港股差咩？ 但我個倉跑贏三大指數。蘋果 微軟 新高，仲有SPGI 同 Black Rock。一半美股息率高過美債。Amazon 廣告越做越勁。恒生科指仲係貴過納指好多。 美股而家仲平過舊年。經濟師冇撚用。返工唔係要令你開心。 (Patreon)

快評兩句—港股差咩？ 但我個倉跑贏三大指數

大師冇點你—蘋果 微軟 新高，仲有SPGI 同 Black Rock

每日一圖—一半美股息率高過美債。Amazon 廣告越做越勁。恒生科指仲係貴過納指好多

Good Read — 美股而家仲平過舊年。經濟師冇撚用。返工唔係要令你開心。

FB Post Summary— 金本位制50年死忌

1. 今日嘅每日一圖同Good Read都好豐富，所以呢度寫短啲。

快評兩句—港股差咩？ 但我個倉跑贏三大指數

2. 港股嘅，繼續麻麻地，中國出嘅經濟數據差，但你見都只係啲科技股重災區，其他一大堆本地股（太古19友邦1299），體育用品股（李寧2331安踏2020），化工股（東岳189同理文化工746），品牌股（歐舒丹973，Prada1913）都仲有得升。太古你可以話殘，但其他嗰啲都唔算咩極殘，見到個市又唔係好差，只係換去啲其他行業。

3. 教訓？好老土，但都係嗰句，分散。你見我啲港股倉都跌得少過指數，皆因入面都夠散。話埋你知，4號倉先係最大，其他123都好細，冇必要呃你話1/3最大。至於4號倉有乜？其實上次尖沙嘴講座有講，可能遲啲先再公開，但絶對係啲悶嘢，甚至你會覺得「唔係下話？」嘅嘢。例如有匯控5（講咗粗口冇？），有地鐵66，有之前日日新低嘅平保2318等等，呢啲都係歷史遺留落嚟。咁當然都有安踏2020，港交所388，騰訊700咁嘅。

大師冇點你—蘋果 微軟 新高，仲有SPGI 同 Black Rock

4. 美股嘅，你見啲中概股都跌得幾勁，同香港啲中資科技股情況差不多。不過市又唔係差，開市時都跌唔少，尾市已經收復唔少失地，道指由跌200變倒升。

5. 你見我地core list呢四隻仲要創新高。另外你可以留意下，呢四隻都唔係啲十分sexy嘅股票，除咗Black Rock同SPGI係相當悶嘅舊經濟股，蘋果同微軟在Big Tech中都係好似悶啲（但微軟股價唔失禮），悶係好事，記得分散。

6. 特別留意係蘋果會出新電話，我都想寫篇文講。其中一個重點係鏡頭靚，啲相靚 —但不方便嘅真相係啲相會整到好大張，咁你就要買大啲容量嘅型號啦 —就係咁樣搵你錢，你都知道啲容量雖然要成本，但對蘋果嚟講好少錢，賣到你度就貴一兩千了。我剛剛先見到，iPhone12 Pro Max，512G貴過256G千七蚊，咁你地係專家可以研究下，成本會多咗幾多？我估百幾兩百蚊？定唔使？遲下會寫文講。

每日一圖—一半美股息率高過美債。Amazon 廣告越做越勁。恒生科指仲係貴過納指好多

7. 一半美股息率高過美債—指美股標普指數成份股，留意呢個比例都係近N年嘅新高，特別係你仲要留意呢十年科企當道，好多都唔派息，但居然呢個比例仲咁高？不過，有啲人用呢樣嘢去講股市平，我覺得係錯的。你唔應該拎股息率去做估值—好簡單，我當聽日道指全部換晒啲唔派息嘅成份股，唔通就會跌好多？唔會的。一間公司嘅派息其實唔太影響股價，特別係美股。

8. Amazon 廣告越做越勁—諗起Amazon，普通人都係諗起網購。Tech人會諗起AWS。呢度嘅讀者都知，網購收入極大，但利錢好低，反而AWS利錢先重，差不多貢獻一半盈利。不過，Amazon嘅廣告收入其實都越做越大，你見market share唔細，仲要一路升，只係因為間公司收入太大，望落唔多咁。特別留意，Amazon嘅廣告收入，比得上Youtube ！係咪好震驚？（你話，唔係喎，個圖見到Google仲係多好多—因為Google唔止Youtube嘛！）

9. 恒生科指仲係貴過納指好多—又一挑戰你直覺，畀夠兩個圖你，但真係的，雖然恒生科指跌咗咁多，納指都升咗唔少，但一路恒生科指仲係貴過納指，一直都係，至少睇預期市盈率係（雖然個溢價收窄緊）。最大原因唔係騰訊阿里巴巴（估值跌咗好多），反而係其他蝕錢嘅公司。你話因為大陸打壓所以盈利預測調低咗？部份係。但你見一直恒生科指都貴過納指，可能呢個先係跌得多嘅原因。

Good Read — 經濟師冇撚用。返工唔係要令你開心。美股而家仲平過舊年。

10. 又，建議大家去訂medium，早年我都有寫而家就冇。點解？因為唔少我分享嘅文都會係medium。會員就免費嘅，但有時有啲作者會限付費會員先可以睇到。咁都係一年50蚊美金，唔會分作者，一訂就所有人睇晒。

11. 經濟師冇撚用 — 呢篇真係正到無倫，必定要睇，亦唔長。呢位仁兄嘅文我亦耐唔耐貼，因為同我想法幾似。呢篇講嘅嘢，就係好多人投資呢，係諗拿呢個地區經濟點點點，所以我買乜乜，就會點點點。可以話你知係相當錯嘅。作者入面再引Howard Marks嘅文（我遲下會再貼）嘅講法，好多人就真係信啲大師講，經濟會點所以股市會點（但講咗幾萬次股市同經濟脫節，況且仲要考慮凡事有個價）。背後其實反映嘅係乜？反映人就係乜都要有意見，阿富汗局勢我又有意見，烏克蘭經濟我又識。我嘅文都寫過好多次，呢個社會係視大聲就有料，有信心就識嘢，答得快就啱—但偏偏我係一個經常都話你知「我唔知」嘅人，注定上電視啲觀眾同導演都唔鍾意，因為佢地要一個乜都即時答得好有信心嘅人 —可惜，咁係唔會幫你搵到錢的。投資好簡單，你要承認呢個世界上，好多嘢根本你係唔知，亦都唔識。亦因為咁，你見我嘅文，成日都寫呢句「如果我錯呢？」。但，好多其他人去講嘅投資故事，永遠好似一切在佢計算，咁樣就會咁然後就會咁—因為要咁講先有人信。正如Howard Marks話齋，經濟預測嘅嘢，一係就根本一街都知全無意義，一係就係風水佬故作驚人聽日支爆後日納指四位數，根本100次都唔會中一次，中左都搵唔到錢。

12. 返工唔係要令你開心—medium文。特別比年青讀者睇。我地年紀大啲嘅，都識講份糧包埋，但新一代覺得難聽過粗口。當然成長環境唔同，社會又唔同咗，仲講咩以前返餐廳師傅打到你飛起咩。但，本質其實冇變到，頂多人工畀多啲，但返工當然唔係要令你開心。我成日講嘅故事，如果你返工好開心，即係公司係迪士尼，就應該佢收你錢，唔係佢畀錢你。所以你在工作搵快樂，都幾多餘。你打工就當然係成全人地嘅夢想（所以，要買股票！），咁理想地當然係自己做老闆（我而家算係），但，在你做到呢步前，就忍佢老味，盡量搵最多錢，學最多嘅嘢—「同埋用公司時間做自己嘢」

13. 美股而家仲平過舊年 — 升咗咁多仲平過舊年？夠晒違反你常識，但睇埋圖你就明。因為講預期市盈率，咁一來舊年你係計今年盈利，但今年就計下年。二來，啲盈利仲不斷上調嘛。留意呢度都只係講市盈率，甚至都未講債息嘅影響。所以真係唔好以為美股升咗一倍就貴咗一倍，可能仲平咗。

FB Post Summary— 金本位制50年死忌

14. 金本位制50年死忌 —都已經係寫咗第二個FB Post，但都只係預告。嚟緊應該會在呢度寫個專題。金本位制收工，法幣任印，改變咗打後五十年嘅世界，同之前五十年好唔同，但唔多人講。咩背景？打後點？我都會寫文講。

================================================================

Facebook Page：「君子馬蘭頭」ivanliresearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

勞蘇基金：50萬港紙入場，暫定2%管理費 20%表現費，應該隨時可以拎錢走。歡迎PM我報名，現階段冇任何commitment，絶對唔使畀錢住，到時你亦可以反口唔畀。亦都唔使怕答應咗到時反口，絶冇問題，純粹等我知道有幾多人有興趣。我預會有好多人到時因為種種理由唔加入的。

聲音版/錄影版：慎防有人唔知，係有樣咁嘅嘢的。方便唔想睇字/坐車聽/公司聽。一個Post有齊純聲音（mp3）同埋影像版（我朋友碌住電話畫面讀）。 20蚊或40蚊會員限定。Sample呢度，免費試聽。