誠哥增持長實1113，DropBox Adobe ViaComCBS 新高．Nike 新高！快手1024大升！唔想買美國Big Tech就買三星2814． 麥當勞是很成功的快餐店。收水唔一定債息升。OnlyFans 老闆神秘又陰暗。1%美國人嘅儲蓄拖到中產負債． (Patreon)

快評幾句— 誠哥增持長實1113，DropBox Adobe ViaComCBS 新高

大師冇點你—Nike 新高！快手1024大升！唔想買美國Big Tech就買三星2814

每日一圖— 麥當勞是很成功的快餐店。收水唔一定債息升。

Good Read — OnlyFans 老闆神秘又陰暗。1%美國人嘅儲蓄拖到中產負債.

FB Post Summary — Nike 大升的教訓

快評幾句— 誠哥增持長實1113，DropBox Adobe ViaComCBS 新高

1. 今日多嘢講，散啲。第一樣當然提返你，李嘉誠又增持長實1113了。你夠耐性嘅，跟佢買1同1113都好少點會輸錢（其他佢系內嘅嘢就唔敢講）

2. 美股嘅嘢，延續升勢，標指再破頂，道指都升得多（我心算好似道指有百幾點升幅都係嚟自一隻Nike），但科技股相對弱

3. 原因？最新出嘅通脹數據仲係幾高，雖然叫做符合預期，但債息都抽上。但冇太影響舊經濟股，新經濟股就差啲。

4. 另外，你見Monitor List 嘅DropBox（卒之30蚊！）Adobe之類都新高，前者除咗賣盤冇乜特別，後者都唔知係升自己嘅業務定併購概念。如果好細心嘅可以分到嘅，可以比較下啲估值。

5. 而我更加想講都係Monitor List上，有排都未創新高（成舊水！）嘅ViaCom CBS，早兩日都未得閒寫，但以前都快up過，咪又係併購對象。（所以真係環環相扣）。傳話係ComCast買，甚至買埋Roku（太貴，我唔敢買）。 至於ComCast同 ViaComCBS入面有乜嘅，自己睇維基啦，太多業務。

大師冇點你—Nike 新高！快手1024大升！唔想買美國Big Tech就買三星2814

6. Nike業績呢，昨晚（其實係星期五朝）已經寫咗，不再重覆。但你真係又見到一樣嘢：梗係壞消息股價跌時買先易得到高回報。但當然未必個個咁勇，在佢上次出個失望業績時飛入去，或者新疆棉單嘢嗰時飛入去。我呢？我係一早買咗的，但我冇因為咁走去沽。話說，公司即使升埋呢棍都好，都仲係跑輸大市嘅，當然你低位買又唔同。但公司嘅估值，之前一路都唔太過份的。嗰時講舊經濟股我都有推過。

7. 另外，快手1024都真係升返8%，早兩日推過的。星期四跌啲，星期五即時有力，照計仲有得上。成堆科技股都開始強，你見科指都跑贏。希望今次可以持久啲。

8. 不過呢，同中資比，都係美國科技股強勢啲。真係唔係廣告（我識三星嗰邊嘅人，但如果係廣告我必然寫明），但咁啱有讀者買咗，見到隻2814日日升，佢都幾開心。隻嘢以前寫過下，適合唔想半夜買美股，或者唔夠錢買晒幾隻Big Tech嘅人。

9. 雖然我都係叫佢開個美股戶口。

每日一圖— 麥當勞是很成功的快餐店。收水唔一定債息升。

10. 麥當勞是很成功的快餐店—麥當勞好成功大家都知，但有幾成功？睇圖就知。你見個圖x軸（打橫）係舖頭數目，打棟係每間舖頭做幾多生意。咁見到，一般係大約反比例，或者L型咁（「其實係雙曲線」）：Subway嘅，舖頭多但每間做唔到幾多生意。Shake Shack嘅，每間做生意多（賣得貴，同埋啲富貴人幫襯），但舖頭好少。就只有麥當勞可以兩者兼得。

11. 收水唔一定債息升—畫埋圖畀你，真係見到咁的。一般以為「量化寬鬆」（Quantitive Easing）印銀紙買債，必然壓低債息。但實證見到並唔係，QE2同QE3時，債息都係升的。原因？主要都係因為金融市場係睇預期的。到你真係開QE，債息往往先走好多步。

Good Read — OnlyFans 老闆神秘又陰暗。1%美國人嘅儲蓄拖到中產負債.

12. OnlyFans 老闆神秘又陰暗—原文係講Shady，唔識譯。Only Fans是甚麼？「色情版Patreon」咯。固然有其他嘢，但主要都係女仔賣相賣片。你話，「Patreon都有喎」。但以我所知Patreon不容許色情，當然乜嘢係色情就有啲深，但好似話一般Patreon都不能露點，Only Fans就可以。呢檔嘢絶對係疫情大贏家，十分賺錢（係賺錢，唔止有收入）。檔嘢嘅大股東係乜水？好神秘，嗰位仁兄完全唔肯見報。但都畀人起到唔少佢過去嘅嘢，例如以前係搞啲網站畀密碼去未成年色情內容的。

13. 1%美國人嘅儲蓄拖到中產負債 —呢篇比較深，但可能有人有興趣。之前有個講法（當然係美國嘅講法！）話美國嘅赤字，唔係因為美國人大洗，係因為其他人（例如中國）儲錢儲得多喎。你儲得多又走去買返美國嘢，炒高股價啦，壓低債息啦，就鼓勵美國人借錢買樓喎（果然係有人搵支槍指住）。另外資金流入亦都令美金強，傷害美國出口。咁用相似嘅睇法，你會發現1%嘅美國人嘅儲蓄，鏡子另一邊就係一大堆中產嘅負債。又，在美國要做1%，如果計資產大約係1100萬美金，計收入要54萬一年。

FB Post Summary — Nike 大升的教訓

14. Nike 大升的教訓 - 呢個係主要講心法同哲學方面，同Nike本身表現冇乜大關係。但幾樣嘢，你見好多人對講政治樂此不疲，咁呢個如果係興趣冇乜關係。但千萬唔好以為講得好似有道理就對你投資有幫助。投資嘅嘢，贏就贏輸就輸，總可以驗證。例如新疆棉事件，一班人可以堅持話Nike冇運行，另一班可以話睇死大陸人身體好誠實。咁真相呢？我都唔知，可能兩個都啱。但股價既判斷係另一回事。事實你見到中國業績真係受打擊，但一來似乎暫時，二來人地唔止中國業務嘛。三來，股價price in咗幾多先？

================================

Facebook Page：「君子馬蘭頭」ivanlirsesearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。