繼續Climbing the wall of worry．iBond抽九中九！睇長短息差就知銀行股做乜受壓。通脹同債息的確正相關，但唔同年代情況爭好遠．頭獎投注站附近居民炒股都狼啲。Patreon CEO專訪． (Patreon)

快評幾句—繼續Climbing the wall of worry

大師冇點你—iBond抽九中九！

每日一圖— 睇長短息差就知銀行股做乜受壓。通脹同債息的確正相關，但唔同年代情況爭好遠

Good Read —　頭獎投注站附近居民炒股都狼啲。Patreon CEO專訪

FB Post Summary — 蘋果Last Day

快評幾句—繼續Climbing the wall of worry

1. 就係咁喎，股市嘅嘢，話就話調整成日有，到你等嗰時又唔跌。然後跌又可能跌少少，你又想貪多啲。但真係不停跌你又驚。然後買完又怕摸頂咁。呢啲過程真係令人心煩。所以叫大家stay invested，每個月有錢拎去買，首先係回報上都幾好，亦都比較易執行。

2. 你睇港股嘅，死嚟死去又死唔去咁，實在好似啲麻煩嘅另一半咁，想飛走佢時又忽然變返好啲，十分雞肋。但當然，男女朋友最好唔好幾個，但買股票不怕多心買多幾個市場。

3. 隻安踏去到5000億市值咁滯，真係睇到我懷疑人生，就快大過Adidas。執咗12倍呀！可惜只係萬幾蚊變廿萬，雖然都好勁，去到呢啲位我再零唔零成本都冇所謂。擺明係泡沫的，我都好有衝動去take profit，因為唔信間公司。但暫時唔等錢用。

4. 其他嘅，長和系長實1113長和1都強，算係比較好嘅公司。領展823都新高，但而家點都唔係平，之前大把位任買。

5. 明顯見到科技股跑出，科指升得多過恒指國指。你見啲中資科技股都不錯，心動2400快手1024美團3690京東健康6618平安好醫生1833甚至京東9618都強。大嘅阿里巴巴9988百度9988同騰訊700反而差啲。希望今次真係翻生。短期可能我會諗快手1024

6. 篇幅所限，美股方面就不講太多，反正都唔上唔落。Facebook Microsoft Google都創過新高，但當然唔係以前升得咁快了，下一個里程碑就係Facebook挑戰１萬億市值。DropBox都見過新高，但硬係突破唔到30蚊。留意啲舊經濟股回返些少，但照舊，唔好又換走晒呀。

大師冇點你—iBond抽九中九！

7. 都不再多講，信者恒信，堅持唔抽嘅照計下次都係唔會抽。咁首先固然有啲係概念上嘅錯誤：有啲以為要坐幾年，有啲以為要轉返做股票之類。證明常識都真係唔係人人有，學呀忠實讀者Joe Sun話齋，雖然周圍都免費資訊，但好多人都係唔理的（當然呢度嘅讀者就早早比別人知得多），所以下次真係可以照寫篇Facebook．

8. BTW，銀行抽真係搵笨的。當然銀行戶口絶大多數人都有，方便好多。但而家證券行開戶轉錢之類都方便咗好多，完全唔使現身，所以你見我都開咗富途（非廣告）

9. 但講返實際嘅問題，幾時放，幾錢放？前者嘛，就梗係今日（星期四）即放！你暗盤已一早放咗都冇壞。

10. 幾錢？有點難估。講真真係可以搞到好複雜，你真係學院派嘅，通脹預期高咗，派嘅息應該高咗，future cash flow 大咗，係咪？但你個discount rate又應該高返啲喎！

11. 咁即係點？即係，講真，都係三百蚊同四百蚊嘅分別（我知33%分別！），是但啦！唔好搞到全日籮籮攣。暗盤都係103左右，令人有啲失望，畢竟你見之前普遍都唔止。我估照計有機會上到104？開市可能有班友不問價沽，我估可能下午兩三點賣最好。

12. 而我係抽9中9嘅，即係差不多執3000蚊。都係嗰句，到底有幾多人可以幾分鐘生產到3000蚊而無風險？And you know the beauty？「你可以在公司開會嗰時抽嘛！」。居然有人同我講「機會成本」，但9萬鎖14日執3000，你自己計annualize 即係幾多回報，邊度有咁高回報而冇風險嘅 alternative？

13. 所以講到尾，問題都係因為金額太細。不過呢啲真係好個人。如果你係幾億身家咪有資格講呢句，但我目測嗰啲嫌少錢嘅網友，好似仲窮過我。一開聲叫佢訂我Patreon又話冇錢啦。「唔係畀唔起不過唔值」

每日一圖— 睇長短息差就知銀行股做乜受壓。通脹同債息的確正相關，但唔同年代情況爭好遠

14. 睇長短息差就知銀行股做乜受壓—好多人連債息都唔睇，咁你已經叻過佢地好多。但時間關係，一般我地都只係睇10年長債做一個benchmark．但其實國債由一兩個月到30年都有，成條curve．呢個圖就好好咁畀你見到咩叫做flattening，扁平化。議息後，短息升，長息跌，條曲線咪扁咗。點解會咁？難講，但正路演繹係「覺得短期會通脹會加息但長期都係停滯」。而銀行最怕條線平，因為銀行係借短錢（你啲存款或同業拆措），放長錢（你供層樓幾十年）嘅東西。仲有，好多時扁平嘅yield curve，甚至去到倒掛（短息高過長息），會預示衰退，都幾準，但遲下再講。

15. 通脹同債息的確正相關，但唔同年代情況爭好遠—類似嘅課題，咁一貼做個scatter plot就見到，10年長債債息同通脹率，有一定嘅正相關。但留意正相關唔算好勁，另外，見到係clustering　—同一年嗰堆就聚埋一齊，唔同時代好似啲關係完全唔同咁，十分奇怪。

Good Read —　頭獎投注站附近居民炒股都狼啲。Patreon CEO專訪

16. 頭獎投注站附近居民炒股都狼啲—講真唔係好夠份量，但幾過癮嘅研究。研究台灣。咁睇下啲友邊度中彩票（似乎要開名同地址），然後假設佢地在屋企附近買（算合理嘅？）。然後再睇下附近啲券商分行嘅交易，見到似乎有一定正相關，有人中頭獎，大家就覺得旺地，啲友買得多啲，炒得狼啲，亦都輸得多啲。但當然好多局限，例如上網買就track唔到了

17. Patreon CEO專訪 – 好睇！有點長，但既然呢個creator economy 大家都有份，不妨睇下呀CEO講乜。TLDR嘅，幫你撮要四個重點：首先佢個創業故事夠好聽（個個都會fine tune 下），自己係歌手，upload上YouTube，好多人睇，但佢分得160美金，覺得個世界有問題。第二就係講Patreon唔搞色情（電子雞要轉場？）。第三係唔想搞algorithm，唔會因為你睇王迪詩就推介你睇我。公司短期重點係content experience，「即係搞好個介面」。最後，始終最特別都係個蘋果稅，一路蘋果都放生佢冇抽佢30%，公司堅持冇同蘋果有任何合約。

FB Post Summary — 蘋果Last Day

18. 蘋果Last Day—都冇乜特別，我亦唔係特別鍾意蘋果，當然亦冇特別討厭，而多啲聲音應該都係必要嘅。貼咗其中一篇我見報嘅記錄，可以睇返。另外當年轉工都見咗報，細細個覺得好威，到真係做到咪覺得「咪又係咁」。但要到你做到先後先可以講咯。有錢（唔使極有，但要有啲）咪可以話錢唔重要。

================================

Facebook Page：「君子馬蘭頭」ivanlirsesearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。