ivanliresearch

跌乜？跌到幾時，乜嘢位買？（有Excel）．LMVH業績（有Excel） (Patreon)

Published:

2021-07-27 20:09:17

Edited:

2021-07-27 20:19:18

Imported:

2021-07

Downloads

Content

跌乜？

跌到幾時，乜嘢位買？（有Excel）

LMVH業績（有Excel）

1. 大跌市就啱啦，賣個廣告，今個星期六7月31黃昏，我會同HomeBlogger在尖沙嘴搞個真人講座，收費的，兩粒鐘。講港股點算好，下半年部署，心水股，同埋你啲MPF配置之類。去唔到嘅可以之後網上重溫，但都係收費。你可以預先問定兩條問題，會細心作答，鍾意搵我合照簽名都得。詳情呢度。報名呢度。

2. 事與願違，以為跌定，結果星期二繼續大瀉，留意成交都好大，3600億，應該史上最高。

3. 不過亦要講返，你見我啲倉，就真係全部跌得少過晒三大指數的。（又，當然係HK4係主力，金額最大）

4. 咁你大約都估到，因為入面啲防守股，同埋本地股（留意圖入面嘅嘢唔係我持倉！只係示範）。又再示範你知，真係不能全部買晒同一樣嘢的。如果你借咗錢嗰啲仲大鑊。

跌乜？

5. 今日呢篇就真係值回票價，又返返你地最關心幾個問題：跌乜，跌到幾時，乜嘢位買。

6. 首先，最簡單可以睇下ADR。雖然你見星期一晚ADR都唔算跌得好勁，事實港股星期二開市唔算跌好多，午後先再加速。今次，應該差不多跌定啦…….？

7. 另外，跌乜？之前講咗監管教育股科技股之類，大家都明。問題就係係咪可以無限引申，所有行業都遭殃？似乎唔係。固然你輸錢，或者富豪輸錢，外資輸錢，絶對唔係大陸政府嘅考慮。但難聽講句，損人不利己都冇乜著數。科技股整治大家絶對明，全世界都係咁做，只係中國比較粗暴。

8. 但教育股呢？真係只係為咗等大家放心生仔，同埋唔好拉濶社會差距之類？固然以上都係原因，但一路都講漏咗一樣最重要嘅嘢：VIE

9. 我建議你可以睇下Bloomberg呢篇文（希望睇到，睇唔到都冇計）。題目固然簡單：China Doesn’t Care How Much Money You Lose，但入面有講埋深層次啲嘅嘢—政府唔係要趕絶外資，亦唔係要打壓富人（當然有必要時絶不手軟）。最重要都係：控制。

10. 此話何解？就係我頭先講嘅，VIE。絶對唔係中國發明，亦唔係新嘅嘢，只係政府真係想整治好耐，卒之出手，可能滴滴就係導火線（馬雲就反而聽話煞停咗螞蟻）。唔知VIE係乜？可以快睇。簡單嚟講，好多中資公司，理論上不能有外資股東，要特批。實際上點搞？就係用一間境外公司，然後我每年過晒啲錢畀你咁。「好似搵人頭買樓咁」。咁當然呢種安排一路都有風險，但冇事咪冇事，有錢賺時大家唔會理（記住呢句嘢！），出事咪出事。

11. 你可以諗下，滴滴實情係一間「開曼群島」公司。咁理論上，佢去美國上市係唔使中國政府批嘅（拿，都要講法律的）。咁但你夾硬去馬嘅，你開曼公司我阻你唔到，但可以搞你在中國嘅業務，後果大家見到。至於教育股，亦係好多用VIE上市嘅

12. 而家睇到嘅係，幾明顯就係唔會再容許呢啲走法律漏洞嘅嘢。要上市嘅，正經搞，同埋好可能唔會畀你去美國上，只能在香港。話說回頭，呢個當然亦唔多唔少同數據安全有些少關係。

13. 咁明白到以上嘅睇法，照計，又好似唔係好驚。至於咩美國唔畀基金買中港股，我係唔信的。呢啲位你咪睇到，到個市一跌就自然多古怪嘢，你諗下早兩年又係咁上下，港紙爆煲呀唔畀你提錢呀乜都講，因為有人想去信，自然有人會傳。你可以用幾秒睇下，故事冇錯係彭博報，但亦只係引返大陸某個不重要嘅人再引述市場傳語，即係廢話。你要信嘅亦可以，而我亦可能錯，但，根本都無關重要。

14. 你亦諗下，美國畢竟都仲有啲法治，你睇即使係侵侵嗰時咁亂嚟，除牌或者禁令等等，都要搞一大輪嘢。否則分分鐘基金告返政府轉頭（法治國家嘛）。所以我就唔信咩禁買中資股呢樣嘢，亦唔需要。

跌到幾時，乜嘢位買？（有Excel）

15. 咁講完以上種種，量化啦。跌到幾時？係唔知的。因為呢個問題問得廢。你日日跌100點，同日日跌1000點，係唔同的，你要睇嘅係個估值，或者在呢個情況，咪睇跌到幾多點。

16. 大約跌到幾多點呢？就比較有討論價值，雖然都唔係易答。你問我就覺得應該已經差不多。但如果再睇悲觀少少呢？如果真係「最壞情況」呢？

17. 咁「最壞情況」，咪同返歷史比。當然你話今次唔同嘅會打仗嘅會核彈嘅咁咩都唔使討論。但我相信如果下星期核爆你應該唔係返緊工睇緊呢篇文。

18. 嚟啦喎，呢個關於恒指嘅圖，我搵人影的，所以有啲矇。但放心，我已經入埋Excel，下面有．你要留意嘅，係Book Value嗰格。呢個就係恒指嘅每股帳面值，BVPS。見到2021年係估計，因為而家先8月。2022年亦係。

19. 睇堆數字有冇見到有乜奇怪嘅地方？就係，點解2021 同 2022年會低過2020年？好少見會咁。

20. 帳面值係乜？大約就係「股東資金」，咁正常就係年頭100蚊，今年公司賺咗10蚊，年尾咪變110。或者如果你派4蚊息嘅，年尾就變106蚊。集資或回購嗰啲唔解住，反正唔會80隻一齊做

21. 咁咩情況下個BVPS會跌？幾種，例如蝕錢，或者派息派突。但兩種情況都唔似係。畀你睇埋街估嘅恒指每股盈利，點睇都唔似會咁多隻成份股加埋要蝕錢。

22. 但，仲有一種情況BVPS會跌：因為我地唔係講一間公司，係成個指數—咁成份股會變嘛。你大約諗到，換咗啲嘢，條數咪唔同。我估係呢個原因，又或者其他古怪嘅錯誤（有幾出奇？），但未能即時睇到。

23. 總之，我係有啲懷疑個BVPS係咪會去到21,235（2021年底）/22,876（2022年底），但暫時信住先

24. 咁嚟啦喎，我搵返史上恒指跌到幾多倍Price to book（即係恒指水平/BVPS），咪大約知道。固然歷史未必次次一樣（例如聽日核爆之類，記得買埋我本書先），但會有個參考，對不？

25. 呢個表你可以自己download玩，我整理咗史上恒指最平嘅Price to book，計法好簡單，咪當年嘅恒指低位，除返當年BVPS．然後咪見到最殘時估值係幾多！留意BVPS可以有兩個，有年頭有年尾，都同你計晒

26. 大約見到，幾次大股災，見底嘅位都大約係0.9 – 1.1倍Book，所以0.9倍應該係幾放心嘅位。不過提提你，0.9至1.1倍，都爭咗0.2倍，如果BVPS 21,235，「呢度都成4300點！」。係咁架喎，跌市捉底你估易？特別係跌到見底時，往往一日高位幾千點的。

27. 咁用最保守嘅睇法，0.9倍 x 21,235，就19,111，嘩！1.1倍嘅，23,558。而家恒指25,086，除返21,235，咪1.18倍book．咁即係，19,100-23,600左右見底咯。係呀，成四千點。

28. 當然，理論上，而家都2021年下半年，你鍾意拎2022個Book value去計都得，開心啲，就會係22,876 X 0.9 或者 1.1— 20,600至25,200左右。

29. 講咗咁多，即係如果樂觀嘅，而家啲呢位應差不多見底。悲觀嘅，咪跌多6000點。嘩，講咗等於冇講？咁但，又認真講，呢幾日都不過跌咗10%多啲啫？點解你覺得會係好抵買？唔係的。2020跳樓價時，都真係跌到0.9倍，今次有冇上次咁大鑊？就好主觀判斷啦。我就估唔使去到0.9倍嘅。「咁但我可以錯架嘛」