港股反彈但成交唔大．美股5連跌．蘋果判決後續—梗係買遊戲股．收水縮表對股市冇壞影響。美股其實仲係唔多貴？ 兩種投資者。行多啲路有助思考。 (Patreon)

港股反彈但成交唔大

美股5連跌

蘋果判決後續—梗係買遊戲股

每日一圖— 收水縮表對股市冇壞影響。美股其實仲係唔多貴？

Good Read — 兩種投資者。行多啲路有助思考。

FB Post Summary — 卒之有北水買王維基。進軍日本股市。ASML 新高。

1. 俗務較忙，又遲咗出文，但反正星期六冇市。

2. 呀仲有，聽日會講下日本股。另外貼個日本股名單，已經買咗三隻，仲有廿幾隻，冇咁多錢了，亦未必隻隻嘢會買。唔少都係朋友畀我嘅冧把，志在集思廣益，輸錢貴客自理。

港股反彈但成交唔大

3. 港股啦喎，幾靚仔呀，唯一挑剔就係成交仲係唔係太大，得1500億（我都幾奇怪隻港交所仲企得咁硬）。你見甚麼騰訊700同恒大3333又反彈，記唔記得星期四先又講到世界末日？固然跌得多彈得少，但肯定唔係講到咩冇得量化咩位都唔應該買。

4. 事實你見到，恒指三個星期彈返1400點，近6%。國企指數就7%，科指直頭15%。我知，離高位仲好遠嘛，跌20%先彈返6%。但一樣，你講到話政策風險無限大，冇人敢買嘅，一樣唔係事實。

5. 至於點睇到幾時見底？你見我舊文有講過下，後來都見到真係差不多嗰啲位反彈，當然你見我畀個range都好濶，因為去到呢啲轉角位梗係咁。但畀你見到，大約都可以有數計下—但唔好諗住可以捉正個底，嘥氣。

6. 至於咩事升返啲？應該都因為習近平同拜登傾電話有關。See？你事先點可能估到？雖然，另外亦似乎有機會再有啲針對中國出口嘅東西出，但你見著實對中國嘅出口冇乜咩好大打擊

7. 不過講返，我個人覺得有電話傾係幾重大利好嘅消息，至少中美關係唔係全面再惡化。雖然你亦可以話，最新呢波跌幅，都係習近平自己搞出嚟嘅，同美國好似冇乜關。

美股5連跌

8. 反而美股嗰邊呢，5連跌喎。驚？完全冇驚。所謂5連跌都只係跌1.4%，真係完全唔係乜，疫情前好多時平時一日都唔止。2016年年尾至而家，有15次5連跌，每次都多過今次，平均係跌5%。

9. 跌乜？又係好多嘢你可以講。除咗講咗N次嘅咩 債務上限呀，病毒變種呀，驚通脹呀。仲有新鮮啲嘅，想股票回購收稅呀。

蘋果判決後續—梗係買遊戲股

10. 另外，蘋果單官司都有咗初步結果，好睇你點演繹，我認為對蘋果唔算太差。判決認為蘋果唔係壟斷，亦冇咩犯法，但要求蘋果不能禁止開發商引導用家去其他渠道科水（咁就可以避開蘋果稅）。

11. 對蘋果有乜影響？咁你見股價都即跌3%，有機會我再詳細講。但我有持有蘋果丫。沽？當然唔會。你唔係以為我會沽下話？太唔了解我了。

12. 但我另外反而想講，你可以留意下啲遊戲股。我之前一路都想寫，嗰時係因為行業整合（同媒體，軟件一樣），但未得閒遂間研究。你可以咁諗：對蘋果打擊未必好大，但對啲開發商嘅利好應該幾實在，星期五晚都有升，但唔算好勁。 例如AppLovin，Zynga，Playtika，Roblox之類。Activision Blizzard 或者 Electronic Arts 就比較大，升得少啲。你問我，係會搏Zynga，或者Activision Blizzard。前者夠細，有機會畀人買。後者之前捲入啲性騷擾問題，明顯落後。不過講明，風險大，而我亦冇打算短期買，冇錢，買晒日本股。

每日一圖— 收水縮表對股市冇壞影響。美股其實仲係唔多貴？

13. 收水縮表對股市冇壞影響— 類似嘅嘢，上星期一篇文講過。今次用咗2013同2017年嘅例。留意右邊軸淺藍色係標普指數，佢用log scale。左邊軸深藍色FARBAST係聯儲局資產負債表規模。咁你見到，頂多係宣佈嗰時有啲影響，到真係收水或縮表時並冇阻止美股升勢。都好合理，炒預期嘛。

14. 美股其實仲係唔多貴？—又要拎返篇舊文嚟講，Earnings yield gap model．低手以為股市升咗幾倍就貴咗幾倍，完全唔理公司盈利升咗。叻啲嘅會睇市盈率PE之類。但再深入啲，你要同埋個息口比較。Earnings yield gap model大約係咁嘅回事，呢個圖講嘅Equity risk premium（ERP） 亦係咁上下嘢，圖中細字有講埋點計。你見雖然市盈率好似同歷史相比幾貴，但債息仲係相當低，所以股票嘅相對估值，唔算極貴。以往歷史呢，去到而家呢個位嘅ERP（300點子，即係3厘），都仲有14%可以升。但首先歷史唔一定重覆，另外，你可能之前都見我貼過其他圖又話而家咁估值，未來幾年回報應該麻麻。你話，咪矛盾咯。係咁的。唔好以為你係做科學實驗。最後都係靠主觀判斷，否則就唔會有人買有人賣啦。

Good Read — 兩種投資者。行多啲路有助思考。

15. 兩種投資者— 原文係講pundit vs professional，Pundit呢度我唔知點譯做中文，你可以當係「名嘴」或「財演」。至於professional，好多人聽到以為係講機構投資者，基金經理，但我覺得唔關事。總之，明顯作者認為前者係壞，後者係好，講兩者嘅分別。你見香港好多KOL或寫文嘅人都係前者。篇文相當短，只係一個列表，其實唔多好，但你可以睇咗先。我亦唔係全部同意，例如佢話前者主觀後者客觀，我唔同意，投資好大程度都係主觀嘅嘢。但留意幾樣嘢我都成日講（我冇抄佢呀下）：前者以為自己乜都識（係咪好似你啲網友？），後者反而知道學習無止境。前者永遠講幾時股災，後者留意控制到嘅嘢。前者販賣情緒，後者教你控制。前者語不驚人誓不休，後者會講不同嘅可能。仲有好重要嘅：前者只會講一隻股票，後者教你成個配置。前者講肯定準確，後者講不確定性，有保留。前者非黑即白，後者知道好多灰色。前者乜都有答案，後者答你唔知。前者乜都可以解釋，後者話你知好多嘢冇得解。前者講自己點巴閉，後者話你知係靠努力同運氣。前者諗聽日，後者諗十年後 — 喂，咪好似我同你講嘅嘢？而我差不多解咗大半篇文你知了。但，得閒自己再諗下。

16. 行多啲路有助思考—雖然Ivan唔多運動，但佢有個奇怪嘅習慣：日行一萬步。行邊？有時係公園，有時係屯門河邊，夏天就商場（咁多人點行？所以揀夜晚）。我仲會一路行一路睇嘢。除咗好似對身體好啲（好過全日唔郁），最重要係我覺得對思考好有幫助！坐定定在電腦面前，一來分心，二來冇乜靈感的。你話我唔使返工先咁有閒情？就錯了，我之前幾年都係咁。我甚至在台灣隔離嗰時在間房入面都可以行到一萬步！呢篇文亦話你知，點解行多啲路有助思考。

FB Post Summary — 卒之有北水買王維基。進軍日本股市。ASML 新高。

冇乜特別好睇嘅文，ASML嗰篇還不錯

17. 卒之有北水買王維基—呢篇都算有趣，王維基隻1137入咗北水後，幾日都冇發市。其實睇港交所紀錄睇到的，最後發現：9月7日有人買咗2000股！

18. 進軍日本股市— 呃下收視咁，聽日嘅專題你就會知晒我買咗邊三隻股，同埋仲有廿幾隻mon住。但邊買得晒？

19. ASML 新高— 美股五連跌佢都仲新高喎。如果忠實讀者會發現我寫啲嘢熟口熟面，都係借呢啲嘢寫下啲核心想法。咁留意埋入面仲有講歐洲最大嘅幾間公司，而英國最大嘅公司甚至不及愛爾蘭 印度 新加坡最大嘅公司。

================================================================

我本書：各大書局均有代售，或者上HomeBlogger網頁買，自己上尖沙嘴拎或者加廿蚊叫順豐畀你。HKTVMall都有但唔包日日有貨

Facebook Page：「君子馬蘭頭」ivanliresearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

勞蘇基金：50萬港紙入場，暫定2%管理費 20%表現費，應該隨時可以拎錢走。歡迎PM我報名，現階段冇任何commitment，絶對唔使畀錢住，到時你亦可以反口唔畀。亦都唔使怕答應咗到時反口，絶冇問題，純粹等我知道有幾多人有興趣。我預會有好多人到時因為種種理由唔加入的。

聲音版/錄影版：慎防有人唔知，係有樣咁嘅嘢的。方便唔想睇字/坐車聽/公司聽。一個Post有齊純聲音（mp3）同埋影像版（我朋友碌住電話畫面讀）。 20蚊或40蚊會員限定。Sample呢度，免費試聽。