理文化工746一日升兩成幾！嗚丫！王維基 HKTV 1137反彈。有關我的新月供 港股美股ETF。點解買？揀邊隻？美股標普指數ETF：SPY，IVV，VOO，SPLG。3187三星亞洲房託。2814三星FANG+ ETF (Patreon)

理文化工746一日升兩成幾！嗚丫！

王維基 HKTV 1137反彈

101文：有關我的新月供 港股美股ETF。點解買？揀邊隻？

美股標普指數ETF：SPY，IVV，VOO，SPLG

3187三星亞洲房託

2814三星FANG+ ETF

短結論

1. 港股反彈，但市況靜，成交少。美股回啲，但我個倉US4係升的（唔知係乜睇舊文），其實唔難，一日半日。更加鼓舞應該係啲中概股都反彈。

2. 今日呢篇精彩，首先我會略講 理文化工746同王維基 HKTV 1137

3. 但戲肉係後面。講返我啲部份新月供股票，實情啲嘢比較「婆仔」（睇落去你就明我講乜），但反正我整咗，公開埋畀大家。有啲我剛買咗，有啲呢兩日會買，詳情睇內文

4. 想講係，我本書入面一路都講一個Core—satellite（即係「膽拖腳」策略）。玩個股好玩，但你主力應該係啲指數基金，可能係五六成？但你見我自己都唔係太守到呢個法則，所以都想加返多啲指數嘢，月供嘢，悶嘢。咁上次講過，港股月供（HK4）冇乜影響，但加咗5隻，好少錢啫。長和1，太古19，長實1113，電訊盈利8，中移動941，都係啲悶嘢。

5. 呢篇文就會同你講啲揀ETF嘅準則，嚟嚟去去都係嗰啲，我見都好多時有人問我英國歐洲日本ETF又邊隻好，或者間公司幾個地方一齊上買邊度好，都大約可以適用。雖然可能我遲下週末會再寫歐洲英國日本ETF。

6. BTW，好多時我幫你搵晒啲舊文嘅link，但有時我比較忙，你自己可以去個Index度搵，用公司名，編號，中英文名，多數都搵到。有用的，亦多謝忠實讀者幫我地做義工。

理文化工746一日升兩成幾！嗚丫！

7. 真係好快講，但頂丫，居然升23%，8蚊都嚟緊。乜事？咁啱同真大行分析員食飯，佢先一語驚醒夢中人。係喎，前海，新能源。理文有個廠在珠海的，我當然知，文都寫過，但就係醒唔起。但留意，理文唔係做鋰電池，只係電解液添加劑。

8. 咁大家記得，我係叫你沽啲先嘅，可能都有人因為咁賺少咗。點避免呢啲？實情好難，因為都唔係覺得間公司可以天長地久，所以叫你沽啲。唯一可以做得好啲嘅，你可以沽些少，將剩低啲持倉變到零成本（或好低）。

9. 不過呢，至少你都見到，我星期一有話你知大成交抽上。平時幾十萬股，星期一兩百萬，到星期二千幾萬股買上去梗係升。睇啲細公司就有時睇到呢啲嘢嘅。

王維基 HKTV 1137反彈

10. 冇事喎，星期一有寫，入咗北水名單，然後都跌5%。咁星期二咪又彈返啲。留意始終個成交都細，明顯地所謂北水都未買，都係要多啲人去宣傳下。

11. 另外公司出咗8月數字，你可以睇原文，或者睇新聞。我個Excel都有。數字幾靚仔的，個GMV新高。睇下幫唔幫到股價。

101文：有關我的新月供 港股美股ETF

12. 好啦，正題，有啲長，但我唔想拆開另一篇。

13. 成件事是咁的，之前咪話在USMART會月供美股SPY？而家都係不了。主要技術問題，因為佢地冇恒生戶口，而我收Patreon美金在恒生，咁冇理由轉咗港紙轉過去又轉返美金。解決方法？好簡單，人手月供，自己每個月買咪得。但唔在USMART了

14. 結果？牽一髮動全身，結果連我原本想港紙用供嘅2814（三星FANG+ ETF）同3187（三星亞洲房託ETF）都停埋！但我有其他嘢玩，下面講。

美股標普指數ETF：SPY，IVV，VOO，SPLG

15. 作為月供嘅膽之一（都買800幾美金），我就好簡單，plain vanilla，傳教士式，就係標普500指數，其他咩又兩倍三倍呀，或者有啲Growth 呀  Value呀之類，一概唔要。

16. 咁先講SPY，IVV，VOO。基本上全部一樣嘅嘢，S道富State Street，I係iShares（BlackRock呀下），V係Vanguard，全部大公司，出感冒藥咁，只能鬥平咁滯。SPY歷史最耐，名氣最大，但亦收得最貴，其他兩隻咪收平啲搶你。我估SPY都有流失資金的，始終而家資訊發達。不過話說回頭，去到0.09%實情都相當低，對散仔分別真係可能好細，可見真係鬥平。

17. 你見啲表現，差不多完全一樣，亦貼晒指數。（又，呢啲圖Google Finance有）

18. 當然，成交額呀，bid ask嗰啲可能唔同，但以本人同閣下嘅財力，又係長線月供嘅，應可以不理。

19. 咁正路，當然係IVV VOO，你見我都買咗。VOO嚟的，張圖冇寫。以後個個月買，希望。

20. 好啦，SPLG又咩回事？實情S字頭，都係State Street，即係出隻平價版，自己打自己，畀人搶不如自己搶自己。舊年寫過，黃金ETF都有呢個情況

(重貼個圖)

21. 但SPLG仲有個好大嘅好處，就係個單位細。有乜關係？如果月供就可能有關係。你見SPY，IVV，VOO，股價都四舊水美金樓上，一股三千幾蚊，即係你四千蚊同六千蚊都只係買一股，SPLG你就可以買到金額多啲。

(重貼個圖)

22. 咁SPLG，又大公司，又照樣跟得貼，又收得平，又金額細，應該無敵啦？但仲有一個小小問題，佢似乎係可以唔使完全跟晒標普指數的，有機會有啲誤差（technical 嘢），定冇乜所謂？

23. 結論？無論如何我都係月供VOO了。可能遲下將VOO部份錢買SPLG？人真花心。

3187三星亞洲房託

24. 首先，隻嘢9月13日會公布息率， 9月21日除淨， 9月30日派息。三星話我知嘅，但公告都有講。

25. 唔知係乜嘅，睇舊文，呢篇同呢篇，或者新聞。我亦講過我之前買咗5萬蚊。

26. 咁而家諗乜？做乜原本話月供又唔供？因為我發現，隻嘢一手四千幾銀，咁我月供二千，不如一個月或兩個月買一手算啦！搞咁多嘢。（月供券商或銀行會食咗你少少價，否則賺乜？）

27. 另外，留意下隻嘢，管理費0.65%，總開支比率1.5%（留意兩樣唔同嘅嘢！但總開支計埋管理費了），都唔算平。

28. 開支比率呢啲，官方文件實有，或者aastock都有。請揀詳細報價。「下次不如我餵埋你食飯」

29. 固然好難話點先算平，但你要諗下隻嘢唔係可以極高增長嘅。不過，考慮到可以分散地理風險，又似乎冇其他選擇，照去吧

30. 佢追蹤嘅指數，係S&P High Yield Asia Pacific-Ex New Zealand REITs Select Index。留意，市面上好似冇其他東西係追呢個指數，不禁令我懷疑根本係度身訂造整畀三星嘅，甚至係三星叫佢整，唔奇丫。你個REIT要畀返錢指數商的，當然即係出在你身上 — 所以，記住買埋SPGI！呢啲錢幾好搵

31. 結論？之前買咗5萬，咁應該我都係每個月買一手咁咯。開支好似有點高，但叫做可以分散。

2814三星FANG+ ETF

32. 最後，呢隻咁嘅嘢，可睇新聞。之前亦有講過。追蹤NYSE FANG+指數，還好。但你唔鍾意FANG+指數就另一個問題，我都有諗係咪應該Nasdaq 100 QQQ，越諗越煩，是但啦。Nasdaq 100肯定係跑贏 FANG+，因為FANG+ 多中資股。但如果我想拎返啲中資科技股嘅exposure呢？除咗騰訊，我係冇乜的（咁你可以話2800 2828 好簡接有啲）

33. 但講返，點解唔月供2814？好簡單，因為可以買美股。美股一樣有FANG+嘅ETF，Bank of Montreal 嘅FNGS（Technically 係ETN唔係ETF，但有點深）。

34. 你見2814，管理費0.65%，總開支1.8%。咁FNGS開支0.58%，雖然我唔知有冇另外嘅嘢，但照計點都平啲。入場費呢？FNGS一樣低，33蚊美金一股，月供幾好 。

35. 咁2814歷史唔長，但你見拎三個月或一個月比，似乎係FNGS跑贏些少的。大家都同一個指數。

36. 而本身FNGS當然跟FANG+ 跟得算貼。

37. 結論？唔知，未買。好似都可能係Nasdaq 100 QQQ好啲？但點講都好，就算想要FANG+，都只會係FNGS，月供，就唔諗2814了（證明我係唔係三星打手）

短結論

38. 搞咗一輪，頭都大，你睇都有啲辛苦，何況我去整？

39. 但萬變不離其宗，你問咩歐洲呀，日本呀，英國呀，都係咁。首先睇你想要咩指數（日經同東證已經唔同啦），然後睇返啲過往表現跟得足唔足，之後就睇開支比率，大約係咁。

40. 當然冇絶對指標，好難話一隻完美，否則其他執笠啦。但你話咩 成交額呀 bid ask嗰啲，我就唔理的。又唔係買幾千萬，況且月供長線，冇乜分別。但有啲去到同我講喂隻嘢啲黃金放香港安唔安全呀，會唔會畀人共同富裕拎咗你啲金去中南海呀，嗰啲我就答你唔到了。

41. 呢篇文應該幫到你的。但你見我自己都十五十六，分分鐘之後變心，可能我都會犯錯，唔係買咗最抵嗰隻。但我已經盡力話晒你知我嘅思路了。未必完美，但以上就係我諗嘅嘢同見到嘅嘢。

42. 「其實呢，都係個股過癮啲」。但過癮嘅未必最有益，所以偶然食下好了，core嘅都係指數基金悶嘢好。雖然真係知易行難，人就係冇乜定力嘅動物。

================================================================

我本書：各大書局均有代售，或者上HomeBlogger網頁買，自己上尖沙嘴拎或者加廿蚊叫順豐畀你。HKTVMall都有但唔包日日有貨

Facebook Page：「君子馬蘭頭」ivanliresearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

勞蘇基金：50萬港紙入場，暫定2%管理費 20%表現費，應該隨時可以拎錢走。歡迎PM我報名，現階段冇任何commitment，絶對唔使畀錢住，到時你亦可以反口唔畀。亦都唔使怕答應咗到時反口，絶冇問題，純粹等我知道有幾多人有興趣。我預會有好多人到時因為種種理由唔加入的。

聲音版/錄影版：慎防有人唔知，係有樣咁嘅嘢的。方便唔想睇字/坐車聽/公司聽。一個Post有齊純聲音（mp3）同埋影像版（我朋友碌住電話畫面讀）。 20蚊或40蚊會員限定。Sample呢度，免費試聽。