東岳189散水，理文化工746點處理？香港電訊6823．長和1．長實1113． (Patreon)

東岳189散水，理文化工746點處理？

長和系：同你講講邊隻打邊隻

香港電訊6823：Now台嘅嘢。

長和1：「收益」同「收入」有乜唔同？

長實1113：賣樓是很好賺的

點解我冇買長和系？

預告：8號仔。Mirror＋Viu台嘅嘢。

1. 慎防有人唔知，上星期篇週末專題，講Big Tech業績嘅，我已經出咗。個Excel都update咗。連續出兩篇文，再加埋仲有寫稿畀經濟一週（係冇錢收的，但可以宣傳下個Patreon），都去到極限。

2. 然後你見話冇力嘅Big Tech，呢兩日又有返啲力。文入面我講咗，呢一刻嘅偏好係Microsoft＞Google～Facebook＞Amazon～蘋果。但實情我五隻都有晒，金額都唔算差太遠。

3. 今日寫返多啲港股，因為都有啲業績

東岳189散水，理文化工746點處理？

4. 理文化工本身就冇乜特別，你見業績後第二日股價仲係企得OK，都仲有1700萬港紙成交。不過想講佢嘅行家東岳189，你見東岳昨日（星期四）已經大插10%，9億港紙成交。

5. 跌乜？都有啲無辜，但你可以見到有新聞講，驚啲PVDF跌價。無啦啦做乜驚？有其他A股公司嘅公告咁樣講。PVDF係乜？氟化工嘅嘢，鋰電池添加劑，電動車喎。某程度上東岳炒到飛天都係因為呢個故事（當然亦因為大陸佬，但都要有個故事），咁但佢佔東岳嘅收入我記得都唔算多。至於理文嘛？暫時未有呢啲收入，但下半年應該有類似嘅嘢貢獻收入。

6. 實情舊文都提過，化工產品我估下半年啲價冇咁硬淨。所以仲持有理文化工嘅，點都沽返一半先，甚至大半，甚至沽晒。

長和系：同你講講邊隻打邊隻

7. 之後，係長和系一大抽公司嘅業績。昨日講咗長江基建1038，結果出完業績股價冇反應，很好，因為個市係跌嘅。

8. 剛剛出咗嘅仲有三間，香港電訊6823，長和1，長實1113。好似大家連邊間打邊間都未知，咁快手介紹下。6823，就簡單啲，固網，寬頻，流動電話同上網，仲有新鮮食咗落肚嘅Now台（留意Viu台唔在6823！）

9. 長和1同長實1113，就大家不如睇我舊文。簡單一句嘅，長和1就係非地產嘅嘢，長江基建1038，電能6，港燈2638，長江生命科技775，新城電台，TOM仔，和記電訊215，屈臣氏百佳豐澤，港口，仲有一大堆嘢。

10. 長實1113呢，地產，賣樓，收租，酒店，酒吧，飛機租賃，仲有啲REIT，仲有少少基建資產。

11. 咁好啦，去片逐隻睇。講真，除咗長江基建外我冇買，歷年亦唔算極熟呢啲公司，所以只能快講。

香港電訊6823：Now台嘅嘢。

12. 先講香港電訊6823，簡單啲。業績呢度，收入156億，純利19億。派息0.307，加咗少少。你見個收入係低過舊年下半年的，而Now台嘅收入係下半年8月先出現。純利亦係低過舊年下半年。

13. 唯獨係派息叫做加咗2%咁大把，咁你有理由相信全年派息都可以做到同舊年差不多，即係一股0.71左右。而家股價10.64，6.7%股息率左右，有一定防守性。

14. 咁大家都知，仲要睇派唔派到，但觀乎啲業務都穩定，大增長冇乜，但保持住應該冇問題。過去4年都冇減過派息（當然，it is until it isn’t）

15. 你見嘛，股價今年都跑贏大市的，收息股咁。

長和1：「收益」同「收入」有乜唔同？

16. 之後係非地產嘅長和1，業績呢度。講真不能就咁睇啲收入純利，但粗粗地快望住先。收益2124億，純利183億。留意返佢呢個「收益」同你在佢income statement 見到嘅「收入」唔同，一大抽聯營公司呀之類。咁我望過呢個收益，按年升唔少，同舊年下半年比都持平嘅。然後你睇佢個income statement收入都係咁上下情況。

17. 中期息就0.8，按年升咗30%。淨係呢樣都夠靚仔，雖然唔好忘記，舊年係減低咗嘅，之前兩年中期息0.87。

18. 股價？年初至今持平，即係都跑贏大市。

長實1113：賣樓是很好賺的

19. 地產嘅長實1113呢，業績呢度。更加不能只睇收入純利，但都冇乜更好方法，粗粗地收住先。真係要睇嘅，收入就低過舊年上半年同舊年下半年。不過純利83.6億，按年升咗31%，但低過舊年下半年。

20. 最重要都係中期息，0.41，按年升咗21%。雖然同1號仔一樣，之前兩年係仲多的。

21. 股價？今年升3成，升到你唔信。

22. BTW，長和1號仔就全世界，一大堆業務。1113就差不多只係獨沽一味地產，仲要絶大多數係香港。但，1113嘅市值，同1號仔係所差無幾嘅。所以你話香港賣樓幾好賺！

點解我冇買長和系？

23. 講到呢度，真係要講多兩句。其實買李嘉誠啲股票，買旗艦嘅（以前長實1和黃13，而家係長和1長實1113），都真係冇乜死錯人，以前都講過多次

24. 之但係你都留意到個問題：點解我冇買？Er…..就真係我都唔知點解，我只係有長江基建1038。咁以前有買過和黃13之類，但近年真係冇買過長和1長實1113。

25. 可能因為驚佢嗰頭近？又或者，係見佢近年啲股價（未計今年）真係麻麻地。你又望下，今年你就話長實1113升到笑啫，但之前連跌3年！而家都仲係5年前嘅位咋喎！1號之前就仲差，甚至6823都仲係5年前嘅位。所以你話我係咪好大損失又唔係。

預告：8號仔。Mirror＋Viu台嘅嘢。

26. 最後，仲有一隻未講。都相當多人問，我都覺得幾有趣嘅東西。惡名昭彰嘅8號仔。點解未講？因為今日先出業績。

27. 有人話當黃色經濟圈概念股咁玩（但，好大市值喎，況且我唔覺得可以咁買股票），有人務實啲，話既然Mirror咁紅（事實），Viu台收視又好咗（都係事實），啲業績應該會靚仔。

28. 詳細嘛，應該真係會週末寫篇文。不過首先，傳統媒體，仲有得玩？你好過TVB唔等於會好搵喎。況且，8號仔入面，仲有一大抽唔係Viu台嘅嘢—唔好忘記6823係8號仔附屬，8號仔係阿媽，6823係仔。以上講6823嘅業務，全部都在8號仔入面見到。

29. 不過啦喎，8號仔真係冇乜點郁過。你睇個股價圖（送埋畀你），真係有波幅冇升幅，「長期4-5蚊咁」。「但而家又真係去返近4蚊」「你見真係一去到4蚊有反彈」（括住呢啲即係唔好太認真，但唔係完全假嘢）

30. 始終有個派息頂住，咁你今年年頭渣到而家嘅，係輸錢的！但都係輸9%，同恒指唔爭好多。即係真係作為Fans嘅，我覺得OK。不過李澤楷啲嘢，係仲難玩過佢老豆啲東西。

31. 最後，容許我自high 一句，今日呢篇真係人都癲，搞咗N個鐘。希望大家覺得有啲用。

================================

Facebook Page：「君子馬蘭頭」ivanliresearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

勞蘇基金：50萬港紙入場，暫定2%管理費 20%表現費，應該隨時可以拎錢走。歡迎PM我報名，現階段冇任何commitment，絶對唔使畀錢住，到時你亦可以反口唔畀。亦都唔使怕答應咗到時反口，絶冇問題，純粹等我知道有幾多人有興趣。我預會有好多人到時因為種種理由唔加入的。

聲音版/錄影版：慎防有人唔知，係有樣咁嘅嘢的。方便唔想睇字/坐車聽/公司聽。一個Post有齊純聲音（mp3）同埋影像版（我朋友碌住電話畫面讀）。 20蚊或40蚊會員限定。Sample呢度，免費試聽。