ivanliresearch

50年前8月，金本位制死亡。當時背景係點？影響係點？之後會點？ (Patreon)

Published:

2021-08-23 00:24:05

Edited:

2021-08-23 00:28:09

Imported:

⚑ Flagged

Downloads

Download sp-500-historical-annual-returns.csv

Content

金本位制死前嘅國際秩序

尼克遜落閘，美金唔再可以換黃金。原本暫時，結果就到而家都係

法幣的年代：我話係就係，因為政府有權力收稅

最大影響 —美元雄霸50年

但全世界政府都開心—鬥借錢，鬥印錢，鬥貶值

社會高度金融化，金融成為顯學，金融才俊成為大帝

資產格價—金價狂升，但股票升都係多得金本位制死亡

然後又點？會唔會返返去金本位？

Appendix：歐元區一樣成班友綁埋一齊，點解冇人話退出？（冇時間可以唔睇）

小小寫後感（冇時間可以唔睇）

1. 好，應下節，盂蘭節就寫金本位制50年死忌。文入面會講，當時尼克遜同佢班官員，甚至市場，都唔可能估到影響咁深遠。呢件應該係近50年十件金融大事之一，甚至係排到頭兩三位。

2. 但有趣地，你見華媒真係冇乜人講，香港更少。你話好深咩？我又唔覺。不過個個只係想速成，賺錢，今日畀個冧把你聽日升，懶人包，最好二十字講完，即係印銀紙，升啦。

3. 我睇咗二三十篇文，夾埋應該超過10萬字？然後濃縮做呢篇嘅7000字，但我都睇10萬字，如果有人話睇幾千字嫌煩嘅，咁係咪覺得你叻我30倍？

金本位制死前嘅國際秩序

4. 唔寫到以物易物貝殼做交易咁遠，就由上世紀1900年開始講。當時當然已經有貨幣，有外匯，有股市，有國際貿易。但國際貿易主要都仲係貨物，而跨境金融實在唔多存在，貿易規模同而家比亦爭好遠—即使你計及當時嘅全球GDP都好，以前邊有咁多貿易。

5. 當其時主要嘅制度，就係金本位制。你國有幾多黃金，咪印幾多銀紙，相當美好。

6. 然後大家知，第一次世界大戰，打仗就當然話知你死，唔會再守咩金本位制，加上亦都好多時換唔到黃金。各國開始「印錢」（當時真係要印，都要啲成本同時間，而家直頭電腦搞掂），匯率大亂，各國限制貿易。打完，短暫回復過金本位制，然後又打，第二次世界大戰就真係世界大戰了。

7. 1944年，二戰未打完，但已經搞江湖新秩序，同盟國（戰勝國）嘅嗰班友就坐低傾（BTW，英國嘅代表係凱恩斯Maynard Keynes，中國代表係孔祥熙，即係宋家皇朝藹齡老公），就在美國個森林傾，所以有咗布列頓森林體系Bretton Woods System（BWS）。留意你今日聽到嘅IMF 同埋World Bank，都係戰後嘅秩序

8. 當其時即使係「戰勝國」，個個都滿身傷痕，唯獨係美國本土冇被襲擊。所以講經濟實力已經係美國獨大，取代咗英國/德國/法國戰前嘅霸主地位。

9. 最後傾出嚟，好簡單，邊個最有實力？邊個最多黃金？美國拎住全世界超過一半黃金，點講都係睇佢頭。傾出嚟嘅BWS，就係一個類似金本位制嘅怪胎：大家主要貨幣同美金掛勾，固定匯率。然後美金再同黃金掛勾，一安士黃金35美金，美國亦都冇得貶值，亦冇得任印。咁就全個世界都返返金本位制咁，可以行外匯管制，但冇得貶值。美國亦都保證你可以拎啲美金嚟換返黃金（聰明嘅你發現美國已經拎晒著數，但其他人冇乜得say）

10. 咁你大約估到，呢套嘢有先天缺憾。講得直接啲係大家各懷鬼胎，只係形勢比人強，先被迫要咁綁埋一齊，耐咗，自然就有離心。

尼克遜落閘，美金唔再可以換黃金。原本暫時，結果就到而家都係

11. 1944年至到1971發生嘅事，主要就係歐洲同日本經濟起飛，呢方面當然美國相當有功勞，但亦係為咗抗共（中國蘇聯朝鮮越南）。同時間美國亦都打越戰，有赤字，通脹勁，失業高。此消彼長，你見到呢啲規定，就會出現問題。

12. 呢度插播少少，冇咁大個頭，係不能戴咁大頂帽嘅，夾硬用啲唔適合嘅匯率體制，最後總會有啲位會出事。我舊文寫過索羅斯狙擊英倫銀行，亞洲金融風暴，拉美金融風暴，都係咁上下問題。

13. 呢度就要講舊文提嘅「不可能的三角」，固定匯率，自主貨幣政策，同埋資本自由進出，只能三選二，三樣要晒就好易出事。例如中國（台灣其實都係）就固定匯率盯美元，亦有自己貨幣政策，但行資本管制。日本英國咪資本自由進出，自主貨幣政策，但匯率不能固定。香港呢？就固定匯率（亦係盯美元），資本自由進出，但你冇自主貨幣政策。冇話邊種好啲。但三種要晒就會有問題，當時BWS各國亦面對呢個問題。

14. 歐洲經濟強勁，覺得固定匯率對自己唔著數，不停咁同美國換黃金。而雖然話係盟友，但美國對歐洲嘅控制遠不如對日本（打敗仗嘛），所以好難使橫手阻止。美國國內呢？就赤字高（越戰嘛），通脹高，黃金不停流失（畀人換走），經濟佔全球份額跌。仲要最初係歐洲人買美國嘢（重建嘛），但後來變咗美國人買歐洲嘢，貿易逆差呀。

15. 卒之去到一個位，歐洲同日本嘅黃金仲多過美國，然後有人計計數，唔係路喎，根本美國唔夠金兌晒喎，會煲爆莊喎。

16. 第一個反枱嘅，係德國（西德），果然係養大狗仔咬春袋。德國退出BWS，當時美國仲威脅撤軍，但德國人話知你。結果一退出BWS，經濟即時好，美金對馬克貶值。其他歐洲國家都跟。

17. 知道守唔住，咁美國會點？當然係落閘，唔畀換。50年前嘅8月，就係尼克遜宣佈停其他人持有嘅美金，不能換做黃金。有埋片睇。

18. 留意，當時尼克遜怪嘅係外國勢力，但冇怪盟友，而係怪「國際貨幣炒家」。仲有，當其時仲出咗兩招，三招夾埋史稱Nixon Shock．另外兩招：價格管制，人工管制。仲有就係即時對外國入口嘅貨品加10%稅，無差別，所有國家都收。擺明就係話本土優先，尼克遜話你買外國車咪會貴咗，但你買美國車嘅冇影響。

19. 不過要講明，最初尼克遜同班財金官員，只係諗住呢個係權宜之計，暫時。到呢個「不公平匯率」停止就會回復正常，亦都完全唔係諗住行浮動匯率，之後幾年都係想傾返返去BWS．點解要停止外國嘅美金對黃金？因為等班歐洲佬知道山姆大叔唔係講玩，可以落你閘。

20. 原本嚇一嚇你，但結果一搞就50年，後來結果一發不可收拾，就唔係尼克遜或最初官員想像到。

21. 所以成個BWS嘅崩潰，有偶然又有必然。以下我會講將BWS崩潰講為金本位死亡，因為BWS年代都仲算係金本位.

22. 留意Nixon Shock係在週末公佈，換著而家個個又話股災，但結果係星期一美股勁升4%，1971年全年都升，1972年都係。

23. 有關更多當時嘅情況，詳細睇substack呢篇文。

法幣的年代：我話係就係，因為政府有權力收稅

24. 冇錯，就係戰前嘅金本位，去到打後30年嘅BWS，然後就係1971年到而家，50年嘅「法幣」時代，Fiat Currency。你以為必然嘅嘢，只係得50年歷史，比好多人想像中短。所以真係多啲同老人家傾計，嗰時耆英證券嘅鬼頭老細，年少就經歷過法幣前嘅年代。

25. 照計大家都知法幣係乜，就係「講個信字」， fiat拉丁文原意係let it be done，「我話係就係」。不過有好多人講加密貨幣時，話法幣背後都係「冇嘢支持」，就相當有問題。冇錯法幣並冇黃金或任何實物支持，但亦唔係真係一定可以無限印，否則唔會有津巴布韋之類。

26. 簡單嚟講你要有一定底氣，經濟要有一定強，更重要係法幣背後就係代表國家嘅主權，monopoly of the legitimate use of physical force，在境內收稅，同埋執行你一定要用呢隻貨幣嘅能力。亦即係你唔交稅你唔收本國貨幣我就打你拉你坐監。

27. 至於另一個制約，可能好多人都聽過，你經濟太差仲不停印錢，自然就會通脹，就會冇人想要你隻貨幣（咪津巴布韋），貨幣不停貶值，你印出嚟都冇用，仲會借錢成本越嚟越高。反過來說，經濟有增長，大約控制到通脹，咁就住印唔會好大問題，反正其他人都會一齊印。

28. 要記住嘅係，1971年之前，全球央行都冇乜應對浮動匯率嘅經驗，都係後來摸摸下摸出嚟，點樣去控制通脹，唔好畀佢失控。可能都有人聽過，金本位死亡後冇耐，美國就經歷石油危機惡性通脹，最後靠當時聯儲局主席「雪茄伏」大手加息先搞得掂

最大影響 —美元雄霸50年

29. 金本位死亡50年，最大嘅影響，就係奠定咗美元甚至係美國霸權，呢個相信係當時所有人都估唔到嘅。當時主流睇法以為金本位制死亡削弱美國公信力同地位。後來證明，美國嘅領導地位，根本唔係因為多金，而係因為經濟，人口，同埋好打得

30. 你再諗下，有金本位嗰時，好似法郎馬克美金都一樣啫，最後都可以換返做黃金，差不多。但都冇黃金嗰時呢？你揀邊個？當時甚至未有歐元！咁當然揀美金。於是乎人人都有美金，美金變咗國際貿易嘅default 貨幣，亦成為絶大多數國家嘅儲備貨幣。

31. 冇錯，任印嘅美金，反而加強咗地位（其中一個原因因為其他人都印）。正如我講過，把口甚至心中真係好反美嘅中東佬南美佬大陸佬，但邊個唔係照渣美金自保？有難唔係照拎黃金同美金？

32. 畀啲證據你，五十年前美股佔全世界股市幾多？大約係60%。而家呢？都係60%。但唔妥喎，明明美國經濟佔少咗好多，由五十年前佔全球40%，而家得24%。當中原因當然同美元霸權權有關。同樣地，即使美國只佔全球經濟24%，但90%嘅外匯交易都同美金有關。

33. 亦都同樣地，美國國債，成為最後嘅避風港，大家default嘅無風險資產。留意美國並唔係最低風險嘅債仔，至少美國國債息口仲高過德國，美國信貸評級亦唔係最高，甚至CDS spread亦唔係最低（CDS，你大約理解做國家違約有得賠錢，咁你保買險要幾錢，越低風險咪保費越低）

34. 順手一提，有話尼克遜訪華，最後促成中國坐大，反咬美國。相信並唔係咁，你見到中國明顯係六四後鄧小平改革開放，以及2001年入世貿後，先變得高增長。當然話說回頭亦可以話金本位死亡50年後先有咁多國際貿易，此乃後話。而中國係唯一一個玩呢個資本主義遊戲，但又完全唔聽美國話嘅國家（以前蘇聯根本唔玩呢啲，日本就始終半個附庸國），難怪山姆大叔好唔高興

35. 有話在BWS年代，美國經濟增長先係最快，呢個似乎係事實，但的確「經濟增長」同「全球地位」未必完全係同一回事，你可以由頭睇多次呢一節。

36. 金本位死亡50年，結果就真係帶嚟咗美利堅盛世Pax Americana，打後50年基本上冇全球衝突（甚麼科威特阿富準就算吧啦），但副作用係全球不平等。不過我嘅睇法係，你西方有一定福利，啲友又未窮到要餓死，頂多只係眼紅有錢人，就唔係以前咩武裝起義了，然後隔幾年畀你選下政府繼續撚化你等你以為有得揀。但強調，呢個我睇法，唔係主流。

37. 最後留意嘅係，近幾十年，但凡美國加息美金強，都總有人出事。例如係1980年代，或者1994。出事嘅就係新興市場，1980年代係南美（冇乜人理），但1994年嗰浸就基本上引起埋亞洲金融風暴了。當然唔好陰謀論到覺得要整死東南亞（冇乜深仇大恨喎，亦冇人挑戰到美國），但當然美國自己加息係理得你其他人死的。

但全世界政府都開心—鬥借錢，鬥印錢，鬥貶值

38. 之後會詳細講，但你記得話原本一安士金對35美金，而家差不多2000美金，可見美金貶值幾咁勁，冇咗九成幾。但又留意，睇上圖，美匯指數又唔係跌咗好多，同其他貨幣比，美金又唔係完全大貶值。所以結論好簡單：根本係全部貨幣都齊齊貶值，齊齊印，有快有慢，但唔使分太細。

39. 金本位制收檔後，政府就再無制約，可以高負債但繼續低息借錢。呢個就係近50年發生嘅嘢，並唔只係由量化寬鬆開始，只不過以前可能主要係借錢，而家印埋錢。

40. 通脹？我嘅睇法（唔係主流）認為，當然一直有通脹，只係政府好聰明咁控制，一啲必需品就唔會畀佢升得太快，窮人要用嘅嘢不能升得多，否則會影響選票。但一啲看似「唔係必須」嘅嘢，就升得極多，例如房地產，醫療，讀大學嘅錢等等。

41. 你睇圖睇到，美國負債佔GDP，明顯以前冇咁誇張，由雪茄伏（Volcker）解決咗通脹，去到八九十年代就開始起飛，呢個亦係金融業嘅黃金年代。

42. 另一個圖，見到以前貨幣供應大約跟GDP，但去到70年代尾，金本位死後就開始脫離，後來量化寬鬆只係再去得誇張啲。

43. 其他國家？情況都係咁。例如你睇英國，戰後地位大跌，英鎊對美金一路跌，1976年搞到要向IMF求助（估唔到呢？），後來亦因為冇咁大個頭又戴好大頂帽，死跟歐洲匯率機制（即係跟西德/德國），最後被索羅斯睇死你守唔住，狙擊英鎊大賺，舊文我都有寫。

社會高度金融化，金融成為顯學，金融才俊成為大帝

44. 要講嘅係，自從金本位制死亡後，金融成為顯學，金融業吸引眾多才俊，社會亦都變得高度金融化。你可以搵返有返七八十歲嘅鬼佬，問返佢地以前係點的。

45. 以前都講過，股市，投資銀行當然唔係呢五十年先有。但以前做嘅嘢好悶，幫鐵路幫鋼鐵廠發下債咁，都話以前石油鋼鐵鐵路大亨先係社會名流，以前係實業家嘅年代，唔係金融才俊。

46. 打後幾十年，倒轉頭，金融先變咗實體經濟。好簡單，以前邊有咁多嘢trade？固定匯率咁你炒外匯炒乜？但呢五十年就有真正嘅國際金融市場，商品可以炒，外匯可以炒，股票都可以炒。諷刺係記唔記得尼克遜最初（至少表面係咁講）係想打擊啲炒家？結果而家國際金融市場，規模係當年幾千倍！

47. 亦都記住，既然浮動匯率係王道，咁各國財金官員又一般唔會肯主動放棄自己貨幣政策（自己搞到自己失業咩！），所以，根據「不可能的三角」（參考第13段），就不能再有資本管制了。

48. 國際資本不停走，就造就咗一大堆嘅機會咯，正如上面所講，到呢五十年先真係有「國際金融市場」。當然其實耐唔耐都有人落閘嘅，台灣都照行外匯管制，馬來西亞更加係在亞洲金融風暴中忽然落閘，畀鬼佬狂鬧但事後證明好有用，亦證明咩嚇怕外資係廢話，話咁快就返嚟。況且你可以諗下，成個金本位制死亡，咪就係由美國落閘開始！

49. 金本位制死亡，先係全球金融化嘅開始，而唔係咩民主同common law，呢啲講法真係害死人，英國美國一早有啦，但剛才咪講英國1976年仲要好似第三世界國家咁向IMF求救，唔通嗰時冇民主冇common law？至於倫敦成為國際金融中心，靠嘅係後來嘅Big Bang，減少監管。當然係多得戴卓爾夫人睇到1971年後全球金融化嘅呢個機會，啲工人階級憎到佢死就後話。

資產格價—金價狂升，但股票升都係多得金本位制死亡

50. 最後講下，對市場嘅影響。首先你睇金價，金本位死亡後，好快美金跌80%，金價由35蚊一安士升到200蚊只係幾年時間。十年已經升到800蚊（第二個圖：平均，年頭，最高，最低，年尾，升幅。詳情呢度）—但你同時又會發現，其實去到而家先2000蚊，呢五十年金價升勢，集中在頭十年間。

51. 你見到金價50年升咗58倍，亦即係美金貶值98%。但係咪只係對黃金貶值？唔係，你見股市升幅，唔會少得過黃金。

52. 另外亦都留意，金本位死亡嘅1971年之後50年嘅美股，回報好過1971年之前好多（畀埋個Excel你玩，但有啲簡陋）！呢個係相當奇怪嘅，因為國家應該慢慢成熟，變到好大，增長會減慢。（Geo mean就係每年複合增長）

53. 事實亦都見到（睇返35段），1971年之前美國嘅經濟增長，高過1971後年喎！但反而股市係1971年後先升得多，相信亦係同美元嘅地位有關。亦畀你見到，股市同經濟唔係同一回事。

54. 仲有，頭先講貧富懸殊，見到嘅係，在金本位死亡後，工資佔GDP嘅比例亦都減低。當然有人話呢個同技術進步都有關，但明顯社會金融化亦係一個好大原因，勞力越嚟越唔值錢。

55. 同樣地，你見到以前男性中位數收入，就同人均GDP差不多，之後係越嚟越脫節的。當然部份都同女性投入勞動市場有關，但好大程度亦因為金本位制後嘅金融化。

然後又點？會唔會返返去金本位？

56. 金本位死亡後，開頭係有一輪混亂，匯率波動，通脹升，但大致都係順利，都話美股1971年1972年都仲有得升，後來先再遇到高通脹，但亦有驚無險，完全冇討論過返返去金本位制

57. 然後你發現，BWS嗰30年平安無事，並唔係因為有個固定匯率，亦唔係因為背後有黃金支持。只係因為戰後人人執爛攤子，全部都聽美國話。

58. 記住，個重點係大家都聽美國支笛，可以坐低齊齊傾。咁你可以諗下，而家有冇可能有咁嘅情況？係冇的。唔好話中國俄羅斯唔睬你，即使歐洲都唔會再咁順攤。

59. 而家你要返返去金本位制甚至BWS，我相信都係不可能，洗濕個頭，而家國際貿易國際金融交流多咗咁多，點再返返去之前？

60. 另外，你發現匯率自由浮動，似乎冇帶畀啲主權國家真正自由？金融危機甚至爆得更多。但你見主權國都係唔會想返返去掛美金甚至掛黃金，除非你好似歐元區咁一個政經合一嘅同盟（但都有缺憾）

61. 有個講法，話將權力關在制度的籠子。咁金本位制死亡後，就係放咗隻精靈出嚟，政府官員試到有咁大權力，點會自己收返？唔好忘記，美國在1933-1975直頭唔畀私人買黃金（話時話，當時係羅斯福，玩嘅係一次過貶值，將美金由一安士對20.67美金變到35美金—就係後來尼克遜嘅價錢）。

62. 而家呢套系統，既然係美國設計出嚟，最後又半意外地對美國咁有利，佢會唔會自己主動去改？佢唔去改，咁邊個迫到佢改？所以改變只能嚟自美國自己。

63. 即係，兩個可能，第一，除美國惡性通脹，但我相信機會極低。第二，除非你信美國會打敗仗啦，相信可能更加低。

Appendix：歐元區一樣係成班友綁埋一齊，點解冇人話退出？（冇時間可以唔睇）

64. 其實BWS呢個「鐵索連舟」，「我冇自主權冇得貶值救經濟咪好唔著數？」嘅問題，歐元區都明顯有，以前甚麼意大利西班牙呢啲南歐國，一路係貶值積犯。但講到歐元咁差，點解只係有人爭住入，從來冇人要退出歐元區？希臘冇，西班牙都冇。（英國從來都唔係歐元區）。其中一個原因，因為歐盟有畀錢你嘛！雖然理論上好似只要係歐盟就有錢拎，唔一定要用歐元，但你退出歐元區必定畀人閂水。