美股又新高，Jackson Hole又如何？王維基 1137！Nvidia Google ASML BlackRock 蘋果創新高！垃圾倉都係！低收入高分嘅大學生畢業率低過高收入低分。蘋果8年回購咗4200億股票。如果Jackson Hole後跌咁點？羅賓漢搞到上市公司無啦啦破財。聯儲局主席點投資？OnlyFans禁porn嘅啟示 (Patreon)

快評兩句— 美股又新高，Jackson Hole又如何？

大師老點你—王維基 1137！

大師冇點你—Nvidia Google ASML BlackRock 蘋果創新高！垃圾倉都係！

每日一圖—　低收入高分嘅大學生畢業率低過高收入低分。蘋果8年回購咗4200億股票。如果Jackson Hole後跌咁點？

Good Read — 羅賓漢搞到上市公司無啦啦破財。聯儲局主席點投資？OnlyFans禁porn嘅啟示

FB Post Summary—片頭經濟學。當文歷餅店。足三兩。王維基we trust．Fake news澄清

1. 內容多，快手講

快評兩句— 美股又新高，Jackson Hole又如何？

2. 美股嘅，不用多講，又新高，我都唔知有乜好驚。固然唔係叫你有舊錢就即時全數飛入去（分散呀！），更唔係叫你借錢。但你見我都仲不停買，驚乜？會唔會跌？可能會架。但如果唔跌呢？

3. 你見Jackson Hole講話前，好多人又驚話縮表會震散股市，結果呢？下面每日一圖都會講。唔係叫你有前無後，但，好似打籃球咁，你係要起手的。冇人叫你好急，你可以等兩日，可以買啲冇咁貴嘅嘢（雖然都冇乜），但不能一路拖。

4. 港股嘛，都係冇乜眼睇。騰訊ADR又跌，唔畀平日打機喎。中概股又跌，不過好似尾市收返窄少少。

5. 仲要買港股咩？咁其實，李嘉誠李澤楷都仲日日買緊長實1113，唔怕悶嘅咪跟。我都有月供，開始咋冇耐咋。

大師老點你—王維基 1137升！

6. 咁另外，上星期講咗買王維基啦，買之前有話你知，買咗再話你知，全部真trade，雖然銀碼唔大（我戶口而家得返幾十蚊了）。你見類似746理文化工咁操作，不過746我冇買，只係同你講。

7. 咁正路如果我沽1137前都會話你知嘅，雖然係好公司，但未必係渣過世，再好嘅嘢都有個價嘛，而且業務本身唔易突破。但無論如何，贏緊14%就係14%，亦都有讀者跟咗。我呢個倉暫時就只得呢隻股票。

8. 煩氣再講一句，746嗰時我冇買，唔係冇信心，而係隻嘢成交太少，唔想畀人覺得我自己買完唱高散貨。

大師冇點你—Nvidia Google ASML BlackRock 蘋果Facebook創新高！垃圾倉都係！

9. 「又係呢四隻，悶唔悶呀？」。悶得過你唔買？

10. 另外留意，多咗蘋果Facebook的，都新高了，之前又畀人嫌郁得慢，大佬呀，畀少少耐性啦，下下都買完兩日就爆升然後你沽完就大插咩。

11. 調整下你嘅期望啦。投資回報一年有10%已經相當不錯架啦。當然升嗰時多數唔止呢個數，但你要預有啲日子輸錢嘛。呢個Patreon開咗一年多啲，暫時全部都係好易捱嘅日子。（其實舊年3月都唔算難捱，跌得快彈得快，2018先惡搞）

12. 最好笑，個垃圾倉升得最多。一個月11%，又新高。但又係嗰句，邊敢買得多？

每日一圖—　低收入高分嘅大學生畢業率低過高收入低分。蘋果8年回購咗4200億股票。如果Jackson Hole後跌咁點？

13. 低收入高分嘅大學生畢業率低過高收入低分—美國嘅情況，固然估到有錢學生畢業率高過窮學生，成績好嘅又畢業率高過成績差。但，如果成績好嘅窮學生，同成績差嘅有錢學生比呢？答案，有錢但成績差嘅學生，畢業率仲要高啲。有錢人就係同你唔同。當然好睇你點定義「成績好」「有錢」，佢呢度分三級。

14. 蘋果8年回購咗4200億股票—添曲10年，蘋果市值升咗6倍，但股價升足10倍。點解有分別？因為回購。呢個並唔係咩財技，等於你話股票計埋派息嘅回報，多過就咁股價，只係美國稅務問題，好多公司寧願回購，原理一樣。另外仲可以留意：係添曲年代蘋果先開始回購（因為業務成熟，而低息）。仲有，蘋果回購咗4200億美金嘅股票—大過標普500指數入面489間公司嘅市值。

15. 如果Jackson Hole後跌咁點？—上次我寫個讀者（冇開名），咁佢冇發脾氣，仲好客氣咁多謝我，孺子可教。咁醒多個圖你睇。呢個圖，就係如果每次「有機會跌」，即係議息呀出就業數據呀之類，我去沽咗佢，之後先買返，有乜後果。見到大幅跑輸啦？越拉越遠。問題係，好多人成日只係諗，「如果跌點算」。但你唔去諗，「如果升點算」。咁怕輸錢係人性，所以我咪幫你克服佢。當然有呢個圖係多得美股長升長有，「你點知之後都會升？」，但，「你又點知唔會？」。支持股市長升嘅理由，點都多過支持佢會長跌。

Good Read — 羅賓漢搞到上市公司無啦啦破財。聯儲局主席點投資？OnlyFans禁porn嘅啟示

16. 今日三篇文都唔難明

17. 羅賓漢搞到上市公司無啦啦破財—好文，又短。你用富途華盛之類都知，有免費股送，多數送一股，而呢個做法係抄RobinHood嘅。但，羅賓漢做乜咁好死？除咗引你開戶，仲有其他原因。上次講過Broadridge，留意羅賓漢唔係用呢間，而係用第間，但原理一樣。送咗好多一股出去，結果有啲上市公司，股東由2萬個變到30萬個！每個啲email又要收返錢，開支都幾係嘢。呢啲就係漏洞了，好大可能嗰間email公司都有畀錢羅賓漢。又，理論上港股一手一手，就避免咗呢樣嘢。

18. 聯儲局主席點投資？—唔長嘅文，原文講Skin in the game．好簡單，講返聯儲局主席鮑威爾個倉。當然唔會去到好仔細，唔會知道邊隻股票，或者有幾錢，但大約有個譜。見到佢老人家都係渣重股票的，60%，你學到嘢未？仲有，作者就質疑，鮑威爾自己渣重股票，當然想股市好。實務上，當然佢不能自己炒，一定係信託或者基金咁，佢冇得直接落命令。但，佢渣咁多股票而冇乜債券，會唔會真係咁「獨立」？我嘅睇法：你話佢會谷高自己啲嘢就太小人之心，講真，儲聯局主席退任後大把世界，演講費都收到手軟，唔使貪呢啲細錢。但，儲聯局當然係服務權貴啦，而家先知？唔好忘記，你最多可以選總統同議員，但冇得選聯儲局官員。

19. OnlyFans禁porn嘅啟示—特登用返英文，因為我唔肯定porn係咪即係「鹹嘢」「色情」（Erotica？），但總之，之前Only Fans禁咗porn然後好快又容許返，亦即係之前一路係容許嘅。唔知咩係Only Fans？你咪當係鹹濕版Patreon，啲友拍片可以去到男女打真軍的，同Pornhub一樣尺度，你地咪訂閱。咁做乜忽然禁？應該係因為銀行信用卡之類唔肯處理呢啲交易。咁固然，我唔係Only Fans creator（但我係訂閱者！），但，沒有人為你發腥嘛。篇文探討返Content Creator嘅權益，例如佢地話應該做到可以免費轉台，好似手提電話咁。仲有，呢個例子畀你見到，即使你去除Facebook 之類嘅「中介」，你要同讀者收錢，例如Patreon，你都仲係要經過信用卡同銀行PayPal之類，換言之佢地好大權力。所以有人講應該去中心化之類。

FB Post Summary—片頭經濟學。當文歷餅店。足三兩。王維基we trust．Fake news澄清

20. 忽然好有興致寫咗好多文，雖然唔係篇篇同金融有關。又，仲有幾篇寫咗未出！唔敢話我點「成功」，但想做content creator嘅，十分簡單，要不停咁有嘢嘔出嚟

21. 片頭經濟學 — 參觀中環街市見到安利魚蛋粉。細個心諗，人人都要片頭，又唔使加錢，咁片中間咪冇人要？後來先知片頭好似美金咁可以不停整。然後又講稀缺性，啲人成日以為物以罕為貴，只啱細半。你要有價值先有用，個個廢柴都係獨一無二的。

22. 當文歷餅店 — 68蚊件嘅蛋糕，憑乜？其實都係行銷。成本得啖笑，你話咩廚藝都係得啖笑，唔係當生自己整喎，咪又係啲普通女仔整。有秘方？又唔係。整得好靚？咁普通女仔都整到啦。講到尾就係marketing, brand building．

23. 足三兩　—　有啲冷知識，QuarterPounder 香港叫足三兩，因為四份一磅就真係三兩。但點解咁啱？另外，其他地方係冇呢種關係的，其他地方嘅斤兩唔同香港。

24. 王維基we trust —解釋返點解買1137，一來殘，二來估佢入北水。咁業績後大升就唔係我估到的。

25. Fake news澄清 — 希望你冇睇到嗰段咩「新加坡外匯交易量過咗香港李顯龍在笑」嘅「新聞」。相當明顯，係fake news．但你見陶傑都貼。問題係，點解好多人諗都唔諗就信？點解我會知係假？唔止係因為我有做過外匯咯。記得有讀者問，點分邊啲好嘢邊啲壞嘢，真係一個好大嘅課題。但應該人人都知，fake news點解多人傳？就係因為佢係針對一啲「你想發生」嘅嘢。講真，李顯龍笑乜你都知？有冇用腦架呢？

================================================================

Facebook Page：「君子馬蘭頭」ivanliresearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

勞蘇基金：50萬港紙入場，暫定2%管理費 20%表現費，應該隨時可以拎錢走。歡迎PM我報名，現階段冇任何commitment，絶對唔使畀錢住，到時你亦可以反口唔畀。亦都唔使怕答應咗到時反口，絶冇問題，純粹等我知道有幾多人有興趣。我預會有好多人到時因為種種理由唔加入的。

聲音版/錄影版：慎防有人唔知，係有樣咁嘅嘢的。方便唔想睇字/坐車聽/公司聽。一個Post有齊純聲音（mp3）同埋影像版（我朋友碌住電話畫面讀）。 20蚊或40蚊會員限定。Sample呢度，免費試聽。