債息跌返去議息前，科技股繼續升，納指新高．Nvidia Microsoft SGPI新高。Adobe Dropbox Crowdstrike都係．美股今年第31次創新高，增長股價值股相關性新低．Nike 股價新高，大學教Finance 嘅一樣左傾。數學家智破六合彩拎走2億。改變足球嘅Start up (Patreon)

快評幾句— 債息跌返去議息前，科技股繼續升，納指新高

大師冇點你— Nvidia Microsoft SGPI新高（有買，so good）。Adobe Dropbox Crowdstrike都係（冇買，So Sad）

每日一圖— 美股今年第31次創新高，有乜啟示？增長股價值股相關性新低，有乜啟示？Nike 股價新高，有乜啟示？

Good Read —　大學教Finance 嘅一樣左傾。數學家智破六合彩拎走2億。改變足球嘅Start up

FB Post Summary — Stephy分手！體育用品股大升（兩篇文，冇因果關係的）

快評幾句— 債息跌返去議息前，科技股繼續升，納指新高

1. 市況繼續都係淡靜，不過你見都幾分化，道指跌200點（0.6%之嘛），但納指就新高，升1%。

2. 原因嘛，自然係又係因為債息，近期都係呢啲現象。你見驚縮表驚通脹嘅，又忽然唔多驚，而家10年美債債息直頭跌到1.50%樓下，自己睇圖吧，10日前議息之前嘅水平了，咩事都冇發生過。咁科技股普遍對債息都敏感啲，因為估值高。

3. 另外，呢種唔同類型股票背馳嘅情況，過去大半年都係咁，下面「每日一圖」都有解。你出出入入，見舊經濟/價值股受捧又沽晒啲新經濟/增長股追入去，好易左一巴右一巴。

4. 港股嘛，就真係冇乜特別，不過見到科技股都係明顯跑出，科指有得升，其他都要跌，但只係極窄幅。仲有啲體育用品股安踏2020李寜2331等等出完盈喜升到飛天，我在FB Post Summary有講，不重覆。

大師冇點你— 8舊水 Nvidia Microsoft SGPI新高（有買，so good）。Adobe Dropbox Crowdstrike都係（冇買，So Sad）

5. 費事不停重覆，但唔少讀者買咗DropBox．總算守住30蚊。另外特別想講Nvidia同Microsoft。

6. Nvidia升到8舊水，就真係有新聞嘅，因為一路都估買arm單嘢會搞唔掂，但而家有啲大公司（Broadcom博通，聯發科MediaTek同 Marvell）出聲話支持，可能估易啲批到吧。

7. Microsoft嘅，冇乜特別，唔係升得特別多，但突破2萬億市值後一路坐得穩。最新會出新Windows，當然不代表會有咩好突破嘅嘢，但留意佢係將Teams塞埋落去—咁你見到Slack（被SalesForce買咗）同Zoom應該冇乜運行。實情微軟一路都係靠呢招。

每日一圖— 美股今年第31次創新高，有乜啟示？增長股價值股相關性新低，有乜啟示？Nike 股價新高，有乜啟示？

8. 美股今年第31次創新高，有乜啟示？—美股今年只係130個交易日左右，已經創咗31次新高。遠比你想像中易玩。但，更想講嘅係，由2013年開始，美股每年都會創至少一次新高，今年進入第9年。係咪玩完？唔知，但上一次類似嘅情況，由1989年至到2000年，美股連續12年都至少每年創一次新高。

9. 增長股價值股相關性新低，有乜啟示？—正常當然係正相關的，始終都係股票，好少會話增長股升價值股跌，或者掉轉。但，相關性有幾大？視乎邊個時期，一般都有60%以上。呢個相關性，由舊年下半年開始急跌，當時見過95%（齊上齊落），而家得19%，兩堆股票係各自郁嘅。似乎呢，並唔係一個好好嘅現象，首先見到只係啲板塊輪流炒，二來亦見到動力唔足。上次見到咁情況時，都係2000年之前，自己小心。

10. Nike 股價新高，有乜啟示？— 周末寫奈雪的茶都講過，你只睇咩幾蚊材料賣幾十蚊，太表面了。租金同人工都食走你好多。Nike好成功嘅地方，就係繞過晒啲中間人，直接賣畀客。2010年都唔係咩蠻荒年代啦，個個都講電商，但當時直接銷售只係佔佢地生意15%，而家係佔39%。你諗下呢度慳咗幾多租幾多人工？哦你搞套嘢都要IT投資，但點都係細數，同有限數，仲要一筆過後都唔使太多錢再畀，唔似你請人個個月要出糧，租舖個個月加租，唔加人工唔加租仲要趕你走。

Good Read —　大學教Finance 嘅一樣左傾。數學家智破六合彩拎走2億。改變足球嘅Start up

11. 大學教Finance 嘅一樣左傾—首先搞清楚乜嘢左右，好多人亂用，好多時語意亦不明，同一個人同一種想法，有人話左有人話右。但呢度係講美國政治嘅context，就清晰好多。BLM LGBTQ之類係左，保守價價係右。民主黨係左，共和黨係右。咁美國大學教授普遍左傾大家都知，但原來連教Finance嘅都一樣！不過以前啲我文都有講，民主黨員一路都多過共和黨，只係投票率低，同耐唔耐輸選舉人票。更得意係睇埋年紀：文中講邱吉爾，就係嗰句—If You Are Not a Liberal When You Are Young, You Have No Heart, and If You Are Not a Conservative When Old, You Have No Brain

12. 數學家智破六合彩拎走2億—　過癮嘅故事，可惜數學嗰部份就冇講，亦可能有點深。但，大家都知六合彩當然係搵笨實，否則馬會唔會有咁多錢做慈善。術語講，個期望值係負數的。不過，某年密歇根嘅彩票，就出現漏洞，去到某啲位，個期望值變咗正數。呢位數學家就發現咗，但畀你估下你會點買？當然要大大注咁買，買好多張，大數法則。最後佢贏咗2億港紙，咁減埋啲成本（唔中嘅東西）都執咗6000萬。成件事最正係乜？兩公婆之前唔食煙唔飲酒唔賭錢，而已經七十幾歲，只係留畀啲仔女，純為興趣。

13. 改變足球嘅Start up—一路都話啲球迷（特別係香港）係相當anti-intellectual 嘅，只會同你講鬥心體能，講戰術嘅已經畀人話紙上談兵。啲「數據L」更加係廢柴。但，你係專家定用家（球會）先係專家？幫助球會嘅start up（唔係搞間新球會當start up），一路都有，成為一門產業。篇文有講，唔係講咩 龍門界技術（判斷入咗未），VAR（判斷有冇犯規之類），而係真係幫你提高勝算嘅東西。例如乜？幫你搵新秀啦，教你買球員邊個抵啦，監察啲球員場上表現啦，乜都有。

FB Post Summary — Stephy分手！體育用品股大升（兩篇文，冇因果關係的）

14. Stephy分手！— 呢篇真係無關投資，但有公共性。點解？因為甚至你唔會問邊個Stephy！我唔使講明Stephy Tang，或者鄧麗欣。咁正經，呢篇文我都唔係鐵粉角度寫，而係兩樣嘢。第一，我在01博評第一篇文就係寫佢同方力申分手，而冇01博評就唔會有我個Facebook Page，冇個Facebook Page就唔會有呢個Patreon（其實未必係咁，可能都會有，但遲啲）。第二，台仔配港女，真係唔多work，因為收入水平，同埋金錢觀念。即係你台仔好富貴配普通香港女仔都仲還好，但你話香港女明星，真係唔work．你睇阿嬌一樣係咁。

15. 體育用品股大升—Er……隻安踏真係升到5000億市值，李寧都2300億，6間奈雪的茶咁。而隻安踏我13蚊渣上嚟，15倍股！另外你見到個威力，而家佢升10%，我就已經由15倍變16倍股。而我一路都冇「止賺」—當然亦因為我唔多記得買咗。而家呢個情況，我收唔收返個「成本」都唔重要了。記住，升少少就急住止賺走，真係唔得掂。

================================

Facebook Page：「君子馬蘭頭」ivanlirsesearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。