王維基1137：史上第一次派息，但增長放慢晒，香港冇得玩啦？8成market share嘅美股．月供美股跟進．信和83業績，派埋特別息 (Patreon)

王維基1137：史上第一次派息，但增長放慢晒，香港冇得玩啦？（有埋Excel）

8成market share嘅美股（有埋Excel）

月供美股跟進

信和83業績，派埋特別息

王維基1137：史上第一次派息，但增長放慢晒，香港冇得玩啦？

1. 先講王維基檔1137，出咗業績，加上早兩日買咗。循例快講下，可能之後會有篇再詳細啲嘅。

2. 首先要講嘅係，派息喎！自搞電視/網購以嚟首次，一股0.08。但係咪好事？唔知。你都知美國好多科技股唔派息，固然因為美國嘅稅制，但亦有時話成長期梗係要投資，到開始派息就畀人認為係過咗高增長（但，承認過咗高增長所以派返息比股東，總好過管理層拎住啲錢亂咁投資或做啲古怪嘢）。

3. 你亦可以留意，公司同時出埋個dividend policy，以後會派EBITDA嘅三成至六成。派中期息會唔會有利股價？我估就唔會啦。但，有一個清楚嘅股息政策，可能有利吸引啲基金投資者。

4. 好啦，你睇業績呢，真係麻麻地的。我又搞埋個Excel，你又可以拎去玩。之前冇的，又，部份係我舊同事整咗，所以你見個format同我平時嗰啲唔多同。

5. 極速睇嘅，見到真係放慢晒。你睇個turnover低過舊年下半年了，毛利亦都低過上兩次半年。純利高過舊年下半年，同舊年上半年比亦只係差不多（不過留意舊年上半年有1600萬保就業）。

6. 完全唔係早兩年嘅高增長，事實你睇每個月出嘅嗰啲GMV數字都見到（Excel都有），半年GMV 30億，而公司之前目標係66-70億，分分鐘達唔到達

7. 想講嘅係，啲人以為網購好好賺，其實唔係。你睇Amazon都知，生意可以好大，但利錢唔高。咁你1137只係做香港，就當然好快見到頂

8. 不過，股價睇將來嘛，以上種種東西，公司點會唔知？一早諗定啦，又或者至少係一早會分散你注意力。

9. 留意公司之前推出咗Shoalter，就係幫人地搞，傳授武功喎。第一擊係同I.T.（well），但留意唔係只係賣I.T.嘅嘢．我覺得應該係試點，但最緊要係搞得掂就拎去外銷！呢個亦係公司之前講嘅策略

10. 仲有我星期一篇文（所以記住日日睇！）都有講，1137入股印尼公司。數目極細，但重點係人地會用佢嗰套嘢。應該之後你會見到更多呢啲海外嘢，咪話你質疑香港見晒頂，佢就會去做呢啲嘢。

11. 當然仲有，都有啲朋友有講，無人店。但，十劃未有一撇啦。但亦有讀者問，點解係歐洲美加，王維基都講到明啦，嗰啲地方人工貴嘛。但我相信仲有一個重點：當然避免同中資對撼，政治上財務上都不明智。

12. 仲有，記得我講Amazon都講過，人地嘅廣告生意越做越大。哈哈，你睇，1137都有咁情況！睇圖，啲「網購主業」真係停滯不前，毛利冇增長了。但，你睇啲廣告費升得幾快！呢啲係新收入來源，我估好少人會講！不過爭在，1137冇AWS咁嘅嘢咯。定會搞？

13. 最最最後，我估出完業績，即係星期五，股價會跌。但本身都幾殘，跌嘅空間應該唔大？

14. 仲有一個終極catalyst：入港股通，北水買嘛。固然你可以話大陸人冇興趣買呢啲，但真係人太多錢太多，1137又咁細，你求其一條村有幾百人買都不得了。拿，大行報告都話1137會入北水呀！我仲早過佢寫！

8成market share嘅美股

15. 另外講Broadridge（BR），之前預告咗話想買，睇真啲又好似麻麻地，但都照講個故事。

16. 吸引到我係Financial Times嘅一篇報導（要畀錢先睇到），講華爾街不滿呢間公司壟斷。心諗，咩咁巴閉？

17. 做乜架嘅？係極之悶嘅業務，幫上市公司同埋基金寄email畀投資者！招股書啦，年報啦，股東會投票信之類嘅東西。但食水好深，可以貴到差不多25美仙一個（即係2蚊港紙！），仲要八成market share！

18. 聽落極吸引，悶到爆但極穩定又OK有增長嘅業務。有啲似VISA/Master Card嗰類。正如FT篇文講，financial plumbing．（慎防有人唔知，到底信用卡公司點賺錢？唔係靠借錢畀你，借錢畀你係銀行嘅事，所以你唔還錢都唔關卡公司事，銀行會追你。信用卡公司就係每單交易舔你少少就夠了）

19. 增長在邊？唔好忘記而家仲要多咗好多散戶！（不過留意，Robinhood正係冇用Broadridge）。又話時話，點解係25美仙？因為，交易所容許嘅上限就係25美仙，可見公司相當有pricing power，護城河呀喂

20. 奇怪嘅係，上市公司同啲基金投訴，但交易所話知你，證監亦唔肯將呢個權由交易所拎走。同樣地，券商/經紀行亦冇乜意慾去推動減費，因為好多本身都收咗Broadridge錢，即係回佣咁，羊毛出自羊身上啦。

21. 我嘅睇法？小股東固然唔會理，而對上市公司同基金嚟講，始終唔係極大舊嘅錢，一路糾纏落去嘅動力唔係太大

22. 但講到尾，估值嘛。我覺得BR呢間嘢都似乎偏貴，業務好似無敵，但睇啲數又唔係咁無敵。

23. 你睇股價嘛，5年升150%，還不錯，唔係好多但應該業務幾穩定。今年呢？升一成多啲，跑輸大市，但還好。然後你睇，200億美金市值，但一年5億幾純利咋喎，絶對唔係點平嘅嘢（雖然，美股都冇乜咩平嘢）。

24. 最後你睇啲收入增長同盈利增長，又唔係十分非常吸引。所以，可能諗下先，或者買少少當了解下間公司，但唔會買得多了。

月供美股跟進

25. 講明，絶非廣告，冇金錢或非金錢利益。但早排咪話我去USMART開戶口？為咗月供美股嘛，我就去買返指數，標普指數ETF嘅SPY。

26. 點知見到最低消費900美金一個月。明明之前見佢賣廣告話最低消費200美金一個月（當然我唔會供咁少），但之後再睇真啲，明白晒！因為原來隻SPY而家都450蚊一股咁滯！所以佢咪至少900咯，費事你一股都買唔到。但其實呢，如果去到460一股，咁你月供900咪又係得一股？所以我應該會加大，每個月1000甚至1200咁（費事成日要轉）。話咗做真係做了，下個月開始。

27. 亦再講多次！絶非廣告，冇金錢或非金錢利益。不過我發現佢地可以月供埋三星隻亞洲房託3187，1000港紙起跳，隻嘢之前我都一早買咗啲。作為分散下風險OK，但唔好預會升好多，叫做好過你擺定期咁咯。我會唔會月供？可能少少啦，乜都買邊多錢，「靠大家個個upgrade了」

信和83業績，派埋特別息

29. 最後循例快速講下，信和83出咗業績。仲要出特別息，我估有得升啩？

30. 唔多人買，我又冇買，亦唔係成日寫。但真係N年前已經話隻嘢好抵買，差不多係最早嘅Patreon文，可惜真係悶到死。但股價絶不失禮呀！一年升三成幾，得罪講句，跑贏好多你啲咩增長股高科技。呢個係好好嘅投資教訓：邊個話啲業務要好fancy先得？當時睇中信和，就係因為夠殘，發展商可以做到net cash添呀，甚至嗰時估私有化添。

================================

Facebook Page：「君子馬蘭頭」ivanliresearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

勞蘇基金：50萬港紙入場，暫定2%管理費 20%表現費，應該隨時可以拎錢走。歡迎PM我報名，現階段冇任何commitment，絶對唔使畀錢住，到時你亦可以反口唔畀。亦都唔使怕答應咗到時反口，絶冇問題，純粹等我知道有幾多人有興趣。我預會有好多人到時因為種種理由唔加入的。

聲音版/錄影版：慎防有人唔知，係有樣咁嘅嘢的。方便唔想睇字/坐車聽/公司聽。一個Post有齊純聲音（mp3）同埋影像版（我朋友碌住電話畫面讀）。 20蚊或40蚊會員限定。Sample呢度，免費試聽。