ivanliresearch

港交所388 騰訊700 反彈，理文化工746大成交抽上。王維基1137入咗北水名單。一孩政策導致中國生育率低？QE壓低債息收水就債息升？美股業績強因為舊年低基數？成功初創嘅創辦人平均45歲。嚴打淡龜。如何修正CAPE。 (Patreon)

Published:

2021-09-06 18:50:41

Imported:

2022-09

Content

快評兩句— 港交所388 騰訊700 反彈，理文化工746大成交抽上

大師冇點你— 王維基1137入咗北水名單

每日一圖— 一孩政策導致中國生育率低？QE壓低債息收水就債息升？美股業績強因為舊年低基數？

Good Read — 成功初創嘅創辦人平均45歲。嚴打淡龜。如何修正CAPE

FB Post Summary — 1137的廣告。持倉全公開。文字有價。1137入北水名單

1. 今日雖然美股冇市，但只係堆每日一圖同Good Read都寫咗好長。幾個圖同幾篇文都幾同金融有關，慢慢消化下。由淺入深

2. 另外之前答應咗你地，週末出咗篇專題，公開咗個持倉。我幾滿意篇文。唔好只係睇我買咗乜，你仲要睇埋我背後嘅思想。

快評兩句— 港交所388 騰訊700 反彈，理文化工746大成交抽上

3. 美股冇市，齋講港股。反彈啦，雖然成交唔大。但你見之前又話熊市呀，又話港交所驚北京交易所呀，又話政策風險不能量化呀，又話港紙弱走資呀。而家又如何？

4. 拿，Cathie Wood即時轉軚買返騰訊添呀，唔通之前會話你知？之前夠話清倉啦。

5. 另外，見到理文化工忽然好強，原因唔知，仲要成交都大過平時一截。而東岳189係要跌嘅。當然我認為而家呢啲位，都係應該take 啲profit，始終唔係可以長玩長有嘅公司。

大師冇點你— 王維基1137入咗北水名單

6. 如題，實情最初一出恒指季檢，已經估佢入到港股通，即係北水名單。後來業績後又講咗次。但之後，上海出個名單，冇佢份喎，都有寫過。但然後今日（星期一）深圳出嘅名單呢，就有了，我都唔記得咗50億市值呢樣嘢係經深圳先有。

7. 咁但，你見到股價要跌5%，雖然成交唔算大。

8. 點解會咁？冇乜點解，唔係樣樣嘢有得解，可能傳說中嘅「好消息出貨」，或者有啲人（可能有你份）走去take profit 先。可以留意埋之後幾日會唔會有北水買，最簡單嘅方法，睇CCASS，所有北水嘅持倉係用同一個「代理人」嘅。

9. 想睇長篇評論嘅， FB Post都貼咗。

10. 點處理？我就唔會沽嘅，反正都唔係在高位。

每日一圖— 一孩政策導致中國生育率低？QE壓低債息收水就債息升？美股業績強因為舊年低基數？

11. 三個圖幾好，三個都挑戰你傳統常識

12. 一孩政策導致中國生育率低？— 呢個應該係一個myth，好多人以為生育率同政府政策或者政體文化等等有關。你見有人話香港冇希望所以冇人生仔：但日本韓國台灣等等民主政體啲人一樣唔生，反而一黨專政嘅越南啲人就生（而家都開始唔生）。點解？亦有人話高樓價係最好嘅避孕藥，但唔係，買得起樓嘅人唔見得會生多啲。最影響生育率嘅因素係：收入。真的，我阿爺嗰啲年代，生六七件冇乜出奇，但去到我老母嗰代你好少再見有咁，三四個已好多，而家啲友就多數一兩件，甚至唔生（例如我）。香港台灣韓國日本等等，全部開始有錢就唔生，反而啲中東人非洲人照生，因為窮，天生天養，難聽啲講句生多幾件當保險，總有一兩件炸死餓死。你見大陸亦係咁，1979年一孩政策先出台，但根本生育率早早已經大跌。所以你可以話領導人落後大勢，「同你炒股票差不多」。而家你要谷返上去，就太遲啦。當然，有冇得避孕（N年前邊有口服避孕藥？而嗰時啲男人又唔用套），有冇得安全合法墮胎之類都係一個因素。仲有，唔同國家相比就會有其他分別，你見美國有錢好多，但生育率都同中國差不多。

13. QE壓低債息收水就債息升？—一樣，你睇真啲，特別睇綠色線。至少頭3次QE，結束果時債息都係高過開始嗰時，即係QE時期債息反而升。係咪同你印象中好唔同？但唔難明，炒預期嘛，每次QE之前，債息已經急跌。當然你亦可以話QE出得一定係經濟唔掂，所以同債息跌嘅日子符合。至於股市？都話美股10年升市咯，由QE1升到而家。

14. 美股業績強因為舊年低基數？ —亦係一個常見嘅謬誤，有興趣睇原文，但要畀錢。解下個圖先，全部係計第二季盈利，打橫x軸係20年同19年嘅盈利變動（疫情下），打棟y軸係21年同19年嘅盈利變動（疫情後同疫情前比）。咁好簡單，個圖上半截嘅，就係21年盈利高過19年嘅，目測你都見到佔咗大半（實情係77%）。右上係兩年都有增長嘅（153間），左上係疫情間下跌但之後反彈到高過疫情前嘅（213間）。下半截就係而家盈利仲低過疫情前嘅公司，左下（101）係疫情跌完仲未返返疫情前水平嘅（無論係連跌兩年，定係反彈但未返返疫情前水平）。右下呢？你見好少公司會咁（10間），就係疫情下盈利升，但之後反而嘔突到低過疫情前水平嘅公司。留意總數477間，整圖時有啲未出業績。另外仲有一間不在圖中，就係 Moderna，增長太勁，會在右上角最篤。呢個圖真係犀利，其實唔太難整，但畀你睇到點樣做data visualization，同時間你可以拎個圖去畀啲人解下，唔少人都會解到一鑊泡的。

Good Read — 成功初創嘅創辦人平均45歲。嚴打淡龜。如何修正CAPE

15. 成功初創嘅創辦人平均45歲—舊文，當年我medium都寫過，當時用嘅題係：40歲搞初創，成功機會大過25歲一個開。提起初創你總係諗起啲少年科技奇才，但實情係：成功嘅創辦人，多數都係老嘢。事後解唔難，。但畀你見到，真係要有數字先得，否則永遠都係茶餐廳廢柴阿叔或者cafe文青拗嘢，一個話年青識新事物敢冒險有想法有衝勁，一個話老嘢有錢有人脈做嘢成熟，根本拗到天光都各有道理。但一個有數字嘅研究咪話到你知結論係：識人好過識字。不過搞笑在，投資者又鍾意投落去年青人度，搞到有啲創辦人要拉面皮植髮搞後生，呢啲咪偏見。正如我講，而家畀人審緊嘅Elizabeth Homes，如果唔係名牌大學金髮少女，而係一個大陸大媽，肯定冇人信。點解投資者鍾意放錢落後生創辦人？除咗係偏見，亦有可能係佢地都知後生仔唔一定掂，但「有其他人」（例如上市接貨嘅你）信。仲有，後生仔冇錢，所以你同一舊錢，可以拎到個股權大啲，老海鮮初創，又唔等錢洗，加上老奸巨滑，先唔會畀你咁易少少錢拎一大舊股權。

16. 嚴打淡龜—原文係叫Poking The Bear。同Charlie Biello一樣，Ryan Detrick亦係我在twitter 日日睇嘅。呢篇係Ryan反駁眾多淡友嘅觀點，包括所謂嘅升咗好多就會跌。又，佢兩位其實風格唔算似，但相似嘅係一樣用好多圖同data，仲有，兩個都係相當樂觀嘅，甚至會畀人話盲目樂觀。勝利係屬於呢啲人嘅。最後講埋，你睇下人地整嘅嘢，你真係分到，香港好多人寫嘅真係垃圾。

17. 如何修正CAPE— 又係技術文，佢講CAPE，亦即係Schiller PE有啲不足，要修正下。咁我估唔少讀者連CAPE都唔知乜，放心，我舊文有寫。一次，兩次，搵埋畀你，算係咁啦我，或者你睇維基都得。好簡單嚟講，CAPE就係有用周期去調整（Cyclically Adjusted）嘅市盈率（PE），唔會只睇死一年。但有乜不足？減咗稅，同埋好多回購，所以作者調整返，整個改良版。咁你見到，用改良版，就冇咁貴了，雖然都係貴。呢個亦係一個好好嘅例子：你乜都唔識，冇基本功嘅，根本呢啲文都睇唔明，又點做到好嘅判斷？