港股黑色7月。Paypal Amazon績後大插點算好？理文化工746見6蚊， 52週新高．美股業績超出預期成條街。英國股市繼續折讓。Twitter 害人不淺。邊個話估值唔緊要？ (Patreon)

快評幾句— 港股黑色7月。Paypal Amazon績後大插點算好？

大師冇點你—理文化工746見6蚊， 52週新高

每日一圖— 美股業績超出預期成條街。英國股市繼續折讓。

Good Read — Twitter 害人不淺。邊個話估值唔緊要？

FB Post Summary— 理文化工新高。錢大媽上市。盈富基金唔畀美國人買會點？

1. 最後召集，聽日尖沙嘴5-7點講座，都有唔少Patreon讀者報名，多謝支持，記得準時。簡介呢度，報名呢度。另外你可以PM我問定問題的，每人限兩條。必定會答。

2. 另外因為搞呢個講座，會比較忙。有可能週末篇專題會遲少少，不過反正唔係好時間性嘅嘢，講Big Tech業績嘛，可能星期一二先出到。但唔會唔出的，反正個Database一定要update

快評幾句— 港股黑色7月。Paypal Amazon績後大插點算好？

3. 好啦，講到咩金融大戰，盈富禁美國人買，點股災。而家又話美國證監要中資股交多啲資料（之前傳到話禁上添），講到完美風暴，結果恒指跌350點，1.5%都唔夠。仲要其實日本股市跌得仲多過香港。你睇啲中概股，又未算再暴跌。咁都有人夾硬fit個story落去嘅，你可以見到佢地嘅水平幾咁低，根本唔會理現實。

4. 但話說回頭，呢個7月都夠晒黑暗，恒指跌10%—居然仲多過舊年疫情大跌市嗰嘅2020年3月（當然高位去低位跌咗超過20%嘅）。國企指數更加跌13%，科指17%。最慘係兩樣嘢：冇乜先兆，同埋外圍仲要幾好。再一次畀你見到，要分段，同分散。

5. 另外，之前講美國科技股嘅。Facebook Paypal星期三收市出業績，星期四跌得勁，星期五叫做跌定咗（仲跌緊，但唔係5-10%咁跌）

6. Amazon就星期四收市後出業績，收入低過預期，唯一一間業績遜預期嘅Big Tech，股價星期五都跌得幾勁，成7%。

7. 暫時我嘅做法？都係一動不如一靜。Facebook我就唔會沽架啦，根本業績仲係好強，話之後放慢亦預咗。Paypal如果再跌可能我會沽部份，Amazon都係—但，唔好聽一半唔聽一半，我只係沽部份，鎖定返啲利潤，零成本，呢個招式以前都教過幾次，心理上幾好的。我嘅Amazon 1100蚊買，Paypal就兩百蚊樓下，做得到嘅。

8. 既然唔會沽晒，所以對個core list係冇影響的。之前Tesla我都沽剩幾萬港紙的。

大師冇點你—理文化工746見6蚊， 52週新高

9. 我在Facebook Page都有寫，理文化工746新高，梗要攞下威，吸下like．但當然Facebook Page免費嘢就金融薯片，求其多人睇就得。付費讀者嘅梗係畀啲深度啲嘅嘢你。

10. 升咗幾多呢啲唔講啦，你問沽得未？我覺得點都應該沽部份。週期行業，唔係咩可以長賺長有，產品價格跌起上嚟，神仙公司都冇嘢做到。最初篇文樂觀地話可以上到6蚊，而家都到埋，有晒交代

11. 另外仲想講講隻東岳，先真係神奇，你見同期理文化工升40%，佢升200%。雖然以前都知東岳爆發力勁啲，一來間嘢進取啲，二來多大陸人買（隻股票）。但你又睇返，down turn嗰時，又唔見得佢跌多過理文好多。咁當然係錯失咗了，但冇法，因為我比較熟746。仲有另一個問題，大陸公司仲要係民企又唔係太大（雖然而家都350億市值！），我係相當有戒心的。

12. 有啲人都知，東岳係炒電動車概念，PVDF。但理文一樣有整PVDF。有機會詳寫，但你見最大分別係個估值，而亦好大程度因為東岳有北水買，係港股通名單。

13. 咁聰明嘅你心諗，幾時到理文入？我估好難。雖然理文都差不多50億市值，符合條件，但唔係計一個月，要持續一排，未必得。就算市值得，因為隻嘢大股東渣住好多，根本好少街貨。佢雖然市值有東岳15%，但一日幾百萬港紙成交，東岳講緊近20億成交。不幸地，入港股通嘅，成交不能太低。當然公司冇理由唔知，相信亦好多蛋頭軍師（如果我仲做分析員都會同佢地講）獻計，叫公司批少少貨出嚟畀基金（最好大陸添），炒熱佢，你持股可能少咗10%，但股價可以上返一兩倍，之類。但我估大股東（即係姓李嗰家人）係唔太想嘅。

每日一圖— 美股業績超出預期成條街。英國股市繼續折讓。

14. 美股業績超出預期成條街—之前寫過好多業績都勝預期，咁固然一向都超過一半，但今季去到近90%。仲有，唔止睇有幾多公司，仲睇埋好過預期幾多。咁你見到了，以前一向係5%左右，今次去到20%！分析員估唔到就好正路，但明顯公司都冇好好引導佢地，好可能係公司都估唔到咁勁。但，你見股價就冇乜力了。又畀你見到市場係點炒預期，同埋，估值都係好緊要的。

15. 英國股市繼續折讓—留意我原本想寫「英國股市跑輸」，但「跑輸」同「估值折讓」可以係兩回事。跑輸係指數，折讓係估值。我個股市可以估值折讓但唔跑輸，例如我啲公司盈利增長好過其他地方100%，但股市只係跑贏少少，你咪見到係估值折讓但跑贏，所以記住留意細節。講返，英國股市嘅估值折讓越嚟越大，以前都講過原因，一來脫歐，二來冇乜科技股。但前者啲影響都九九十十，後者科技股亦越嚟越多，好早已經叫大家留意，希望之後有機會寫多啲。

Good Read — Twitter 害人不淺。邊個話估值唔緊要？

17. Twitter 害人不淺—睇啲非金融嘢，嚟緊會有多篇講Twitter（個平台，唔係隻股票）。作者講英國嘅例子，話呢個平台令大家完全誤判現實，以為上網啲弱智推友就係全個英國。作者話英國其實唔Racist，但網上世界就係有「芝娃娃效應」，一小撮最偏激嘅人，就最多人睇最多人周圍轉。我話你知，Facebook都係咁，香港都係咁。但我未必同意作者嘅理論—好多人根本就係痴線佬，只係以前佢地冇乜機會出聲咁解，或者平時唔敢講

18. 邊個話估值唔緊要？—又係Charlie Bilello嘅好文，呢篇我唔會特登譯，反正相當短。其實篇文有啲生不逢時，佢講百度股價跑輸Google，阿里巴巴跑輸Amazon．咁你去問其他人，梗係話中國打壓企業啦。但，真係咁？事實你見到，阿里巴巴收入增長跑贏Amazon，百度增長亦都跑贏Google—咁點解股價跑輸？因為最初估值貴咯。

FB Post Summary— 理文化工新高。錢大媽上市。盈富基金唔畀美國人買會點？

20. 無聊文一堆，志在keep住有嘢出。但當然都會睇到我諗嘢，特別係錢大媽嗰篇比較好睇

21. 理文化工新高—想講嘅係，首先你身邊嘅人會不停幫你搬龍門，特別如果你做content creator面對群眾實會咁（其實唔面對群眾都係咁，只係可能冇咁多人評論，或者你唔知），你要做嘅只係做好自己，因為haters gonna hate，你做到畢菲特都有人話你冇料到的（事實大把小朋友咁講）。另外留意，投資嘅嘢，你唔使拎10分9分，有7分已經好夠。

22. 錢大媽上市— 個重點係，Franchise，特許經營，加盟店。呢個生意模式真係既偉大又仆街，所以記得做投資母公司嗰個，唔好做下面開舖嗰個。本質就係利用啲人「追夢」「自己做老細」嘅執念去搵佢地錢，然後風險踢畀佢地。咁你不學無術又想過老闆癮，當然要交學費。

23. 盈富基金唔畀美國人買會點？—之前一晚嘅文，都不再重覆了，根本係non event，但總有人可以講到點點點大件事。唔該，遠離嗰啲人。除咗對你投資冇幫助，仲會拖低你智慧，同埋影響你心情。

================================

Facebook Page：「君子馬蘭頭」ivanliresearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

勞蘇基金：50萬港紙入場，暫定2%管理費 20%表現費，應該隨時可以拎錢走。歡迎PM我報名，現階段冇任何commitment，絶對唔使畀錢住，到時你亦可以反口唔畀。亦都唔使怕答應咗到時反口，絶冇問題，純粹等我知道有幾多人有興趣。我預會有好多人到時因為種種理由唔加入的。

聲音版/錄影版：慎防有人唔知，係有樣咁嘅嘢的。方便唔想睇字/坐車聽/公司聽。一個Post有齊純聲音（mp3）同埋影像版（我朋友碌住電話畫面讀）。 20蚊或40蚊會員限定。Sample呢度，免費試聽。