［101文］睇年報學投資 — 港交所388點賺錢？（有Excel！） (Patreon)

今次睇港交所年報

港交所收入來源：7瓣收入6種業務 42味

示範：現貨分部

10年財務數據

如何估各瓣收入

點估日均成交

1. 新讀者可能唔知，每個週末我都會整個專題，十分費神，一嚟寫嘅時間好長，二來亦難諗topic，不過聽聞呢個環節好受歡迎，所以繼續。

2. 之前有人點唱，話教睇年報買股票，所以寫呢篇文。搞到一半已經極之後悔，因為太多嘢要入。但既然開咗個頭，好歹完成埋佢。

3. 話定你知，靠睇年報揀股或者判斷買唔買得過，完全唔work，真係幫唔到你啲乜。但，對你了解間公司多啲就有幫助。有個術語叫Business model，即係「檔嘢點賺錢有乜收入有乜開支」，你可以了解到。

4. 了解咗，咪幫到你有時判斷一定事，例如我知道Nike大陸收入佔成間公司幾多，就可以衡量跌幅係咪過度係咪跌多咗。又例如我成日恥笑嘅「負油價頁岩氣公司爆煲銀行唔掂」，你知道呢啲公司佔銀行loan book幾多，咪評估到。

5. 如果想入行轉行，或者自己研究嘅，都會有幫助，我仲會教埋你點估數（入門級咋）。

今次睇港交所年報

6. 主角揀港交所，多人有興趣，又夠大，亦係香港好重要嘅一間公司。仲有原本我以為啲數唔太複雜—明顯近年已經複雜咗好多。

7. 年報邊度搵？Google啦，每間公司網站嘅實有，港交所嘅披露易亦有。David Webb嘅網站最方便，不過得英文版。將就讀者，我都係用中文版，但想入行轉行嘅應該睇多啲英文版。

8. 年報在此，Attachment 亦都有。以下所有頁數，係指我PDF上面嘅頁碼，本嘢印嘅頁數就自己減返2。224頁嘅年報，有用嘅，唔知有冇20頁。但，都已經夠玩死你。

9. 你見頭幾頁，公司會好多基本數據，好多時我係只係拎呢啲嘢嚟cross check自己Excel．實情你直頭飛去睇佢盤數咪得—綜合收益表Income statement，又名損益表Profit and loss，簡稱PL．同埋財務狀況表Statement of Financial Position，又名資產負債表Balance Sheet，簡稱BS

10. 當然有啲營運嘅基本嘢，係PL BS冇嘅。例如第11頁呢啲市場成交數據都緊要。中間仲有唔少，但不能一一列出。個rule of thumb係：有圖有表嗰啲咪睇下。

港交所收入來源：7瓣收入6種業務 42味

11. 好啦，其中一個極Q咁知重要嘅圖，係P.47，上半截嗰個。偉大之極，我當年好似都冇呢個當西。係乜？就係收入 breakdown．留意，港交所有7瓣收入（為慳字數用簡寫）：交易費，上市費，存倉費，結算費，數據費，投資，以及其他（計埋乜鬼慈善基金，呢兩年先出現的）。冋時間，又有6種業務：現貨，輪證，商品，交易後，科技，公司。

12. 快手講下各自係乜，港交所點搵錢。7瓣收入：交易費，好簡單，買路錢，任何交易都收錢。上市費，新上市收你一次，然後每年再掠，另外留意啲輪，牛熊證同期權等等全部要收，隻輪幾個月死出隻新又收多次錢，都幾和味，當然羊毛出自你身上。存倉費同結算費應該大約明係乜，結算所亦都係港交所全資擁有。市場數據費都簡單，你拎佢嘅數據，全部都收錢。投資，咪拎咗你嘅錢（其實係啲參與者）去投資，當然仲有公司內部嘅錢。

13. 至於6種業務，現貨咪你平時認識嘅買股票，輪證就係窩輪牛熊證期權。商品咪商品，留意倫敦金屬交易所由LME，2012年起係港交所全資擁有。交易後有點複雜，但就係結算存倉嗰啲東西，設置上同交易所分開，但冇最初交易又點有結算？科技我都唔係好肯定係乜，可以睇第70頁，啲網絡專線，Terminal，斬件咁嘅收入。公司就係corporate level，拎去投資。

14. 留意同一頁，仲有EBITDAbreakdown，但我幾懷疑係咪可以咁拆開（例如結算嗰部份），同埋有啲開支都係公司corporate 層面食，所以好難去計邊種業務最賺錢（但收入就易啲計）。留意下，商品而家一年EBITDA 8億港紙左右，2012年港交所用咗167億買，似乎都係幾貴。

15. 嚟啦喎，7瓣收入6種業務，玩到你謝，我個Excel都有分返開，你ungroup 返啲數就得。但，最好都係咁樣用個Matrix表達，下面係佔總數入嘅百份比。

16. 睇到乜？以7瓣收入計，交易費係主菜，佔近四成。結算費都多，但冇交易何來結算？仲有就係投資收入，同上市費。留意交易費，存倉費同結算費我highlight 咗，傳統上都係同大市成交好有關係。相比之下，你想像到投資呀，數據費呀，上市費呢啲同大市成交相對地冇咁大關係。

17. 6種業務計，交易後佔最多，但冇交易又點有呢啲？仲有一大截投資收入都係嚟自呢個交易後。打後係現貨同埋輪證期權，估唔到輪證期權都佔咁多呀，你班炒鬼。之後就係商品。

18. 再睇落去，仲可以見到，交易費入面，現貨佔一半，但輪證都佔到三成，唔好睇少。另外，上市費方面，甚至係輪證仲多過現貨，所以唔好咁膚淺，以為點失落冇咗啲大公司上市，就影響上市費— 個影響在交易費度見到

19. 至於開支方面，反而好簡單，人工佔咗六七成，剩返就係IT佔一成幾，其他細數，當然最後仲有折舊攤銷，同埋稅（留意稅率唔算好高）

示範：現貨分部

20. 剩返嘅，已經冇乜好講，又唔係冇用，但太多。我只舉一兩個例子，例如49頁，講現貨業務，留意佢列嘅數字：呢啲數字唔算難搵，唔知點解亦可以查。最重要係，佢列得出嘅，即係呢啲數字係影響呢個業務嘅一啲drivers，而呢啲數字你會睇得到，或者可以估。就係由呢啲數字再去估佢各種收入幾多，之後我會再示範。例如現貨嘅交易費，咪同股票成交額有關（留意佢減走咗輪證期權）。

21. 現貨嘅上市費，咪同上司公司數目有關。留意有總數目，同新上市數目。同時間亦話埋你知有幾多收入嚟自第一次，幾多係年費。頭先講過，新上嘅收一次，每年再收。咁你理論上可以計晒出嚟的，睇你有幾得閒。仲有創業板，當然佔好少。

22. 其他嘅，冇時間講，但如此類推。例如輪證期權，就睇輪證期權嘅成交，同埋每年發幾多輪證，留意呢啲東西多數短命，所以冇分開年費。例如商品，你咪睇下商品價，同埋LME嘅交易量。又或者投資收益，你可以睇下嗰年整體市況點，但當然港交所唔會拎晒啲錢去炒股票。

23. 至於開支甚麼，亦不太難估，望下員工人數就知，或者你大約都計到佢地一年加幾多人工，好少大起大落。

24. 如果真係大行分析員（我都叫做做過），直接去見管理層，叫佢畀啲指引亦大約得。唔會畀實數你，但例如話今年IT開支增幅，佢可能話你知會落力啲，咁你自己調高啲。

25. 加上，港交所係每季出一次業績嘅，你啲數照計唔會爭好遠。最重要係啲成交日日都公開，收入亦唔太難估，所以你見港交所啲業績次次同都預期相差唔多，股價又冇乜反應，non event嚟的。

10年財務數據

26. 之後另一好重要嘅圖，第79頁呢個，十年財務數據。唔少公司都會有畀。固然對於你投資冇乜用（一次業績嘅數一兩日都反映晒，何況幾年前？）。但，對你了解間公司就有用。

27. 時間關係，我已經幫你入晒，我甚至係入到2001年！幾個好快嘅點：

28. 首先你見到，港交所個派息比率好高，年年派九成。本身冇話「好唔好」，反正股價會反映，而你見啲科企唔派息都升幾倍。不過點解港交所可以年年派九成息？首先係能力，因為佢啲業務根本唔使好多資產或資金去支持。第二係意願，有啲家族公司，係都唔會派息益你。咁大股東都冇著數？錯，可以用其他方法去淘乾間公司，搵個二奶入嚟出好高人工呀，幫襯返自己朋友啲公司之類。

29. 另外，當然係十分scalable 嘅生意。例如你睇2020同2013年比，收入升咗超過一倍，但開支只係升60%，好多年都有呢個現象，所以見到個cost to income ratio越壓越低．咁當然友要加人工，所以有得揀就入呢啲公司。

30. 成份年報，剩返你要睇嘅地方，就係PL同BS，129同131頁。放心，已經幫你入埋在Excel，入足10年，連埋啲6種業務各自幾多都有（只入咗兩年）。理論上應該睇埋啲remark，134頁，或者138頁睇起。不過港交所反而未必好需要，上面都已經講咗好多。

如何估數

31. 呢節好快咁教下大家，可以點估啲數。

32. 講咗咁耐，都未講咩係ADT。ADT就係average daily turnover，日均成交。亦即係你每日睇新聞睇股票機見到嗰個成交多億，不過有時有少少出入，因為仲有舊嘢叫創業板，雖然好細。

33. 咁多earnings driver中，呢個就最重要，重要過咩幾多公司上市，集資額幾多。記唔記得有3瓣收入我highlight咗？交易費，存倉費，結算費。三樣都好受ADT影響。

34. 但個關係係點？睇你玩到幾詳細。我呢，就好簡單，Linear regression！你可以慢慢用更複雜嘅方法，但我只係教你入門版。比較熟嘅，可以直接用LINEST 呢個function，但以下我BB班教法。

35. 其實唔難，將歷年ADT拎出嚟。呢個係x，independent variable．然後交易費之類係不同嘅y，dependent variable．分開三次玩。

36. 示範起見，你可以將11年至19年嘅ADT，同埋11年至19年嘅交易費，揀出嚟，然後揀個「散佈圖」，就得到我個圖。自己搞下版面配置，可以出埋個方程式同個R^2。R^2你大約可以當係degree of fitness，今次見到都82%，幾好。

37. 然後？你就用呢個方程式，去估下2020年嘅交易費幾多。2020年如果ADT（x）係129.5，方程式咪計到交易費（y）係6959。咁同真實相比呢？真實係7526，爭咗8%，還好但又唔算太好，陣間解點做好啲。

38. 實務上，唔使次次都整個「散佈圖」抄個方程式，直接用formula（自己開excel睇），y= 62.48x – 564.78，用Slope同 Intercept function就搵到嗰兩個數，即係y = slope*x + intercept．

39. 總之，照樣玩法，就會搵到當ADT係129.5時，預計存倉費同結算費係幾多。見到出嚟，存倉費爭11%，結算費爭5%。亦見到存倉費個R^2好低的，唔夠60%，似乎應該用其他方法。

40. 好啦，點可以冇咁大偏差？好多方法，除咗問管理層外，實際上港交所每季出一次業績，你應該有多好多data point，希望會準啲。另外，例如存倉費呢啲，你可以唔用ADT做x，用其他嘢。用乜？你睇返年報佢嗰頁畀啲咩相關數字你。

41. 如此類推，上市費之類，都可以咁去估出嚟。分開現金同輪證期權，然後現金又可能分兩部份，年費就同上市公司數目比，首次嘅咪同新上市比，又玩以上嘅嘢。

42. 投資收入嘛，咪睇下嗰年股市點。另外留意埋息口，因為唔少係放銀行存款（保守嘛）。仲有，以上呢個係個回報率。個本呢？就同佢有幾多資金有關。咁就靠你去成個Excel model估完PL再計返BS之類，太深，不在呢度討論。

點估日均成交

43. 好，真係最後。你見為咗估呢啲不同嘅收入開支（y），就要有x．我頭先back test當然有個x，知道2020係幾多ADT。咁但如果要估2022，2023嘅數呢？咁即係要估埋個ADT。咁就高難度了。

44. ADT大約點估？首先當年嘅，你每日要keep track，亦因為咁，往往成交一升港交所股價已經飛上去。但如果去到2022 2023，都真係要靠估。

45. 一個方向係：ADT就係 = 總市值x 換手率（velocity）．總市值就係所有公司加埋嘅市值，不難，港交所每日有。點估之後？自己估下啲新上市，以及organic growth（股市長遠係升的！）。但velocity比較煩，就同個市場氣氛有關，例如同樣係50萬億市值，你成交可以係一日1000億，又可能係一日2000億。咁就靠你判斷，同埋往往係reversion to mean的。

46. 其他咩新上市公司數目，一年有幾多輪證等等，都係差不多玩法咁估。

47. 叫做好快（4000字！）講完晒，你仲係咪有興趣做分析員呢？應該冇乜吧。

================================

Facebook Page：「君子馬蘭頭」ivanlirsesearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

勞蘇基金：50萬港紙入場，暫定2%管理費 20%表現費，應該隨時可以拎錢走。歡迎PM我報名，現階段冇任何commitment，絶對唔使畀錢住，到時你亦可以反口唔畀。亦都唔使怕答應咗到時反口，絶冇問題，純粹等我知道有幾多人有興趣。我預會有好多人到時因為種種理由唔加入的。

聲音版/錄影版：慎防有人唔知，係有樣咁嘅嘢的。方便唔想睇字/坐車聽/公司聽。一個Post有齊純聲音（mp3）同埋影像版（我朋友碌住電話畫面讀）。 20蚊或40蚊會員限定。Sample呢度，免費試聽。