美國通脹5.4%，但債息照跌，美股照破頂．國泰293蝕76億照升，港交所388業績遜預期又升．BlackRock又新高．邊個國家最高比例嘅人有Bitcoin？Big Tech太多錢點算好？奧運獎牌數目同乜有關？有人收錢幫你搞到仇家ig戶口被ban．點解大陸樓咁貴？一日只能三四個鐘專心創作 (Patreon)

快評兩句：美國通脹5.4%，但債息照跌，美股照破頂

國泰293蝕76億照升，港交所388業績遜預期又升

大師冇點你：BlackRock又新高

每日一圖—邊個國家最高比例嘅人有Bitcoin？Big Tech太多錢點算好？奧運獎牌數目同乜有關？

Good Read — 有人收錢幫你搞到仇家ig戶口被ban．點解大陸樓咁貴？一日只能三四個鐘專心創作

FB Post Summary—高天佑用家報告。國泰還唔到優先股息爆煲未？垃圾股實驗

1. 提返，因為節目調動，星期一冇出每日一圖/Good Read，所以星期二同星期三（今篇）兩篇都係有每日一圖/Good Read。

快評兩句：美國通脹5.4%，但債息照跌，美股照破頂

2. 真係快評。美股嘅，出咗CPI數據，按年升5.4%。但債息跌（然後低位彈返啲），道指破頂。點解？一來個大數同預期差不多，二來核心通脹係低過預期的。我依然認為聯儲局之前一路嘅睇法啱，通脹只係暫時。

國泰293蝕76億照升，港交所388業績遜預期又升

3. 國泰嘅，有趣。你估真係還唔起優先股息好唔掂咩，你見出完業績仲要有得升。係呀，仲係不停蝕，鬼唔知咩，睇預期嘛。留意今年上半年蝕76億，上年上半年係100億（頭兩個月仲算正常），下年半係120億，明顯而家已收窄好多，亦因為減咗成本。仲有，你見半年蝕76億，但本book都仲有700億，都仲…..頂到兩三年嘅（唔會去到冇晒先籌錢啦）。

4. 最記住蝕錢同現金流又係唔同概念，咁你見公司有講，一個月燒錢10億，動用到嘅資金就差不多330億，亦係頂到兩年左右。又，優先股股息，講緊半年3億，要還當然還得起啦，但為乜要咁早還？

5. 最後，你見港交所388出埋業績，第二季盈利倒退，仲要低過預期。但你見股價照升的。港交所一向都好少因為業績升定跌，因為透明度好高，幾多成交幾多新股，你日日都見到。既然係炒預期，咁業績好定差根本一早大約估到。嗰啲咩差預期，只係爭好少。記住留意每隻股票嘅股價由啲乜帶動。

大師冇點你：BlackRock又新高

6. 都循例講返，隻BlackRock創新高，你見我唔會因為中間啲上上落落而走去沽。留意公司呢排有個新業務增長幾好：就係接人地啲外判。外判乜？就係其他公司，將啲投資外判畀佢地做。有機會細講

每日一圖—邊個國家最高比例嘅人有加密貨幣？Big Tech太多錢點算好？奧運獎牌數目同乜有關？

7. 邊個國家最高比例嘅人有加密貨幣？—留意當然係計比例，但你都未必估到，係非洲嘅尼日利亞，仲有越南同菲律賓。同high唔high tech冇關。知唔知有乜共通點？首先，都係窮。二來，年青！三來，本身隻貨幣波動大。就同高唔高科技冇乜關係的。

8. Big Tech太多錢點算好？— 畀夠兩個圖你，好簡單，畢菲特嘅巴郡，近年都面對問題，太多錢，但搵唔到嘢買。Big Tech而家問題一樣，好多錢。但做收購？又可能過唔到。最後巴郡做乜？回購自己股票。相信科企都會，亦係會股價動力。見唔見整體回購已經差不多創新高？

9. 奧運獎牌數目同乜有關？—舊文寫過下，咁撇除主辦國效應，同埋政治（杯葛）外，舊文寫過兩個因素，差不多一樣重要：人口，同埋收入水平。咁夾埋，夾埋咪即係個經濟規模。你見都大約係咁，經濟規模越大，咪表現越好，留意印度表現亦越嚟越好。仲有，個圖聰明在，佢係計經濟規模佔全球嘅比例 —因為獎牌係零和遊戲，你贏就會有人失。亦都解釋到美國點解少咗牌＝唔係經濟細咗，但後來者升得仲勁，令佢嘅份額細咗。

Good Read — 有人收錢幫你搞到仇家ig戶口被ban．點解大陸樓咁貴？一日只能三四個鐘專心創作

10. 有人收錢幫你搞到仇家ig戶口被ban—幾有趣，不過希望大家唔好用。你想人地被ban？只係舉報唔得嘅。有專業服務，例如幫你用bot去扮幾百人舉報，例如佢地會將自己嘅相同資料換成受害人，然後話返受害人用假身份扮佢。另外原來，多人follow嘅戶口係比較難搞的，大家繼續努力。成件事最正嘅係乜？最正係，出面有公司收錢幫人restore 戶口 —當然係同一班人，收完人錢搞到你被ban，再收你錢幫你restore

11. 點解大陸樓咁貴？　—呢個可以由幾個層面睇。首先，度度嘅樓都貴，都幾大程度因為印錢。大城市嘅樓更貴，亦因為貧富不均，而所有富貴嘅人都集中在同樣嘅地方，仲有想上位嘅人都係。例如在日本，有錢人當然住東京，所有想搵好工嘅人亦由鄉間湧入，台灣就台北，韓國就首爾，大陸就北上廣深，英國咪倫敦，差不多全世界都係咁嘅問題。作者特別講深圳，仲提到一點，就係土地政策。可惜佢冇好仔細咁講其他城市。當然你亦可以話，「華人特別鍾意買樓」，亦可能因為在大陸，你有錢唔係買樓，唔通買A股？（之但係，你見港股過去幾十年表現都好好，但啲人一樣係買樓唔買股的）

12. 一日只能三四個鐘專心創作— 又係有趣嘅文，佢指嘅係要十分精神集中嘅創作工作，每日只能三四個鐘。我都大約認同，雖然我寫書嗰時一日唔止寫三四個鐘，但你可以話寫嗰個過程並唔係要好多精神，打字可以好快，反而諗，編排先花腦汁。

FB Post Summary—高天佑用家報告。國泰還唔到優先股息爆煲未？垃圾股實驗

13. 高天佑用家報告—高天佑者，信報都幾出名嘅作家，獲獎無數。亦都出過書。你見我都耐唔耐提佢啲佢，因為真係寫得好，我之前亦推介畀公司啲下屬睇。而我係識佢本人的，但唔係識咗好多年，不過佢當時同我講：我細細個已經睇你嘅文！原來好早佢已經留意我網上寫嘅文。呢個Post係佢對我本書嘅評語。留意佢特別有講我本書最尾，叫人遠離虛偽，證明佢係有睇到尾的。

14. 國泰還唔到優先股息爆煲未？—就係講國泰拖欠優先股股息壇嘢，我覺得我解釋得幾好，講下咩係優先股，亦講各種制度嘅設計，去encourage 或 discourage你做某啲嘢。當然呢度嘅讀者就早早已經睇咗，我換個手法再寫一次啫。

15. 垃圾股實驗—講返我個10隻美股實驗，入面都好多嘢分享。當然週末我已經在呢度講咗，星期一亦有跟進。幾時都係呢度嘅讀者優先。又，嗰堆嘢，連續兩日都係輸錢嘅，隻ZETA仲要大插！果然我一早有預感！當時係寫：

我直覺型住呢間係會出事爆煲的，睇下準唔準。點解？我買啲股票，明顯都係A-M嗰堆表現好啲，N至Z嘅唔掂。幾隻出事嘅都係N至Z，例如WISH，YALA之類。有冇科學跟據？應該冇，但我個有人做過研究。

================================================================

Facebook Page：「君子馬蘭頭」ivanliresearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

勞蘇基金：50萬港紙入場，暫定2%管理費 20%表現費，應該隨時可以拎錢走。歡迎PM我報名，現階段冇任何commitment，絶對唔使畀錢住，到時你亦可以反口唔畀。亦都唔使怕答應咗到時反口，絶冇問題，純粹等我知道有幾多人有興趣。我預會有好多人到時因為種種理由唔加入的。

聲音版/錄影版：慎防有人唔知，係有樣咁嘅嘢的。方便唔想睇字/坐車聽/公司聽。一個Post有齊純聲音（mp3）同埋影像版（我朋友碌住電話畫面讀）。 20蚊或40蚊會員限定。Sample呢度，免費試聽。