5000字 MIRROR/VIUTV aka 8號仔電訊仍fall（即係香港電訊6823）分析 (Patreon)

5000字 MIRROR/VIUTV  aka 8號仔電訊仍fall（即係香港電訊6823）分析

8號仔係老母但先300億市值，個仔6823就800億市值，搞乜？

6823有乜業務？8號仔又有乜業務（如有）？

6823 邊瓣貢獻收入多？利錢呢？

8號仔邊瓣貢獻收入多？利錢呢？

結論：李家嘅旨意點係你凡人估到？不過，三父子都係一撚樣的

5000字 MIRROR VIUTV 8號仔電訊仍fall（即係香港電訊6823）分析

1. Mirror Error 好紅，加上人人唔睇TVB，好多人都諗，喂，咁VIUTV（唔分大細楷了）咪好掂？收視好好喎，照計廣告收到手軟？咪對業績好大幫助？咁係咪應該買8號仔電訊仍fall 或者6823香港電訊？呢篇文就幫你研究下。

2. 畀定個TLDR你：正如好多投資嘅嘢一樣，答案係：Yes and No，Depends。好快咁答你，VIUTV佔8號仔根本好少，可能好有潛力，但你見根本過去一兩年股價都係食蕉，真係work嘅冇理由冇人炒啦下話？原因係兩間公司，其實都算經營不善，負債極多。但That said，股票炒前景，兩間公司經營差負債多，一直都知，股票炒將來，又未必冇得炒，甚至你當黃色經濟圈炒都可能得，夠人買咪得。（雖然李澤楷係政協，但who cares，王維基夠政協）

3. 況且，重點應該係OTT，即係NOWE同黃VIU。我係可能會買少少。但記住，李澤楷同佢阿哥老豆都係一撚樣的（朋友講，我原文照錄），佢地諗嘢，真係同你唔同。佢地都係做刁嘅人，最後應該都係會玩拆骨，重組。不過可能玩到你謝先。在李澤楷啲公司身上賺錢，似乎幾難，難過佢老豆好多。

4. 唔想深究嘅，睇到呢度都應該完。當然想知多啲嘅，睇落去，但比定心理準備你，都幾煩，因為佢兩間公司就係咁煩，佢阿哥佢老豆啲公司都係咁。就係要你睇唔透。建議你開住個Excel嚟睇文

5. 亦都順手講下，寫一篇呢啲咁嘅文，用嘅時間多過我平日5篇夾埋，只係個Excel都有血有淚。當然反應好我就一路會做，但即係第時到我忙啲（例如有得去日本嗰時），就未必成日有呢啲週末專題了。話定你知

8號仔係老母但先300億市值，個仔6823就800億市值，搞乜？

6. 首先再講一次，李澤楷同佢阿哥老豆，都係做刁嘅人。呢句嘢你可以慢慢領會，但由最初長實和黃點以小控大，李嘉誠當年點賣橙，想賣百佳，李澤楷點蛇吞象玩到8號仔人人聽到都爆粗，到早幾年嘅世紀重組，你都大約會明。我朋友（真係我朋友唔係我）咬牙切齒咁形容，佢三仔爺係一撚樣的。佢平時唔多講粗口，亦唔係因為佢輸咗錢，而係真係要強調。

7. 今日要講嘅，兩間公司，第一間8號仔，電訊盈科，PCCW，老母。第二間6823，香港電訊，HKT。首先講8號仔，大股東係李澤楷，渣30%，但二股東係中國聯通，渣18%（呢點都十分重要）。

8. 但留意，8號仔渣住 6823，51.94%（以下當52%）。呢度又涉及啲會計嘅技術問題，冇學過嘅繼續睇，有學過嘅去下一段。由於8號仔渣過半，全數控制6823，所以6823嘅收入，係全數計晒入8號仔嘅！即係6823 156億收入，你在8號仔就會見到入晒呢156億，而唔係81億。咁著數？咁但去到純利，就要扣返出嚟的。所以你會見到有舊嘢叫「少數股東權益」（Minority interest, MI），又名「非控股權益」（Non-controlling entity，NCI）減返出嚟，減返屬於其他48% 6823股東嘅利潤

9. 然後你一望，8號仔320億市值，6823就820億。個仔仲大過老母兩倍。因為唔係渣100%嘛，但你計下，820億嘅52%，都430億啦。即係8號仔其他業務送嘅？理論上都係。但首先呢個現象好常見，holding company discount，套餐平過散叫。另外，8號仔啲其他業務，就真係唔多吸引的。

10. 最後你仲要留意，8號仔舊年下半年（8月）將收費電視（即係NOW）賣咗畀6823，老母賣畀仔。點解咁做？我都唔知，但請參考朋友嘅名句。咁你話有冇收益？答案係冇，老母畀仔。留意舊嘢就去咗6823入面，6823之前冇NOW。但對8號仔嚟講，係一樣的。只係以前嘅NOW係分開一味業務，而家嘅NOW係6823嗰堆嘢嘅一部份。

6823有乜業務？8號仔又有乜業務（如有）？

11. 好啦，然後我地睇下，兩間公司有乜業務。先由個仔6823睇起。你鍾意可睇業績，但我保證你發火。我幫你搞。樓上係公司業績寫嘅各種metrics，8號仔直頭冇出。

12. 香港電訊，顧名思義主力就係電訊，呢度係指固網。入面再分本地同國際。本地嘅，再分開數據，電話同其他。電話不用講啦，留意企業用戶都仲唔少嘅。數據正係寬頻，網上行，家居同住宅都有，加埋你街邊用嘅Wifi之類。留意和記寬頻唔關事。國際嘅，甚麼長途電話呀，Reach呀電纜出海呀嗰啲。

13. 第二味，就係流動通訊。留意佢有分開流動通訊服務，同埋產品銷售，特別拆開的，你見之後計EBITDA利錢都拆開，因為產品銷售極之冇肉食。流動通訊，就係CSL，1010同Sun Mobile（我都唔知仲存在！）。留意3台唔關事。

14. 第三味業務，舊年下半年先開始有（留意唔足半年），老母度過嚟嘅收費電視，即係NOW台，收嘅係廣告費同月費。

15. 仲有其他，包括The Club，同埋HKT Financial Services—呢度有大家呢排關心嘅Tap and Go。

16. 講完個仔，講埋老母。8號仔嘅業務，當然就包括以上全部嘅嘢，在8號仔盤數係一舊大數。以前8號仔仲有NOW台嘅數，而家就包咗落去6823個大數。

17. 仲有乜業務？OTT，over the top。即係乜？直接用網傳啲內容畀你，唔同大氣廣播或有線電視咁。NetFlix就係OTT。在8號仔，即係NOWE，同埋黃VIU（同VIUTV區分所以咁叫），留意8號仔嘅OTT唔止做香港

18. 仲有？免費電視，正是VIUTV。以及「企業方案」，呢舊嘢都貢獻幾大，包埋數據中心，但剛賣咗。當然仲有冇乜值得講嘅盈大地產（432）。

19. 下面就詳細講。要了解阿媽，先講個仔，所以講6823先。留意個Excel有兩個TAB，我啲數嘅頂頭都加埋公司冧把，同埋用唔同色，費事你搞亂。

6823 邊瓣貢獻收入多？利錢呢？

20. 呢段講6823各種業務，唔清楚有乜嘅睇多次第11—18段。咁邊樣貢獻最多？當然就係電訊（即係固網）。佔咗三份二收入。流動通訊就貢獻三份一。NOW台同其他雞碎咁多，留意加埋超過100%，因為有啲「抵銷」，內部你幫襯我我幫襯你要扣返。

21. 再睇深入，電訊（固網）入面，本地七成國際三成。本地入面嘅，數據收費貢獻過半。流動嘅，台費貢獻大半，銷售產品細半。再講一次公司特登分開，因為利錢好低的

22. 然後你睇趨勢，基本上，全部都冇乜增長。電訊市場成熟晒，全世界嘅電訊商都唔係點賺到錢，commodity business 咁滯，邊間平我用邊間。N年前都仲因為2G上3G同埋新智能手機賺過一轉，而家冇了。投資期可能過咗，但年年食折舊攤銷都夠大鑊。但呢啲業務其實好有戰略同政治意義，所以當年新加坡先要想買香港電訊（N年前，唔係而家呢間），點解中資要支持李澤楷蛇吞象。

23. NOW台收入按半年大升，主要係因為：舊年下半年冇計足半年。不過公司話廣告升咗48%，歐國盃收視好喎。但你見，公司收入半年近160億，NOW台貢獻12億，10%都冇。

24. 睇返公司盤數，你見到銷售成本都食咗你一半。但仲要扣其他行政成本，特別當中過半係折舊攤銷（Depreciation D 同埋Amortization A），呢啲係電訊股嘅特色，咁多資產當然年年折舊，仲有投頻譜牌照嘅錢應該係年年攤銷，根本冇得慳。亦因為公司負債重，利息開支（Interest I）都幾係嘢，幸好近N年都係低息環境。

25. 然後睇6823嘅各種業務貢獻幾多盈利。留意冇得睇純利，公司只係同你講EBITDA，即係未扣利息I，稅T，折舊D同埋攤銷A嘅！咁所以，你見出面啲友講咩VIU將會賺錢，完全係亂咁嚟。人地公司指嘅係EBITDA Positive，而呢個同「賺錢」真係相當大距離，因為你都見電訊公司嘅DA同I都係相當大嘅，大家小心。不過呢度下面我地都係講EBITDA，睇下各項業務貢獻

26. 睇EBITDA，亦係電訊（固網）佔三份二，流動通訊佔三份一左右，即係兩者嘅利錢（EBITDA margin，EBITDA除以收入）差不多。留意流動產品銷售利錢極低，之前直頭EBITDA負數，拖抵咗流動服務嘅高margin，拉勻就會同電訊（固網）差不多。亦留意有啲其他業務係EBITDA輸錢。NOW 利錢都低，低過電訊（固網）同流動通訊業務，但至少係EBITDA正數的。

27. 最後講多次，呢堆嘢只係各個業務嘅EBITDA，然後ITDA呢四味就不用分咁細，全部中央處理。爭幾遠？例如你睇上半年，EBITDA 57億，純利得19億，剛好得返三份一。陣間你睇8號仔仲爭得遠。

28. 睇埋派息，一路keep 一年0.70左右，應該會維持到，但公司負債相當重的。呢個係行業本質，Capital intensive，重資產嘅行業。留意亦對估值好不利，因為近十幾年投資者都鍾意平台，輕資產，asset light model。

29. 睇返balance sheet，1040億資產，950億固定，當中有500億goodwill（以前啲文解過係乜，就係「收購嘅溢價long住舊數放呢度」，並唔係咩品牌價值，唔好畀中文嘅「商譽」誤導），同130億無形資產，呢啲就係每年嘅折舊同攤銷來源。

30. 另外，公司負債680億（但唔好同Debt撈亂，有啲唔同），咁你計下，equity（或者叫net asset淨資產）係資產減負債，即係360億。嘩，減埋堆Goodwill，tangible asset咪負數？

31. 最後，公司Net debt 400億。頭先講過，淨資產得360億。Net debt to equity 110%，幾誇張下。當然公司係用net debt to asset，話你知40%。但一般分析員都係用Net debt to equity。

32. 結論？成熟嘅業務，唔知增長亮點在邊，負債又重。係年年派到息咯，但除此以外仲有乜？當然，請睇返我朋友評李氏三父子嘅一句。

8號仔邊瓣貢獻收入多？利錢呢？

33. 好啦，到8號仔啦喎，我就將頭先嘅6823嘅操作嚟多次。你鍾意可睇業績，但我保證你發火。我幫你搞。

34. 再煩氣提你，因為渣住52%嘅6823，所以6823嗰156億半年收入，係全數100% consolidate 晒入去的，有數你睇。亦即係，根本8號仔嘅收入，有86%係6823嘅嘢。已經唔記得6823有乜嘅，睇多次第11-18段。

35. 咁，除咗6823嘅嘢，仲有乜？有乜嘢係在8號仔而唔在6823？有，主要就係企業方案收入，佔8號仔收入15%。至於盈大地產？都話可以不理。NOW台？冇聽書？都話已經在6823入面。未入之前？都不過係5-10%總收入

36. 其他仲有乜？就係OTT（NOWE+黃VIU），佔咗4%收入．至於VIUTV？更少，佔收入1%。

37. 實情你睇條大數都知，8號仔一年收入360億，NOW台可能貢獻到30億。VIUTV？往年3億，今年可能去到6億咁。都只係佔好少

38. 另外你亦可以留意下，TVB香港廣告收入2017年嗰時24億，去到舊年得返9億，冇咗15億，但去咗邊？幾明顯，大多數都唔係去咗VIU台度，而係消失咗。想講嘅係，傳統媒體嘅廣告，仲有幾多空間？你搶晒TVB都返唔到TVB以前嘅水平的。

39. 然後睇下趨勢，6823嗰堆講咗，冇乜增長。OTT業務公司講到好勁，見到有增長但唔係好誇張，VIU台增長係快（另外好似廣告收入外仲有啲藝人收入）。但最殺食反而係企業方案，悶聲發大財，增長都快。

40. 去到利錢，睇不同業務EBITDA，更加係6823單天保至尊，貢獻晒全部57億EBITDA， EBITDA margin有36.5%。企業方案都係正數margin，但得17%．亦即係話，其他全部係EBITDA都負數，都未同你計攤銷折舊利息。但留意OTT同VIUTV都就快會變EBITDA positive，不過，唔係叫「賺錢」

41. 頭先都講，6823嘅半年EBITDA 57億，但去到純利得返19億。8號仔仲精彩，半年EBITDA 56億，但純利？係蝕3億嘅。可見堆 ITDA就食走你60億！而你班友仲當 EBITDA positive 即係「賺錢」.

42. 股息方面，都冇話你知，公司近三個半年都係輸錢，不過仲係堅持一年派返大約0.32股息，輸錢派息有乜後果？一路食走個book value咯．同時你亦見到，公司嘅負債比率，係仲高過6823嘅。

43. 你個帳面值，由2020年頭嘅155億，一路縮到而76億，只係一半年，三次業績。我亦懷疑因為咁，所以公司之前要賣咗數據中心，book 返14億收益。留意數據中心都係在「企業方案」。

結論：李家嘅旨意點係你凡人估到？不過，三父子都係一撚樣的

44. 結論？李澤楷啲嘢，邊係我地凡人諗到。佢當然係遲早會搞啲嘢，但好難估到佢想點搞，幾時搞。記得N年前搞過私有化，衰咗。早排又有出Tender買你啲股票。

45. 將來？好有機會係分拆OTT上市。你見啲媒體同KOL都成日吹，大約你估到乜事。講到東南亞Netflix咁喎，排第二。事實主要市場在泰國印尼，收訂閱費，應該拆出嚟有啲吸引力。

46. 我認為？呢壇爛攤子，都唔知點玩落去，8號又好6823又好，每年只係啲折舊攤銷都玩死你。但不過，股票炒前景，呢啲嘢已經反映晒落佢低殘嘅股價。將來如果真係VIU台廣告費升10倍，或者拆個OTT上市，或者私有化等等，都有得搏。甚至我都話，你當黃色經濟圈咁有人手痕去買都唔奇。

47. 所以啦喎，我係可能會買少少玩下的，或者月供返1000/500咁。但記住，注碼。我就又係當買垃圾，零食嚟啫。你就真係唔好拎大錢買落去。

48. 你諗下，甚麼MIRROR呀 VIU呀，個市場肯定知晒啦。但股價點？今年8號仔輸10%，衰過你買恒指好多。（反而6823有得升8%，你睇到市場對8號仔ex 6823嘅嘢點評價）

49. 咁究竟真係市場仲係嚴重低估咗VIU台嘅潛力，定係市場冇死錯人？我當然信係後者，不過，「可能我錯呢」。況且照計個downside又唔多，錢多無聊咪玩下。

================================

Facebook Page：「君子馬蘭頭」ivanliresearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

勞蘇基金：50萬港紙入場，暫定2%管理費 20%表現費，應該隨時可以拎錢走。歡迎PM我報名，現階段冇任何commitment，絶對唔使畀錢住，到時你亦可以反口唔畀。亦都唔使怕答應咗到時反口，絶冇問題，純粹等我知道有幾多人有興趣。我預會有好多人到時因為種種理由唔加入的。

聲音版/錄影版：慎防有人唔知，係有樣咁嘅嘢的。方便唔想睇字/坐車聽/公司聽。一個Post有齊純聲音（mp3）同埋影像版（我朋友碌住電話畫面讀）。 20蚊或40蚊會員限定。Sample呢度，免費試聽。