多，總會搵啲地方泊。

三星亞太房託3187派息，全年應該4.3%股息率冇問題吧？

14. 之前都講過隻嘢，我亦真係有買小小，HK1 就係呢隻嘢， 五萬幾港紙，叫做分散下風險，好過拎現金。

15. 咁留意返，隻嘢舊年10月成立，正路一年派四次息，正路係3，6，9，12月派，但但舊年12月冇派（一早講咗唔會）。剛剛宣佈咗最新嘅派息，0.04美金。21號除淨日，30號收錢

16. 慎防有人唔知咩係除淨：即係話，21號之前（留意冇個或字）買你就30日可以收到息，但21號或之後就冇。不過，理論上係冇分別嘅，因為21號隻嘢除淨，就會交易所自動調整返個價，扣走舊股息。換句話講，其他嘢不變，21號前買，你就係買貴啲但有埋息收，21號或之後買，就買平咗不過冇息收，應該一樣，個機制就係想做到一樣。你係沽嗰個呢？原理一樣，除淨日前就沽貴啲但冇息收，除淨日後先沽就沽平啲但有息收（係！沽咗都可以收到息的，好多人唔知）。

17. 不過，以上係講理論上。實際上呢？就要做啲不同研究。另外，你話如果除咗淨後先話唔派息咁會點？少見，但唔係冇試過，亦都合法。舊年匯控5咪搞到滿城風雨。所以，計及呢啲風險（細，但唔係冇），照計應該除淨日或之後買股票先抵，嘻。以前見有學術論文研究過的。

18. 講返，3187今次派息0.04美金。之前兩次，3月0.043，6月0.0205。留意佢入面渣住嘅嘢，財年呀派息時間各有不同，所以睇季度升跌冇乜意思，睇全年吧。應該仲有一次在12 月。但我就當只係頭三次，加埋都0.1035美金。咁現價港紙22.32，你只計頭三次都超過3.5%股息率。

19. 全年呢？正路地，我當12月嗰次有返6月咁多（但呢個假設未必準），咁全年就0.124美金，4.3%，還好。下年加唔加到？難講，但我估照計，啲租金應該都見底啦啩？

20. 留意隻嘢年初至今都係跑贏大市，但當然亦多得大市表現差。你個市表現好嘅，呢啲嘢就會跑輸。就係畀你分散下啲風險。記住係靠呢啲配置，唔係靠你自己估幾時見頂見底，或者渣住大量現金。

小版務：普通重要

21. 再次呼籲大家，未買嘅，記得買我本書。篇文最底有講點買，書局，HomeBlogger或HKTVMall 都可以。唔係賣唔去，亦唔係好好搵（我一本袋12.8），而係真係有用。好多人都係本末倒置咗，只係想睇冧把，甚至有啲睇冧把都懶，只係抄功課，你買乜我跟住買，係唔work的。你應該睇熟啲基本嘢，先好去買股票。否則就唔會有啲人睇我Patreon話好有用賺到錢，有啲（極少部份）就鬧住走話冇用。文大家都係睇嗰啲，分別係乜？咪你本人。

22. 一不離二，順手講埋，除咗我本書同埋呢度，仲有邊度有我嘅文？答案係明報，同埋經濟一週。前者好似要錢（理論上你有方法搵到唔使錢嘅，但我就唔主動提供了），後者免費。In case 有人估，我可以話你知全部係我自己寫的，冇槍手。另外，之後仲會在信報月刊寫文，10月嗰期開始有。有時有啲有趣嘅故事可能冇在Patreon或FB Page講的。不過記住，當然係呢度含金量最高，如有衝突嘅，以Patreon講嘅為準。

23. 二不離三，咁順手再講埋。請follow 我Instagram：@ivanliresearch，有時都有啲金融無聊嘢睇。但主要係都幫我grow 下 follower，拎多啲影響力同搵多啲收入。

24. 三不離四，上次7月31日在尖沙咀搞過個收費講座，上次我記得嚟嘅全部都係Patreon讀者，多謝晒大家。嚟緊10月9日（星期六）黃昏又會再搞，講第四季投資展望。可以先報名。照舊你可以預先問兩條問題，你見我當日都係全部答晒的。而因為收費講座，你見我真係事後都冇貼過嗰日啲內容嘅。唔得閒真人嚟嘅，亦有得睇片重溫，價錢一樣。

================================================================

我本書：各大書局均有代售，或者上HomeBlogger網頁買，自己上尖沙嘴拎或者加廿蚊叫順豐畀你。HKTVMall都有但唔包日日有貨

Facebook Page：「君子馬蘭頭」ivanliresearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

勞蘇基金：50萬港紙入場，暫定2%管理費 20%表現費，應該隨時可以拎錢走。歡迎PM我報名，現階段冇任何commitment，絶對唔使畀錢住，到時你亦可以反口唔畀。亦都唔使怕答應咗到時反口，絶冇問題，純粹等我知道有幾多人有興趣。我預會有好多人到時因為種種理由唔加入的。

聲音版/錄影版：慎防有人唔知，係有樣咁嘅嘢的。方便唔想睇字/坐車聽/公司聽。一個Post有齊純聲音（mp3）同埋影像版（我朋友碌住電話畫面讀）。 20蚊或40蚊會員限定。Sample呢度，免費試聽。