美國禁咗基金買中港股未？Apple Google Microsoft Facebook Paypal Visa Shopify Spotify 麥當勞 星巴克業績。乜嘢國家奧運先贏得多牌？美股巨企同其他公司股價相關性去到新低。奧運各國表現同預期相比如何？美國乜都靠晒企業唔得架喎。 (Patreon)

快評幾句— 美國禁咗基金買中港股未？

業績一抽— Apple Google Microsoft Facebook Paypal Visa Shopify Spotify 麥當勞 星巴克

每日一圖— 乜嘢國家奧運先贏得多牌？美股巨企同其他公司股價相關性去到新低

Good Read — 奧運各國表現同預期相比如何？美國乜都靠晒企業唔得架喎。

FB Post Summary— Google Microsoft Apple 業績速評

1. 星期六731同HomeBlogger我有個真人講座，尖沙咀，5點至7點，唔得閒嚟可以之後網上重溫，但一樣價錢。內容會講下半年部署，大市跌夠未，仲有你啲咩強積金配置之類。可以send定兩條問題。詳情呢度，報名呢度。到時搵我影相簽書都得。

快評幾句— 美國禁咗基金買中港股未？

2. 實情昨晚係聯儲局議息，上次六月中搞到滿城風雨，話咁快又個幾月。留意市場反應好似都當算正面，主席話未有條件縮表。

3. 不過我估你最關心嘅係港股。由於明顯唔係全球事件或金融危機（斷症好重要！），所以你睇嘅嘢都唔使太多，睇中概股，ADR，夜期，都差不多。固然冇包生仔，冇話中概股彈ADR彈夜期升返700點星期四就實彈，況且高開都可以倒跌。

4. 但即係，同咩「美國禁止基金買中港股」之類，或者咩「冇人再敢買中資股」之類，真係爭得好遠好遠。今次又係好好嘅教訓：首先，唔好走去低位打靶沽畀人。第二，真係唔使成日睇股票。第三，遠離啲九唔搭八嘅人，嗰啲成日打風又碼頭工人消息，成日都轉假新聞（例如呢單）嘅人。當然有時跟車太貼中伏難免，你都會，我都會，嗰啲友亦都會有時笠個「未FC」「寧可信其有」嘅帽，但你會睇到個態度分別的。

5. 香港地講media literacy，真係笑話。不過點分消息可唔可信？有幾步好簡單：首先睇下係咩人傳過嚟，你總有啲細細個已經亂吹水嘅朋友，遠離呢啲人。另外睇下係咩媒體報，再去Google下，有時根本就冇呢段嘢。而傳統媒體嘅公信力，都仲係遠勝於你啲網友。仲有，可以嘅話，用半分鐘理解下內容。例如「美國禁止基金買中港股」的確係Bloomberg有報，但都係引返內地某唔知乜水引述嘅傳聞。咁同佢地自己爆料嘅嘢，係好唔同的。

業績一抽— Apple Google Microsoft Facebook Paypal Visa Shopify Spotify 麥當勞 星巴克

6. 嘩，人都癲，N咁多間。只能極速評，但講晒啲我有留意嘅公司（不一定有買，下面講），同埋績後股價表現。今個星期六應該會詳細寫堆Big Tech

7. 首先，在Facebook寫咗Big Tech嗰三隻（Apple, Google, Microsoft）。你想睇CNBC原文嘅，Apple呢度，Google呢度，Microsoft呢度。三間都勝預期的，但只得Google 大升，Microsoft破頂後回軟，Apple直頭要跌。

8. 順手講埋，剛剛星期三晚收市出嘅Facebook．業績當然一樣係得，但盤後股價都跌得幾勁。原因任你講，可能因為啲用家數量唔算太靚仔，又或者預告之後增長會放慢。

9. 同樣在core list嘅，仲有亦係剛剛星期三晚出嘅PayPal，呢間就真係麻麻，盤後都跌得勁，我係會考慮賣的，雖然好可能最後都係傾向一動不如一靜。但公司面對挑戰都幾大，例如我在Patreon都唔用Paypal的，用佢對手Payoneer

10. 仲有在core list嘅，VISA同埋Shopify都係星期二晚出咗業績。兩間都好，但股價都要跌。

11. 另外有間在watch list，有提過下嘅Spotify（聽歌嗰間，唔好同樓上Shopify搞亂）。收入純利雖然勝預期，但又係用家數字令人失望。股價大跌的，我有機會買，可能沽咗啲PayPal買，但記住我一樣未講都即係未做。我諗嘅嘢好多，但做嘅trade並唔太多。

12. 最後，兩間飲食股，麥當勞同Starbucks冇買亦冇乜點提，雖然耐唔耐我都想買Starbucks．兩間都勝預期，兩間都跌。

13. 綜合你見到，真係差不多間間都勝預期（Paypal係少數例外），有啲仲要係高過預期好多。但股價之後有得升嘅呢？好似一半都冇。又唔係好奇怪，對上兩三季都見過呢啲現象。當然我未好仔細睇，但除左PayPal外，其他我都冇乜擔心。

每日一圖— 乜嘢因素最影響國家奧運成績？美股巨企同其他公司股價相關性去到新低

14. 乜嘢因素最影響國家奧運成績？ —應下節，講奧運。留意唔同足球，雖然有啲關係，但奧運項目同牌數多好多，好講國家實力。好啦，咩國家先拎得多牌？最簡單諗咪人多，但真係？印度呢？印尼呢？越南呢？一路都唔多牌，但越嚟越多。所以你估到了，另外，仲要係有錢。當然咩體育文化呀，有幾多運動員呀，場館呀等等都有關。不過，最重要嘅兩個因素其實係：第一，主辦國。亦同足球唔同，奧運主辦國嘅優勢極之大。第二，係…….政治。後生讀者真係唔知，我細個時呢，奧運真係互相杯葛的，邊有而家咁大愛，係84/88年後先開始叫做「全球」。

15. 美股巨企同其他公司股價相關性去到新低 —我個題可能有啲誤導，但易入口。想講嘅係兩樣嘢，第一個係平時你見嘅美股標普指數（當然巨企佔比重多啲），第二個係「標普等值指數」，即係假設500隻成份股都係一樣比重。你見呢兩個指數，相關性去到新低，亦都即係可以話，啲大型股同冇咁大型嘅，表現幾脫節。作者話埋你知，上次咁低嗰時正係科網爆煲之時。不過我覺得兩樣嘢，第一，而家啲科企就真係有winner take all嘅特色嘛。第二，其實講緊近低都仲有0.84，又唔係好誇張。雖然歷史上長期都好高。

Good Read — 奧運各國表現同預期相比如何？美國乜都靠晒企業唔得架喎。

16. 奧運各國表現同預期相比如何？—都話應下節講奧運，FiveThiryEight嘅文（Nate Silver之前預測總統大選出晒名）。當然唔係所有嘢都可以量化（但獎牌榜唔係量化係乜？），亦好多變數，但係咪不能預測？呢啲只係懶人反智嘅藉口。當然有得估，唔通美國會包尾？「乜都有可能」？「你不如聽日成副身家買六合彩丫」，世界唔係咁運作的。人地有晒經験有實數據出糧咁去做呢啲嘢，點都好過你啲網友廢up．聽落估奧運奬牌都唔太難，主要係睇返以前幾屆嘅實力，主辦國優勢（加今屆，減上兩屆），新項目咪睇其他賽事。留意佢係比較啲國家實際獎牌同預期獎牌，點估嘅佢舊文都有講，佢有每項咁估，但好似冇畀實數，亦都冇分開金銀銅，係估總數。如果想睇估金銀銅嘅，另一個source，GraceNote就專做體育數據的。

17. 美國乜都靠晒企業唔得架喎—大家在外國人有三急點算？在東亞各國嘅，就商場，或者地鐵站。但美國呢？我冇去過，聽聞好多地方都唔易搵公廁，於是好多人去Starbucks，亦會造成各種問題。篇文由呢樣寫起，講返好多政府應該做嘅嘢，都係企業做咗。咁聽落幾好丫，有人幫政府做。但有冇諗過背後代價係乜？例如，係咪商界騎劫咗政府？

FB Post Summary— Google Microsoft Apple 業績速評

18. Google Microsoft Apple 業績速評-—冇乜特別，就係速評呢三間，詳評就等星期六（希望得閒）。實情買Big Tech呀大企都好，一路買一路自己學嘢。玩熟呢啲你先去買理文化工啦（都仲幾硬淨）

================================

Facebook Page：「君子馬蘭頭」ivanliresearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

勞蘇基金：50萬港紙入場，暫定2%管理費 20%表現費，應該隨時可以拎錢走。歡迎PM我報名，現階段冇任何commitment，絶對唔使畀錢住，到時你亦可以反口唔畀。亦都唔使怕答應咗到時反口，絶冇問題，純粹等我知道有幾多人有興趣。我預會有好多人到時因為種種理由唔加入的。

聲音版/錄影版：慎防有人唔知，係有樣咁嘅嘢的。方便唔想睇字/坐車聽/公司聽。一個Post有齊純聲音（mp3）同埋影像版（我朋友碌住電話畫面讀）。 20蚊或40蚊會員限定。Sample呢度，免費試聽。