港股低位反彈．理文化工10蚊！中資股見底？人人買下年加利得稅。乜嘢行業對債息最敏感？左到極端就是極右。Buy now pay later咩回事？金融煙腸reading list． (Patreon)

快評幾句 — 港股低位反彈

大師冇點你 —理文化工10蚊！

每日一圖— 中資股見底？人人買下年加利得稅。乜嘢行業對債息最敏感？

Good Read — 左到極端就是極右。Buy now pay later咩回事？金融煙腸reading list

FB Post Summary — C朗轉會金融掃盲。我會寫信報月刊。魚蝦蟹必勝法。世界盃兩年一次。澳門都買到我本書

1. 周末專題寫咗篇日本股嘅文，相當值得睇的

快評幾句 — 港股低位反彈

2. 港股又跌過，你見都係恒指跌啲，國企指數更多，科指就最多，明顯見到係啲科技股拖低大市。而A股反而係仲有得升嘅。

3. 咁睇恒指，一度跌超過600點，最後低位彈返近200，跌近400點收市。

4. 見到普遍啲本地公司，就企得硬啲，都有啲仲有得升。

5. 亦都畀你見到，我啲港股，都係跑贏大市嘅（舊文已講過，主要就係HK4），不過升市時好似我有時跑輸，似乎個組合太保守？

6. 美股方面呢？寫嗰時仲未收市，暫時叫做好似終止5連跌，但都只係道指升得最好，標普指數同納指係要倒跌嘅。成個市況都麻麻地，記住唔係日日都有得升的。

大師冇點你 —理文化工10蚊！

7. 上到10蚊樓上！都真係冇乜好講，似乎好股都真係要長渣的。問題係，真係我之前都叫你沽咁啲，始終覺得係周期嘢。另外，公司出咗中期報告書（業績就一早出咗啦），會比業績嗰份嘢更多資料，有興趣去睇下。我可能遲下都會講。例如你見去到中期報告，先有講各樣產品賣咗幾多噸，同埋啲化工產品上半年嘅半均售價咁。

每日一圖— 中資股見底？人人買下年加利得稅。乜嘢行業對債息最敏感？

8. 中資股見底？— 純粹只係睇圖，唔係咩阻力線之類。但你話今次中資股嘅大跌好誇張？其實每隔幾年就一次，11年，15年，18年都有（08就不用講啦，仲勁）。留意個 3 year rolling drawdown（即係由高位到低位），之前都係三成幾四成，今次都差不多。不過留意，佢用嘅係MSCI中國指數。唔同指數嘅情況可以爭好遠，你睇上證指數今年仲要係升5%添，同滬深300甚至恒指科指完全係兩回事。

9. 人人買下年加利得稅—背景係美國民主黨人提議企業稅應該加到26.5%，資本增值稅升到25%，留意兩個稅率都低過拜登最初提議嘅數字。都係黑面白面，同埋開天殺價落地還錢。至於張圖？係PredictIt，政治博彩網站，有啲似賭盤。應該係禁咗香港IP去。

10. 乜嘢行業對債息最敏感？ — 幾有用嘅圖，銀行股對債息敏感大家知啦，一般正相關，債息高時股價就會跑贏。最高其實係保險股。負相關嘅呢？都大約估到，金礦，同埋公用股。債息強傳統都不利金價，另外，如果債息高，收息公用股嘅吸引力就低咗啦。最後留意，個表係加拿大公司，但債息都係睇美國。我相信美國公司嘅情況都會同加拿大差不多。

Good Read — 左到極端就是極右。Buy now pay later咩回事？金融煙腸reading list

11. 左到極端就是極右。 —呢個一路都係我嘅講法，結果有實據證實。你見我啲文成日都講，香港地經常都左右不分。但亦未必出奇，因為左右政治思想並唔係好多人諗嘅光譜兩極，而係一個圈咁。極左嘅同極右嘅，好多想法都差不多，都係威權主義。而威權主義本身唔分左右，可以左亦可以右，總之就係本人支持嘅就係真理。呢篇文引述返啲研究，見到極左同極右嘅人，啲心理特質相當相似嘅。

12. Buy now pay later咩回事？ — 留意返寫嗰個有份做創投基金，亦都係Affirm嘅共同創辦人（之前同Amazon合作，股價大升嗰間）。佢解你知，Buy now pay later嘅公司，點樣可以挑戰VISA Master Card．另外，佢仲有段片講信用卡到底點運作，幾好的。

13. 金融煙腸reading list — 資料嘢，reading list．呢位仁兄去推薦啲investment bank 嘅intern，應該去睇啲乜。我可以話你知入面有好多嘢！外匯股票債券乜都有，有書，有website，有教學內容。自己慢慢睇。

FB Post Summary — C朗轉會金融掃盲。我會寫信報月刊。魚蝦蟹必勝法。世界盃兩年一次。澳門都買到我本書

14. 忽然又寫咗好多文

15. C朗轉會金融掃盲– 由C朗拿度重返曼聯講起，講返好多普通人對於球員轉會嘅誤解。當然只係金融財務同商業方面。我在文中寫到C朗係一個開心樂園餐，可以幫近年戰績麻麻地嘅曼聯吸返啲新球迷。

16. 我會寫信報月刊— 冇錯，下期（10月初）開始我會在信報月刊寫專欄。呢個Facebook Post 亦都有講我同信報嘅種種淵源。十幾年前幻想，幾時先到我寫？結果到今日就達成咗。

17. 魚蝦蟹必勝法  — 我自己相當鍾意。Facebook 只係summary，請睇medium 篇文。固然係講魚蝦蟹嘅必勝法（答案：做莊），但主要係講數學，教你數嘢，示範你睇點解莊家有著數，到底有幾著數，教埋你欣賞數學之美。放心，應該普通初中數學程度都睇得明。

18. 世界盃兩年一次 — 亦都只係一個引子，講國際足協想世界盃兩年搞一次，背後當然亦係權力同金錢。我地生存在一個高度金融化的社會。我本書成日講呢句

19. 澳門都買到我本書 —如題，呢度係有澳門讀者的，希望佢睇到。澳門有得買了。

================================================================

我本書：各大書局均有代售，或者上HomeBlogger網頁買，自己上尖沙嘴拎或者加廿蚊叫順豐畀你。HKTVMall都有但唔包日日有貨

Facebook Page：「君子馬蘭頭」ivanliresearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

勞蘇基金：50萬港紙入場，暫定2%管理費 20%表現費，應該隨時可以拎錢走。歡迎PM我報名，現階段冇任何commitment，絶對唔使畀錢住，到時你亦可以反口唔畀。亦都唔使怕答應咗到時反口，絶冇問題，純粹等我知道有幾多人有興趣。我預會有好多人到時因為種種理由唔加入的。

聲音版/錄影版：慎防有人唔知，係有樣咁嘅嘢的。方便唔想睇字/坐車聽/公司聽。一個Post有齊純聲音（mp3）同埋影像版（我朋友碌住電話畫面讀）。 20蚊或40蚊會員限定。Sample呢度，免費試聽。