港股跌1100點，點算好？Tesla 業績（有埋Excel）。今次經濟復蘇通脹並唔係特別高。美股回購力度一路升。美股跌少少有人衝入去買。呢位仁兄廿年冇用過錢。讀Master搵你笨。買Bitcoin左翼定右翼？ (Patreon)

快評幾句—港股跌1100點，點算好？

Tesla 業績（有埋Excel）—首次一季賺過10億，又，係咪高位沽晒Bitcoin？

每日一圖— 今次經濟復蘇通脹並唔係特別高。美股回購力度一路升。美股跌少少有人衝入去買。

Good Read —呢位仁兄廿年冇用過錢。讀Master搵你笨。買Bitcoin左翼定右翼？

FB Post Summary— 順流逆流。滑板金牌受惠股。

快評幾句—港股跌1100點，點算好？

1. 首先留意，雖然慘烈，但你見我FB有寫，我堆港股當然跟跌，但每個倉都係少過港股三大指數。正如美股嘅倉（個圖反映星期五），當然指數新高我堆嘢都新高，但留意我亦係啲倉跑贏大市。跌嗰時少過大市，升嗰時多過佢（同埋其他人），慢慢就拉開。

2. 另外，見到分散嘅重要未？咁你可以話一早買晒美股仲賺得多，但我唔求賺到最盡，只求買得大坐得安心。到美股唔掂時又點？即使只係講港股，咁我啲嘢跌得少過指數，當然因為都有唔同行業。個list短期唔公開，但例如長江基建1038呢啲有一排都成日講，我都有。港鐵66恒生11呢啲悶嘢都有，三隻都逆市升。甚至你見領展823中銀香港2388呢啲，都係企得較硬。

3. 見唔見上面呢堆嘢有乜共通點？就係，香港股。我買港股都會分散返本地同大陸股，你成手中資科技股就明顯做得唔足。

4. 講返呢1100點，點算？今次唔只例牌對白。首先係斷症，值唔值得討論先？咁跌4%，就值得講。然後諗下，跌乜？你見到其他股市唔係跌得咁多，美股仲要創新高，明顯唔係咩系統性問題，或全球經濟問題。另外，頭先都講咗，啲香港股跌少好多，更明顯見到係中資股獨有嘅問題。

5. 咁跌乜？可能好多人都知，教育股嘛。近乎將你收歸國有咁滯，咁星期五都知啦，教育股本身我從來都冇寫過乜滯，太貴。但，呢堆嘢唔係騰訊阿里巴巴，明明唔係指數成份股，執晒笠都唔關我事架喎，做乜其他股票都跌？呢下就有趣了。

6. 你可以睇吾友高天佑嘅文，簡單嚟講，你可以話有人（外資？）重新審視風險之類。今日可以將呢個行業一夜消失，下次到乜？咁就當然沽咗先。

7. 咁有啲人又會認為中資股玩完，冇人敢掂，買乜都驚你收歸國有。咁但，故事當然唔係咁簡單，所有嘢都係睇值博率。極端講，如果真係好大機會咁做嘅，就唔止跌4%啦？況且，中國呢類風險唔係第一日丫，只係似乎咁多年都冇乜點樣去鐵碗做呢樣嘢。咁去到某啲位，你咪又會習慣。

8. 至於背後乜動機？我就唔知了，斷估唔係同啲教育富豪有仇，佢地又唔係大到馬雲咁有機會動搖管治，有個講法話為咗社會和諧，唔好窮人上流唔到之類，等啲人夠膽生仔，我都覺得可能有關係。

9. 咁我一路都講，個問題唔係咩法唔法治民唔民主，但，以往嘅中國，似乎願意畀人發達，對企業家好，對股民都還好。而家就似乎唔係，咁你就明白點解港股冇乜運行了。

10. 可以點？都真係冇乜點。我唔認為會跌好多，ADR都算略為回穩，啲中概股都唔算跌得太多（除咗隻BEKE），當然我嘅好多同你嘅好多未必一樣，你話跌一兩千咁冇乜出奇（一日都跌咗1140啦！），但去到咩24000樓下就怕且唔會。

11. 有乜好做？咪照樣做你做開嘅嘢，但，重新審視，到底你啲嘢係咪側埋一邊。係嘅，都唔係叫你即時換晒佢（我發現啲人好鍾意咁做的！），咁例如你全部港股嘅，新錢咪買美股咯。港股入面全部中資股嘅，新錢咪買本地股。

12. 分散投資真係成日畀人笑，但如果你係1100點已經問我點算 已經叫股災嘅，都係分散啦。況且係因為分散你先可以買得大。

Tesla 業績—首次一季賺過10億，又，係咪高位沽晒Bitcoin？

13. 留意星期一日晚收市後先出的。呢間週末嗰篇冇寫的（強文，必定要睇），但既然出業績（CNBC文）時我仲未瞓，而且亦唔少讀者鍾意，就快寫兩句。上次業績都有賽後評。留意間嘢我仲有些少（所以在core list），但年頭已沽咗一半定大半，持股唔多的。

14. 另外，個Excel除咗Big Tech，同埋之前嘅NetFlix Twitter Snap外，我連Tesla同Pinterest都入埋了。

15. 好快手講，業績係好的，收入120億，街估113億。每股盈利1.45，街估0.98。今季繼續賺錢（連續8季了），純利11億，按年升10倍，第一次超過10億。但見到了，到公司賺大錢，股價反而唔太得。記住股價係炒預期。

16. 比較正面嘅係，嚟自賣carbon credit嘅收入只係3.5億（上次篇文有講係乜），近五季最少。賣車嘅毛利率去到28.4%，亦係五季最高。

17. 至於生產數量同付運數量，之前已公佈咗，Excel亦有，不用討論。留意Bitcoin方面嘅減值只係2300萬，唔係大數，遲下再分析，可能已經高位沽咗唔少？

18. 業績肯定係好嘅，不過盤後股價就只係升少少。今年都仲要跌10%，衰過你買港股，邊個話估值唔緊要？

每日一圖— 今次經濟復蘇通脹並唔係特別高。美股回購力度一路升。美股跌少少有人衝入去買。

19. 今日太多嘢講，呢部份講短啲。

20. 今次經濟復蘇通脹並唔係特別高—有圖你睇，同返史上咁多次經濟復蘇相比，咁經濟復蘇物價當然升。而今次，甚至同歷史平均比都唔係特別高，真係咁驚通脹？

21. 美股回購力度一路升—呢個一路都講係動力，亦係點解「放水」會有利股市嘅機制之一。公司易借錢，利息開支低，可以做更大槓杆。最重要係，仲可以借錢回購，息咁低，冇得點輸。

22. 美股跌少少有人衝入去買—呢個可能係點解「放水」會有利股市嘅機制之二。之前講過，應該你都識背，美股自從舊年3月到而家都冇一次10%嘅調整，即使講5%，都要數到舊年10月。你見今年真係都有幾次高位跌3-4%，但就即時有人飛入去買。咩人？散戶都佔唔少。錢從何來？唔多唔少都係政府派。當然，呢個唔代表你下次一見到3%就飛入去實冇死—重點係你要知道，成日咩等調整先買，等到幾時？

Good Read —呢位仁兄廿年冇用過錢。讀Master搵你笨。買Bitcoin左翼定右翼？

23. 呢位仁兄廿年冇用過錢—長文，但唔難睇。留意佢唔係冇用現金，係完全冇用錢，但唔係留在屋企嘅隱青，加拿大佬嚟的。好多嘢有人接濟，電話都有人送舊款畀佢，但就冇3G/4G（唔會交台費！），要用Wi-Fi—聽落，都唔係好難？不過連佢老母死佢都冇得返去探佢（又，叫朋友車佢唔得？）

24. 讀Master搵你笨—好睇！我寫過篇類似題目嘅文，講真寫得幾差，但在medium收視好好，而家都成日有街外人搵嚟睇。同類嘅仲有「移民台灣心路歷程」。有機會寫多啲呢類文，等自己多啲觀眾。講返呢篇，好多大學，都係靠啲Taught Master，Graduate Degree去昆錢。你讀完根本係三等公民，搵工又冇幫助，最慘仲要一身債。例如文中講，芝加哥大學，Humanities MA，你冇申請都出offer畀你。學費六萬（美金啦梗係），加埋生活費多數你借多三四萬一年。即係一年十萬。讀完一年人工？三萬八。即係一個月兩萬五港紙，未計稅。估下還幾耐先還完？

25. 買Bitcoin左翼定右翼？— 留意Coindesk嘅文，當然支持返Bitcoin，但入面佢係討論另一個人講嘅嘢，就有趣了。Jackson Palmer係發明狗狗幣嘅人，佢遠離呢個遊戲，因為認為件事十分「右翼」。呢度都冇乜特別，但你知香港文化就鍾意鬧人左膠，右係好事，有乜唔好？佢認為件事係令啲推加密貨幣嘅人變得更富有，逃避，逃避法律等等，就同你香港啲網友嘅睇法完全唔同了。係左定右（留意，當然係外國嘅語境，唔係香港嘅左親中右反中語境）？我嘅睇法：想搵大錢當然係右，但香港嘅網友當呢樣係左（癲覆現有利益喎，咁點會唔係左？），不過就話自己覺得右。

FB Post Summary— 順流逆流。滑板金牌受惠股。

26. 順流逆流—冇乜特別，但強調返我一向嘅信念：唔好諗咩逆市賺錢反手造淡，唔work的，除非你買幾皮嘢咁細。一個大浪打埋嚟話你知神仙都輸錢，正如個市升得夠癲，合埋眼都日日賺錢。你要做嘅嘢係，買得大，然後跌市嗰時跌得少過人地啲啲，升嗰時又賺得多過人少少，日子有功，過一排就拉開晒。其實做人，打工各樣都係。

27. 滑板金牌受惠股—無聊文一篇，講返日本奧運滑板金牌都有股票炒起。唔係叫你買，但見到日本股市唔少有趣嘢，第時勞蘇基金（下面有資料）可能都以此做賣點（使唔使請返個識日文嘅幫手？）。同場講埋「馬蘭頭獎學金」嘅核心思想，就係唔想啲小朋友大學走去搵錢，唔好學我當年咁。

================================

Facebook Page：「君子馬蘭頭」ivanliresearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

勞蘇基金：50萬港紙入場，暫定2%管理費 20%表現費，應該隨時可以拎錢走。歡迎PM我報名，現階段冇任何commitment，絶對唔使畀錢住，到時你亦可以反口唔畀。亦都唔使怕答應咗到時反口，絶冇問題，純粹等我知道有幾多人有興趣。我預會有好多人到時因為種種理由唔加入的。

聲音版/錄影版：慎防有人唔知，係有樣咁嘅嘢的。方便唔想睇字/坐車聽/公司聽。一個Post有齊純聲音（mp3）同埋影像版（我朋友碌住電話畫面讀）。 20蚊或40蚊會員限定。Sample呢度，免費試聽。