一個字。日本股． 理文化工9蚊！美股近十幾年因乜跑贏？美股過去四十年只有七個月「抵買」．估下有幾多人用Apple Pay？放假後分析員估數準啲 (Patreon)

快評兩句— 一個字。日本股

大師老點你— 理文化工9蚊！

每日一圖— 一美股近十幾年因乜跑贏？美股過去四十年只有七個月「抵買」

Good Read — 估下有幾多人用Apple Pay？放假後分析員估數準啲

FB Post Summary —  NetFlix新高，理文化工1，理文化工2

1. 市況呢，就麻麻地。港股你見成交唔多，騰訊700，HKTV1137 甚至理文化工746呢啲高開後都一路收窄。美股亦係冇乜力，然後ADR都係受壓，中概股亦跌，仲有我個垃圾倉都跌得急，有幾隻都大成交，唔知係預警。

2. 你要驚嘅，大把嘢驚啦。經濟好又驚加息，經濟差又驚盈利受影響，恒大又話驚，共同富裕又話驚，唔止，嚟緊仲有美國債務上限，照計以而家政治環境，今次有排玩。但邊驚得咁多？

3. 要講嘅係，由呢個Patreon開始，呢一年股市都係相當順風順水嘅！係喎，你真係未見過咩叫股災。咁唔會每一日都好似過去呢一年咁好的，要有心理準備。但我唔明點解跌你又咁擔心，你又唔係下年退休埋單計數，跌市你咪有機會買多啲咯。

4. 升晒我先擔心呀，例如下一段嘅嘢

快評兩句— 一個字。日本股

5. 由9月頭開始我就講日本股（實情舊年已開始講），上星期都提咗兩次，呢度，同呢度。經濟一周（已出）同埋嚟緊信報月刊（新專欄！）都有寫。十分邪，然後一講完，日本首相就辭職，日經指數就連升8日

6. 冇錯，我係會買日本股的。呢兩日就買。但可惜仲未有時間睇個股，原本已經鎖定咗一堆，希望星期四去睇，星期五買。

7. 但唔想煩嘅？當然亦可以日本ETF。不過留意返，正如美股都幾個指數，日本亦有日經同東證TOPIX。好難話邊個好啲，但日經真係似道指，舊，唔多科學，而今年亦跑輸東證。

8. 當然香港同美國都有日本指數嘅ETF，但我就買返日本當地嘅，感受下氣氛嘛。呢度有個簡單嘅list，我暫時望咗兩隻，兩隻都係大和Daiwa嘅東西，日經就1320，東證就1305。大和網站都有啲資料咁咯。開支比率都算低，0.1%-0.2%，還好。

9. 同埋，都見到跟指數跟得足嘅。

10. 不過我自己呢，就覺得買日本股，梗係買個股。過癮啲嘛。嗯，大家唔好學我。但我買少少啫。都係幾皮嘢。

11. 邊度買到日本股？我都係用IB。未開嘅，用我呢個referral link吧。咁講明referral link我就有錢收返的，但你冇蝕底，好似都有著數。

大師老點你— 理文化工9蚊！

12. 都冇乜好講，我在Facebook Post都有講。呢度， 同呢度。真係反思下，做乜咁早take profit？但冇錯，係我叫你沽咁啲的。因為我都怕唔叫你take profit到時你怨我。唔係話賴皮，但呢個係我心路歷程。

13. 正如Facebook講，如果我自己都去買，可能我就唔會沽，亦唔會叫你沽。呢個只係假設，但你睇到我平時嘅坐貨能力係好強的，升又唔沽，跌都唔沽。

14. 無論如何冇如果了，點避免？好難避。當然你可以只係沽咗一半先，個心理壓力就細好多。

15. 另外，話說早兩晚係同我舊老細（我書中有寫嗰位）食飯，都講起呢隻嘢。當年都係佢欽點我去寫（你以為我識化工股？但個個都唔多識，佢就比較信我），但佢講咗句，話今次炒起，成個走勢同2009年嗰時差不多。咁就驚醒夢中人啦，你見2009次嗰次炒起後，最後都係好景不常的，始終係周期股，跟啲化工品價格行，難免我嘅信心冇咁大。

每日一圖— 一美股近十幾年因乜跑贏？美股過去四十年只有七個月「抵買」

16. 美股近十幾年因乜跑贏？—留意呢個唔係美股表現嘅圖，而係美股盈利（相對於其他）嘅圖，但望落同美股（相對於其他）嘅圖係差不多的。所以，點解近十幾年跑贏？就因為盈利都跑贏。不過你亦可以留意，之前十年並唔係咁。個轉角位在邊？似乎就係金融海嘯。可能因為印錢，亦可能因為Big Tech冒起。

17. 美股過去四十年只有七個月「抵買」—上次同大家講過CAPE（Shiller PE）嘅問題，你可以睇返。呢個圖係同一篇文嘅，畀你見到，如果你用元祖嘅CAPE去計，你同返真係「長期平均」去睇，美股過去四十年，有三十九年零三個月係貴過「長期平均」的，你靠呢啲指標就死得。

Good Read — 估下有幾多人用Apple Pay？放假後分析員估數準啲

18. 估下有幾多人用Apple Pay？— 當然你好可能唔知有幾多iPhone用家，亦唔係度度都收。但原本嘅標題寫得好清楚：推出七年，有94%嘅iPhone用家，在有得用Apple Pay嘅情況下都係唔用。應該都算失敗，因為同幾年前差不多。點解？文入面好詳解咁講。但我本人都係好少用嘅：去便利店，驚佢detect唔到，阻住後面。去其他唔使怕阻住人嘅地方，又唔肯定佢收唔收，問人「你收唔收Apple Pay」好似怪怪地，阿姐會問你乜Pay．最後就係：冇乜動力。而我已經係成日都唔帶銀包出街嘅人（對，只帶部電話）

19. 放假後分析員估數準啲—有趣嘅研究，就係睇到放完假嗰幾日，啲分析員估上市公司嘅盈利，係比平時份外準的。個差別都幾明顯。爭幾多？等於多一年經驗。所以大家都放下假，有時我都想放下假。

FB Post Summary —  NetFlix新高，理文化工1，理文化工2

20. NetFlix新高—NetFlix 無聲無息N連升，創咗新高。都幾奇怪。要知道對上兩次業績後都大插，而啲上客數字又真係唔掂的。但而家又無息無息走返上嚟。又畀你見到了：壞消息嗰時，你沽晒佢，咪笨咯。平時又嫌貴，咁冇壞消息又點會平？

21. 理文化工1- 星期二大升後寫的，冇乜特別，唔知做乜炒前海 電動車 新能源甚麼走埋上嚟

22. 理文化工2— 星期三升到上9蚊後寫的，順便講埋，如果我有買，可能唔會叫你take profit

================================================================

我本書：各大書局均有代售，或者上HomeBlogger網頁買，自己上尖沙嘴拎或者加廿蚊叫順豐畀你。HKTVMall都有但唔包日日有貨

Facebook Page：「君子馬蘭頭」ivanliresearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

勞蘇基金：50萬港紙入場，暫定2%管理費 20%表現費，應該隨時可以拎錢走。歡迎PM我報名，現階段冇任何commitment，絶對唔使畀錢住，到時你亦可以反口唔畀。亦都唔使怕答應咗到時反口，絶冇問題，純粹等我知道有幾多人有興趣。我預會有好多人到時因為種種理由唔加入的。

聲音版/錄影版：慎防有人唔知，係有樣咁嘅嘢的。方便唔想睇字/坐車聽/公司聽。一個Post有齊純聲音（mp3）同埋影像版（我朋友碌住電話畫面讀）。 20蚊或40蚊會員限定。Sample呢度，免費試聽。