言出必行：話買10隻垃圾，就買咗．新世界17頻頻回購．國泰293爭政府利息還唔到，係咪就執笠？維他奶345盈警後大插，仲有得跌，定溝貨？ (Patreon)

言出必行：話買10隻垃圾，就買咗

新世界17頻頻回購

國泰293爭政府利息還唔到，係咪就執笠？

維他奶345盈警後大插，仲有得跌，定溝貨？

1. 節目調動，今日多其他嘢想講，所以有Good Read同每日一圖嗰篇順延一天，即係星期二星期三連續兩日都會係有Good Read同每日一圖

言出必行：話買10隻垃圾，就買咗

2. 跟進返，週末出咗篇文，講Business Insider揀咗全美最勁分析員嘅10隻股票。我就話做真人實驗，去買，睇下有乜後果。冇呃你，就已經買晒，每隻3000港紙，夾埋3萬。今日我會再出個Facebook Post講，IG都會有。

3. 成個實驗背後嘅諗法思考等等，週末篇文有寫。跟唔跟嘅隨你，我其實建議你唔好跟。因為真係一堆好細嘅公司，絶大多數我連名都未聽過，所以我係預會輸晒的。但我控制我嘅注碼，3萬蚊輸晒都唔會叫救命，況且……應該唔會輸晒？

4. 另外你仲可以睇到幾樣嘢。第一，本作者真係言出必行，唔會講完又話冇買。講真，如果有讀者以為我會買自己又去買，到頭嚟我話唔買，可能佢覺得被騙喎。固然實際上，關我春事，但情感上我都唔想大家唔開心。所以你見好多時我都唔會講得好實，例如Amazon業績後跌，我話可能沽少少，都只係講可能，結果都冇做。但掉轉，我講得會買/會賣嘅，就真係會去做。

5. 大家返工做人都係，盡量唔好over-promise—雖然我明白實際上有時好難抗拒，因為人人都係鬥吹得大，太「老實」好蝕底。打工老細問搞唔搞得掂，梗係話搞得掂啦，唔通話「都有一定機會搞唔掂但我試下」咩。

6. 不過，好似殷海光（年青讀者識唔識？）話齋，為搵食冇計，但，到你情況變好嗰時，就收復返啲道德嘅失地啦。例如我返工當然都要玩fake it till you make it，但而家唔使返寫字樓工，就當然守返自己原則。

7. 又，係咪估唔到會有張咁嘅相呢！的確係殷海光故居，又真係我影的。就在台北市中心，我好似係食食下鰻魚飯發現的）

8. 講遠咗，畀你見到，真係10隻買齊了。咩位買都畀晒你睇，絶冇做假。你仲可以睇到兩樣嘢：第一，我係無論如何都收市前會買晒，執行上我放mid price，咁你見半個鐘內有9隻都到晒，唯獨有一隻唔多生性打唔中，我都半個鐘後搞掂佢。一來呢個係我性格，二來唔想話明買10隻到時又爭一隻。第二，同一道理，你見隻MQ係升咗10%的，我都照追，有何問題？原因亦同上面一樣。

9. 呢堆嘢我會在yahoo finance開個list紀錄低佢，不過唔會放在咩core list度。都話只係一堆垃圾，況且，買得3000蚊。

新世界17頻頻回購

10. 美股相對靜，所以寫下啲港股，都係極短打多。首先見到新世界又做回購，原來上個月開始已經不停做。表面睇唔係好多，有時幾十萬股，多就一兩百萬股，即係最多都大約一日幾千萬港紙 — 但隻嘢成交都唔係特別多，往往一日都係幾百萬股。

11. 係咪托股價？就當然係。況且，回購嘅嘢仲可以四兩撥千斤—即係我出少少錢回購，你班友當然會見到，然後咪會覺得「嘩公司應該抵買」，就會衝入去。

12. 你問我，回購，就梗係冇大股東增持咁開心。好簡單，回購係用公司入面嘅錢，增持係大股東自己嘅錢，你話邊樣有信心啲？不過新世界股價算殘，公司冇乜特別，又唔係特別非常差。我就唔會買，又唔會特別建議你買，但本身都鍾意公司嘅，或者諗唔到買乜嘅，都可以諗下。始終又唔係好似美股咁升咗好多，又唔係咩中資股咁易出事。呢排啲本地股幾值得睇。

國泰293爭政府利息還唔到，係咪就執笠？

13. 仲有，想講埋大家成日都好關心嘅國泰293。就梗係唔買，但都講下最近單嘢。就係公司（再一次）拖欠政府嘅優先股股息。

14. 固然，你見一般人嘅講法，當然係先有結論再夾硬塞啲嘢入去。就係「國泰好唔掂」（今日先知？），「違約破產」，「政府又做傻仔，啲錢凍過水」（呢個嘛，有啲難講）

15. 但我想講，成件事根本合理之極，一早預咗。只係講一樣嘢已經夠：之前已經拖咗一次啦，咁公司爆咗煲未？市場大插未？上次公佈之後，根本股價都冇乜點變。

16. 根本，好多人連咩係「優先股」都未知。但唔緊要，你唔識咩係優先股，都識睇英文（或者中文）。

17. 你可以睇返舊年6月（咁就一年幾！），政府「打救」國泰嗰時嘅terms．我知好大份嘢，但只睇優先股嗰兩頁就得。

18. 入面根本寫到明，可能會遲派優先股股息，可以因為任何原因（即係，唔使原因），亦都冇乜後果—唔係完全冇，但唔存在個優先股股東（in this case香港政府）可以去告佢或者清佢盤之類，亦唔會起釘唔會罰息。因為，優先股，只係優先，但唔係包你有得收息。包你有得收息嗰啲叫債券，公司唔派就係違約，可以告佢，可以清佢盤。優先股冇呢樣嘢。

19. 至於呢啲安排，亦唔係咩喪權辱國嘅條款，十分standard嘅terms

20. 頭先話，唔派優先股息，又唔係全冇後果。後果係乜？就係類似「舊數未清新數免問」咁。你唔派嘅優先股息，就一路積上去，唔會起釘唔會罰息，但你未找晒呢啲數，就唔可以派息畀普通股股東，亦唔可以回購股票。好合理啫，就係要保障返優先股股東。在國泰呢個情況下，亦都避免咗政府出錢打救，但國泰就派息或回購益啲其他股東之類嘅問題。人地啲安排係有原因的。

21. 但當然，我話完全意料之中。因為好簡單，飛機都冇得飛，點派息？當然拖得就拖。況且，你再睇下啲terms，頭三年優先股只係3%息，之後先慢慢加上去。你係國泰，根本冇任何原因要而家找數，至少都等到第四年先計下數。你亦可以話，最初設計就係預頭幾年公司都冇乜運行，公司亦都係Buy time，睇下幾時先回復正常。但當然不能無了期（話晒都公帑），去到第6年就去到9厘息，都幾係嘢，亦都係一個「誘因」去「迫」國泰唔好無了期咁拖住，照計去到一個位國泰就會贖返佢—好粗淺咁講，我出面借錢然後還咗你呢舊嘢好過啦，使乜捱你9厘息。

22. 係呀，發行人可以贖的，但呢個terms唔一定出現，正如你亦可以安排到個認購人（呢個情況係政府）可以put，即係好似call loan咁，但當然唔係太常見。

23. 又一例子，再次畀你見到啲網友係全無常識，都算。但又要出嚟講。我上網多年，唔覺得以前啲人冇咁笨—但以前啲廢人冇咁大聲。亦因為咁，你訂呢個Patreon是超值的，記住叫多啲朋友嚟。

24. 呢節啲內容應該之後會出Facebook Page，吸下讀者。況且呢節又唔涉及啲咩投資策略，而大家都飲咗頭啖湯。而我一貫作風，係會由頭寫一次，可能又會有唔同角度。

維他奶345盈警後大插，仲有得跌，定溝貨？

25. 講到本地股，就當然要講維他奶345。實情上星期五先講過，出咗盈警，當時我認為個盈警甚至唔係壞消息。結果星期一，盈警之後第一個交易日，股價大跌，一度去到十幾巴仙，收市都跌10%，跌到3年低位，即係之前買嘅都輸錢。

26. 但你話我頑固都好，我都係覺得市場過敏。唔覺得星期五嘅分析有乜嘢諗漏。當然未買嘅未必應該買（實請呢個世界好多股票），買咗嘅亦未必應該溝貨（我一向都唔興，反而升咗可能會再加碼），但你話買咗又驚嘅，我覺得可以繼續坐的。

================================

Facebook Page：「君子馬蘭頭」ivanliresearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

勞蘇基金：50萬港紙入場，暫定2%管理費 20%表現費，應該隨時可以拎錢走。歡迎PM我報名，現階段冇任何commitment，絶對唔使畀錢住，到時你亦可以反口唔畀。亦都唔使怕答應咗到時反口，絶冇問題，純粹等我知道有幾多人有興趣。我預會有好多人到時因為種種理由唔加入的。

聲音版/錄影版：慎防有人唔知，係有樣咁嘅嘢的。方便唔想睇字/坐車聽/公司聽。一個Post有齊純聲音（mp3）同埋影像版（我朋友碌住電話畫面讀）。 20蚊或40蚊會員限定。Sample呢度，免費試聽。