理文化工746跟進。日本仔增持維他奶345，搞乜？滴滴被打，港交所388果然受惠。美國債息係咁跌，又話驚通脹驚加息驚縮表？ (Patreon)

小小版務（不太重要，趕時間可跳過）：節目調動，聲音版，勞蘇基金

理文化工746跟進

日本仔增持維他奶345，搞乜？

滴滴被打，港交所388果然受惠

美國債息係咁跌，又話驚通脹驚加息驚縮表？

小小版務（不太重要，趕時間可跳過）：節目調動，聲音版，勞蘇基金

1. 忙到一個點，N樣嘢未搞。早排先話個市悶，但呢幾日就好多嘢想寫，多到寫唔晒。所以都係嗰個比喻：市場嘅嘢似上山打獵出海打魚，邊到你去「期望」點點點，你可以做嘅只係佢打到埋嚟你應付。當然一直都有講，將個時間拉長，就反而好多嘢易估。

2. 由於多嘢想講，所以節目調動，每日一圖Good Read嗰篇星期四先出，星期五再出。今日就照舊係幾個主題嘅形式。

3. 最後，今個月多咗好多新讀者，同新讀者講下，唔慣睇字唔想睇字，或者想坐車或在公司聽嘅，有聲音版同影像版的。睇最底有講。20蚊或40蚊會員限定

4. 仲有，有個東西叫勞蘇基金，最底有詳情，報咗名嘅唔使再報，未報有興趣嘅PM我，PM咗而我未覆你嘅等多陣。答定你，如果係勞蘇基金，都會買理文化工或維他奶之類的，但當然唔係核心。同埋唔係只買香港。美股歐洲日本都應該會做。

理文化工746跟進

5. 冇乜補充，應該點處理都講咗（正路應該沽）。以上係星期三嘅股價，記住，星期一先炒上再收市出盈喜，星期二爆升，星期三就係咁。有人會發現都仲頂得住，冇散晒水（實在都唔少讀者有份買，亦沽咗，我唔知嘅可能仲多）。但教你睇多樣嘢：個成交。你見到仲係有400萬股成交。記住呢隻嘢唔係成日咁多成交。

6. 有人問幾時出業績，我唔係好明佢用意，但當然交易所有，8月4日。我想講嘅係，照計到個業績出嗰時，唔會再有乜新消息炒上，因為所有消息都知晒，除非忽然派特別息之類（怕且唔會）。

7. BTW，N年前我仲做分析員，咁都有大基金嘅基金經理睇呢隻嘢。個基金經理（女人）固然係猛人之後，何壽南個女。但我今日先發現，當時佢嘅馬仔（都係女人），原來係維他奶家族嘅！點知？因為我睇維他奶年報。然後又諗下，固然佢地都好叻，但本人係屯門居屋仔出身，社會流動性嘅嘢。點解睇維他奶年報？就下一段講

日本仔增持維他奶345，搞乜？

8. 拿，算係大師冇點你啦，維他奶345星期一大插。夜晚我寫叫話可以買，星期二回穩，星期三就彈返唔少。

9. 更有趣嘅係，星期一大跌時，邊個在買？「大戶入市」。其中一個，就係三菱UFJ，都用咗1億港紙，410萬股。嗰日大約4000萬股成交啦。

10. 呢間三菱UFJ，日本通會識，我有一排都成日寫。N年前日本銀行業百齊放，後來當然係整合，全世界都係。但講返，我做銀行嘅年代，有四大日本銀行。就係東京三菱銀行Bank of Tokyo Mitsubishi，三井住友Sumitomo Mitsui，瑞穗（日本唔係用呢兩隻漢字，得個拼音，Mizuho），同埋日聯UFJ。而你睇就知，呢四大亦都係由啲細嘅嘢併出嚟。之後？就係東京三菱買埋UFJ，就係今日嘅三菱UFJ，加埋另外兩間，就三大（日本乜都鍾意三大！）

11. 問題嚟啦喎，好地地一間日本銀行，做乜走去買維他奶？如果你夠細心，篇文有講，15.9掃到去16.3%，一直都係股東，在市場掃貨增持，掃到過咗整數（16%）就要申報，咁咯。

12. 咁仲奇怪，做乜日本銀行at the very beginning 會買咗維他奶？而仲要，我都好似冇乜印象？成件事，可以幫你抽絲剝繭，順便教你啲101嘢。

13. 首先，想知間公司乜水大股東，持股幾多，去邊查？都唔好以為唔使用腦。正路，就係睇交易所，同埋年報。但我可以話你知，唔係咁易睇，因為好多股東都用公司甚至信託之類持股，固然都要講背後乜水，但你有時見到一家十二口每人都10%，加埋咪120%？實情根本全部係同一個東西（N年前馬仔真係咁寫落報告，畀我媽佢唔帶腦返工，唔明唔緊要，唔明就問，但咁你都可以照寫落去？）。但要慢慢拆。

14. Anyway，交易所披露呢度。揀1，「按上市法團搜尋」，股份代號打345，日期隨你，「大股東完整名單」就見到以上嘅圖。明顯有啲重覆，遲下先教你點拆，其中一個方法去睇年報之類。

15. 但呢度都未係重點，回返帶，返返交易所披露，揀2， 「按大股東/董事搜尋」，填UFJ，日期有咁長揀咁長，咁就有嘢睇了。

16. 應該見到上面個圖。即係點？即係UFJ，都有唔少香港上市公司股權。

17. 然後你再在維他奶嗰格按左邊，就會見到呢個東西。有乜啟示？你見到一路主要都係有加冇減，但，最早一格都不過係2019年8月。仲要，一開始就9%？邊度爆出嚟？仲要，個平均價係0。

18. 即係話，2019年8月，唔知做乜，三菱UFJ就忽然拎咗9%股權，仲要係0成本，咩事？

19. 我第一樣估嘅，就係債轉股！可能大家睇日本企業劇都見過，亦唔係日本先有。還唔到錢，咪變相拎你股權，而反正三菱UFJ亦係維他奶嘅銀行之一（年報有寫）。但，諗真啲，唔會係。咁大件事，2019年，我點會冇印象？況且維他奶點會還唔到債？

20. 見唔見中間，「作出披露的原因」，有1013？入去你見到乜？就係「任何其他事件」！噓～～～。但入面仲有一句：你必須在補充資料方格簡述有關事件。

21. 咁個「補充資料方格」在邊？左邊CSXXXX 嗰度就係。你會見到呢個畫面。拉到最低就有寫！我費事呃字數，就話你知：就係因為當年，三菱UFJ買咗澳洲CBA（Commonwealth Bank of Australia，澳紙四大）某啲資產管理業務咯。成件事明晒，好似普通基金咁。

22. 唔好意思，上面打咁多字，但希望大家學到點操作呢舊嘢。而仲有兩點可以補充：

23. 首先，我諗唔怕講，根據相當可靠嘅消息，當年（都十幾年前）有日本公司，係相當接近收購維他奶嘅。邊間？當然係飲品公司，唔開名。固然當年同而家各樣嘢唔同，但，維他奶呢類東西，始終消費品牌，而家仲有埋咁大嘅大陸市場，點都可以係併購對象。

24. 另外，可能都有人留意到，篇文入面都有講，羅友禮持股16.3%，三菱UFJ買到16.29%。呀？會唔會狙擊佢？不過亦都見到，姓羅嘅仲有其他人，但當中有幾齊心，啲股權真係加埋有幾多，就另外研究下，

25. 講咁多，都係話你知，星期一大跌時，係應該買的。現價？我估都OK，但呢啲小注怡情好了，講過啦，呢啲你都係炒之前跌多咗，未必係坐過世嘅嘢。咁而你嘅投資，應該大部份係啲可以長坐嘅嘢，小部份玩下呢啲過下癮交下學費。

滴滴被打，港交所388果然受惠

26. 都update 下，星期二晚篇文，有一部份講滴滴打車，但我提過，中國政府似乎嚴打公司去美國上市，咁，正常即係想上市只能嚟香港啦，點都有利港交所388，果然就連升兩日。道理好簡單啫，你諗下未來，字節跳動ByteDace（抖音Tik Tok）仲點會係美國上市？而呢間好大嘅嘢喎。仲有，好多人誤解咗，我唔係收你一次上市費，而係之後你上市日日trade（例如阿里巴巴美團騰訊咁），先真係幫港交所印錢呀。

27. 之但係，係咪瞓身買港交所？又唔係喎。固然唔係升咗好多，但你不能每次都在消息之後先買，早就應該平時買（我都持有）。以上講嘅利好，當然係假設Other things equal．但就算唔講到美國會制裁港交所咁遠（以前都有人講過，講到似層層咁，and？）．你都可以諗到，政府咁打壓大型科企，對佢盈利當然唔好，對盈利唔好當然對股價都唔好，對股價唔好，成交又似乎未必會太好了。又睇下打壓到幾時？

美國債息係咁跌，又話驚通脹驚加息驚縮表？

28. 最後都提下，唔知做乜，美債債息呢兩晚（星期二星期三晚）急跌。而家已經跌到1.3%水平。記唔記得冇耐前唔夠先話驚通脹縮表債息急升？

29. 點解債息急跌？我都唔知，有人話因為個ISM數據差，我覺得唔係，呢個數據向來唔係咁大影響力，況且債息都弱咗一排。好可能係因為市場唔覺得通脹唔會狂升，又或者，根本通脹狂升都唔會加息縮表？唔知

30. 你估到嘅，就係啲銀行股冇晒力，銀行股對長債債息好敏感，長債債息跌即係息差收窄。

31. 但另外，照計債息低，係對股市有利嘅，計返earnings yield gap之類，又冇之前咁貴了。唔知係乜嘅，睇舊文。

================================

Facebook Page：「君子馬蘭頭」ivanlirsesearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

勞蘇基金：50萬港紙入場，暫定2%管理費 20%表現費，應該隨時可以拎錢走。歡迎PM我報名，現階段冇任何commitment，絶對唔使畀錢住，到時你亦可以反口唔畀。亦都唔使怕答應咗到時反口，絶冇問題，純粹等我知道有幾多人有興趣。我預會有好多人到時因為種種理由唔加入的。

聲音版/錄影版：慎防有人唔知，係有樣咁嘅嘢的。方便唔想睇字/坐車聽/公司聽。一個Post有齊純聲音（mp3）同埋影像版（我朋友碌住電話畫面讀）。 20蚊或40蚊會員限定。Sample呢度，免費試聽。