ivanliresearch

今日只寫業績，冇推介，但提升到你知識（亦所以我唔睇圖）．太古19　港鐵66：全線改善，但要你睇得明份業績先。迪士尼：業績好勁，盤後升5% (Patreon)

Published:

2021-08-12 22:06:06

Edited:

2021-08-12 22:53:32

Imported:

2021-08

Downloads

Content

今日只寫業績，冇推介，但提升到你知識（亦所以我唔睇圖）

太古19：全線改善，但要你睇得明份業績先（幫你入埋Excel）

地鐵66：全線改善，但要你睇得明份業績先（幫你入埋Excel）

迪士尼：業績好勁，盤後升5%

今日只寫業績，冇推介，但提升到你知識（亦所以我唔睇圖）

1. 今日夠晒豐富，主業都係業績評論。但容許我講一講：其實我大可以唔使搞咁詳細，但都係為咗大家，同埋自己識多啲嘢。所以你見我有時講完一輪隻股票，都係唔買，但我地唔只係為咗寫篇嘢搵理由買間公司。

2. 呢個亦好可能係我比較抗拒「技術分析」（即係睇圖）或者其他各式各樣古靈精怪system（幾時買幾時賣）嘅原因。首先以前都講過，呢啲方法本身似乎有缺憾，你認圖點快得過部電腦？況且人人都用呢啲指標，原本有錢賺都變冇

3. 但更重要嘅係：我就算畀你賺到錢，都提升唔到你本人水平。睇圖搵到錢都好，你唔會叻咗。而我睇嘢嘅方法，相信大家都同意，就算你贏唔到錢，都會識多咗嘢。

4. 你心諗，搵到錢就得啦，使乜理點搵到？Yes and No，除非你係搵到幾十億啦。呢點好重要，因為上得山多終遇虎，你輸舖勁之後，點算？呢個就係2008年發生在我身上嘅嘢。到你不幸輸錢，要由頭開始，但你係咪有技能？

5. 你諗下，點解外國啲友，中完彩票，好多都會窮返？除咗因為理財不善同大洗外，亦因為佢地累積財富嘅過程只係靠運 —你係冇學到任何嘢。相反，靠其他嘢致富嘅人，我冇咗錢，都容易搵返。

6. 你見我今日講嘅係兩間香港公司（嚴格係三間）。或者都有人發現，我會睇美股，亦都會睇香港上司嘅香港公司，但真係比較少買少睇少講中資公司。原因並唔止係咩政策風險，你見我一直都係咁。原因係：唔識睇。你叫我講Facebook點賺錢，有乜影響佢，我答到。你叫我講國泰地鐵領展，我都知。咁但，如果係某啲咩中資醫藥股核電股，講真，識條春咩。所以你見我買或睇中資股，都係睇啲相對地易啲明嘅公司，騰訊阿里巴巴，或者中海外華潤置地，或者去到啲消費股。理文化工算唔算例外？還好，但香港人話事。

7. 下面講嘅香港公司，就算你冇特別買，你都會至少知道啲公司到底做乜，知道佢地點搵錢，盤數點睇。咁你已經叻過好多人，你見好多人完全都唔知啲公司業務有乜，或者唔知邊啲大邊啲細。

留意兩個Excel在Attachment 有的

太古19：全線改善，但要你睇得明份業績先

8. 第一間係太古，夠晒煩。但亦係你提升水平嘅好機會。好多人都大約數得出太古嘅業務，但到底邊味多？邊啲係佢全資，邊啲係細份？睇新聞唔多明。就算畀你拎住份業績都唔識睇。所以我整埋呢個表，畀你好清楚睇得到

9. 首先留意，太古19下面，仲有兩間上市公司。一間係國泰293，知唔知渣幾多？大約42%（留意唔夠一半），呢度你記住，國泰上半年蝕76億港紙，昨日寫過。

10. 第二間係太古地產1972，太古持股近80%。咪….地產，留意太古主要收租，亦有酒店，起樓再賣唔多，香港更少。太古地產，上半年就賺19.8億。留意你見到新聞都幾個純利，但你睇返官方報表，「呈報」（reported）嗰舊就係真正嘅純利。（太古地產嘛，有機會我再整個Excel，但佢地每季出一次啲租金同出租情況的）

11. 太古其他業務，都好多人知道有飲料，可樂嘛，留意係中國，同埋美國為主，香港台灣佔好少。然後就係相對地冇咁重要嘅，仲有海洋，同埋貿易（例如……太古方糖）。當然仲有「中央」呢個例牌蝕錢嘅「部門」，包括坐冷氣房班友，同埋啲利息成本都係中央食。

12. 好啦，呢個表，係純利嚟的，陣間解點解純利都幾個。但，點解唔用「收入」，因為實在有點難搞。首先，幾個分壇啲業務性質太唔同。但更重要係，你會見到國泰貢獻嘅「收入」，係零。呢度涉及啲會計嘢，因為太古渣國泰只係42%，會當聯營公司，所以係唔會在太古嘅「收入」見到。

13. 上半部，就係報出嚟嘅盈利。下半部呢，就係「核心」純利（core）。有乜分別？你細心可以見到，除咗「地產」外，其他幾味全部係上下半一樣的，所有分別嚟自「地產」，核心盈利，就冇計啲重估收益/虧損，即係你啲投資物業（收租），升值或者跌，每次半年都要測量師做估值咁。理論上就應該真係睇核心嘅。

14. 咁我地睇核心，你見到地產呢味，同舊年上半年比升啲，但同下半年比爭好多。點會咁？我未100%肯定，但留意賣樓同酒店嘅數好細，所以真係嚟自收租。但點可能會咁奇怪，舊年下半年彈，今年上半年又大跌？應該就係因為賣咗太古城中心。所以睇你點計，但正路同舊年上半年或下半年比，都係改善。

15. 另外，頭先講咗，太古地產1972，呈報純利19.8億，核心純利45.1億。你見呢兩個數字嘅80%，就差不多係呢個表入面太古嘅地產純利／核心純利。

16. 同樣道理，航空方面，好簡單，國泰蝕76億，乘返42%，就大約係你在太古見到嘅32.5億虧損。大約啦。但昨日講國泰時都講咗，同舊年上半年或下半年比，都係蝕少咗的。

17. 你見到，平時唔起眼嘅飲料，貿易，同埋海洋業務亦都持續改善（海洋業務應該舊年上半年有個好大嘅減值）。

18. 最後你仲見到有個recurrent profit，又係乜？頭先講過，呈報純利，唔計物業重估，就係核心純利。咁如果再唔計啲賣資產呀，減值呀之類，咪就係recurrent profit。例如你見舊年上半年，core蝕55億，recurrent蝕1億，明顯一大舊減值（海洋）。舊年下半年呢？core 賺15億，recurrent 反而輸5億，就係因為有舊收益（應該係賣太古城中心）

19. 最後講返，派息係大增嘅，呢個應該係好消息。負債係偏低嘅，同舊年年底差不多，財政相當健康。

20. 買唔買得過？其實還好，固然國泰一直拖後腳，將來都唔會點賺錢，但股價夠殘，你見今年太古都升咗11%，跑贏晒大市。留意，中午出業績，股價應該反映咗

地鐵66：全線改善，但要你睇得明份業績先

21. 另一隻，一樣盤數好煩嘅，就係地鐵66。喂，轉虧為盈喎，唔出盈喜嘅？我記得好似真係冇出。

22. 另外，冇加到派息，但都預咗嘅。掉轉，之前連出幾次盈警，上市以嚟第一次蝕錢，但都冇減到派息。仲有，呢個中期息0.25，應該過去10年都維持到，末期息亦都N年冇減過，好多時有得加，港鐵嘅漸進派息都維持得幾好。話埋你知個負債比率都係低，仲要低過舊年年尾一截，我估可能年尾末期息有得加？

23. 港鐵我就寫短啲，一來之前已經太長，二來啲業務我Facebook Page寫過下。業務？車務咪收車費，留意收入高但利錢低，全世界都係咁。咁大家知政府靠其他嘢補貼間公司。車站商務，就係舖租同廣告位。物業，就係商場收你租，同埋管理費。大陸同海外大家明啦，有啲乜乜線佢地管理。其他，塞晒啲嘢入去，之前沙中線大撥備應該在呢度。聯營公司，留意包括八達通。以上呢啲都叫「經常業務」

24. 在港鐵嘅論述，賣樓係叫「非經常業務」。香港就係地鐵站上蓋起樓做發展商。大陸都有賣樓，但極少。

25. 如果你開Excel嘅，只係睇左邊（即係上面你見到呢個圖）好了，右邊堆收入未得閒整。咁你見到，我分咗嘅係唔同業務嘅EBIT，earnings before interest and tax，同埋純利嘅分佈。

26. 咁好快睇一次EBIT，車務方面，當然係蝕少咗，啲客流量好返好多，但留意疫情同社運前都唔係點賺錢。車站商務，都硬淨，同舊年下半年差不多，但同疫情社運前水平爭好遠。商場租呀管理費更加企得硬。海外業務大幅反彈，沙中線舊撥備又舊年下半年一嘢踢咗落去，今年冇。整體嘅「經常業務」EBIT，高過對上兩次半年，主要因為冇咗沙中線撥備。

27. 賣樓方面，今年上半年有樓賣（好似係日出康城八期），舊年下半年就冇乜，但舊年上半年賣好多。所以個總EBIT都不及舊年上半年。

28. 最後，你見到物業重估虧損少咗好多，所以今年上半年有錢賺，舊年上下半年都係輸錢的。