縮表又如何？Nvidia Google ASML BlackRock 創新高！垃圾倉都係！王維基 1137升！信和83 特別息反而要跌！跨境匯款越嚟越平。ETF 行業旺得有道理．— 蜜桃臀商機。一街都大麻公司點賺錢？ (Patreon)

快評兩句— 縮表又如何？

大師冇點你—Nvidia Google ASML BlackRock 創新高！垃圾倉都係！

大師老點你—王維基 1137升！信和83 特別息反而要跌！

每日一圖—　跨境匯款越嚟越平。ETF 行業旺得有道理

Good Read — 蜜桃臀商機。一街都大麻公司點賺錢？

FB Post Summary— C朗轉會曼聯股價即升

1. 太累，早咗瞓，所以而家先有文，不過反正星期六冇市，你朝早五點收到定下午五點收都冇乜大分別。

2. 另外留意，今個星期週末係冇專題嘅。上星期寫咗篇金本位完氣大傷（真係巨著）。不過應該下星期平日我會整一篇特別版，公開個持倉。但只有買入價，冇銀碼的。

快評兩句— 縮表又如何？

3. 港股，就唔好講啦，睇個圖都唔開胃啦，即市彈到些少都要跌返晒出嚟。點玩？

4. 美股，就另一風景，再創新高。但最重要嘅新聞係聯儲局主席嘅Jackson Hole講話（就真係一個地方名），年前尾會taper，即係開始減少買債，但話加息仲未有耐。股市即時大升。

5. 呢度真係不吐不快，希望個讀者唔會嬲我，對事不對人，我亦冇開名，當係個教材。有個讀者早兩日PM我，問我係咪應該Jackson Hole前沽咗佢，真係搞到我有啲扯火，「明顯冇聽書」。咁你地知我點答啦。我問佢點解要沽，佢話驚講完嘢後跌。咁我話，如果講完後升呢—結果你睇到啦。唔好自作聰明。仲有，就算跌又如何？如果「驚乜乜乜之後可能跌」所以沽貨嘅，咁你每一日都冇可能買股票，因為冇一日可以保證升的。未跌都咁驚，到真係跌兩三成（未試過咩？成日都會有），點生存？

大師冇點你—Nvidia Google ASML BlackRock 創新高！垃圾倉都係！

6. 你留意到，連續一三五都係同一個題！因為真係呢四隻呢排日日破頂，記住要有耐性，同埋唔好畏高嫌貴。之前有人又覺得ASML升咗好多（其實點先叫好多？）唔敢買等回調，但你又見Nvidia真係都有過幾大嘅回調任你買的。你要信間公司，同埋唔好畀啲短期波動影響你（當然如果可以靚價買到更好，但可遇不可求）

7. 更有趣當然係個垃圾倉，IB log in 唔到，我畀住呢個Excel圖你睇。一個月未夠，升咗10%！但三千蚊有鬼用咩。記住呢個係實驗，你可以諗下學到啲乜。例如你見我只係買3萬，因為根本唔信呢啲公司（我都唔知係乜！），好多人買股票亦係咁，你買啲唔知係乜嘅公司，心中都知流，點敢買得大？咁買得細，就贏幾倍都冇用。另外，一樣見到，真係一隻好股夠冚晒輸錢嘅嘢啦（有兩隻都14%），亦唔使求隻隻都贏錢。最重要係：唔好手痕走去「止賺」。當然，亦都時勢做英雄，因為呢排Nasdaq勁，呢堆廢拉科技股咪有得炒。

大師老點你—王維基 1137升！信和83 特別息反而要跌！

8. 哈哈哈，我是燈神。星期四我仲寫，估1137業績後會跌，然後估信和會升。完全錯晒。但我反想而你思考一樣嘢：你搵個小朋友亂估，都不外係升升，跌跌，升跌，跌升，估中是但一隻走勢嘅機會，應該75%。而我估錯晒兩隻，即係仲差過小朋友亂估好多。但咁係咪代表個小朋友識嘢過我？你可以諗下呢個故事，然後你就明白，點解啲人去笑啲其他人準唔準，根本係錯晒。

9. 又，呢個華盛倉就只係得1137一隻股票。一目了然。另外我亦想講，雖然我估1137會跌，但之前我已經買咗啦。記住，行動勝過一切，身體最誠實。你可以話我買1137然後又話業績後會跌，「咁實中一邊」。但事實一定係持倉先有意義。換著我買重隻嘢，然後估業績後升，結果大跌，你都係覺得我冇眼光啦。梗係睇啲錢放邊先最真。

每日一圖—　跨境匯款越嚟越平。ETF 行業旺得有道理

10. 跨境匯款越嚟越平　—　你見只係十年，個跌幅都真係幾誇張。當然係多得啲Fintech公司，Paypal TransferWise（而家叫Wise）之類，同時間傳統嘅Western Union之類股價當然唔得。你話個rate 低咗係咪人人冇肉食？當然唔係，首先啲新公司係搶咗舊公司嘅份額，另外，個匯款量相信亦大咗好多，以前太貴你就會唔匯。留意成個情況同廣告差不多，都係新公司搶舊公司，同埋個餅大咗好多—以前電視廣告貴，但有幾多人落得起？Facebook廣告就另一回事

11. ETF 行業旺得有道理 — 之前講拜登嘅Capital gain tax都有提呢個問題。相比於傳統嘅股票基金，ETF係畀少好多稅的。亦因為咁個行業大盛，亦因為咁Black rock股價先咁勁。

Good Read — 蜜桃臀商機。一街都大麻公司點賺錢？

12. 蜜桃臀商機 —就真係整靚個籮嘅技術，BBL，Brazilian butt lift。原來只係幾千美金，聽落唔貴。唔使植入就可以幫你整個靚籮，用自己脂肪。呢個係近十年其中一個最流行嘅手術，但點解呢十年先多人做？你估到了，因為有Instagram同埋Tik Tok．

13. 一街都大麻公司點賺錢？ — 早幾年大麻股曾經熱炒過，因為加拿大叫做將佢合法化（亦因為咁大麻股多數加拿大公司）。咁舊年總統大選都炒過一輪，我都有講，因為民主黨政策都係向呢個方向。但回歸現實，你見今年好多股價都大跌。除咗係「炒過籠」「反映晒」「一切有個價」外，亦因為根本啲公司不停蝕錢。你諗真啲，其實好合理，合法化後，仲邊有咁高利錢？呢個亦係唔少人主張毒品之類應該合法化嘅原因，因為合法後價格一定大跌，毒販再冇咁多錢紙犯罪。

FB Post Summary— C朗轉會曼聯股價即升

14. C朗轉會曼聯股價即升—話說C朗拿度回歸曼聯，曼聯股價即時大升。但好多時你見到啲媒體講咩賣咗幾多件波衫收咗幾多錢，就絶對係計錯數，因為一件波衫1000蚊，球會拎一百幾十，好少多過兩百。你睇球會本身啲收入數字都大約睇到，邊有咁高收入。正如我成日講，你諗下曼聯巴塞之類，一年收入仲少過一間維他奶，係相當有趣嘅一件事。咁波衫嘅錢咩人賺？當然係Nike Adidas之類，早早叫你買Nike，我都有買，在core list．Nike市值差不多係曼聯嘅100倍，邊個賺錢啲，十分明顯。亦都畀你見到咩先係value creation，人地打造個品牌，吸引到啲潮男潮女買衫買鞋，絶對唔易。

================================================================

Facebook Page：「君子馬蘭頭」ivanliresearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

勞蘇基金：50萬港紙入場，暫定2%管理費 20%表現費，應該隨時可以拎錢走。歡迎PM我報名，現階段冇任何commitment，絶對唔使畀錢住，到時你亦可以反口唔畀。亦都唔使怕答應咗到時反口，絶冇問題，純粹等我知道有幾多人有興趣。我預會有好多人到時因為種種理由唔加入的。

聲音版/錄影版：慎防有人唔知，係有樣咁嘅嘢的。方便唔想睇字/坐車聽/公司聽。一個Post有齊純聲音（mp3）同埋影像版（我朋友碌住電話畫面讀）。 20蚊或40蚊會員限定。Sample呢度，免費試聽。