太古19 理文化工746 中移動941 維他奶345．LVMH 愛馬士 微軟 新高． 科技股食水深過其他公司好多。串流大戰人人有肉食．美國唔畀廁所收錢，結果有乜後果？美國連登估值100億美金 (Patreon)

快評兩句—太古19 理文化工746 中移動941 維他奶345

大師冇點你—LVMH 愛馬士 微軟 新高

每日一圖— 科技股食水深過其他公司好多。串流大戰人人有肉食

Good Read —美國唔畀廁所收錢，結果有乜後果？美國連登估值100億美金

FB Post Summary— 50年前嘅今日。其實我係一個作家。Ivan同Freddie Mercury  Billie Eilish齊名

快評兩句—太古19 理文化工746 中移動941 維他奶345

1. 昨日嗰篇寫得勁長（好好睇，記住睇），元氣大傷，加上市況都冇乜特別，所以今日寫短啲。好快跟進幾隻港股。

2. 太古嘅，升到10日高。你見昨日我都有講，業績全線改善，又夠殘。不過，我講漏咗樣最簡單嘅嘢：股息。我有講股息大升，但居然冇幫你計。今次中期息1蚊，上年末期息1蚊，咁你計12個月都已經2蚊（況且好可能末期會加），當時股價50蚊，即係4厘息，還不錯。仲有，原來公司有講個股息政策，咁分析員話即係會去到5厘息。呢樣我真係完全冇留意到。

3. 另外仲想講，明明公司係中午出業績，但星期四下午冇升，星期五先大升。原因？可能真係啲分析員出完報告先郁，或者啲外資基金真係第二日先買吧？唔知。但證明我話「業績中午出所以股價反映晒」呢句嘢，至少在今次情況，係唔啱嘅。錯咗當然要認（唔一定要公開），同埋反思返。

4. 理文化工，結果仲有得升，新高了。不過都係叫大家沽走佢，咁如果有啲再叻啲嘅沽一半，甚至可以做到零成本嘅更好（但隻嘢由我講到而家冇一個開，所以你要沽超過一半先零成本）。始終係周期嘢，唔係可以不停升嘅公司。又，關於零成本，記住睇舊文。

5. 中移動嘅，以前都講過，就係一隻收息股，夠晒殘。咁當然中資股全部都可以有不同風險，但呢隻應該係相對細嘅。唔好望有乜增長，但真係幾穩定地派到息。都升到3個月高。

6. 最後，維他奶，盈警後大插。都講過，應該跌過龍。寫嗰時19.28，而家跌定咗，去返20蚊樓上了。有嘅可以渣住。

大師冇點你—LVMH 愛馬士 微軟 新高

7. 都不用多解釋，呢三隻都係在core list．微軟就幾年前買落，但愛馬士同LVMH買嗰時，呢度有出文的（自己去index搵吧），4月嘅事。愛馬士執三成，LVMH都15%。咁你又有冇跟？唔係話好多，但可以大大手買落去。

8. 另外留意，歐洲股市已經十連升。美股嫌貴（都幾貴），香港嫌廢（都幾廢），都有其他選擇。

每日一圖— 科技股食水深過其他公司好多。串流大戰人人有肉食

9. 科技股食水深過其他公司好多—講net profit margin，純利率，profit/revenue．實情呢個應該係常識，好多人都知。但亦留意，呢個圖係指所有科技股，照計Big Tech仲勁（之前啲Excel你都睇到）。另外，留意佢地同其他公司margin嘅差距，係越拉越遠的。呢個係啲科技公司嘅本質，network effect，收入狂升但成本唔會點升。亦因為咁，你見到點解啲估值咁貴，因為長期都高增長。

10. 串流大戰人人有肉食—好早我已經預言，NetFlix同迪士尼，唔會係你死我亡，好大機會兩間都共存。而家甚至未去到呢個位，個圖講有幾多比例嘅美國家庭，有訂唔同嘅串流公司。你見到，同一年前比，每一間都係升嘅。暫時個餅係越做越大，人人都有增長。

Good Read —美國唔畀廁所收錢，結果有乜後果？美國連登估值100億美金

11. 美國唔畀廁所收錢，結果有乜後果？—冇去過美國，但上次都有篇文講過，美國係好少公廁嘅，啲友要去就去星巴克，又造成好多問題。亞洲就普遍靠商場。咁如果去過歐洲嘅，都知好多廁所收錢。但點解美國冇收錢廁所？答案好簡單，因為係違法嘅。然後你知道了，違法嘅，咪索性唔會有廁所。呢篇文其實講經濟嘢，一葉知秋，好多人以為禁止收錢就解決問題。例如露宿者冇錢去廁所，咁我地禁止廁所收錢啦！結果？原本佢地都仲可以叫好心人畀錢，禁埋後，廁所都冇得去。

12. 美國連登估值100億美金—講Reddit最新估值去到100億美金，係諗住上市嘅．值唔值？當然好難講，但大約比較下。Reddit活躍用家5000萬，Facebook 20-30億（睇你計每日定每月），計埋instagram Whatsapp 35億，40-70倍。Reddit 一季收入1億美金，Facebook 300億，300倍。而Facebook 市值1萬億美金，只係100倍。不過當然，細公司嘅增長快啲。

FB Post Summary— 50年前嘅今日。其實我係一個作家。Ivan同Freddie Mercury  Billie Eilish齊名

13. 50年前嘅今日— 實情係行行下街醒起，寫個短Post上Facebook，反應幾好。你見張相係講聯儲局資產負債表又創新高，仲有人類史上嘅美金，差不多一半係疫情後印出嚟嘅。但呢啲呢度長期嘅讀者都知。50年前8月13日發生咩事？就係美國總統尼克遜退出布列敦森林體系（Bretton Woods system），亦即係美元再唔會兌黃金，亦即係金本位制結束。你可以想像，帶嚟幾咁多嘅影響，自此法幣就成為任印嘅嘢。可能遲下詳細講

14. 其實我係一個作家　— 講我去新城電台宣傳新書，實情冇乜特別。但由最初只係Personal account寫嘢，到FB Page，到在01，或者報紙專欄，到而家出埋書，Patreon。應該真係算作家啦？

15. Ivan同Freddie Mercury  Billie Eilish齊名　— 原本又係無聊嘢，純粹屯門誠品將我本書同佢地放埋一齊。但個Post都幾長，開始寫返大西北嘅學生，真係眼界會爭啲，然後寫返好多我中學時嘅嘢。最後都係講，我嗰時都仲幸運，而家如果出身唔好，要上流更加難。所以點解搞馬蘭頭獎學金

================================================================

Facebook Page：「君子馬蘭頭」ivanliresearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

勞蘇基金：50萬港紙入場，暫定2%管理費 20%表現費，應該隨時可以拎錢走。歡迎PM我報名，現階段冇任何commitment，絶對唔使畀錢住，到時你亦可以反口唔畀。亦都唔使怕答應咗到時反口，絶冇問題，純粹等我知道有幾多人有興趣。我預會有好多人到時因為種種理由唔加入的。

聲音版/錄影版：慎防有人唔知，係有樣咁嘅嘢的。方便唔想睇字/坐車聽/公司聽。一個Post有齊純聲音（mp3）同埋影像版（我朋友碌住電話畫面讀）。 20蚊或40蚊會員限定。Sample呢度，免費試聽。