賣奶茶好好搵？Really？　—　奈雪の茶の分析 (Patreon)

新股睇兩日嘅，其實就唔使乜嘢分析。但想知多啲嘅咪睇落去

唔好用你嘅品味去判斷間公司得唔得

公司背景 — 2015年先開。Market Share第二。唔做加盟。冇物業

估下一間舖每日做幾多生意？留意唔同級別嘅城市爭唔遠

Same-store sales：唔計開新店又點？

賣奶茶好好搵？咁點解得300億市值？收入升3倍，成本都升3倍

最後梗係講估值

新股睇兩日嘅，其實就唔使乜嘢分析。但想知多啲嘅咪睇落去

1. 奈雪的茶（以下簡稱「奈雪」「公司」「間嘢」）抽唔抽得過？截晒飛啦。但你抽中應唔應該即放，或者應唔應該追，就可以研究下。

2. 簡單答：即放，唔好追，好貴。

3. 同樣地，新股嘅嘢，頭一兩日，真係唔使分析乜，主要睇下嗰時市場氣氛，又有冇第二隻嘢上市，以及公司呀投行呀之類點玩。廢話一句就係「供求」—即係冇講過，唔好以為超額認購得多就代表有需求（呢隻都430倍，但冇乜意思），啲友做大孖展之嘛，唔代表真係會追。當然你如果唔足額嘅就唔多好玩，但100倍同300倍，我唔覺得有乜分別。而如果你睇國際配售就可能有多啲啟示，雖然都係把托，因為國際配售啲基金，係可以抽飛的。

4. 但如果想睇埋之後買唔買得過，或者了解下間公司，可以睇落去。

唔好用你嘅品味去判斷間公司得唔得

5. 見到呢類公司，總係令我諗起「冇腳嘅雀仔」，不停咁燒錢，睇下邊個死先，停落嚟就會死了。大陸唔少產業都係咁，仲要唔止係科技，你見零售飲食都可以係咁，甚至以前國美493賣電器都係咁。

6. 當然呢度要講嘅係，大家應該發現我好少買中國零售股，隻10倍股安踏2020都算係半意外（買咗唔記得沽）。總係覺得貴到無倫，但又可以繼續貴，的確又真係見到個增長勁（但估值更勁）。所以可能係我唔識睇。

7. 好啦，講真的，兩樣嘢。首先，睇招股書嘅，一般你睇個Summary都已經好夠好夠，頂多睇埋後面啲Financial Statement（唔使remark）．反正你唔係返工，唔使搞咁多嘢。我返工時就真係同你極速飛晒成本（600頁）

8. 另外，以下我refer嘅頁數，係本招股書入面印嘅頁數，唔係你個PDF Reader入面嘅頁數。我都唔肯定用邊個好啲，但總之，將我講嗰個頁數 +10，就係PDF Reader入面嘅頁數。

9. 第二樣，好重要，千萬唔好用你自己嘅品味去評論間公司得唔得。好多你嘅印象都係假嘅，況且有時產品越垃圾嘅公司越賺錢。你睇飲食嘅，邊間做得大嘅唔係難食？麥當勞，海底撈，大家樂，全部個重點係連鎖，中央廚房，統一品質。

10. 所以同樣地，你有冇飲過奈雪，係冇關嘅，我都冇飲過。正如我都係嗰句，唔識半導體就唔講得科技股？咁啲車房仔砌機仔發達冇？我使唔使識晒愛馬士每款袋先去買佢嘅股票？

11. 即係，你覺得難唔難飲，唔好意思，no body cares，「得一間香港分店」。大陸佬覺得難唔難飲，都唔係重點 —睇多次麥當勞大家樂嘅例子，我諗冇人覺得好食。

12. 好，去片。

公司背景 — 2015年先開。Market Share第二。唔做加盟。冇物業

13. 由啲最不重要但比較冇咁悶嘅嘢開始講，如果冇睇錯，呢檔咁嘅嘢係2015先開，相當年青，仲係奶茶第一股！但正如吾友高天佑話齋，唔係奇在「賣奶茶都上到市」，中國十幾萬萬同胞，真係乜生意都上到市。係奇在點解冇一間奶茶公司上市。你以為真係好好賺？唔係。

14. 同埋你睇下，上限定價都只係340億市值。你相比下，打邊爐海底撈6862係2000億！安踏2020賣波鞋賣到5000億！而奈雪已經係第二大（最大冇錯係喜茶），係咪有啲不成正比？

15. 好啦，第5頁。睇睇幾多間舖先？舊年年尾在大陸489間，咁總數491，邊度嚟？唔係台灣，而係一間香港，仲有一間日本！反攻日本成功！

16. 留意佢啲分店分佈算平均，新開嘅一線，新一線二線都有。邊啲叫新一線？自己睇圖。邊啲城市叫一線？搞錯！北上廣深呀。

17. 公司嘅大計，係再開多750間（係開多750！唔係開到750）。而家就玩到562間（呢個「最後實際可行日期」，你當係份嘢埋單嘅日子， 今次係2021年6月11 日）。留意摺埋嘅唔多，舊年只係執咗8間，不獨立討論。

18. 560間即係幾多？喜茶講緊 700間（still counting）．咁計market share，就唔止睇店舖數目，計錢計收入最實際。當然有幾多share睇你點定義market，「到底雞煲同邊爐係咪一樣嘢」「福建肉骨茶（馬拉式）同潮洲肉骨茶（坡式）又係咪兩個market」．原來話計現製茶飲店嚟講，奈雪排第7，market share 3.9%．計高端現製茶飲店，就排第二，market share 18.9%（最大應係喜茶，27.7%）。咩叫高端？20蚊人仔以上就算高端。諗落都幾係嘢，唔好忘記大陸嘅人工同香港比低好多，真係20蚊算高端了。

19. 另外留意嘅係，奈雪所有舖頭都係直營嘅，冇franchaise，原因我唔知。可能純係大陸唔畀（唔會吧？），或者係希望控制品質。咁以搵錢嚟講，做加盟真係無敵，利用人地嘅夢想嚟搵錢，當然就會搞到啲舖頭賣魚蛋呀之類。但奈雪冇做加盟，OK。

20. 另外，公司係冇物業嘅。好處你咪可以話asset light model，但香港人心諗，賺埋咪又係畀人加租。當然大陸嘅情況同香港又唔同，相對地業主冇咁大議價能力，香港就當然你唔租大把人租。

估下一間舖每日做幾多生意？留意唔同級別嘅城市爭唔遠

21. 好啦，睇下啲舖頭。你估下一間舖一日做幾多生意？估咗先。留意唔同級別城市唔爭得遠，可能山卡啦嘅佢就成個城只開一間。

22. 答案係：第9頁，每一日，一間做2萬蚊生意左右。係咪比你想像中少？但大陸咋喎。同埋真係斬埋有柴，自己計，500間舖，一年365日，每間每日2萬，夾埋一年就三十幾億生意。嘩。

23. 另外，之前講過，所謂高端係20蚊杯以上，奈雪就26蚊杯．之但係每張單就平均43蚊，一來可以買兩杯，亦可以叫其他嘢。一日2萬生意，一張單43蚊，咪一日500張單左右。

24. 留意以上種種，一線新一線二線都差不多，「其他」就高啲，香港人日本人有錢啩，而且得一間。

25. 睇一睇個trend，你見無論係單數，定係每張單消費，都係跌緊的。2020當然因為疫情，但2019都係咁。唔多唔少都係因為開更多舖頭拖低咗（一個城市開多幾間當然會分薄人），但公司亦靠呢樣嘢，所以收人都係越滾越大。開舖速度，當然係快過啲收入跌嘅速度—但總有盡頭。

Same-store sales：唔計開新店又點？

26. 為咗應付呢啲公司（零售最多），所以我地有一個指標，睇Same store sales（SSS），同店銷售。咁你就分到啲收入係嚟自開新店，定係舊店。SSS就只計開業至少一年嘅舖頭。

27. 咁你睇到，第11頁，個SSS，絶對係唔靚仔的，雖然利潤率好似升咗。

賣奶茶好好搵？咁點解得300億市值？收入升3倍，成本都升3倍

28. 好啦，壓軸啦喎，BTW，壓軸係指尾二，唔係最尾，呢度特登拋下書包。

29. 壓軸，當然廢話少講，睇數。你好多時啲街外人講，乜乜乜生意好受歡迎，係好大嘅盲點。因為有啲公司好好生意你睇到，有啲睇唔到，例如你睇澳門賭場，最大嘅生意係啲超級貴賓，你睇出面多唔多人冇意思。另外，好受歡迎又未必等於收入好多，反正可以做好多宣傳。收入多又未必係利潤多。給我數字，其他免談。

30. 第16頁，見到了，生意真係增長得幾勁。頭先都有講，一年30億生意，2018年先10億，升三倍。

31. 有話賣呢啲奶茶化學嘢，成本好低好好賺？yes and no，有冇諗過，咁好賺嘅嘢，實會有人抄？得你先知好賺？以前就可以，而家資訊咁流通，好難。

32. 100蚊收入，去咗38蚊係料，我唔知你覺得係咪叫食水深，但同我想像「食水深」應該幾有距離。星巴克嘅咖啡，100蚊入面，應該得10幾蚊係料。

33. 仲有，員工又食咗你30蚊。交租又食多10幾蚊咁咯。好多時飲食業最貴都係員工，唔係租，香港都往往係員工貴過租，大陸更加唔使講，人工係平，但租更平，始終地大。況且我估你總不能搵個大媽去做（我估咋）。

34. 頭先提過，2018年去到2020年，生意3倍。但，分店數目都差不多係3倍，你見員工成本，材料，租，甚至水電，融資之類，全部都3倍的！

35. 證明乜？證明呢盤生意，唔多scalable，唔會出現啲收入升幾倍開支唔點升嘅情況。當然呢個本身唔一定係問題，生意性質，況且你可以自己睇返估值食飯。我當第一年100蚊生意95蚊成本，之後200蚊生意190蚊成本，「個純利都上一個開啦」。

36. 另外，有啲開支似乎應該唔會隨住收入而升，例如marketing．但另一方面，你見啲配送開支升咗16倍，冇計，應該越做越多外賣，而呢部份嘅成本似乎只會再升。

37. 搞一大輪，你發現公司都係賺唔到錢嘅。當然有啲one off item，但調整埋，都不過係一年1600萬純利。咁點計都好，啲虧損都係收窄中，但係咪值咁嘅估值？

38. 最後，因為2020啲數受疫情影響，啲數好難搞。其實公司都有提供返疫情嘅影響，同埋疫情後最新情況，但因為太瑣碎，我就唔一一列了。有興趣你自己睇P25-27 。

最後梗係講估值

39. 好啦，壓軸係尾二，而家咪最後，知我作風嘅，當然係講估值。話知你盤生意點賺錢，乜價先？所以有啲人問我一啲未上市嘅公司買唔買得過，都答唔到你。你100億估值定1萬億先？

40. 奈雪拎嘅估值，上限定價係340億港紙（第40頁）。PE（市盈率）就唔好提了，冇乜盈利。但如果計PS（市銷率）呢？一年31億生意，即係9倍PS（留意個生意係人仔，市值港紙）

41. 咁講返，即係貴唔貴，同乜公司比？「我覺得最接近係星巴克Starbucks」。星巴克嘅，1330億市值（美金啦，自己Google得了），一年生意265億，純利36億。咁大約係37倍PE， 5倍PS。留意我有時唔用2020，因為疫情影響。咁相比下，奈雪好貴喎，仲要係一上市呢個價，你仲可以有幾多upside？

42. OK，賣茶唔同賣咖啡（但人地利錢高好多），咁我地睇茶，大陸冇，但台灣有隻天仁（1223，台股啦）。未必完全可比，但玩住先。市值 32億台幣。20億收入，1.6億純利。PE 20 倍，PS 1.6倍咋。

43. 咁當然，台灣點同大陸，增長飽和晒嘛。咁我地不如睇大陸，睇模式有啲似嘅打邊爐股，海底撈（6862）。2000億市值（港紙），290億收入，23億利潤。PE 72倍，PS 6倍，都仲似乎平過隻奈雪。另外留意，呢檔嘢2016年先得78億收入 ， 純利 7億，可見仲係高增長的。

44. 咁你話，太大啦，睇隻細啲嘅，咁睇小火鍋，呷哺呷哺（520）。 90 億市值  61億收入  3億盈利。PE 25倍，PS 1.5倍咋下。

45. 當然啦，真係未必能直接比較，特別係奈雪有機會真係轉返賺錢。但，你只睇PS，都好似幾貴下。呢個仲要只係定價，你仲要預佢再升？好似唔多抵玩。

================================

Facebook Page：「君子馬蘭頭」ivanlirsesearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。