ivanliresearch

週末專題：日本股全攻略。 (Patreon)

Published:

2021-09-13 11:41:01

Edited:

2021-09-13 12:53:43

Imported:

2022-09

Downloads

Content

買日本股嘅理由？「點解唔買？」

咁唔買日本股嘅理由又點反駁？

點買日本股？

日經指數點計？邊個行業最勁同最差？（有埋個Excel）

點解日經225隻中有140隻跑羸？

東證指數又點計？（有埋個Excel）

好唔好過日經？點解兩千幾隻股得八百幾隻跑贏？

埃汾買咗邊三隻日本股？（幾皮嘢港紙啫）

Japan 27：我的27隻心水日本股（觀察名單咋，只買咗3隻）（有埋個Excel）

任天堂40萬港紙入場費。咁ADR又如何？

後記（好短）

買日本股嘅理由？「點解唔買？」

1. 呢部份唔會寫太多，你可以睇返我Facebook Post，同埋經濟一周嘅專欄（免費的應該）。仲有，嚟緊10月信報月刊我篇文都係寫日本股，下星期明報專欄都會，全力開動，周圍推。

2. 理由相當之簡單：估值相對唔貴，under-researched，唔少傳統產業仲有優勢，軟實力強（特別係流行文化，唔好睇少呢樣嘢，至少啲股票多故事講），企業管治相對地好，同埋越嚟越多人留意

3. 又或者，掉返轉，只係作為分散嘅一個option，已經好夠。點解要買日本股？應該反問：點解唔買。除非你有好強嘅理由。下一部份我會提呢啲理由，然後逐一反駁。

咁唔買日本股嘅理由又點反駁？

4. 香港人男女老少，左中右紅藍黃，個個都鍾意日本。但你見好少人會買日本股，點解？應該有以下嘅原因。有啲係不為，有啲係不能。

5. 唔知去邊買，交易費貴：呢個嘛，以前可能係，而家應唔係。況且因為我唔係成日買賣，對我嚟講交易費都唔係一個大問題。咁睇圖，我做25000港紙嘅交易（35萬円），佣金都係13蚊（186円），點都唔係貴。

6. 至於去邊買？下一節會講，我係用IB（Interactive brokers）的，反正本身我都開咗嚟買啲古靈精怪股，佢地亦有日本。冇收佢地錢（雖然有傾過合作，亦可能將來會），你鍾意第間都得。

7. 人口老化又萎縮，經濟增長慢，迷失N年日經仲未返家鄉：頭兩樣係事實，但關你乜事？呢個絶對係迷思。講咗N次股市同實體經濟兩回事，你睇今年日本股市表現失唔失禮？至於後者，冇錯係事實，可以睇返我篇舊文，平成年代日本股票真係悠長假期。但，日經指數30年前咩位，同你而家買有乜關係？況且，東證指數都30年新高了。令和年代，兩年多啲，日經都升咗近40%。表現唔得咩？肯定跑贏唔少市場。

8. 日本社會保守，冇大型科企：Yes and No．冇錯日本的確冇乜大型科企（指Big Tech，唔係Sony 任天堂嗰類）．最大嘅叫做Softbank，係投資其他公司嘅。即使唔同美國中國比，日本呢方面真係幾落後。日本得6間「獨角獸」（估值10億美金嘅初創），少過香港新加坡同韓國，死未。會唔會急起直追？應該會。你見韓國社經文化同日本好似（財閥當道，長幼有序，唔鼓勵創業），但而家Kakao Bank市值大過晒傳統銀行，日本都會係呢個方向。

9. 但你話你等唔切啦，咁點？都冇問題。日本股市的確係舊經濟股多，但一樣值得買。正如你見歐洲股市都冇大型科企，今年照樣破頂，因為真係估值相對平。你見美股，都唔只係啲Big Tech貴，其他舊經濟股都炒到極貴。相對之下，日本股市啲估值唔算太過份。

10. 唔識日文，冇資訊：以前可能係，而家未必係。首先，Google Translate．二來，好多人買美股亦唔見得識英文，佢地理解英文，應該同你理解Google Translate後嘅日本差不多。最後，真係要搵嘅，台灣網站算係比較多日本股資訊。而相信全世界都會慢慢多。因為同美股一樣，以前華文媒體邊有咁多美股資訊？多咗人留意，自然資訊就會出現。另外，Financial Times而家已經係日經新聞旗下，固然要錢訂啦。但你亦見到，外國投資者會多咗見到日本股市嘅資訊。

11. 日本公司企業管治麻麻，對海外投資者唔友善：前者睇你同邊度比，日本公司係有好多傳統嘅麻煩嘢，例如交叉持股，買埋啲唔啦更公司（SONY走去做旅行社，彈珠機公司走去整即溶咖啡），講到尾圍威喂，自己友，唔好畀外人玩。亦因為咁，公司管理層改善股價嘅誘因唔係好大，因為就算股價唔掂，你外人想狙擊換走管理層都好難。雖然呢，呢啲嘢應該改善中，同埋你話日本公司公然造假，或者呃投資者錢，都係比較少嘅。後者呢？亦係改善中。況且你去做小股東啫，冇人理你的。

點買日本股？

12. 正如上面講，我用IB，不再重覆。你鍾意嘅可以用Referral link開戶，聽聞有IB自己嘅股票送畀你，然後我又可以拎返200美金，不過要你戶口放1萬美金一年我先收到，隨你。但記住，西班牙讀者（好似冇）日本讀者（有的）應該唔entitled，應該法規問題，會唔會開咗戶口畀人爆門拉人就貴客自理。

13. 佣金，樓上講過，大約係0.05%，10000蚊交易收你5蚊。實際上仲會多少少其他交易費用，唔係大數。

14. 另外留意，IB有階梯式同固定式嘅佣金計劃揀，煩到一個點。但正路如果交易額唔係太大嘅，就階梯式，我都係階梯式。留意你揀嘅計劃，適用於所有市場。

日經指數點計？邊個行業最勁同最差？點解225隻中有140隻跑羸？

15. 呢個亦都係日本股比較難搞嘅一個問題，正如美股有道指同標普指數，日本有日經225同埋東證 TOPIX。你可以話日經似道指，東證似標指。咁如果你買ETF之類，記住真係唔同嘅東西。

16. 咁你話邊個「好啲」？都好難答你。但投資者多數關心嘅，都係邊樣會升得多啲。將來唔知，但至少睇下過去呢？

17. 你睇今年，日經升12%，東證升17%。但你睇1年，就日經反而好啲。睇5年，直頭日經贏好多。所以好難一概而論，只能講兩個指數唔同。（又，呢啲比較圖在Google Finance有的，幾好用）

18. 先講日經，你可以睇官網嘅資料，謝天謝地有英文，都幾多嘢睇的。留意維基 中文同英文 有啲成份股係錯的。可以睇日文。

19. 日經225，就係225隻成份股。但正如之前講，似道指，唔多科學的。有啲公司夠大又冇入到指數，另外例如任天堂，村田製作所之類，之前都唔知咩原因一路入唔到指數，應該係因為之前在大阪掛牌（2013年東京交易所同大阪先合併）。不過留意，最新近呢次檢討，卒之畀咗呢兩間公司（同埋Keyence）入日經。

20. 亦有個原因講，任天堂股價太高（54000 円一股），所以入咗指數會佔比好重。呢度就帶到第二個問題，指數計法

21. 正如頭先講，日經似道指，唔同標指（或恒指）。日經同道指都係Price -weighted 嘅指數，大約跟股價去決定比重，都唔太科學。例如你見迅銷 Fast Retail（Uniqlo），佔指數9%，就係因為75000円一股。

22. 不過，你見我話大約跟股價決定比重，就仲有個細節。見唔見Excel度有個股數？要計埋呢樣嘢，就整到個比重出嚟，自己睇Excel。例如Softbank，7000円一股，但在指數比重多過好多其他公司，因為計6股。點解會咁？我都唔知，可能同啲合股拆股有關，又或者有啲公司真係市值太大。早講過，唔多科學，亦因為早年未有電腦之類，計法要簡單啲。

23. 我呢個Excel教埋你計日經指數！你將個股價，乘返佔幾多股，變成Column E，加埋晒佢。然後再除返一個謎一般的Nikkei Divisor，就大約會係日經指數嘅水平。邊度搵個Nikkei Divisor？實情有得計，但有點深，最簡單方法係上官網。留意日日會變，所以計出嚟有少少分別。

24. 循例望下，今年日經指數大約升10%（我個Excel上星期三定四的），你見到跑贏嘅140隻，好簡單地講，求其買一隻而跑贏指數（225隻）嘅機會，都有62%，中位數表現（即係由最好排到最差表現，中間嗰隻）有17.8%，遠好過指數。計平均數更不得了，21%，但冇乜意思，當然係由幾隻最勁嘅拉高咗

25. 表現最好咩公司？好易望到，全部係航運公司，應該大家都知全世界都係航運股強，因為運費一路升。其他呢？就冇乜路捉

26. 最差嘅公司？都唔太難估，就係鐵路，兩間私鐵（京王，小田急）都幾差。仲有Softbank，啲中資投資拖累啦。仲有唔少大名氣嘅消費股都差，花王呀，麒麟（唔止啤酒的），迅銷（Uniqlo）之類。

27. 得閒下次可以玩下個Pivot Table，睇下各個行業嘅表現，我個Excel有的，或者你由頭自己整一次都得。

東證指數又點？好唔好過日經？點解兩千幾隻股得八百幾隻跑贏？

28. 玩完日經，玩埋東證指數。反高潮，其實冇乜好玩，因為成份股太多。近2200隻。知唔知點解係呢個數？就係因為佢計晒所有東證一部（你當係主板）上市嘅本土公司。

29. 而基本上，東證係market cap weighted．咁你大約見到到分別，東證佔比最重嘅，Toyota，Sony，全部係大公司。但最大一隻亦不過係佔3.6%，仲有留意，三菱UFJ呢啲，大公司但股價得600円，在日經佔比0.08%，但在東證佔1.5%（仲要東證係兩千幾間，日經只係二百幾），就見到計法分別。

30. 仲有留意，成個指數今年升15.1%，但跑贏嘅，只得837隻，38%，即係你亂買，多數跑輸東證。發唔發現同日經好唔同？日經係亂買多數跑贏指數。當然因為計法唔同，同埋亦因為日經係大公司，東證包晒所有公司。即係話：大公司入面，求其一間買就跑贏大公司指數。但所有公司，求其一間買就跑輸所有公司指數。有啲人理解做：咁即係買大公司就買個股算啦。未必，留意計法真係唔同。

31. 同樣道理，咪話東證今年升15.1%，兩千幾隻嘅平均數就冇乜意思，但留意中位數係8.6%，低過成個指數好多，亦反映咗上一段嘅現象。

埃汾買咗邊三隻日本股？（幾皮嘢港紙啫）

32. 貼埋出嚟，就係呢三隻。咁點解只買三隻？因為冇錢。日本股一個好大嘅問題，就係要100股咁買，咁你咩任天堂之類，54000円一股，100股就38萬港紙。我估你有38萬買股票，都唔會買落去。

33. 咁點解我買咗呢三隻先？「因為入場費平」。分別係Panasonic 6752，樂天 Rakuten 4755，同埋Z Holdings 4689．前兩者大家熟，Z Holdings係乜？就係LINE，同埋Yahoo Japan。

34. 每隻你見咪兩三萬左右，實在已經冇錢。另外留意，一隻大約十幾蚊港紙佣，絶對實惠。而一如以往，留意時間，我係見價就買，完全唔使咩排隊等。

Japan 27：我的27隻心水日本股（觀察名單咋，只買咗3隻）

35. 原本想分兩篇，都係一篇過吧。其他公司呢？個名單就在呢度，27間，Excel都放埋上嚟（我知file 名串錯字），另外感謝讀者兼我以前同事幫我在Bloomberg拎啲數字，你地邊位公司可以用（自己位有更好）而又OK得閒嘅都可以話我知。

36. 首先講下個名單點嚟，答案就係：都有啲亂嚟，主要係我問人！問咩人？就我嘅朋友，我叫佢地揀心水。多數都係冇做金融嘅。有A-I咁多提供者，我都有份，全部香港人，有男有女，好似有幾年在日本，或者識日文之類，但多數都唔識。年尾可以搞個表，睇下邊個啲嘢最勁。另外你亦大約可以估下係乜人，例如有啲你完全唔識嘅公司，肯定係啲在日本嘅讀者揀嘅。

37. 準則？係冇嘅，近乎free flow咁滯，因為brainstorming，我唔會ban任何idea．然後我差不多都冇做咩篩選，全部放落嚟。冇睇公司大細，冇睇股價表現，咩都唔睇。

38. 你心諗，咁化學都得？係！咁都得。有冇令你諗起乜？舊讀者可能估到。就係美股嘅垃圾股實驗！一個月前嘅事，呢篇同呢篇。結果一個月後，我只係亂買，都贏10%，跑贏晒大市，搞到我懷疑人生。

39. 正因為係咁，所以我都唔做太多分析。當然可能之後再會睇，但唔係今篇，亦寫唔晒。如果你有興趣想知啲公司做乜，或者睇下啲財務數字，而又唔識日文又冇Bloomberg之類嘅，Financial Times 幾好，而家已經係日經新聞旗下，不過要畀錢訂（我就有訂）。免費嘢嘅，Yahoo Finance還可以。

40. 睇返我地個Excel，有你最基本知嘅嘢，幫你用顏色分晒大細，公司名，編號，係咪日經指數成份股，今年同埋五年嘅股價表現（黃色嗰三間上市未夠五年），市值（有埋港紙，方便你比較其他公司），仲有幾錢入場費（十分重要），舊年收入同純利，市盈率（Price to earnings）市銷率（Price to Sales）之類。ADR嗰幾個陣間講

41. 堆嘢共通點係：冇乜。都話唔同嘅人揀，我冇篩選咁滯。表現由好差到好好都有，市值由好細到好大都有（你睇隻Mizuno 50億港紙市值，細過理文化工，而另一邊任天堂Hitachi之類，係日本頭20大市值了）。

42. 實際上你要留意嘅，就係一手嘅入場費。多數都一兩皮嘢港紙有交易，但唯獨兩隻去到廿幾三十萬港紙。

43. 亦因為呢個問題，就節外生枝，我地要睇埋：ADR。