大陸降準。道指新高，股災，甚麼股災？果然港股美股反彈，連中概股都反彈． 油價已經唔多影響通脹亦唔多影響經濟。中國經濟由乜推動？贏歐洲國家盃股市就升（買咗英股未？）。黑膠好賣音樂人好頭痛 (Patreon)

快評幾句—大陸降準。道指新高，股災，甚麼股災？

大師冇點你— 果然港股美股反彈，連中概股都反彈

每日一圖— 油價已經唔多影響通脹亦唔多影響經濟。中國經濟由乜推動？

Good Read — 贏歐洲國家盃股市就升（買咗英股未？）。黑膠好賣音樂人好頭痛

FB Post Summary — 唐人街第一股

快評幾句—大陸降準。道指新高，股災，甚麼股災？

1. 先講大陸降準，有人唔知咩係降準嘅，快手解。我地生存在一個高度金融化嘅社會，大陸亦不例外，理論上銀行可以將啲錢係咁碌大，我將你存嘅錢又借畀另一個人，佢又會放返入銀行，越滾越大。但實際上當然要留低啲做存款準備金，否則好易爆煲。所以銀行不能無限槓杆，有存款準備金呢樣嘢限制佢地放錢。咁減咗呢個率，就理論上令銀行易啲借錢出街，所以一般又被視為「放水」，「釋放流動性」。

2. 但係咪一定好利好市場？普通。N年前我做分析員時就好緊張的，而人民銀行例牌鍾意星期五做嘢，好多時我都要星期五晚send email．但打從習近平上台後，套玩法唔同咗啲，冇咁多呢啲嘢，而對股市嘅影響亦細咗好多的。

3. 當然啦，星期五美股連啲中概股都反彈，都可能關事嘅。另外留意，B站同陸金所（Lufax）成交都相當大。（留意呢度一隻我都冇買）

大師冇點你— 果然港股美股反彈，連中概股都反彈

4. 好啦，正如昨日所寫，有乜好驚？幾百點嘅跌幅討論都費事，而到跌幾千點時先走又好似遲，好多時你唔係咁畀個市場拉住走的（當然，都話似上山打獵或出海打魚，唔好諗住你可以同佢對抗）。

5. 咁連弱到不能嘅港股星期五都反彈，美股星期五晚更加強勢。話咁快道指又創返新高！死未，忽然又唔擔心經濟了。你若果係星期四急急走，又後悔了。一般股票都係只買不沽的。（當然短炒理文化工 維他奶 CCL 嘉年華郵輪嗰啲另計）

6. 另外，亦順手提下，Nike Apple都創新高，都係core list 上有嘅嘢，即係我有買（都話遲下全部公開，雖然根本稍為長期嘅讀者都知）。但又話說回頭，呢兩隻嘢都係跑輸大市的。Nike你新疆棉飛入去就當然發（但我係一早買咗的），Apple係麻麻地，但，所謂「跑輸大市」，年初至今都升12%，好失禮？

7. 最後你見，都係Core List，甚麼LVMH 愛馬士 ASML BlackRock之類都反彈得幾好。固然你未必真係神到星期四晚可以捉到個底，但想講嘅始終都係，你見呢啲公司我係充滿信心長期持有的。之前跌兩三成甚至更多我都冇沽，何況跌幾個%？

每日一圖— 油價已經唔多影響通脹亦唔多影響經濟。中國經濟由乜推動？

8. 油價已經唔多影響通脹亦唔多影響經濟—好似之前都有版友PM我，但近期咩通脹預期升溫，唔多關油價事，甚至唔多關商品價格事，只係咁啱一齊升。我好怕啲人（多數係老嘢）聽到油價高又同你講石油危機。大佬呀，咩年代啦？畀夠兩個圖你睇，你見到，由80年代開始，通脹都同商品價格（入面主要係油價）冇乜大關係的。另外，亦見到而家你要同樣嘅經濟增長，用嘅石油已經比以前少好多。個世界唔同咗嘛。咁到底呢排通脹升溫由乜推動？係人呀！人工嘛。

9. 中國經濟由乜推動？—當然你話啲數全部係假嘅就唔使討論（但偏偏話假嘅人又好鍾意發表偉論）。但，中國經濟增長由乜推動？過往我都講過。咁經濟教科書嘢，GDP增長，三樣東西：消費，固定資本形成（又名投資，你當起路起橋，唔係買股票嗰啲），同埋淨出口。記住係淨出口，即係出口減進口。好啦，三樣嘢邊樣係中國經濟推手？你估唔到，淨出口嘅推動極細，咁多年都好細，同好多人嘅理解，以為中國經濟靠出口，係完全唔同。點解同啲人嘅理解爭咁遠？首先，中國係貿易大國，但出口多進口都多，而只有淨額先係推動GDP。另外，GDP係計「附加值」，你部iPhone賣一皮嘢，歸於中國嘅附加值，可能一兩千？當然，實際上唔係咁簡單，呢三瓣東西係互相有關嘅，你冇出口啲廠執晒，又何來有人消費？

Good Read — 贏歐洲國家盃股市就升（買咗英股未？）。黑膠好賣音樂人好頭痛

10. 贏歐洲國家盃股市就升（買咗英股未？）— 統計學家可以去研究下係咪Significant，但過去5次歐洲國家盃，有4次捧盃國家股市，之後6個月都跑贏泛歐指數。咦？一早叫左你買英股喎（又，有機會講下隻Wise，以前叫TransferWise，剛登陸英國）

11. 黑膠好賣音樂人好頭痛— 黑膠好賣，當然係相對於自己本身，同串流冇得比。但大家都知，近年黑膠變咗文青嘢（或者係品味中佬嘢），銷量甚至仲高過CD。之但係，就搞到啲音樂人，特別係細公司之類十分頭痛。點解？因為唔夠產能！根本pressing plant整唔切。而點解唔夠產能？首先因為疫情，但亦因為大唱片廠都係咁出黑膠，咁pressing plant當然應付咗大廠先，啲細公司就有排都未出到貨，有啲音樂人真係靠呢啲救命的。

FB Post Summary — 唐人街第一股

12. 唐人街第一股— 呢隻新股「喆麗」2209，就係YesAsia，我先由個公司名講起，然後講返呢間公司真係同我年紀嘅一早就識，居然未執笠仲搞上市。但呢種「鄉愁」係相當大嘅生意。當然公司而家主力唔係賣香港VCD CD 同書，而係韓仔衫同化妝品之類。又留意，啲客源美國英國澳洲咁的。

================================

Facebook Page：「君子馬蘭頭」ivanlirsesearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

勞蘇基金：50萬港紙入場，暫定2%管理費 20%表現費，應該隨時可以拎錢走。歡迎PM我報名，現階段冇任何commitment，絶對唔使畀錢住，到時你亦可以反口唔畀。亦都唔使怕答應咗到時反口，絶冇問題，純粹等我知道有幾多人有興趣。我預會有好多人到時因為種種理由唔加入的。

聲音版/錄影版：慎防有人唔知，係有樣咁嘅嘢的。方便唔想睇字/坐車聽/公司聽。一個Post有齊純聲音（mp3）同埋影像版（我朋友碌住電話畫面讀）。 20蚊或40蚊會員限定。Sample呢度，免費試聽。