太古19太地地產1972中電訊728資金避風港，友邦1299業績，東岳189理文746急回。Walmart HomeDepot 業績好都照跌，乜事？三星隻2814 FANG+跟得唔足？我去開咗個USMART戶口，為咗月供美股！ (Patreon)

港股：太古19太地地產1972中電訊728資金避風港，友邦1299業績，東岳189理文746急回

美股：Walmart HomeDepot 業績好都照跌，乜事？

三星隻2814  FANG+跟得唔足？

我去開咗個USMART戶口，為咗月供美股！

1. 市況麻麻地，今日寫咗兩個一路想寫而又唔係好貼市嘅故事。原本仲有一個，可能星期四寫。但都快講下市況。

港股：太古19太地地產1972中電訊728資金避風港，友邦1299業績，東岳189理文746急回

2. 港股就固然弱，不過呢幾個星期（定幾個月？）都係咁上下大調，科指就跌得甘，國企指數好少少，恒指再好啲。本地股，或者個別一啲大陸股係成為避風港。留意唔一定係啲公用股添，只要覺得政策唔多會打嘅都會有資金。例如太古19，太古地產1972或者中電訊728之類

3. 友邦1299一路係我港股愛股之一，亦都長期持有。昨日（星期二）開市前出業績（一向傳統），相當唔錯，在咁嘅市況下股價都升到3%。今年股價表現？睇你點睇。我覺得係未及我期望，但講咗好多次，市場先唔Q會理你乜期望。咁客觀數字，叫做年初到而家打個和，跑贏指數，還好。亦留意之前叫留意係因為估通關，結果一路等極都未通，難怪股價不如預期。當然你亦可以話未通關都跑贏指數，通埋仲得了？我就認為一日未通關，一日仲有得炒，當然我好早買落，亦有月供。唯一有啲擔心係啲債息咁低，唔多唔少都影響公司。

4. 另外留意，理文746同東岳189雙雙急跌。其實理文4%都唔算咩好特別，況且原因好簡單：除息，你見跌0.27，但根本派息都0.26。東岳嘛？冇乜特別，貴嘛，去到某個位咪會咁。當然唔好問我之後會唔會彈返，但整體你睇大陸經濟都係放慢，照計啲上游價格唔會一路高企。所以理文都係叫你至少沽一半。

美股：Walmart HomeDepot 業績好都照跌，乜事？

5. 美股呢？先講經濟（都有時關啲事嘅），呢排我都係覺得明顯之後嘅主調係放慢，唔係過熱。中國嘅情況已經睇到。美國呢？上星期出嘅消費者信心指數遜預期，剛出嘅零售銷售數字亦都抵過預期。

6. 當然咁不代表股市一定大跌，純粹畀你知個世界發生緊乜事。之前咩通脹呀，經濟過熱呀，甚至縮表加息，都可能係過份擔心。

7. 話就話道指一度跌500點，但一樣係收窄唔少（星期一由跌300變倒升添），況且仲要剛剛先創新高，股咩災？不過跌勢幾全面就真，我嘅core list都冇幾多隻有像樣升幅

8. 亦特別留意埋，兩間相當重要嘅舊經濟公司都出咗業績，雖然兩隻我都冇買過亦冇乜提過。一間係Home Depot，一間係Walmart，明明兩間都勝預期，但股價都要跌。原因都係嗰啲，可能指引保守啲，或者啲細嘅數字不如意。記住股價炒將來，但而家好多時啲「業績」勝預期都一早知，所以似乎經常都出現業績勝預期都股價跌。亦唔一定係咩凶兆（星期一蘋果同微軟先新高喎！），只係畀你知道發生咩事。

三星隻2814  FANG+跟得唔足？

9. 之前都有人問我Big Tech買邊隻。你問我，就當然全部買晒都可以，大包圍，美股一股一股咁買，每隻買一股都係美金7000有找，港紙5萬3。但當然你每樣一股，就係會集中在兩三千美金一股嘅Google Amazon。所以如果想equal weight，最貴嘅係Amazon，一股2萬6港紙，咁即係你大約每隻都買2萬6，夾埋13萬。

10. 5萬3又好，13萬又好，話多唔多話少唔少，如果初出嚟打工真係未必有，況且明明埃汾教路都話要分散。咁點算好？

11. 上次咪講過有隻ETF，三星嘅2814，而家差不多三個月。4千蚊手，夠晒實惠，如果冇咁多錢，又或者唔想開美股戶口嘅可以買。再一次講明，我之前有幫三星做marketing，但呢隻冇收受任何金錢或非金錢利益的。我自己仲要有買隻亞太房託3187添（應該問佢地收返錢）。但2814我就冇買，我直接買美股嘛。

12. 不過仲有個小問題，有讀者買完，都同我講2814「跟得唔足」。咁「跟得足唔足」的確係買ETF甚至其他嘢好重要嘅考慮，以前咩炒輪嗰啲，一個「引伸波幅」就玩謝你，正股升但你隻睇好嘅輪都跌，吹咩。或者正股升5%隻輪升8%，正股跌5%隻輪跌12%之類嘅東西。

13. 詳情，你當然應該去問返發行人（都話我冇份推廣）。但我在局外人角度研究下，「跟得足唔足」有兩個層面，第一係佢跟得足唔足個指數。咁人地寫到明追邊個指數，係跟NYSE FANG+ Index，就冇得呃嘅，當然仲有少少偏差，會係啲開支呀，或者時差呀之類嘅問題。大約見到，都跟得足。

14. 但第二個層面「跟得唔足」，就睇隻指數係咪啱你心水。FANG+ Index係乜？實情原本篇稿都有講，10間公司，全部10%比重。冇Microsoft喎，但有Tesla Twitter Netflix Nvidia，仲有中資百度同阿里巴巴。所以你咪見呢排麻麻地。咁呢個不能話人地出術，一早講到明係買乜的。如果你唔想要中資股嘅，就唔啱你。

我去開咗個USMART戶口，為咗月供美股！

15. 是咁的，我去咗USMART開戶。咁其實我在富途，華盛，IB都有戶口。再加上陳年用落嘅其他傳統銀行咁。你心諗，做乜春要走去門市？其實係唔使的，不過我咁啱出開旺角咪去埋。過程十分順利，都讚下啲員工

16. 如果之前7月31日有去過我講座嘅，都會見到有USMART嘅人。甚至你逢星期二睇我在HomeBlogger嘅節目，都會見到佢地贊助。但我鄭重講返，我係冇任何金錢或非金錢利益的。當然佢地有贊助HomeBlogger，但同我無關。你見我呢度都唔會有開戶link畀你。

17. 點解我去開？第一原因係拎著數，你見而家開戶仲係送股票，都七八舊水，不錯的。富途之前都送咗成千銀。

18. 不過要講，USMART仲有一樣嘢，係富途華盛IB好似冇嘅。亦係我去開嘅主要原因。就係佢有月供美股。

19. 固然美股可以一股股咁買，講真你真係自製月供都得，咪自己每個月出糧去買，但真係唔好睇高自己嘅自制力同紀律，十個有九個最後都係手痕，見升咗又可能唔買，見跌又唔敢買。

20. 呢個亦係我以前寫過，雖然理念上我反對MPF（我嘅錢點解要你迫我儲），但實際上世界好多人係自己唔儲錢然後老咗冇飯開又去鬧人的。同樣地，呢個亦係你供樓嘅一個意外利益，幫你自動儲錢。聽落幾悲，但人性就係咁。

21. 我做乜會去月供美股？或者我供邊隻？好簡單話你知，就係SPY，標普500指數ETF。

22. 原因？固然我倉位大約係六成美股四成港股（未計層樓），但，港股我都有唔少係盈富基金，反而美股我係完全冇一啲跟指數嘅嘢。固然我已經夠分散，新舊經濟都有啲，但都覺得應該加大啲跟指數嘅嘢。

23. 今日你當然覺得Big Tech呀 ASML 呀 LVMH無敵，但十年廿年後呢？畢菲特之前講過，30年前嘅20大企業，而家已面目全非。近期FT都有人講（應該畀錢先睇到）。固然Big Tech可能this time is different，但，都係小心啲好。指數本身就係一個汰弱留強嘅機制，唔完美，但亦唔會落後大勢好多。

24. 用我本書嘅講法，核心（或者叫膽）應該係啲指數ETF，閒錢先玩個股。港股我做到，但美股反而我自己都唔係咁做，應該調整返啲。

25. 暫時我先剛剛開戶，未完全睇到好唔好用，遲下分享。咁當然券商梗係會賺你錢啦，唔收佣咪在啲你睇唔到嘅地方搵你錢。有冇諗過銀行啲月供股票收你咁平，賺乜？咪就係用啲差嘅價畀你。但即係我呢啲叫做長線嘅，咪冇乜大所謂。

26. 而公平講句，USMART嘅月供美股，唔少細節都比傳統啲銀行月供港股更好。例如畀你自己揀邊日呀，唔夠錢會在你其他戶口扣呀，要更改嘅通知期唔太長呀。

27. 再講一次，絶非廣告。開戶link我都唔貼，又冇referral code唔放上Facebook，你咪知唔係廣告。我唔介意做廣告，亦會做，但必定話你知。盡量做到maximum transparency，我做人嘅宗旨（明顯受Ray Dalio同NetFlix CEO Reed Hastings影響）

================================

Facebook Page：「君子馬蘭頭」ivanliresearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

勞蘇基金：50萬港紙入場，暫定2%管理費 20%表現費，應該隨時可以拎錢走。歡迎PM我報名，現階段冇任何commitment，絶對唔使畀錢住，到時你亦可以反口唔畀。亦都唔使怕答應咗到時反口，絶冇問題，純粹等我知道有幾多人有興趣。我預會有好多人到時因為種種理由唔加入的。

聲音版/錄影版：慎防有人唔知，係有樣咁嘅嘢的。方便唔想睇字/坐車聽/公司聽。一個Post有齊純聲音（mp3）同埋影像版（我朋友碌住電話畫面讀）。 20蚊或40蚊會員限定。Sample呢度，免費試聽。