盈富基唔畀美國人買，哦．勞蘇一堆（最值錢係呢部份）．港股已經定咗落嚟，美國經濟數據差美股照升．SPGI 又新高，到底公司點賺錢？（有埋Excel） (Patreon)

盈富基唔畀美國人買，哦

勞蘇一堆（最值錢係呢部份）

港股已經定咗落嚟，美國經濟數據差美股照升

SPGI 又新高，到底公司點賺錢？（有埋Excel）

盈富基唔畀美國人買，哦

1. 大市算係靜咗落嚟，實情都冇乜好寫，你見我的確唔係好受啲雜音影響。有人以為係要炒上炒落，成日睇住啲最新消息，係錯的。我都講過我經常瞓到三四點，港股收市先起身。以前返工時就照買美股，唔使「睇住」。認為成日要「睇住」嘅人，只係搵啲假安全感，實情啲消息去到普通散仔都知嘅，乜股價都郁晒啦。

2. 做金融行業嘅就冇計，所以做金融嘅投資成績先差。因為你冇得隔絶啲躁音，必定由返工到放工都有人講，甚至有客問，自己原本唔驚都變驚。但有糧出就份糧包埋。所以唔係打金融工嘅，真係唔使自尋煩惱。

3. 講咁多想講乜？就係「盈富基金」。唔畀美國人買喎。哦。

4. 有乜評語？冇。有乜影響？冇。

5. 你好失望？但點解你覺得好有影響？定你只係聽唔知咩人講？你可以睇下我Facebook啲留言。我講明冇乜影響，但啲人都會覺得，嘩，股災啦。嘩，金融核彈呀。冇得救的。

6. OK，好快話你知件事係點。上次真係比較大風波時，一早已經寫咗文解你知！盈富基金十九問。拿，幾咁有用！係咪後悔冇早啲訂呢！記得叫朋友訂！

7. 當年侵侵仲係總統時，唔畀美國人買中移動之類嘛，咁盈富基金咪會出現啲問題。寫咗啦。拜登早排延續咗呢個禁令。咁，你美國人買盈富基金，咪會持有中移動咯。當然就要警告你，同埋叫你啲經紀搞清楚個客唔係美國人。

8. 就咁已經講完。有乜影響？冇影響。就算有都上次見到晒。BTW，今年中移動升咗10%，大幅跑贏指數。

9. 至於咩會狂沽盈富基金，哦，關我乜事？會隊低個市？盈富基金幾時變咗恒指成份股？明顯啲人連個世界點運作都未知。哦，我渣咗盈富基金，咁會唔會畀勁沽？答案係，就算會，都唔會影響個價。因為有套戥，如果恒指升500點但盈富基金跌10%，我就發達啦，梗係狂買盈富然後沽期指（或嗰幾十隻正股）

10. 固然，你見夜期ADR好似回返，但唔該，真係唔關呢單嘢事。

勞蘇一堆（最值錢係呢部份）

11. 容許我最後講多兩樣嘢：首先，早排有運動員出嚟講，「你啲友只係book過街場跑下渣馬就當自己識運動」，我唔係完全同意（我係咪要好波過美斯先可以講波先可以批評佢？）。但，你的確見到，好多完全乜都唔識嘅人，都照樣出嚟講金融的。諗真啲你就明點解，運動嘅嘢，跑到幾快跳到幾遠好客觀，但邊個先叫「識金融」，都唔係咁易分

12. 仲有，第二樣嘢，skin in the game．你朋友你屋企人你愛人可能係為你好（咁出發點好都可以害死你，即係「香爐灰溝水醫病」就另一回事，不討論），但你網上見到嘅資訊，唔好意思，絶大多數人都有自己嘅agenda，特別係金融界別，我點解要益你？你要諗下人地背後點賺你錢。當然唔一定係金錢上，可能係非金錢。

13. 香港人（台灣人都係）十分虛偽，好似為利益有問題，但我認為求利益全無問題，你唔交12蚊月費嘅，下個月我就唔畀你睇文啦。呢個咪我搵你錢嘅方式。

14. 咁你話未搞Patreon前呢？我在Facebook呃like嘛，然後我可以在公司刷存在感，又可以出面寫稿收錢，又或者出廣告post，就係咁得益。

15. 我嘅business model，好簡單。最好改善到大家嘅投資回報，即係搵到錢。唔得嘅（神仙咩，況且都要睇你自己咩料子嘛，係咪？），至少都希望你學到啲嘢。最後？真係賺唔到錢學唔到嘢，都至少有得啖笑。即係，profit, knowledge, entertainment．（其實同我本人書嘅WTF哲學一樣，W對娛樂，T對knowledge，F對profit，唔知係乜嘅自己買返本）

16. 如果你搞唔清楚對方係靠乜得益，先最頭痕。而話你知，KOL嘅嘢，好多係靠販賣恐懼的。當然乜事都講到爆煲，因為人就係有危機感嘅動物嘛，有人提你，你梗係覺得開心。

17. 其他行家搵食我就唔阻啦，有啲係賣貼士，我反而覺得正路。但又冇貼士嗰啲，你有冇諗過靠乜生存？咪就係靠你嘅恐懼。每次佢地都講到股災，但冇一次你見佢夠膽瞓身沽空。我呢？我唔同，你覺得我係股市啦啦隊幾時都盲目唱好，但我身體力行，全副身家買晒落去。見唔見到分別？

18. 雖然以上呢啲嘢好似同金融關係唔大，但其實呢啲先係最大關係。點解人人都係睇嗰啲公司嗰啲財務數字，有啲人不停咁輸錢？咪就係自己嘅問題。

港股已經定咗落嚟，美國經濟數據差美股照升

19. 好啦，發咗輪勞蘇，亦因為大市冇乜好講。恒指反彈兩日後，星期四晚夜期你見回返啲，所以未必肯定話見咗底（點肯定？），但至少大市靜咗落嚟。至於咩美國禁止基金買中港股，更加係提都冇人再提。See？最初言之鑿鑿嗰啲又點講？今日未禁聽日禁，今年唔禁下年禁？

20. 美股呢？上篇都講咗，好似八九成公司業績都好過預期，但好多股價已經冇力上。但呢個係咪代表個市已冇力？未必，你見呢幾次業績都係咁。

21. 另外見到，美國出嘅經濟數字唔多好，個第二季GDP遠遜預期，街估8.4%，出6.5%，爭咁遠都算少見。另外首次申領失業救濟人數高過預期，估38萬，結果40萬。

22. 咁係咪美股就唔掂？當然唔係，即時道指升200點添。雖然次次講「經濟越差股市越好」都幾搵笨，但有時真係咁。至少你擔心啲咩縮表加息，又可以遲下先驚。

23. 至於我啲持倉，係冇變動嘅。PayPal結果都冇沽，但咁多隻我真係比較擔心呢隻，表面上好似護城河好高，好多朋友都好熟間公司，「度度都用」。但呢個並唔自動係護城河。「柯達以前夠多人用」（後生讀者Google 下），「Nokia以前夠多人用」（BTW，剛出咗業績，好勁。封殺華為受惠股？又唔完全係，你見愛立信股價唔得的。連呢啲都睇埋，到底我一日睇幾多嘢？）。PayPal一直令我擔心嘅，都係競爭。我在Patreon收錢用緊Payoneer，平過佢，亦一樣咁方便。「我有時覺得呢啲公司就會搵人hack對方嘅系統」，亂估，冇根據，笑下算。

SPGI 又新高，到底公司點賺錢？（有埋Excel）

24. 今日寫得長，但都快講埋兩句。Core List上嘅 SPGI（標普全球），出咗業績，相當強勁。股價已經去到新高，你有幾可見其他人講呢間公司？其實完全唔細，成1000億美金市值，但啲業務太悶。今年升27%，跑贏晒指數

25. 唔知係乜公司？舊年我寫過一篇。因為當時佢地買IHS Markit，係舊年全球最大收購，而唔少人都唔知呢兩間係乜公司。

26. 好啦，留意下，由我推介時買呢，股價升咗26%，同期標普指數（個指數都係呢間公司的！連道指都係佢的！）只係升20%。但我當然唔只係攞威，仲想你留意多樣嘢

27. 我推嗰時係336蚊，但推完係咁跌，一度跌到300蚊，超過10%，仲要個市好似係升嘅。咁如果我走去低位「止蝕」，就錯失晒升浪。我亦到而家都唔知「點解跌」，好彩我冇走去問人「係咁跌點算」。學到嘢冇？真係唔使亂咁止蝕，亦唔好成日諗啲股票做乜跌，有時就係唔知點解。

28. 你可以去佢地公司網站，幾多嘢睇的。最新業績presentation都有，可以留意下間公司點賺錢，原來我都唔係完全清楚。而家幫你整埋個Excel。有得download

29. 呢間公司分開四瓣業務，實情都算幾獨立，用嚟自學最好。睇乜？睇四瓣業務邊樣佔最多，邊樣增長最快，邊樣利錢最重。

30. 四個業務，Ratings，即係好多人都聽過嘅信貸評級，標普，同埋穆迪（Moody’s）兩巨頭，十分之惡，兩分天下，護城河極深。Platts係買返嚟嘅公司，做石油數據。Indices正係標普指數，唔止，道指都係佢，你啲ETF全部要交license fee．Market Intelligence有點難解，但就真係做啲各種研究，主要係金融數據，你見有時我貼啲圖都係佢地的。

31. 大約你都估到，評級係起家嘅核心業務，佔收入一半，盈利（呢度指operating profit）六成，理論上公司係想踩入啲新業務，但呢一瓣比例上呢兩三年更加重要，但我未睇再舊啲嘅數據。留意你見佔收入一半但盈利六成，就當然估到利錢高，68% margin（收入/operating profit）。第二大嘅係Market Intelligence，佔25%收入，佔16%盈利左右，但利錢係咁多瓣中最低。Indices方面，佔收入13%，但貢獻16%盈利，利錢仲高過評級。Platts就冇乜特別

32. 順手講埋，對手穆迪做嘅嘢都差不多，不過好似冇乜做指數。MSCI就只係指數，冇信貸評級。咁我就係貪SPGI樣樣有啲，但其實穆迪股價係略為跑贏的，實不相瞞我最初係買穆迪，然後先換咗去SPGI。

================================

Facebook Page：「君子馬蘭頭」ivanliresearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

勞蘇基金：50萬港紙入場，暫定2%管理費 20%表現費，應該隨時可以拎錢走。歡迎PM我報名，現階段冇任何commitment，絶對唔使畀錢住，到時你亦可以反口唔畀。亦都唔使怕答應咗到時反口，絶冇問題，純粹等我知道有幾多人有興趣。我預會有好多人到時因為種種理由唔加入的。

聲音版/錄影版：慎防有人唔知，係有樣咁嘅嘢的。方便唔想睇字/坐車聽/公司聽。一個Post有齊純聲音（mp3）同埋影像版（我朋友碌住電話畫面讀）。 20蚊或40蚊會員限定。Sample呢度，免費試聽。