港股點算好？美股點算好？ 環球股市上半年表現100年排第7。美股已經266日冇5%調整。 100萬個失敗嘅理由。Facebook Bulletin唔受街外人玩 (Patreon)

快評幾句—港股點算好？

快評幾句—美股點算好？

每日一圖— 環球股市上半年表現100年排第7。美股已經266日冇5%調整。

Good Read — 100萬個失敗嘅理由。Facebook Bulletin唔受街外人玩

FB Post Summary — 美國國防部合約重新再bid過。理文化工746自我回顧

快評幾句—港股點算好？

1. 今日唔寫大師冇點你，雖然Amazon都逆市新高。

2. 正如之前多次講，舊年由我開Patreon開始（8月），股市好易賺錢。今年上半年賺錢亦都好易（但你瞓身買晒未？），但，唔會永遠係咁的。唔止係講2020年2/3月嗰啲大股災，你可以睇下嚟多次2018年之類就夠慘。

3. 話口未完，港股美股都急跌。有啲唔同，分開講。先講港股，一直都弱，然後昨日（星期四）急跌800點，蒸發晒全年升幅。點解？唔知，固然部份係因為甚麼監管中資科企，但即使係甚麼嚴打滴滴之類，都係上個星期已出場。相信更多係因為其他嘢，可能純粹係避險意識高，你見其他行業都跌。跌嘅股票8成，升嘅2成，十分全面。仲要係2000億嘅大成交。

4. 港股由今年高位，大約都跌咗4000點，13%左右，都算係唔細嘅調整。只係呢轉都跌足8日，跌2100點，7%。

5. 問我點？如果老讀者應該估到，有乜點？可以點？而家沽走梗係唔好，但而家大手買貨亦都不見得好抵—2020年尾價咋喎，嗰時你有冇覺得好抵？但，做開嘅嘢當然繼續做，月供嘅繼續供，有閒錢嘅有乜想買照買（但唔好借錢）。唔好因為跌而停咗佢，正係平嗰時先要買。

6. 咁你話，如果一路都唔升返，咁點？冇喎，你覺得可以點？當然，你亦都可以選擇買美股—應該話你一早應該咁做。留意返，唔係叫你全部買晒美股，而係一路你都唔應該只買港股。我從來都叫大家分散投資，港股呢幾年咁嘅市，你要跑出真係極難，你估日日都有理文化工746咩。

7. 怕煩唔買美股並唔係理由，而家開戶已經易好多。佣貴亦唔係理由，首先而家好多券商平咗好多，二來我亦從冇建議大家炒上炒落，長線投資，佣金關係冇咁大。時差更唔係理由，我要寫文就話啫，正常人係唔使「睇住」啲美股的。你唔信？應該好多讀者知道我有時瞓到三四點先起身，何來會「睇住」港股？你真係要睇嘅，都有幾個鐘畀你睇，冇話要睇到半夜收市。

快評幾句—美股點算好？

8. 再三強調，唔係叫你沽晒啲港股去買美股。咁講返美股，仲得意，道指一開就跌成500點（之後收窄返），搞乜？又關中國事？冇理由下話

9. 同我地之前嗰日（星期三晚）講嘅都有關，之前講美國債息係咁跌，有人話因為ISM數字差，我都唔多信，認為呢個數字唔重要。

10. 但可能真係債市一葉知秋，然後到星期四晚出嘅首次申領失業救濟數字呢，又係差，而市場一般幾睇重呢個數字。有幾差？上個星期37.1萬（原本36.4萬，上調咗，耐唔耐都會），街就估跌到35萬，點知出嚟個數係升到37.3萬。

11. 於是乎，咩經濟過熱呀，加人工呀，通脹縮表加息呀，全部又冇人講。美國債息再跌（不過低位彈返少少），而家甚至講話驚個復蘇乏力添，驚變種病毒，仲要咁啱Economist 出個封面話全球經濟有Faultline。成個主流故事，就由驚過熱，變咗驚冇力。

12. 固然，冇話經濟差股市唔會升（你睇舊年2/3月？），但，我當你好似舊年股災一半嘅跌幅，就都嚇死你。

13. 咁你話美股而家點好？答案同港股差不多，但更簡單。拎住嘅，當然唔好沽。但有錢而又未買嘅（其實等乜？），又未必要咁快

14. 因為，講到尾，500點道指跌幅，1.5%都未到呀老細。真係冇乜咁大件事，唔好咁細嘅波幅就嚇親，聽聞再早一日（星期三晚）標指納指先新高喎！港股嗰啲高位跌13%就值得你有反應。

15. 最後提多句，之後好多人問勞蘇基金（最底有資料，不重覆），做乜咁耐唔開波。固然我都有各種私事。但，急甚麼？個市有啲貴亦係我冇特別趕急嘅原因。你諗下，如果我之前急急開波，咁當然勞蘇基金唔會買晒港股，但都總會有部份（兩三成？），即時就輸你一截錢，你開心咩？

每日一圖— 環球股市上半年表現100年排第7。美股已經266日冇5%調整。

16. 環球股市上半年表現100年排第7 —留意係環球股市，唔係美股。仲有佢年度化咗，即係大約X 2。今年上半年環球股市回報，年度化後大約21%，100年嚟第7高。好啦，另外6次之後呢，下半年平均有些微跌幅的，9%（即係半年跌4.5%左右）。咁即係好悲？又未必。記得月頭貼過個圖，美股上半年有咁嘅表現，史上下半年都唔會太差。咁即係點？做乜好似矛盾？其實都冇。你望下上面個圖，之前嗰6次，全部都係80年代或以前，當時美股都未係咁全球獨秀。所以，都係純粹畀你睇下，今年上半年真係好易玩，你都要輸錢嘅，真係要檢討下，或者幫襯勞蘇基金。

17. 美股已經266日冇5%調整—呢個圖相當好，類似嘅嘢我成日講，但佢個圖表達方式唔錯。最底黃色就係個日數，會一路儲上去，到有5%調整就會跌落嚟歸零。對上一次，我有講過，係舊年美國總統大選前。同而家比就266日了。呢個266日冇調整，史上都唔係咁多見。當然這不代表好快就會跌，而係畀你睇到舊年3月後係幾咁易玩（但仲要捱大選前嗰下5%），而你一路等等等調整真係唔知等到幾時，唔知錯失幾多機會。點解要等調整先買？真係拎住一大舊錢又唔知幾時買嘅，可以睇下舊文。

Good Read — 100萬個失敗嘅理由。Facebook Bulletin唔受街外人玩

18. 100萬個失敗嘅理由—Reformed Broker寫嘅文，我都成日貼呢個站。好簡單，你每次望事後，都係發現早知一早長期持有，甚至唔使揀股，過去N年你買美股ETF都已經贏到笑。但點解每次你真係想做都唔多成功？做乜中途好易放棄？首先係你驚今次同以前唔同，另外，世界上好多雜音。呢排都唔少有啲名氣嘅投資者（包括呀「富爸爸」作者，而我唔明佢做乜有資格講美股）話美股爆煲，但你可以睇返，佢地自己有冇瞓身沽空？又好似冇。好多只係年年話爆煲，等啲末日信徒一齊感覺良好，以為買股票嘅人（例如我）之後會仆街。結果你話會點？就係就算股災，買股票嘅人輸完都仲係富有過唔投資嘅人。

19. Facebook Bulletin唔受街外人玩—我呢個Patreon算係newsletter玩法，亦有人用Substack（我之前都有講如果Patreon有乜三長兩短，例如執笠呀，賣咗畀中資你地杯葛呀，香港封咗佢呀之類，我就會用Substack）。我好早已經講，Facebook自己咪最應該搞一個，唔少人都係因為Facebook冇分錢畀佢地而另外搵收入嘛，你諗下我呢壇嘢如果統整落Facebook，都好似唔錯。亦畀你見到Creator Economy真係熱門話題，Twitter亦都買咗間做newsletter嘅公司。不過講返，Facebook似乎唔打算將佢融合落自己主平台，而係會另外一個app另一舊嘢，叫Bulletin．而且唔係來者不拒（Substack基本上就人人可開），暫時佢只係邀請某啲名人（例如Malcolm Gladwell）。固然係想試下反應先，同埋用名人效應，但你留意佢最初嗰班作家，全部都係寫下娛樂消閒體育。唔寫乜？唔寫政治。點解？就係避免啲仇恨言論之類。

FB Post Summary — 美國國防部合約重新再bid過。理文化工746自我回顧

21. 美國國防部合約重新再bid過—侵侵年代有個雲計算合約，原本大家（但，邊個大家？）以為Amazon 大熱勝出，點知畀咗Microsoft，光頭佬發晒火，話因為侵侵唔鍾意佢，因為佢反侵，先針對Amazon，仲要話告上法庭。唔知有冇關，但而家忽然就話當初個招標唔合時啦，整份新嘅，大家再玩。當然似乎係Amazon勝利，股價連升幾日去到歷史新高。

22. 理文化工746自我回顧—回顧返3月開始寫理文化工，然後點推，點樣估中會出盈喜叫大家買定嘅歷程。唔只係自high，而係畀你睇到：首先，我係識捉個股的。二來，我係識睇小型股票的。三來，呢隻嘢成個過程近乎完美，大把時間你買，大把時間你走 — 但你唔好諗住我可以好快重覆多次。成日有就唔係世界波啦。

================================

Facebook Page：「君子馬蘭頭」ivanlirsesearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

勞蘇基金：50萬港紙入場，暫定2%管理費 20%表現費，應該隨時可以拎錢走。歡迎PM我報名，現階段冇任何commitment，絶對唔使畀錢住，到時你亦可以反口唔畀。亦都唔使怕答應咗到時反口，絶冇問題，純粹等我知道有幾多人有興趣。我預會有好多人到時因為種種理由唔加入的。

聲音版/錄影版：慎防有人唔知，係有樣咁嘅嘢的。方便唔想睇字/坐車聽/公司聽。一個Post有齊純聲音（mp3）同埋影像版（我朋友碌住電話畫面讀）。 20蚊或40蚊會員限定。Sample呢度，免費試聽。