港股又冇力，美國又冇力，點算好？蘋果添曲十周年。Amazon 服務收入就快多過貨品。業績好唔升業績差就跌。Howard Marks 論經濟師。千禧世代買SPAC輸錢記。 (Patreon)

快評兩句：—港股又冇力，美國又冇力，點算好？

大師冇點你—Nvidia Google ASML BlackRock 創新高！垃圾倉都係！

蘋果添曲十周年

每日一圖— Amazon 服務收入就快多過貨品。業績好唔升業績差就跌

Good Read — Howard Marks 論經濟師。千禧世代買SPAC輸錢記。

FB Post Summary— 金基德慾海慈航

快評兩句—港股又冇力，美國又冇力，點算好？

1. 真係兩句，你見港股彈完一日又冇力，夠晒令人沮喪。加上啲中概股仲要都回吐唔少。點算好？冇乜點算。

2. 美股咩？叫做連升五日，日日新高，但真係龜速，見到冇乜力。點算好？冇乜點算。用一位讀者嘅名句：等時間消化估值。但唔好手痕走去落車，再開返車冇人會通知你。

3. 你要明白，市場或者任何人，並冇欠你任何嘢。

4. 我經常叫大家，調整你嘅期望。今年嘅市場已經極易玩（其實舊年都不難，2018嗰類先玩死人），遠比我想像中順利。只係高位唔上唔落你都唔耐煩嘅，跌幾百又驚，唔郁又想走嘅，到年頭跌到年尾嗰時，你點頂？但偏偏嗰啲時間先最需要投資（當然，而家一樣需要，幾時都要）

5. 冇錯，人總係見到升市有人賺錢就自己心雄，正如跌市就驚。唔使自責，你係人，呢啲係人性，我都會有呢啲問題，亦唔等於會解決到，但你要知道有呢啲問題。舊文引嘅一句：發明避雷針後，行雷閃電冇少到，冇弱到，但我地再冇好似原始人咁驚甚至走去拎同伴祭神（叫咗你睇多啲書啦！）。

6. 搞唔掂嘅？咪迫自己月供買股票。但記住，咁樣即係地獄式減肥，違反人性的，所以留啲空間畀自己食雪糕，留少少錢自己玩。但唔好本末倒置

7. 另外，星期二提咗兩句，我星期四應該會講隻BR。

大師冇點你—Nvidia Google ASML BlackRock 創新高！垃圾倉都係！

8. 冇錯，就只係貼多次，唔會呃字數。

蘋果添曲十周年啟示

9. 但我另外想快講下，2011年8月24日，添曲接手蘋果，幾個月後Steve Jobs死埋，絶大多數人都懷疑添曲唔得，因為份CV真係唔夠靚，況且Steve Jobs係神咁滯。

10. 但結果？添曲應該係史上最成功嘅CEO之一，因為佢創造咗最多財富，冇任何人比得上。你鍾意講創意嘅隨你，但聽聞呢個newsletter主要係講投資，佢任內，蘋果市值由4000億不夠，變成而家……24000億！10倍回報！（點解唔係6倍？因為，股數少咗，有回購！）

11. 應該下個再下個星期會詳細寫，但，我想講一樣好關鍵嘅嘢：10年前蘋果已經係一個所有人都識嘅公司，所有人都知賺緊大錢。所以根本你唔使擔心「盤生意會唔得」。但你又驚已經過咗高增長嘛，事實咪話你知唔係。

12. 你諗下，買未掂嘅公司，你又話冇proven record可能會死（跌5%個個已經叫救命啦）。但買掂晒嘅公司，又話驚已經見咗頂冇增長。咁，即係乜都唔好買？唔得的，邊驚得咁多嘢？

每日一圖— Amazon 服務收入就快多過貨品。業績好唔升業績差就跌

13. Amazon 服務收入就快多過貨品—我諗呢個係我一路都仲未沽Amazon嘅原因，眾所周知（唔知就睇舊文），Amazon生意極大，但利錢低，因為做網購係極之多成本低利錢嘅（佢定到咁平亦都令到其他人無得競爭），去到一個位你見個增長會慢落嚟。但，Amazon仲有其他業務，生意其實都好大，利錢更厚，只係因為公司真係太太太大先唔多起眼。好多人都知AWS佔咗公司一半盈利，但我話你知Amazon廣告收入比得上Youtube—慢慢地就會呢啲部份先貢獻更多。

14. 業績好唔升業績差就跌—呢個現象都寫過好多次，量化埋畀你睇。寫Big Tech都有講，你見好多明明業績極好都跌，唔止一間，幾間，甚至幾季都係咁。原因當然係一早炒上。你可以睇埋，收入同盈利，只得是但一樣勝預期嘅，出完業績平均要跑輸指數2-3%。兩樣都不符預期嘅，亦係跑輸3%。只有兩樣都勝預期，先有得跑贏1%。但你話係咪唔應該買股票？相反，係叫你唔好諗住一心搏業績好，唔好諗住業績前飛入去搵快錢。要長期持有。

Good Read — Howard Marks 論經濟師。千禧世代買SPAC輸錢記。

15. Howard Marks 論經濟師 — 非常好嘅文，你睇開頭（Inflation 之前）就得了。之前我都講過一篇講呢篇嘢嘅文。講嘅嘢差唔多，經濟師冇用（作者公司一個都唔請，亦唔會聽佢地意見），經濟分析對你投資作用近乎零。原因好多，首先實體經濟同股市係兩回事，仲有經濟嘢一係就不能預知，一係就人人都知，兩者都係冇用。經濟預測，一係就大路嘢，一係就永遠都唔中嘅故作驚人之舉。作者亦都講，問題就係好多人唔願意接受自己「唔知」，乜都總係要有「見解」。講真，你總會識到啲朋友，阿富汗又好多見解，中國科研佢又好多見解，就係自己嘅人生一鑊泡。It’s one thing to have an opinion, but something very different to assume it’s right and bet heavily on it

16. 千禧世代買SPAC輸錢記 —非常長嘅文，但中心思想都幾簡單：潮嘢害人不淺。我都寫過SPAC，但係週末專題齋介紹。有冇推介過SPAC股？好似一次咁大把。但反正我自己都冇買過。總有啲人會話：車，買股票夠會輸錢。我可以話你知，我係越嚟越厭倦同唔同嘅人爭論，根本冇意思，亦都幸運地而家我唔需要。「買SPAC會輸錢」「買股票夠會輸錢」呢種邏輯，應該係同「食煙會肺癌」「唔食煙夠會肺癌」差不多。標普指數今年升22%，創新高，SPAC就好多離高位插咗一半。你話呢？順手講埋，你可以睇下係咩人買呢啲嘢，有咩人買完發達。

FB Post Summary— 金基德慾海慈航

17. 金基德慾海慈航 — medium 版就有埋圖，純粹就係我第三次睇《慾海慈航》嘅感想。不能夾硬拉到同投資有關，但又係咪完全冇關？咩叫有關咩叫冇關？好多電影最後係講「人性」，金基德嘅電影特別係。你了解「人性」，當然有助你了解呢個世界。可惜好多人都係好短視，最好今日篇文講買乜冧把聽日就升（然後最好你沽完就大跌！see？我幾咁了解人性）。你可以諗下，點解啲成功嘅投資者，都係鍾意睇書嘅。

================================================================

Facebook Page：「君子馬蘭頭」ivanliresearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

勞蘇基金：50萬港紙入場，暫定2%管理費 20%表現費，應該隨時可以拎錢走。歡迎PM我報名，現階段冇任何commitment，絶對唔使畀錢住，到時你亦可以反口唔畀。亦都唔使怕答應咗到時反口，絶冇問題，純粹等我知道有幾多人有興趣。我預會有好多人到時因為種種理由唔加入的。

聲音版/錄影版：慎防有人唔知，係有樣咁嘅嘢的。方便唔想睇字/坐車聽/公司聽。一個Post有齊純聲音（mp3）同埋影像版（我朋友碌住電話畫面讀）。 20蚊或40蚊會員限定。Sample呢度，免費試聽。