拜登基建方案買啲乜？梗係買股票．美國銀行股—全數通過壓力測試。但又如何？Nike 業績 — 梗係有影響。但怕乜？CCL 郵輪業績 — 差不多啦（但下一季仲會蝕錢，全年都係） (Patreon)

拜登基建方案買啲乜？梗係買股票

美國銀行股—全數通過壓力測試。但又如何？

Nike 業績 — 梗係有影響。但怕乜？

CCL 郵輪業績 — 差不多啦（但下一季仲會蝕錢，全年都係）

1. 唔好意思，晏咗出，可能呢排都耐唔耐會咁。原因？樓上裝修（搞咗幾個月死唔斷氣）。關乜事？裝修即係佢會9點搞醒我，我就要早啲訓，不能以前咁寫到4/5點先訓。咁盡量夜晚1/2點寫好吧，但要啲時間調整。

拜登基建方案買啲乜？梗係買股票

2. 拜登嘅基建方案，叫做獲得參議院通過。咁當然規模就縮減好多，但都預咗係玩開天殺價預你講價。有乜影響？短期明顯股市當係好消息，你見標指納指都再破頂。「其實唔難」

3. 咁你問有乜股票好買？都唔係冇。最簡單嘅，有隻ETF都幾多人買，就咁叫PAVE，你可以慢慢研究入面有乜。不過而家先買仲得唔得？好過冇咯，升就升咗好多，但未去到痴晒線，況且嗰啲公司應該真係受惠，盈利會好

4. 但最想講嘅係：早早已經炒咗一大輪啦，你投資不能咁後知後覺，炒預期嘛。況且你見，升都唔止升基建股，好多公司都升。當然昨晚普遍舊經濟會好少少

5. 所以幾時都係嗰句咯，你係要買定等佢升，唔係見有利好先買入去嘛。同埋，要買得大，要長坐。

6. 另外，呢個大基建計劃對債息有乜影響？都有啲難講。錢從何來？理論上都係要借多啲。咁但係咪會拉高債息？又不一定。可能個結果係聯儲局印多啲，不能咁快縮表加息。真係難估，但我信加息嘅幅度都唔會大。

7. 最後都補多句，你見昨晚嘅首次申領失業數據係麻麻地嘅。所以啲通脹壓力係咪真係咁大？未必。

美國銀行股全數通過壓力測試。但又如何？

8. 另外講下啲銀行股。弱咗一排，昨晚彈返啲，因為期待收市後嘅「聯儲局壓力測試」。咁當然係冇問題全部通過。過到又點?就可以回購同派息。 但，首先預咗啦。人人都知嘅嘢，唔會令你有額外回報。二來，似乎係未宣佈時炒起，到盤後出咗結果反而冇乜反應。咁如果啲債息長期都唔升，銀行股都係冇乜運行。雖然我都係仲持有JP Morgan嘅。新讀者會唔會問「咁你話銀行股冇運行仲持有」？答案係「如果我錯呢？」。況且，冇運行都可以升，可能升得冇咁多，但或者跌時抗跌都強啲。諗嘢不能咁單方向

9. 其他嗰啲東西，就不一一再講，微軟成功守住佢嘅2萬億市值。Facebook 挑戰1萬億。SPGI Nivdia 愛馬士更加係日日破頂，連Visa都上返嚟。講真，有幾難呢？之前話叫公開我買乜，都公開晒啲美股咁滯。7月畀個full list你（美股咋）

Nike 業績 — 梗係有影響。但怕乜？

10. 拿，爆新疆棉單嘢時已經叫你買（一次，兩次），冇搵你笨啦？然後5月時Adidas出業績勁彈，我都係話不如買Nike．當然我都早早有買。

11. 成個故事嘅幾個投資教訓，我在Facebook快寫咗，你可以去睇。但兩樣最簡單嘅嘢：你個個啲政治分析噴口水，冇落場買冇得驗證嘅，基本上都係廢話。講嗰個拎嚟搵食當然得，但對你投資零幫助。第二：間公司當然係有壞消息嗰時先會抵買，唔通你覺得會無啦啦冇壞消息然後跌20%畀你買？咁你業績後一棍升咗14%先嚟追，分分鐘又摸個短期頂了。不能咁操作的。

12. 至於Nike業績，只能快講，反正好似唔係好多人有買（但留意，仲係落後大市的）。想快睇嘅睇CNBC講亦得。你睇收入123億，街估110億。每股盈利0.93，街估0.51。業績遠遠高過預期。

13. 主要增長依然嚟自北美（唔通南美咩），Digital Sales更加係主力，證明咩封城呀冇得跑步呀影響根本不大。同時都調高埋全年指引。股價唔升就假。

14. 大中華呢？其實唔算太好，你可以話有影響的。你見其他地方嘅增長都顯著改善，大中華就放慢。亦都由最快增長變到最慢。但首先，price in 晒啦。第二，北美市場補得返。第三，咁你所謂杯葛，唔係所有人一隻都唔買嘛，唔好咁非黑即白啦。第四，都係短暫，公司係相當有信心嘅。

15. 不方便嘅真相係，計埋業績呢棍，股價仲係跑輸大市。之前「壞消息」嘛。你問我，估值未去到痴線咁貴。但即係一下升咗14%，你追入去可能又跌返5%，可能又叫救命。但等回調又唔知會唔會。所以根本係應該之前出業績 或者棉花風波時買嘛，又上一課了。

CCL 郵輪業績 — 差不多啦（但下一季仲會蝕錢，全年都係）

16. 呢隻比較多人有，又講下。詳細嘅睇原文，鍾意可以比較下上一季。但簡單嘅睇CNBC都夠（佢地啲業績文寫得不錯）。上次業績我都有寫。環環相扣呀！重要的，睇下公司係咪前言不對後語。

17. 留意「第二季」係3-5月。因為基本上都係未有收入，所以都係睇燒錢速度，同埋展望。

18. 公司繼續引導一個亮麗嘅將來畀大家。咁仲要數都畀埋，照計不能空口講白話，否則坐監的。話booking volume按季升45%，而2022嘅累計預訂仲高過2019—報復性消費咁喎—但上次已講，唔係新消息。另外話11月底前應該有一半capacity喎。

19. 但先講生存問題，早早話你知公司生存唔會有問題，況且早就過咗危險期。當然冇收入的話，都係不停燒錢。第二季（3-5月）蝕20億，同第一季（12-2月）差不多。舊年呢個時間係蝕緊44億，咁當然因為減晒成本了，但照計減無可減，就睇下一季（6-8月）有幾多收入.

20. 93億嘅現金，上季係差不多115億，即係呢一季燒咗22億。咁上次都話上半年一個月燒5.5億，同指引差不多。

21. 公司亦預第三季（6-8月）都會蝕錢，全年都係—正常，頭兩季都蝕40億，第三季都會蝕，話知你第四季識飛全年都應輸錢，但唔代表公司就會唔掂或股價實唔掂。睇前景嘛。

22. 簡單嚟講：完全冇特別，但你見股價就回些少（留意開市前出業績，個股價反映咗業績），應該有啲take profit。照計讀者絶大多數都贏錢，如果之前已經「斬邊留邊」零成本嘅就簡單，繼續坐。如果我有買（但實際上我冇）我就會等多一至至兩季，等個業績好轉（下一季都應該輸錢，但有機會收窄，咁就夠啦），然後一大班人仆入去嗰時先賣。又或者係業績好轉股價都冇反應，都似乎應該賣。「你又話股票只買不賣？」。普通嘅係，但呢啲唔係，由頭到尾都係炒個周期，不能長期持有的，所以唔好聽一半。亦唔多唔少因為咁我冇買。（當然亦因為嗰期冇錢，有閒錢我有時都會玩呢啲，但唔係正餐）

================================

Facebook Page：「君子馬蘭頭」ivanlirsesearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。