日本股跟進：今日就買，應該係。騰訊700大跌。恒大3333爆煲。美股連跌四日。Accenture 同 LuluLemon係咁升，點算好？ (Patreon)

日本股跟進：今日就買，應該係，除非唔係

騰訊700大跌，港股點算好？

恒大3333爆煲，港股點算好？

美股連跌四日，點算好？

Accenture 同 LuluLemon係咁升，點算好？

日本股跟進：今日就買，應該係，除非唔係

1. 昨日話咗買日本股，今日（星期五）就買！希望買到，但日本股早收市，仲要有時差，好多時香港兩點我都未起身（！）。

2. 至於買乜？就抱歉，可能星期六先話你知。因為我都未立定心水，甚至可能唔買住，但今日（星期五）唔買就下星期一買，星期一唔買就星期二買，照計唔爭在一兩日。你都唔爭在。

3. 今個星期六嘅專題就會講啲日本股，公司太多，只能好初步咁講，但我已經整理咗個名單，都廿幾隻。同埋你應該都知道有一個十分難搞嘅問題：要100股咁買，有啲公司幾十萬港紙一手，我就不了。「但有啲可以買ADR」，所以咪再要時間睇

4. 不過記住我都係牛刀小試，佔個倉比重唔會多。主力都肯定係美股（大約六成，計埋歐洲公司），同港股（大約四成）

騰訊700大跌，港股點算好

5. 你見講日本先，證明市況都冇乜好講。港股尤其慘。但我幾時都係悲觀嘅樂觀者。你見夜期呀，ADR呀之類，又企返穩啲。又話澄清返唔係唔批遊戲，係批得慢啲喎。

6. 但肯定你睇返，昨日騰訊700夠晒慘烈（本人都有渣，冇呃你，持倉公開過），咁大家都知因為被約談，可能又話唔批啲遊戲咁。

7. 想點？幾時停？我都唔知。但我認為最重要嘅係：點解你要覺得自己乜都有諗法？承認自己唔知，真係咁難？唔識嘅嘢，唔好主動去以為估到。反正好多嘢你控制唔到，不如集中一啲你控制到嘅嘢（順手推介你睇呢篇文，遲下我會再講）。拿，你有買我本書，呢啲心法應該係知的。

8. 我幫你計返，恒指跌600點，騰訊已經佔咗180點。計埋阿里巴巴120點，美團又90點，三隻嘢佔咗差不多400。你睇其他嘢又唔係咁差，都有20隻恒指成份股有得升。

9. 港股你講到點差，今年都不過係跌6%，大把更差嘅年份。當然唔好玩，但肯定唔係咩世界末日。你都未見過世界末日—其實見過，舊年3月咪全球股災。之後呢？

恒大3333爆煲，港股點算好

10. 同樣地，你問我恒大3333會點？會唔會爆煲？我只能答你：唔知，我亦唔care，反正我冇渣。短答你嘅就多數都會。但你可以睇多次第7段：點解覺得自己會知？為咗同人拗？我好奇怪，點解一個普通香港小朋友，覺得自己會知恒大會點？

11. 我搞呢個Patreon，其中一樣最開心嘅，就係卒之我可以唔使唔識都扮識。唔知嘅嘢可以話唔知。拿，你返工或上電視就冇法啦，唔識都要扮識，否則點上位？打工就唔好咁有良心，反正你老細都唔會對你有良心。但我在Patreon就唔會同大家咁虛偽！因為你真金白銀支持我嘛。

12. 做乜花時間花心機去討論恒大呢啲問題？唔會爆又點？你飛入去買？（我係唔會的）。「爆煲」都有好多種，可能債務重組呢（似會係咁）。你網上啲KOL吹水當然唔使理呢啲，日日都可以話中國已經爆煲添，正如舊年美國選完總統一樣大把人話美國玩完。但你投資係另一回事。

13. 會又點？哦，有人話會拖冧個市。「一早冧咗啦」。你話咩銀行有問題嘅，你估投資者係咪今日先會知恒大唔掂？單嘢發酵咗幾耐？講咗N咁多次，股價炒預期，去到你啲網友都知恒大爆煲，仲有幾多嘢未反映？而你計數都計到，銀行絶對食得起（當然會有啲打擊）

14. 咁但，你講到話骨牌效應呀，一間死十間都死一百間都死呀，咁我就討論唔到了。正如舊年負油價又有人話頁岩氣公司違約呀骨牌效應銀行爆煲，正如蘇伊士運河塞咗架船又有人話全球供應連停頓又爆煲啦，韓仔基金爆煲又有人話要沽晒啲貨又骨牌效應（的確係，結果就有平貨賣，而你睇美股個圖，搵唔搵得返呢件事係幾時？應該搵唔到。嗰時講到點大件事）

15. 我只知呢，日日都話有壞消息，但美股係升個不停嘅。

美股連跌四日，點算好？

16. 美股呢？都係好似冇乜力，連跌4日。但緊連跌4日，標普指數離高位，都只係回調1%。講過好多次，今年從來都冇一個5%嘅調整（上一次舊年9月定10月，如果要10%調整更加數到舊年3月），最多就係4%．史上（差不多100年）只有3年更加少。

17. 但你話係好事？睇你點睇。你學我咁一路stay invested咪好事，但你永遠等等等調整，咪唔知幾時先買到。

18. 最好玩嘅係，你又睇返另一樣嘢：即使美股11年牛市（當2009-2019），都係經常有10%調整，但換著而家高位道指跌3500，包保好多人話股市玩完。

19. 然後你又見，股市好似不停升。但好耐咩？由舊年3月到而家，年半之嘛。上面咪講咗，上一次（2009-2019）牛市11年，平均牛市都有5年。

20. 講呢啲代表乜？代表絶大多數人，低估咗股市嘅波幅，同埋不可預測性。明明升市中有調整好正常，又驚。但到你見到明明成日有調整，偏偏過去一年等極都冇。

21. 好簡單，承認大自然嘅力量，唔好諗住去time the market．都係嗰幾句心法啦，唔重覆了。

Accenture 同 LuluLemon係咁升，點算好？

22. 結果都係太長氣。實情仲有留意兩隻美股，但記住。唔！係！叫！你！而！家！買。我實在好怕啲讀者睇一半唔睇一半，但唔少人都係咁。然後話「喂埃汾你話間公司有趣喎我咪瞓身買」，咁多年街度好多女仔我都覺得靚的，但追得幾多個？同埋，有個價嘛。仲有，「唔使瞓身一隻嘅」

23. 所以純粹分享，我都係走寶，冇買，亦唔打算買。但畀你見到市場上好多好公司，你亦根本唔使只係咩聽冧把。呢啲公司（特別係第一間），都係我少留意嘅，呢度都好少講。

24. 第一間係 Accenture ACN，可能都有啲人聽過，但未知係做乜。大公司，差不多全球50大，市值大過摩根士丹利。做乜？做啲白領嘅粗重嘢。我一路知呢間公司，但近來睇到嘅故事：原來佢地就係其中一間幫Facebook 執屎嘅公司！執乜？咪啲hate speech呀，直播自殺甚至殺人呀嗰啲，總不能全部AI做，亦不可能Facebook自己請人，又唔可以求其搵幾條友。Facebook咪就係外判出去，ACN之類再畀南亞仔做（唔通你肯做？）。一年收5億美金—不過對ACN 唔係大數，人地一年收入440億（！），但畀你見到幾咁多呢啲商機。

25. 股價？當然係得。5年200%，今年都33%，跑贏大市。表面聽落技術含量唔高，但我係Facebook，5億嘢唔係好多錢，但我一定要搵間冇手尾跟，做得妥當嘅，畀貴啲有乜所謂，你加少少價有乜所謂。而ACN 又要搞到啲南亞仔貼貼伏伏喎，唔好搞搞震，你估容易？

26. 第二間，應該好多讀者識，我都識，Lululemon。大家都知個故事，work from home在家冇嘢做，啲瑜珈褲六七舊水一條，食水極深，女人錢好賺。當然凡事有個價啦下，潮牌嘅嘢有時好睇唔好食。你見Under Armor或者 A&F之類，而家股價係高位一半。

27. 但講真我都好似十年八年前知道間公司，居然係個男人話我知（正係理文化工嘅公子），走寶了。結果之前一晚出業績，勁到不得了，提前兩年達標。股價即升10%。但其實今年「只係」升咗18%，即係未計業績呢棍全年只係8%，跑輸大市好多。大約你都估到，之前呢啲 lock down 股都受壓嘛。所以好難估咩位出出入入，但你畀時間佢咪最簡單 —5年升咗 500%，你之前幾年任何位買都贏到笑。

28. 呢啲好簡單嘅故事，就畀你睇到啲心法點解重要。點解要睇長線，點解唔好試圖去捉高位低位，點解我唔會止賺止蝕。

29. 最後補多點，講到尾，都係睇返啲收入同盈利。兩間公司都係增長得幾好，先支持到股價。你可以上macro trends（好東西，唔使錢）．自。己。慢。慢。睇。

================================================================

我本書：各大書局均有代售，或者上HomeBlogger網頁買，自己上尖沙嘴拎或者加廿蚊叫順豐畀你。HKTVMall都有但唔包日日有貨

Facebook Page：「君子馬蘭頭」ivanliresearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

勞蘇基金：50萬港紙入場，暫定2%管理費 20%表現費，應該隨時可以拎錢走。歡迎PM我報名，現階段冇任何commitment，絶對唔使畀錢住，到時你亦可以反口唔畀。亦都唔使怕答應咗到時反口，絶冇問題，純粹等我知道有幾多人有興趣。我預會有好多人到時因為種種理由唔加入的。

聲音版/錄影版：慎防有人唔知，係有樣咁嘅嘢的。方便唔想睇字/坐車聽/公司聽。一個Post有齊純聲音（mp3）同埋影像版（我朋友碌住電話畫面讀）。 20蚊或40蚊會員限定。Sample呢度，免費試聽。