［社會實驗］7500個美股分析員，最勁嗰10個，每人一隻心水股。我隻隻都跟，今晚就買。睇下之後會點？ (Patreon)

社會實驗：拎30000港紙，買10隻垃圾美股，乜都唔睇！

其實係7500個美股分析員中最勁嘅10個，而家嘅10隻心水股

但邊個係最準嘅分析員？乜嘢叫「top pick」？咩係「目標價」？

今晚我就買，但講埋啲實際上會遇到嘅問題

呢10間公司有乜共通點？

約略介紹下呢10間公司

1. 原本想寫電訊盈科PCCW 8號仔業績，Mirror好受歡迎 ViuTV 好多人睇廣告收入大升嘛，但點解股價唔得？不過一來用咗唔少時間在Facebook 寫巴塞。二來，搞搞下8號仔都幾大壇嘢，你知李澤楷啲公司，繼承老豆，都係一大抽嘢。我要講8號仔就要講埋 香港電訊6823，咁搞啲數字搞到一半，發現未必寫切，即時唔寫住。但放心，應該呢兩日會寫返（夠吸睛，用嚟搵新讀者都好），最遲都係下星期。

2. 咁但，我早早已經有Plan B，就係呢篇文。篇文未必好特別，但成件事幾特別，唔係我一貫作風。畀啲新嘢玩下。

3. BTW，我個Patreon一週年，多謝晒大家。

（按：篇文Attachment有埋個Excel的！）

社會實驗：拎30000港紙，買10隻垃圾美股，乜都唔睇！

4. 冇標題黨，就係身痕。我會拎3萬蚊港紙去買10隻垃圾美股—唔係每隻3萬，係夾埋3萬！即係每隻3000。今晚就會買。

5. 跟唔跟隨你，但我一定要預先警告你。首先，啲公司似乎真係幾垃圾，都係啲細公司，完全唔係我一向作風。第二，根本我連啲公司做乜都唔知，甚至數字我都懶理，係因為寫篇文先幫你搵。第三，我嗰啲係閒錢，我預會輸晒的，呢個機會都唔細。

6. 冇錯，就係亂咁買，十個冧把買落去。咁我做乜仲要買？冇，就係實驗！睇下係咪真係亂買都中！係咪真係一兩隻跑出，夠頂其他全部死晒。

7. 仲有，其實係睇下啲分析員有冇料到。嘻。

8. 十間公司，陣間會講。但個名單點嚟？好簡單，係嚟自Business Insider（而家就咁叫Insider）嘅一篇文，好似要科水，但不重要，反正都冇乜內容。

9. 篇文一貫佢地標題黨嘅風格：華爾街最準嘅10個分析員，呢10隻係佢地而家心水。我就係跟呢10隻買，背後理由完全唔睇。

其實係7500個美股分析員中最勁嘅10個，而家嘅10隻心水股

10. 咁可以睇下，其實佢點揀出嚟。咩叫「最準分析員」？根本都好難定義。但佢用咗個第三方平台TipRanks嘅數，追蹤7500個分析員，然後量化佢地嘅分析。

11. 大約點評？例如今日勞蘇證券嘅分析員Ivan Li，給予上市公司小企鵝實業（PENG）（我亂作的，唔好走去買！）「買入」評級。然後個系統咪會睇返，由我出報告嗰日開始，之後隻嘢升幾多。「賣出」嘅，就計跌幾多。「中性」唔計。

12. 然後？就揀10個最勁嘅出嚟。點畀分？三樣嘢，第一成功率（即係10隻有幾多隻真係升），第二係平均回報。第三得意啲，統計顯著性。即係例如你同我都係90%命中率，平均回報一樣係50%，但你寫3隻股票我寫10隻，咁當然係我高分啲。因為你可能撞彩，我10隻就好難

13. 揀咗呢10條友出嚟，然後再去睇佢地嘅top pick．點睇？就係睇佢地啲目標價中，邊隻最多upside．最後就係下面呢10隻股票

但邊個係最準嘅分析員？乜嘢叫「top pick」？咩係「目標價」？

14. 講落去之前，都可以討論下，以上嘅方法有乜問題。首先，實情香港都有啲咁嘅嘢，本人都拎過獎！做過10大stock picker！主要原因係乜？好彩！（2009年嘅事了，又，我當然借呢個機會R公司勁加人工）

15. 但，真係得啖笑。首先，都講過，基金經理根本唔係重視你份報告個目標價，甚至唔會理你個評級，而係要睇入面嘅思路，或者有乜嘢你講咗係佢唔知，或者冇諗到。「準唔準」唔係重點

16. 第二，正如我講，好大程度都只係運氣，亦睇嗰期市場炒乜。你嗰期旺科技股嘅，咪會係啲科技股嘅跑出。例如我係cover中資教育股嘅，咁話知你神仙都死啦。今次佢篇嘢，揀出嚟嘅都全部係科技股嘅分析員

17. 第三，啲分析員「top pick」，未必係最有信心最鍾意嗰隻。例如話，小企鵝實業現價50蚊，我嘅目標價係100蚊 —但隻嘢本身高波幅嘛，可能100蚊，又可能爆煲。相反，可能我心水係領展，但根本唔會預佢一年升幾成，不過冇得輸。你見到了，risk and reward，點可以只睇upside？

18. 最後，又係我作風。其實你有冇諗過，咩叫「目標價」？以前請啲小朋友，見工面試我都成日問佢地。最簡單嘅問題好多人都冇諗。你可能會認為，經過我啲咩運算，計出嚟個「公平價」就係「目標價」，Fine．咁我問你，如果我ASML嘅「目標價」係1000蚊，下個月佢升到3000蚊，咁你係咪建議沽空佢？又唔係喎。但你明明話1000蚊先係「公平價」

19. 又有個講法，話「目標價」係12個月之後會到嘅價。咁一樣，如果你12個月目標價係1000蚊，下個月升到3000，我係咪沽空佢？ 你話最後會變1000喎，又好似唔係。

20. 又有人認為，「目標價」係將會hit到嘅價。咁又有個問題，ASML而家800蚊，你目標價係1000蚊，另一個睇淡嘅分析員目標價係200蚊。結果ASML下個月升到1000蚊，然後3個月後爆煲，跌到100蚊。好啦，咁你個「目標價」算唔算中？如果算，咁睇淡嗰個分析員又算唔算中？都有打中200蚊喎。咁如果你地兩個都中，咁有乜意義？我點知邊個中先？

21. 你見到了，其實投資，就係要多思考。做人都係。

今晚我就買，但講埋啲實際上會遇到嘅問題

22. Anyway，講正題。但仲要話埋你知，實際上會預到嘅問題。就係呢10間公司，最尾我會約略介紹，但講真唔睇都得，我真係亂買的。你見到啲分析員嘅命中率，同埋平均回報，我完全冇理，但可能最後一年後睇下啲結果同佢地命中率及平均回報有冇關

23. 另外，有冇諗過，點解係3萬蚊？點解我要每隻買3000港紙？實不相瞞我係想買少啲的，但你見到，有一隻萬惡嘅Twilio，一股都近3000港紙。咁你話，我可唔可以每隻買一股？又唔得喎，如果我咁做，咪會側重晒落隻Twilio！有啲係幾百港紙一股，甚至有隻係幾十蚊！

24. 所以，最後Twilio就係個limiting factor，我每隻都要買3000港紙。好彩冇一隻係2000蚊一股，否則都幾煩。而1700/1800嘅，我就買兩股。最後大約係每隻10%啦，大約

25. 仲有，最最最後一個問題。畀你睇到我係有唔同考慮。我有睇埋啲公司一日幾多成交。點解？本身我買就冇問題，但，記唔記得我話過理文化工746我冇買？因為太少成交，如果我又買，難免會有啲人覺得我係咪自己買完，唱好，然後沽畀讀者。就算你地唔咁諗，都難免有街外人咁諗，甚至證監咁諗。我就唔想有呢啲嘢發生。

26. 幸好，望過，呢堆美股最少嗰隻都有千幾萬港紙成交，多數都過億港紙。所以就唔使驚話咩我買完沽畀你，亦唔驚話我又買你又買掃起晒個價。雖然講明先，可能我會隨時沽。

27. 今晚我就會去買！

28. 正文已經講完，最後下面我會講呢10間公司，雖然我覺得真係唔使理。但你鍾意嘅可以睇埋，趕時間嘅唔睇都得，使鬼理咩！

呢10間公司有乜共通點？

29. 呢10間公司有乜重點？全部都係科技股。點解會咁？因為最勁嗰10個都係科技股分析員。點解會咁？上面寫咗。

30. 仲有，10間公司，都係冇乜人識嘅，絶對冇咩大名。我唔知你識幾多間。我就只係聽過3間，SentinelOne（唔知邊度見到），Monday.com同埋Twilio。呢3間明顯出名啲

31. 同樣地，呢10間公司，都係細公司。Twilio係特大嘅，之後嗰啲都係100億美金市值咁上下，有兩隻直頭得10億美金市值咁滯—但話說回頭，都等於一間大家樂咁，又未係咩好豆泥嘅公司。

32. 最後，呢堆公司，居然有5間係上市冇耐，呢幾個月先上市。夠晒高危。咁嗰啲年初股價，年初至今表現，就係由上市日計起。

33. 以下係極簡單嘅介紹，我都只係睇CNBC Profile（畀埋link你），甚至懶得去公司網站睇，有啲都唔知做乜，費事花時間。但反正我都只係亂買冧把，唔使扮分析。

約略介紹下呢10間公司

34. 第一隻係Smart Global，做記憶體，LED Solution。都唔知係乜。12億美金市值，極細隻

35. 第二隻係Marqeta，發卡，payment processing solution，好似大約估到係乜。上上市冇耐。過百億美金市值

36. 第三間，Anaplan，雲端軟件，唔知係乜。上市編號夠靚，就係PLAN．之前一路有個研究，睇呢啲「特別編號」係咪對股價有利。拎呢啲編號要錢的。

37. 第四間，Zeta，又係上市冇耐，data driven marketing 平台。10億美金市值。我直覺型住呢間係會出事爆煲的，睇下準唔準。點解？我買啲股票，明顯都係A-M嗰堆表現好啲，N至Z嘅唔掂。幾隻出事嘅都係N至Z，例如WISH，YALA之類。有冇科學跟據？應該冇，但我個有人做過研究。

38. 第五間，SentinelOne。又係上市冇耐。上市編號靚，一個S字。上市冇耐，做Cyber security。呢間係聽過個名嘅。

39. 第六間，算有啲名氣，Monday.com．上市冇耐．以色列公司，software publishing , workflow, project management。

40. 第七間，Cohu，semiconductor test and inspection handlers。17億美金市值

41. 第八間，Coupa，上市編號Coup，政變？做Business Spend Management (BSM) solutions，我以為係BDSM Solution

42. 第九間，應該最大名氣，亦係最大市值，Twilio。做Cloud Communications

43. 最後，第十間，Sprinklr，上市編號係CXM（唔好買咗澳洲間Centrex Metals Ltd）。customer experience management platform。又係上市冇耐。

44. 今晚就買晒佢，睇下年尾會變成點！

================================

Facebook Page：「君子馬蘭頭」ivanliresearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

勞蘇基金：50萬港紙入場，暫定2%管理費 20%表現費，應該隨時可以拎錢走。歡迎PM我報名，現階段冇任何commitment，絶對唔使畀錢住，到時你亦可以反口唔畀。亦都唔使怕答應咗到時反口，絶冇問題，純粹等我知道有幾多人有興趣。我預會有好多人到時因為種種理由唔加入的。

聲音版/錄影版：慎防有人唔知，係有樣咁嘅嘢的。方便唔想睇字/坐車聽/公司聽。一個Post有齊純聲音（mp3）同埋影像版（我朋友碌住電話畫面讀）。 20蚊或40蚊會員限定。Sample呢度，免費試聽。