美股舊經濟股又跑贏。DropBox新高．維他奶8月就出盈警—到底搞乜？唔使驚，仲有5萬億美金新錢未入市！早十年投資，之後慳返三十年時間．睇完呢篇文你仲想做分析員？Bitcoin的哲學討論 (Patreon)

快評幾句— 美股舊經濟股又跑贏。

大師冇點你—DropBox新高

維他奶8月就出盈警—到底搞乜？（有Excel）

每日一圖— 唔使驚，仲有5萬億美金新錢未入市！早十年投資，之後慳返三十年時間

Good Read —睇完呢篇文你仲想做分析員？Bitcoin的哲學討論

FB Post Summary— 李超人的人生智慧。美斯離隊

快評幾句— 美股舊經濟股又跑贏。

1. 都真係，得幾句。美股嘅，之前咪話ADP就業數據勁差嘅，我都有寫，疫情下佢同官方個數據好似成日都背馳打交。呢，結果真係出嘅官方數字，極之強。街估85萬新職位，結果係94萬。街估失業率5.7%，結果係5.4%。

2. 雖然我都仲係覺得大方向係經濟變差多過係再有改善，但即市大家就只睇好短期嘅嘢，你即時見到債息勁彈，而舊經濟股跑贏新經濟。好敏感的。

3. 港股嘛，又冇乜好講，而家真係草木皆兵，小小風聲都見到啲人即時好驚，以為不停咁殺唔同行業。但你見咩東岳189騰訊700港交所388江西銅358甚至阿里巴巴9988都有得升，又真係唔係冇人飛入去搏咯。

大師冇點你—DropBox新高

4. 另外都循例講下，隻DropBox又新高了，呢隻都係得意之作，都唔少讀者買咗。今次係因為出完業績靚仔，但講到尾都係估賣畀人。留意我係冇買嘅

維他奶8月就出盈警—到底搞乜？

5. 唔知有冇時間細講，但睇大數先。留意係9月結，咁話呢半年（2021年3-9月）盈警，但，8月頭咋喎？公司就真係有講返甚麼內部備忘錄嗰壇嘢，搞到大陸下架。但講真，我都唔想咁陰謀論，但，壇嘢7月先開始，公司又話已經開始上返架，可能前後影響一個月，真係咁大影響？仲要咁快出盈警？記得我以前都講過，維他奶在大陸嘅業務，之前都倒退緊。係咪借機順便推埋落呢單嘢度？唔知了

6. 不過睇數字，個盈警係咪真係盈警？未必。話今次呢半年（2021年3-9月）蝕5000萬至賺6000萬，個range都幾濶，不過，舊年半年（2020年3-9月）賺緊6.7億喎，咁梗係大幅倒退。

7. 但又但係，又望下公司舊年下半年（2020年10月至2021年3月），蝕緊億幾喎！仲要係有拎成億補助。咁到今次，2021年3-9月，照計冇乜補助拎，都只係蝕5000萬，好過上次半年好多，唔係改善緊？

每日一圖— 唔使驚，仲有5萬億美金新錢未入市！早十年投資，之後慳返三十年時間

8. 唔使驚，仲有5萬億美金新錢未入市！—原本講嘅係excess savings，好重要，唔係之前積落，而係疫情之下出現嘅。點嚟？入面冇講，但相信部份係因為減咗開支啦，冇得去旅行啦，同埋政府派錢。咁如果呢啲錢入埋股市呢…..不得了。但會唔會？相信都係會嘅，因為債息咁低，銀行存款息又低，唔買股票可以做乜？呢啲錢未必係而家即刻買，但可能係當個市有調整時就買 — 亦可能亦因為咁，美股一路都冇一個大嘅調整。

9. 早十年投資，之後慳返三十年時間—信報嘅圖，但都係拎外國網站啫。呢個圖幾震憾。就係假設A同B兩個人，買嘅嘢一樣，都係每年走去供指數基金，一年7%回報（幾合理嘅假設）。問題係，A君就早起步，頭十年每年投資十萬，之後三十年乜都唔做。B君呢？頭十年冇儲錢，但之後三十年每年投資十萬。好啦，十年加三十年，四十年後，邊個多啲錢？答案係A！明明佢只係拎咗一百萬出嚟，B君拎咗三百萬，但都係A多錢啲。你當然知道係因為複利的威力，而仲有係同個7%回報有關，你可能覺得太低—但，如果唔止7%嘅，A君拋離更多。 好啦，故事講完，投資要趁早。但首先剛出嚟做嘢冇錢，另外後生仔唔會諗呢啲，梗係呢刻享受咗先。不過，我當你做咗五年嘢，十年嘢，一樣適用—唔好再等啦。

Good Read —睇完呢篇文你仲想做分析員？Bitcoin的哲學討論

10. 睇完呢篇文你仲想做分析員？—呢篇真係非常精彩，同你探討equity research（大行股票分析員）成個行業嘅轉變。好多人完全唔理解，例如啲分析員（我當時都係），寫完啲報告，咁畀公司啲客啦。但點收錢的？答案係，免費的！點解會咁？因為係bundle落其他嘢度。但點解有咁嘅安排？作者好詳細咁同你分析成個行業嘅生態。另外，彩蛋話你知，至少在美國，分析員嘅人工，2000年已經見頂。你仲可以睇埋啲友幾錢人工。適合有意轉行或畢業想做嘅去睇。但你問我，我當然叫你唔好。

11. Bitcoin的哲學討論—呢篇文極長，但夠晒有哲學性，適合好得閒嘅人去睇。佢嘅中心思想係：我地對於金錢（同埋Bitcoin）嘅理解都係完全錯嘅。點解會咁？因為我地用嘅語言錯晒，經常只係用形容詞，而用形容詞係捉唔到核心。即係點？作者舉咗唔止一個例。例如前面有一張全世界得一張嘅椅，整到隻大象咁嘅，你要解釋畀個盲人聽係乜。你會點解釋？如果你用形容詞：佢係全世界獨一無二嘅，值800蚊美金，啡色。咁人地都係唔知你講乜，一定要用名詞：一張大象形嘅椅。同樣地，例如枱上有支冧酒（rum），你可以直接解畀盲人朋友知，係冧酒（留意英文rum冇個「酒」嘅意思）。咁如果佢唔知咩係rum呢？咁你可以解佢知，係一種酒 —而你唔可以去話佢知，咩顏色，幾錢。咁喎。照計足夠吸引你睇落去？

FB Post Summary— 李超人的人生智慧。美斯離隊

12. 都有點無聊，但定時就要呃下啲like繼續滾大個Facebook Page

13. 李超人的人生智慧—其實早一日篇Patreon咪講咗，但冇睇嘅可以睇多次。今年你就話1113 升3成，跑贏晒港股美股指數。但之前2018 2019 2020三年股價都要跌，換著普通跌5%已經問點解或者走去止蝕嘅，根本冇可能坐得到。況且你坐到而家，都只係返返去2016年嘅位，反而月供嘅就有錢賺。同場加映，話埋你知，你結婚對象或者人生伴侶，真係十分重要嘅決定，仲係極少數你可以自主嘅決定。唔該，謹慎啲，認真啲。你問我？好簡單，先同居。當試用咁。相見好同住難，住埋一兩年都頂得順嘅，先好諗長期一齊。

14. 美斯離隊—半夜突發新聞，當然有助收視。非球迷就未必有興趣睇，但我都係在金融角度講返。主要因為巴塞冇錢，疫情打擊亦關事。然後再話你知，球會係真係shitty business，一間錢大媽，估值大過晒咩曼聯曼城巴塞皇馬。

================================

Facebook Page：「君子馬蘭頭」ivanliresearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

勞蘇基金：50萬港紙入場，暫定2%管理費 20%表現費，應該隨時可以拎錢走。歡迎PM我報名，現階段冇任何commitment，絶對唔使畀錢住，到時你亦可以反口唔畀。亦都唔使怕答應咗到時反口，絶冇問題，純粹等我知道有幾多人有興趣。我預會有好多人到時因為種種理由唔加入的。

聲音版/錄影版：慎防有人唔知，係有樣咁嘅嘢的。方便唔想睇字/坐車聽/公司聽。一個Post有齊純聲音（mp3）同埋影像版（我朋友碌住電話畫面讀）。 20蚊或40蚊會員限定。Sample呢度，免費試聽。