澳門股嘅嘢。美股反彈，垃圾倉大升．理文化工12蚊！留意微軟。仲留意緊隻美股 Sportradar．核心通脹完全唔高喎（睇你點睇）。唔同學歷對通脹預期好唔同。太忙唔開心太得閒又係唔開心。意甲評分歧視黑人？ (Patreon)

快評幾句 — 澳門股嘅嘢。美股反彈，垃圾倉大升

大師冇點你 —理文化工12蚊！留意微軟。仲留意緊隻美股 Sportradar

每日一圖— 核心通脹完全唔高喎（睇你點睇）。唔同學歷對通脹預期好唔同。

Good Read — 太忙唔開心太得閒又係唔開心。意甲評分歧視黑人？

FB Post Summary — Donki 開業淘大尺價升上兩萬

快評幾句 — 澳門股嘅嘢。美股反彈，垃圾倉大升

1. 其實昨晚（星期二晚）已經知澳門股單嘢，不過都冇特別寫。首先從來冇買咁滯，另外都冇點推過寫過，最重要係，寫咗你都走唔切。

2. 理論上非美國嗰三間（銀河27，新濠200同澳博880）應該影響細啲甚至冇乜，你見股價都係呢三間跌少啲。不過又提返你，之前針對教育股科技股，一樣係本土公司。

3. 我傾向覺得市場係過度反應，不過你話就咁走去摶一隻反彈我就唔會的。有嘅就可以坐，冇嘅未必要飛入去，特別係一買再跌兩三成你又會驚。

4. 而雖然澳門股在恒指成份股當中佔比重唔多，恒指照樣畀啲中資科技股拖低。但都仲有成14隻恒指成份股有得升，可見都唔係去到乜都跌，你夠分散嘅，唔會太過大打擊。你港股平時有每月買開嘅嘢咪繼續買（我都有繼續的），冇理由啲嘢跌咗你就停，更加冇理由跌晒先走去沽。不過走去一大注搏邊隻邊隻反彈，我就唔會的（我咁多年都唔明啲人做乜鍾意一注買落去，平時就拎住一大舊錢又唔買）。

5. 正如另一方面，美股就反彈返，你唔係全部買晒港股嘅就唔會點傷。比較特別係個垃圾倉（持股全部有公開的）特別強勢，仲要十隻有九隻升，可能都預示到風險胃納返嚟？

大師冇點你 —理文化工12蚊！留意微軟。仲留意緊隻美股

6. 理文化工，我都冇乜好講了。有冇讀者而家仲未沽？有嘅話我知，咁你就真係叻仔啦。

7. 另外，留意下微軟，因為公佈咗個相當大型（600億美金）嘅回購，亦都加咗股息。當然隻嘢離歷史新高不遠的。

8. 最後，之前都有留意呢隻SportRadar，體育（大）數據股。Michael Jordan同 Mark Cuban有份投資（其實關乜事？），上市兩日。你見一般我對呢啲新上市都幾有人保留，但隻嘢第一日就跌，星期三反彈，而家返返招股價。未望仔細，但至少唔係一上市炒上幾倍嗰啲。至於做乜的？咪體育數據。最主要嘅客戶，係博彩公司。留意有間同業都有上市，Genius Sports，表現都係麻麻地。

9. 冇叫你買，只係覺得幾有趣。不過幾有趣同會升就真係兩回事。技術門檻未必有你想像中咁高，同埋最大問題當然都係競爭：佢地要同返啲體育聯盟（例如NFL）拎數據，有時仲係兩間爭獨家，好貴的。

每日一圖— 核心通脹完全唔高喎（睇你點睇）。唔同學歷對通脹預期好唔同。

10. 核心通脹完全唔高喎（睇你點睇）—如果嫌講通脹比預期低太屈機，咁不如睇下同之前嘅數字比，你見都唔係特別高喎。咁點解你又聽人講通脹好似好高？留意兩樣嘢，第一，呢個圖係按月，平時你聽嘅數字多數係按年。第二，呢個係核心CPI，冇計食品同能源價格。結論係乜？結論係，而家你見到好高嘅headline CPI，好大部份嚟自舊年嘅低基數（所以按月唔高但按年仲係高），同埋食品同能源價（所以核心唔高但headline高）

11. 唔同學歷對通脹預期好唔同—呢個亦同上面講嘅有關，你見係低學歷嘅人，對通脹預期比高學歷嘅高出唔少。更得意嘅係，之前幾年個分別唔大的。所以好可能唔係低學歷嘅人預測水平低啲（或者高啲），而係因為呢一轉嘅通脹，集中在一啲低學歷嘅人（多數亦係低收入）會用大量嘅嘢：就係食品。

Good Read — 太忙唔開心太得閒又係唔開心。意甲評分歧視黑人？

12. 太忙唔開心太得閒又係唔開心。 — 好簡單嘅實驗設計，睇下啲人有幾多可以自主嘅持間，再睇下佢地開唔開心。開唔開心點度？你見差不多所有實驗都係用自我評估，開心係好主觀嘅。咁見到同之前講 人工 vs 開心 一樣，越高人工係越開心，但up to a point，去到某個位後，再多啲人工帶嚟嘅開心都唔大（實際上講緊五六萬蚊港紙一個月，以前貼過）。原來時間都係一樣，日日忙到跳樓梗係唔開心，多啲時間會開心啲，但亦係up to a point．呢個實驗仲得意，直頭見到一日有七個鐘自主持間嘅，反而唔及得三個半鐘快樂。

13. 意甲評分歧視黑人？ —又係睇實驗設計，所謂歧視，在呢啲實驗中有三種解說。可能係口味，人就係唔鍾意啲平時少見到嘅異類。可能係統計，某啲種族嘅人特別易犯罪之類，在唔夠資料下，呢個係「理性」行為。但亦可能根本係潛意識。以前做過個研究，睇下啲球會有冇歧視黑人。點睇？唔係睇有冇噓，亦唔係睇人工（可能黑人特別屎波呢？）。而係睇，在同一個人工下，見到黑人多嘅球會，表現好過少黑人嘅，咁就證明到係畀低咗人工。而呢一篇呢，就睇啲報紙評分，意甲，見到啲報紙似乎係黑人特別低分。有趣嘅係，在意甲嘅人工上面，就見唔到特別待薄黑人的。咁，其實會唔會係黑人球員真係表現差啲？本人覺得，個實驗應該試下拎啲客觀嘅評分機制（唔少體育網站有），同返啲報紙主觀評分去比。

FB Post Summary — Donki 開業淘大尺價升上兩萬

14. Donki 開業淘大尺價升上兩萬 — 冇乜特別，就只係呢篇。我相信其實係冇乜關係的，正係因為多人住先會開Donki．唔係開咗先多人買樓。

================================================================

我本書：各大書局均有代售，或者上HomeBlogger網頁買，自己上尖沙嘴拎或者加廿蚊叫順豐畀你。HKTVMall都有但唔包日日有貨

Facebook Page：「君子馬蘭頭」ivanliresearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

勞蘇基金：50萬港紙入場，暫定2%管理費 20%表現費，應該隨時可以拎錢走。歡迎PM我報名，現階段冇任何commitment，絶對唔使畀錢住，到時你亦可以反口唔畀。亦都唔使怕答應咗到時反口，絶冇問題，純粹等我知道有幾多人有興趣。我預會有好多人到時因為種種理由唔加入的。

聲音版/錄影版：慎防有人唔知，係有樣咁嘅嘢的。方便唔想睇字/坐車聽/公司聽。一個Post有齊純聲音（mp3）同埋影像版（我朋友碌住電話畫面讀）。 20蚊或40蚊會員限定。Sample呢度，免費試聽。