港股入熊！可以開煤氣～嘅業績睇下。恒指季檢嘅重點係……有隻嘢入港股通？NVIDIA 大成交破埋頂，微軟都係！今年盈利大彈只係因為舊年低基數？公司一年唔賣廣告有乜後果？金融危機有冇得預測？根本冇Buy and Hold呢回事． (Patreon)

快評兩句：港股入熊！可以開煤氣～嘅業績睇下。

不過我個倉仲係跑贏大市（多謝喎）

恒指季檢嘅重點係……有隻嘢入港股通？

大師冇點你：NVIDIA 大成交破埋頂，微軟都係！

每日一圖— 今年盈利大彈只係因為舊年低基數？公司一年唔賣廣告有乜後果？

Good Read —金融危機有冇得預測？根本冇Buy and Hold呢回事

FB Post Summary— 四十歲去過幾多次葬禮？垃圾倉上水面啟示。微軟破頂，就快追過蘋果。

1. 忽然好多嘢想講，加強版。

快評兩句：港股入熊！

2. 真係兩句，烏鴉口，但天要下雨娘要嫁人，星期四先講話恒指就快熊市，星期五就正式入熊。但又如何？19%同21%有乜分別？真係要講嘅，昨日我已經講咗唔少。你可以重溫。

3. 未來幾日，你會聽到更多人講入熊然後點，但絶大多數係廢話。例如話25000冇埋下一站就24000之類。星期一我在明報都會寫下「港股大跌點算好」，呢度最尾我attach埋畀你先睹為快，唔好傳畀人，唔多啱規矩的。

可以開煤氣～嘅業績睇下

4. 不過，真係可以開煤氣！我指睇下煤氣嘅業績！平時冇跟開，所以快講，但資深啲嘅股民知呢隻嘢曾經幾神奇。不過2019年後麻麻地，但始終本土仲要公用股，呢期點都有啲資金追捧。

5. 加上個業績，都幾靚仔。冇睇開，但只睇大數。收入247億，純利42億，都高過晒之前幾次半年。

6. 仲有，關於呢隻股票，一路有個迷思話年年十送一紅股有利股價，實在錯得很。十送一，咪即係拆股咯！點會影響股價？間間公司都可以年年做的。

7. 最後都老土畀啲正能量你，輸錢啫，唔好影響你生活，更加唔好搞到要生要死。2020年3月都頂得過啦，而家算係乜？雖然你可以話嗰時好快跌到底好快反彈，好過而家每日四五百咁慢慢折磨，但，「叫咗你買啲美股啦」。

8. 講真的，如果啲股票搞到影響你心情或者瞓覺，好簡單，一係練大你個心（但都不能一朝一夕），一係就唔好買咁大。雖然我好似係教你100% 持倉，咁我覺得冇借錢真係唔使點驚。

不過我個倉仲係跑贏大市（多謝喎）

9. 冇呃你，一路都話4號倉先係主力，1-3可以不理。雖然都係輸，但至少唔會太痛。

10. 好多人成日想我公開，咁都可以嘅，等下星期六專題吧，連埋美股都公開。點解？因為月尾，寫啲好嘢都未必有新讀者。

11. 不過講明，只貼名單同埋我嘅買入價，唔貼買咗幾多，費事銀碼太細畀你笑太多畀你綁架。第二，美股其實成日提啦，講座都貼過，我本書都有。港股嘅？都講過幾多悶嘢，匯控5中銀2388領展823地鐵66，當然亦有港交所388騰訊700之類。

恒指季檢嘅重點係……有隻嘢入港股通？

12. 恒指季檢，冇乜心機睇，幾乎打咗做季殮，風光大殮。但，都留意一個重點：王維基隻HKTV 1137入咗恒生綜合指數。咁恒生綜合指數當然唔係恒生指數，正如神聖羅馬帝國唔係羅馬帝國。但，入恒生綜合指數，代表有資格入到港股通，北水買。另外，睇市值，要睇N個月平均，但1137應該都夠。成交？我估都好似夠（真實公式好煩）。咁可能之後真係有得入北水名單。加上隻嘢叫做本土，又唔會太受啲政策影響，冇嘢敢買嘅，可以諗下。但講明，可能有錯，唔包生仔。但到人地宣佈埋就一定太遲啦。

大師冇點你：NVIDIA 大成交破埋頂，微軟都係！

13. 極快講，兩隻都core list，微軟嘅，日日破頂，300蚊都升穿埋，就快大過蘋果。Facebook Post 都有講。

14. Nvidia嘅，出咗業績，亦都講咗。不過留意業績後連續兩日大成交，平時一日千幾兩千萬股，呢兩日七八千萬，有人大手買了。股價尾市破埋頂。

每日一圖— 今年盈利大彈只係因為舊年低基數？公司一年唔賣廣告有乜後果？

15. 今年盈利大彈只係因為舊年低基數？—呢個係一個常見嘅迷思，好多人以為啲公司今年業績咁勁，「完全」因為舊年太差，即係前年100舊年50今年80咁。事實係點？一計就知。你見到事實根本計兩年增長，啲盈利都仲係相當靚，高過前年一截啦（但經濟就未必，唔少國家GDP仲係低過疫情前）。然後諗下，所以股市係咪升得有道理？證明當時啲人覺得盈利一定重創嘅，錯得很！但正係因為佢地錯得很，先會有得買平嘢然後升咁多。當然，股市升得有道理，但咁嘅升幅有冇過火就另一個問題。

16. 公司一年唔賣廣告有乜後果？—咁梗係生意跌啦。但留意大中小公司分別，咁當然你都估到細公司最受影響。亦因為咁，你見嗰時啲大公司話杯葛Facebook唔落廣告，都只能夠玩幾個月（仲要可能疫情減預算順手拎光環），因為你唔賣，啲中小企就會賣，頂你個位。而Facebook嘅廣告客戶群係好廣嘅，唔會係某十幾廿間公司貢獻好多。佢成篇文你都可以睇。

Good Read —金融危機有冇得預測？根本冇Buy and Hold呢回事

17. 金融危機有冇得預測？ —學術嘢，但寫得幾好，亦易明。留意金融危機同股災唔係同一回事，金融危機多數都股災，但股災不一定要金融危機。雖然金融危機引起嘅股災最危險（2008就係）。金融危機有冇先兆睇？要100%準當然好難，但大約都有路捉。你見佢都係擺資產價格升幅（多數係樓），同埋債務升幅，兩者都升得快，之後就幾大機會爆煲。亦都留意，其實一般價格跌唔會即時死人，係債務先殺死人。但資產價格升往往就令到好多人做槓杆買嘢，唔只係家庭，公司甚至銀行都會。你槓杆大嘅，跌少少你就負資產要打靶狂沽貨。

18. 根本冇Buy and Hold呢回事—個題吸咗我入去，頂丫，原來都幾標題黨。咁我當然係信買入好股然後長渣，但佢話冇呢回事，睇佢講乜。佢由阿麻個鐘講起，話表面一樣，但其實去到某個位已經變咗，變到冇用，整返都嘥錢，唔再係同一個鐘。即係忒修斯之船哲學問題。咁佢再講，話而家嘅Walmart點同創辦人搞嗰時，所以你唔係買緊同一間公司。扯，原來玩文字遊戲。但佢話係買個文化，我都同意，你係信CEO迎難而上嘅能力。當然亦都有啲公司真係前人種樹後人可以守業嘅。冇錯係日日變新CEO要適應，但總易過你由頭搞一間。

FB Post Summary— 四十歲去過幾多次葬禮？垃圾倉上水面啟示。微軟破頂，就快追過蘋果。

19. 四十歲去過幾多次葬禮？—呢篇完全唔關金融，但寫得比較有心機。緣起係我朋友兼呢度讀者（唔知仲係唔係）都寫咗篇，寫得不錯。寫返我去過嘅8個葬禮。後來埃汾太先提我係9個，但到佢提返我都仲係冇乜印象有去佢阿麻葬禮。總之，記得去人地嘅葬禮，否則佢地就唔會去你嘅葬禮。

20. 垃圾倉上水面啟示—冇乜特別，講8月9日個垃圾倉上返水面，有錢賺，仲要跑贏大市。十隻有七隻跌，一隻平手，一隻贏少少，但剩返嗰隻就夠冚晒其他。詳情早兩日篇文都有講過。

21. 微軟破頂，就快追過蘋果—同樣地，冇乜特別，純係出嚟自high下。但微軟真係早早已經話係Big Tech中較睇好，你又買咗未？

================================================================

Facebook Page：「君子馬蘭頭」ivanliresearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

勞蘇基金：50萬港紙入場，暫定2%管理費 20%表現費，應該隨時可以拎錢走。歡迎PM我報名，現階段冇任何commitment，絶對唔使畀錢住，到時你亦可以反口唔畀。亦都唔使怕答應咗到時反口，絶冇問題，純粹等我知道有幾多人有興趣。我預會有好多人到時因為種種理由唔加入的。

聲音版/錄影版：慎防有人唔知，係有樣咁嘅嘢的。方便唔想睇字/坐車聽/公司聽。一個Post有齊純聲音（mp3）同埋影像版（我朋友碌住電話畫面讀）。 20蚊或40蚊會員限定。Sample呢度，免費試聽。