聯儲局卒之考慮減慢買債，美股跌一跌又回穩．美股垃圾倉上咗水面！跑贏大市！使Q分析咩！但都有啲啟示！騰訊700業績，太興6811盈喜．美股一年半都冇10%調整了！歐洲股市今年跑贏美股。 C朗記者會後可樂股價係升嘅。MySpace創辦人去咗邊？ (Patreon)

聯儲局卒之考慮減慢買債，美股跌一跌又回穩

美股垃圾倉上咗水面！跑贏大市！使Q分析咩！但都有啲啟示！

騰訊700業績，太興6811盈喜

每日一圖— 美股一年半都冇10%調整了！歐洲股市今年跑贏美股。

Good Read — C朗記者會後可樂股價係升嘅。MySpace創辦人去咗邊？

FB Post Summary— Donki 業績分析！BlackRock叫你買中資股！

聯儲局卒之考慮減慢買債，美股跌一跌又回穩

1. 美股方面，最大新聞應該係聯儲局會議記錄，卒之有人話考慮減慢買債。你睇指數即市圖都睇到個反應，先插（但唔算好多），但又彈返啲，再回，反應唔算太大。可能都係睇死縮表極慢—何況而家只係話減慢買，都未到縮表。詳情睇返以下嘅表，以前都係縮得慢擴得快

美股垃圾倉上咗水面！跑贏大市！使Q分析咩！但都有啲啟示！

2. 另外，都真係要講，驚唔貼冇機會。我個垃圾倉上咗水面！即係有賺（你自己加一次）！單日升4%！由買入（8月9日至而家）升1.5%。完全打真軍冇造假，畀晒你睇。

3. 有機會細講，但首先我見到同期美股仲要跌，即係垃圾倉都跑贏。另外，你見真係十隻跌咗七隻，有四隻都跌10%（我先唔會去止蝕，話知佢爆煲！），但我一隻升60%就補返晒！都真係證明一路講「一隻好股夠冚N隻衰股」，去到垃圾房都應用到。仲有，真係最初都有講，Monday.com 正係當中比較正路嘅一隻，就係佢一命救全家。但，如果我走去「止賺」，就死得。買垃圾都不能止賺，何況買好公司？

騰訊700業績，太興6811盈喜

4. 騰訊出咗業績，出面都有幾詳細嘅報導，我都唔使再加兩句。咁簡單睇，業績係勝預期嘅，當然股價炒將來，你可以話之後公司會年年蝕錢甚至消失都得，亦冇人能夠保證唔會發生。

5. 但首先，你見到Naspers同Prosus股價都升。咩公司？Naspers咪個南非股東（一路有傳只係人頭，背後係中共高官，我都信嘅），Prosus係Nasper拆出嚟，拎住騰訊及其他嘢，在荷蘭上市。Prosus掉轉又渣返住Nasper，傳說中惡名昭彰嘅交叉持股。

6. 咁一般你睇騰訊業績，睇佢地股價就知，因為剛好騰訊出業績後歐洲就開市（南非都係同一時區）。咁再夜啲，你可以睇ADR，都係升嘅。

7. 無獨有偶，上次2018年又係跌45%左右就見底，今次又係？留意2018年跌完45%後仲可以反彈兩倍。我係繼續有渣住嘅。

8. 另外，見到太興6811都出咗盈喜。3000-3500萬盈利。咁同舊年上半年比梗係勁，但留意，之前寫過，舊年下半年公司都係靠拎保就業先有錢賺，唔計的話應該蝕錢（但照樣派息），所以真係大幅改善。不過你見股價都低位反彈唔少，實情你去食飯都大約會知情況好咗，使鬼等盈喜先知，股價炒前景嘛。唔係叫你買，得個知字。

每日一圖— 美股一年半都冇10%調整了！歐洲股市今年跑贏美股。

9. 美股一年半都冇10%調整了！—呢度嘅讀者當然知道，舊年美股2020年3月23日見底。留意個圖係上個月月尾的，同埋337日係交易日，計到而家差不多360個交易日。又，升浪好長？又唔算，試過超過1000日（記住一年大約250個交易日，即係4年），癲起上嚟7年都冇一次10%調整。就算唔講咁極端，500日以上都有幾次。至於升幅？剛剛好標普指數低位升咗100%，亦未算好誇張。所以你話等調整，等到幾時？何況跌10%你又唔敢買啦。就算跌兩成，都只係返返去舊年11月尾嘅位。

10. 歐洲股市今年跑贏美股—是真的，以MSCI歐洲嚟講，仲要升得勁過美股。又，core list 入面當然有ASML愛馬士 LVMH之類（我知好多人催，但明明成日都貼，我本書都有貼）。所以一早同你講，美股又怕貴，港股又覺得廢嘅，可以買歐洲ETF的。你咪去搵MSCI 歐洲ETF，一般收得最平嗰隻就得。另外，美股有FAAMG，但歐洲有GRANOLA，都有啲我講過嘅公司，包括ASML同LVMH

Good Read — C朗拿度記者會後可樂股價係升嘅。MySpace創辦人去咗邊？

11. C朗拿度記者會後可樂股價係升嘅—非常簡單而且好嘅文。恥笑之前咩C朗飲水令可樂市值蒸發300億港紙之類嘅垃圾報導。值得你細心諗下。首先，300億聽落好多，但有冇諗過可樂市值係20000億？另外，你如何確定個「因果」？市場從來唔會話你知點解跌，媒體呀分析員都係搵啲嘢講，但幾時係真係「因為」呢樣嘢跌，幾時唔係，根本冇人有答案，係藝術，靠你功力同水平。最重要係，根本股價在C朗拿度記者會前已經跌，佢飲水後反而升，你睇下時間就知。你心諗，扯，唔好咁認真啦。冇錯你當係垃圾新聞睇咪唔使認真，但至怕好多人睇睇下就潛移默化影響埋判斷。另外你仲可以諗下，點解會有呢啲新聞？點解大家都瘋傳？同假新聞一樣（但呢單唔係假新聞，只係相當垃圾嘅新聞），因為佢打中你想要嘅嘢，你就係想要呢啲即食嘅嘢。咁你話，喂，成日咁認真好累喎。冇問題，咁你咪走去買ETF算數，唔係個個都要做分析員。唔識唔緊要，但，就千萬唔好以為自己真係識。

12. MySpace創辦人去咗邊？—啲回憶返晒嚟！Myspace真係算係第一代比較像樣嘅社交網站（之前有Friendster，但未到咁規模）。一度係全世界流量最高嘅網站，直到Facebook 出現。有趣嘅係創辦人Tom Anderson，冇乜人知佢乜水，同而家科企啲小朋友呼風喚雨唔同。最開心係佢在個網高峰時6億美金賣走，當然唔係拎晒所有錢，但有幾千萬美金已經夠佢歎世界，更開心係買家摸晒頂（梅鐸嘅新聞集團），之後甩手蝕九成幾。正如我講嘅：做個普通有錢人，同你一齊仇視啲超級富豪。咁先最開心，好多人甚至懷念佢，冇賣你嘅data，冇干預大選。但你亦見到佢嘅影響力同Facebook仲係爭好遠。彩蛋：你一加入Myspace，就會成為Tom Anderson嘅朋友。正如2017年之前，你在Facebook係不能Block走教主嘅

FB Post Summary— Donki 業績分析！BlackRock叫你買中資股！

13. Donki 業績分析！ — 實情只係求其講咗兩句，慳水慳力又有啲收視。想講嘅係，Donki亞洲（唔計日本，另外留意美國都好大），之前財年200億收入（yen啦梗係），剛剛一年係500億。新增嘅呢300億，有200億嚟自香港，驚唔驚人？當然香港開咗唔少新舖，台灣就只得一間，咁樣比又唔公平。但大家又知道，你開一間啲人就冇得揀，集中晒，但你台灣開5間，收入會多啲，但唔會係5倍的，所以應該計same store sales之類會好啲。以前講奈雪の茶都講過。另外留意，海外新增收入雖然多過日本本土，但盈利反而爭好遠，唔知係外國貴租定其他成本貴。

14. BlackRock叫你買中資股！ —冇錯，就係「門徒」，呢啲先係最大嘅財演。你唔買佢邊有生意？所以我唔係去買中資股（都有買些少），而係去買BlackRock．正如JP Morgan話啲客話加密貨幣係老鼠藥，但照樣開平台畀啲客買 — 你要死，唔通唔畀你死？當然一般嚟講販毒嗰個唔會自己食埋一份嘅。所以我都有買JP Morgan

================================================================

Facebook Page：「君子馬蘭頭」ivanliresearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

勞蘇基金：50萬港紙入場，暫定2%管理費 20%表現費，應該隨時可以拎錢走。歡迎PM我報名，現階段冇任何commitment，絶對唔使畀錢住，到時你亦可以反口唔畀。亦都唔使怕答應咗到時反口，絶冇問題，純粹等我知道有幾多人有興趣。我預會有好多人到時因為種種理由唔加入的。

聲音版/錄影版：慎防有人唔知，係有樣咁嘅嘢的。方便唔想睇字/坐車聽/公司聽。一個Post有齊純聲音（mp3）同埋影像版（我朋友碌住電話畫面讀）。 20蚊或40蚊會員限定。Sample呢度，免費試聽。