奈雪の茶2150の教訓。大快活52業績。Microsoft Nike新高，大市悶，但美股半年已升14%—遠比我預期好。Facebook 1萬億市值，有乜特別？美國銀行股加派息 (Patreon)

奈雪の茶2150の教訓

大快活52業績（有Excel）

Microsoft Nvidia Nike新高，大市悶，但美股半年已升14%—遠比我預期好

Facebook 1萬億市值，有乜特別？

美國銀行股加派息

1. Ivan 懷住沉痛嘅心情打完呢篇Patreon，不過呢，又唔係返工白逗人工咁爽，所以都係要專業少少，繼續寫文。仲有下個月本人生日（7月1呀喂），咁應該再會有多啲新東西畀大家。

奈雪の茶2150の教訓

2. 奈雪今日（星期三）上市喎，應該都冇乜特別好講吧。文之前寫過，固然寫嗰時已經截飛，影響唔到你抽唔抽，但至少證明我睇淡隻嘢冇乜錯。雖然，再講一次，新股第一日嘅嘢，就真係冇乜好分析。

3. 咁見到了，暗盤都係近乎平收，相信第一日表現唔會太好吧。用孖展嘅應該要輸錢。教訓？新股普遍都係搵笨。仲有，你見啲咩幾百倍超額認購，你估會唔會開市後幾百倍人買？梗係唔會啦。你知我知個個知，嗰啲「需求」係假嘅，不過係啲友用孖展抽。實情佢可能星期三9:40分以後一股都唔想要。

大快活52業績（有Excel）

4. 講真冇乜特別，隻嘢又唔係大，又冇乜讀者買，但原來一路有寫開，又有個Excel，就每次都寫下。話晒都叫做民生股，大家見得到嘅公司。

5. 點解冇乜特別？仲要因為，一早出咗盈喜。而業績仲要係中午出，而盈喜內容同個最終業績差不多一樣，所以股價冇乜反應。

6. 咁睇乜？循例都睇下啲數。

7. 記住，公司3月年結，今次出嘅係全年業績（20年4月至21年3月），綠色嗰兩格。但我幫你拆返晒出嚟，你睇橙色嗰4格，4次半年，先睇到個趨勢。

8. 第一次半年（19年4至9月）完全冇肺炎影響，可以當係「normal」。雖然有社運，可能再睇早半年好啲，但未得閒整。

9. 咁你首先睇收入，之後開始爆疫，兩次半年嘅收入梗係跌，最新半年已反彈，但只係走出谷底，未返到第二次半年（19年10月至20年3月水平），更唔好講話返爆疫前甚至社運前。

10. 毛利嘅情況都差不多，表面上好似最近兩個半年反彈，但入面計埋「保就業」（銀碼我寫咗，你心算都計到），趨勢同收入一樣的。然後去到你睇「核心純利」，減走晒啲補貼（唔止「保就業」一款）同埋公司話一次性嘅減值後，見到剛好夠吊住命打平。

11. 事實上你睇返全年業績（又去返綠色）都見到，話就話1.5億純利，但「保就業」都1.8億，其他補助又8000萬，我畀你扣埋啲減值唔計，都係輸錢的。

12. 但，最緊要係乜？係最近半年（20年10月至21年3月），已經叫做好過再上半年（20年4月至20年9月），扣埋保就業都係。

13. BTW，留意埋，派息派得幾好。你就算用再上一年嘅派息（0.73）都4厘，用最新嘅派息（0.90）5厘添。Sustainable 嗎？還好，至少公司財政仲係極穩。6億幾net cash，仲高過之前兩個半年。（圖冇貼，但Excel有）。咁一年派息都係1億左右，真係冇盈利都可以頂到一兩年呢個水平派息（但只係話數係咁計，不代表公司真係會做）

14. 留意冇晒保就業之類後，就見真章了，分分鐘仲係冇乜錢賺。

Microsoft Nike新高，大市悶，但美股半年已升14%—遠比我預期好

15. 美股方面，你見又係窄幅上落。一路都話貴貴貴，但美股真係叫做沿住恐懼之牆慢慢升，你見話咩sell in May 五窮六絶，但呢兩個月美股有些少升幅，半年表現絶對唔失禮。（亦因為咁，你見我一路話貴但都一直買，不過小心啲咁解）

16. 又再廢話講句，半年美股指數都已經升13-14%（三大指數差不多），喂，你仲想點？呢個表現已經好過歷史平均嘅全年！當然，這不代表下半年冇得升或實會跌。之但係又諗下，如果你上半手冇呢個升幅，甚至仲要輸錢嘅，就檢討下。

17. 除咗呢啲老調，仲畀多個圖你睇，耐唔耐都會出現。而家係美股牛市一年多少少，未到年半。好消息係乜？美股牛市，好少一年貨仔，一年升完，絶大多數情況第二年都仲有得升。唔使驚。但壞消息？你見去到呢個位開始冇乜力了。固然呢啲冇乜科學根據，但睇下無妨。

18. 個股嘅，不講太多，可能留返聽日講少少。Microsoft Nvidia 不再重覆，Nike 繼續新高，但原來好多讀者係之前新疆棉嗰時買，你班友仔丫。但的確係醒的。當然個不方便真相始終係：Nike今年都仲係跑輸大市的。但冇緊要，唔係隻隻都會跑贏。況且，如果你新疆棉嗰時買，就應該跑贏大市，但我係舊年買的。

Facebook 1萬億市值，有乜特別？

19. 另外仲有Facebook，星期二晚跌返些少，但仲守住1萬億市值。又可能之後再寫寫，但政府話佢壟斷但咬唔入，當中有啲位都係幾值得睇（但有少少深同悶，法律嘢），可能遲下在我Page講

20. 不過想順帶一提，Facebook係第五間達到1萬億市值嘅Big Tech，亦即係FAAMG當中最後一間，根本咁多年佢都係最細嘅一間。但，知唔知有乜特別？佢同其他四間公司有乜唔同？你計時間上佢係最慢，但，呢間公司係最年青嘅！亦係最快達到1萬億市值。

21. Microsoft 同 Apple仲老過我！而好多人都知Amazon 2000年科網爆破時已存在，跌九成幾再升返幾千倍。但Google都係 2000年前嘅公司（1998）。就只有Facebook，係2000年後嘅公司（2004）。只用17年就打到1萬億市值。

22. 而呢間公司我由年頭推到年尾，未開Patreon已成日寫，自己都一早買埋，今年亦都跑贏大市，冇介紹錯啦。

美國銀行股加派息

寫完晒先醒起，循例快講。之前（上星期四之嘛）都提過，美國嘅銀行通過咗個壓力測試，咁就可以派返息同回購，但當時反應不大。咁但，估唔到咁快就宣佈埋加派息，例如摩根士丹利直頭加一個double，搶晒頭條，其他銀行都有宣佈。

但你見，銀行股反應都係普通，同我上星期篇文講嘅一樣，銀行似乎都冇乜運行。

不過，估下我諗起邊隻股票？就係匯豐5！講明，唔係叫你買。但不幸地我係持有部份嘅，咁如果你或者阿媽阿婆有嘅，可以留意下。我知匯豐唔係美國銀行，但照計歐洲嘅玩法都差不多，有冇機會加返多啲派息？咁可能幫到股價。但未有嘅，就千萬千萬千萬唔使買了。

================================

Facebook Page：「君子馬蘭頭」ivanlirsesearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。