共同富裕計劃震散LVMH 愛馬士 Prada．美國話縮表，經濟數據又勁，但債息又跌．NVIDIA 礦卡生意遠遜預期，中銀航空租賃2588業績大插．David Webb 增持佐丹奴．我買過270蚊嘅Tesla (Patreon)

共同富裕計劃震散LVMH 愛馬士 Prada

美國話縮表，經濟數據又勁，但債息又跌

NVIDIA 礦卡生意遠遜預期，但who cares？

中銀航空租賃2588業績大插，但who cares？

David Webb 增持佐丹奴，但who cares？（可能都有嘅）

比悲傷更悲傷的故事：我買過270蚊嘅Tesla！一拆五之前喎！）（但who cares？）

共同富裕計劃震散LVMH 愛馬士 Prada

1. 港股就無謂講，就快「熊市」添呀下。雖然我唔明跌20%有乜特別意義，係咪跌咗兩成就實會繼續跌？又好似唔係。係咪跌完兩成反彈？又好似唔係。就只係方便討論。

2. 雖然我個倉都仲係跑贏三大指數（冇人理個港中企業指數，雖然計埋我都係跑贏），但只係輸少啲都未必好安慰。況且，好多時市升嗰時我個倉又冇升咁多，似乎個beta係細過一，升又升少過指數，跌又跌少啲。（一路都話4號係主倉，冇呃過你，實情4號係1-3加埋嘅5倍有多，所以只睇呢個都得）

3. 另外想講講，騰訊700業績明明不錯，之前都有講ADR都仲升唔少，到香港開市又係大跌，冇計。不過特別留意公司有講呢個「共同富裕計劃」，亦係習近平近來提嘅東西。

4. 去到呢刻，開始大約有眉目知道政府想點，之前係完全唔知想點。真又好假又好，執唔執行得到都好，至少見到個劇本。你見到就係「穩定」為先，唔想社會咁多不均，所以殺咗啲教育股，亦都搞埋啲科企之類。然後你亦都明白，點解呢排LVMH，愛馬士同埋Prada嘅股價大跌。順手講埋，唔使嚟問我點算好，係咪要沽咗佢，你明知我會點答，當然繼續渣。

美國話縮表，經濟數據又勁，但債息又跌

5. 美股嘅，亦係有點複雜。但首先昨日（星期三）我講話聯儲局提減少買債，美股冇乜大反應，結果星期三臨收市跌幅先加大。然後你見星期四唔止港股差，亞洲歐洲啲股市都幾差，似乎唔係咩香港中資股嘅問題，係聯儲局嘅聲明令人有啲驚。股市估值高當然就對啲消息好敏感。

6. 不過，你見去到星期四晚，美股就回穩了，標普指數同納指甚至倒升。

7. 更奇怪係雖然首次申領失業救濟數字好過預期，跌到疫情後新低，再加埋呢個減少買債嘅消息，但債息反而仲係有得跌嘅。

8. 我嘅睇法，都係相信經濟係放慢，唔係過熱。

NVIDIA 礦卡生意遠遜預期，但who cares？

9. 另外，core list 上嘅NVIDIA出咗業績，你見相對地比較少講，因為唔係太多新聞，唔似啲Big Tech咁畀你見到。業績係星期三美股收市後出，即係星期四晚反映。一度升6%，最後都有4%．另外留意，NVIDIA同Netflix都係大成交嘅，Netflix 原因不明。順手講埋微軟又創新高，你買咗未？

10. 咁NVIDIA業績當然靚，詳情你可以睇呢度。上面個圖係不同業務嘅收入，留意有個Excel，attachment有，但太過求其，所以標題都冇講。總收入65.1億，升68%（上季係84%），街估63.3億。每股盈利1.04，街估1.01。下一季指引預收入68億，市場原本係預期65億。

11. 留意掘加密貨幣嘅CMP收入比公司上季自己指引都少好多，但講緊而家只佔2.7億嘢，對公司嚟講唔係好大嘅一個生意。最大係Gaming（Graphic card）同埋Data Center

12. 最後公司話仲係有信心完成收購arm，但我估都幾難，市場都普遍估搞唔掂。掉轉睇，照計而家股價係price in 佢買唔成，如果買得成應該升一浸勁嘅。

13. 仲有留意，雖然等了又等，但都仲係好多人（包括我）估佢會入道指的。

中銀航空租賃2588業績大插，但who cares？

14. 另外，中銀航空租賃2588出咗業績。留意我係冇買過的。同埋留意寫過公司出咗盈警。盈警話純利2.4-2.6億美金，結果純利2.5億。所以業績應該non event，而之前出盈警嗰日低開倒升的。

15. 另外要講嘅，派息少咗，但個減幅同純利跌幅一樣，「比率」冇變。但留意好多公司中期同末期嘅比率唔同（畀返啲彈性自己嘛），所以睇股息比率只能睇全年。

16. 仲有，留意到負債高，net debt to equity三倍幾，但行業特色，一向係咁。大股東就係中國銀行自己，冇查有幾多錢係老母借出嚟，但就算係街外人債主都冇人驚公司會冇錢還。

17. 照舊有個Excel，attachment有，但太過求其，所以標題都冇講。

David Webb 增持佐丹奴，但who cares？（可能都有嘅）

18. 之前出咗業績都冇跟進，有機會搞返。但之前7月出盈喜寫過，話個盈喜唔係好消息，呢個月股價都係普普通通。最新消息就係David Webb有增持，多過5%所以浮咗水面。照計唔使太多政治聯想，隻嘢夠殘夠悶，派息不錯，又唔係大陸嘢（我好似冇見過佢買大陸股），啱佢口味。睇下股價有冇反應。

我買過270蚊嘅Tesla！一拆五之前喎！

19. 大市冇乜好講，講個悲慘舊故事。我在東盛/台灣佬公司年代，係買過Tesla的，五萬蚊港紙。但後來去星展嗰時要沽晒佢，後來諗起真係痛不欲生，因為我啲Tesla係270蚊一股左右。咁你話，而家都係700樓下，兩倍幾，都幾慘。

20. 錯！我嗰啲係一拆五之前嘅270蚊呀！（有日期為證！）。即係54蚊一股，後來高位900蚊，差不多20倍股！成球嘢港紙呀！嗚！！！！你邊位炒上炒落可以5萬變100萬？

21. 當然世事冇如果，但大家睇我往績，我係相當坐得嘅。就當我玩斬邊留邊（新讀者必睇），都應該剩低一半啩，都四五十萬。

22. 而錢銀都事少（但，呢度夠一層樓首期！），最慘係我冇得做大師，只能講啲升10倍嘅安踏（但，一萬變十萬港紙有鬼用），或者幾倍嘅Microsoft 之類。

23. 係喎，你見到仲有啲130蚊嘅Facebook（而家360），同埋800蚊嘅Google（而家2700），不過幸好呢啲係後來有買返嘅，但然後好似離開星展又沽咗啲。

24. 教訓？首先股票係要坐嘅，固然有啲我輸錢，但呢度真係畀你見到扑中一隻夠輸好多隻。第二，做金融工，真係越搵笨實。即係我都叫做拎到高人工，食得鹹魚抵得渴。你話普通拎兩皮嘢人工，又要要公司唔畀你買乜買物嘅，真係阻住你財務自由的。

25. 留意呢啲甚至同咩證監之類無關（美股喎！），只係公司內部嘅規定，總之就你乜都唔好買，賣條命畀佢最好。不過，你出得起人工就話啫，你話做卒仔撈三五七年都冇乜進展嗰啲，真係轉行好過。

26. 以上種種，在我本書都有講。

27. 不過冇，Life Goes on，唔錯都錯咗，只能吸取教訓。不停咁望呢啲自己沽咗嘅股票升幾多倍，好快人都癲，好似你諗返以前男朋友/女朋友後來發咗達咁。

28. 所以？我係唔沽股票的，當然你可以話我被呢啲不愉快經驗影響咗，人人都有bias，但至少我話你知我啲bias點嚟的。

================================

Facebook Page：「君子馬蘭頭」ivanliresearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

勞蘇基金：50萬港紙入場，暫定2%管理費 20%表現費，應該隨時可以拎錢走。歡迎PM我報名，現階段冇任何commitment，絶對唔使畀錢住，到時你亦可以反口唔畀。亦都唔使怕答應咗到時反口，絶冇問題，純粹等我知道有幾多人有興趣。我預會有好多人到時因為種種理由唔加入的。

聲音版/錄影版：慎防有人唔知，係有樣咁嘅嘢的。方便唔想睇字/坐車聽/公司聽。一個Post有齊純聲音（mp3）同埋影像版（我朋友碌住電話畫面讀）。 20蚊或40蚊會員限定。Sample呢度，免費試聽。