［101心法文］有舊錢，唔買驚輸死，買又驚摸頂，點算好？— 最好時機投資係舊年3月，第二好嘅係而家 (Patreon)

時機？每個月出糧嘅，咪有閒錢即買，話知佢市況瘋狂定股災。不停買。

但，如果我係有一舊大錢呢？一下瞓落去摸大頂，點算？我冇得溝貨喎

拎住一舊錢嘅掙扎

實際上你擔心嘅問題係呢幾個

—估值好貴喎

—升咗咁多，仲有幾多升？

—等調整下先買啦

—收水啦喎，會唔會衰退？到時咪股災？

—而家因為低息啫，到加息點算？

接下嚟一一解答

結論（趕時睇睇呢度，但邊有得咁速成？）

1. 呢篇週末專題就勁咯，值得book mark 低。6000字，但我費事分兩半。你可以等得閒先睇，唔趕。我相信長，但易明。

2. 講明先，你大可以去睇Charlie Biello嘅原文（A Guide to Moving from Cash to Investments），但當然加埋好多我嘅演繹。佢同我嘅想法相當相似，佢啲文我都耐唔耐譯。咁你可以話嚟嚟去去都係嗰啲嘢，但始終有實例又唔同。況且，今次同以前嘅文有啲唔同，雖然核心理念都係一樣。

時機？每個月出糧嘅，咪有閒錢即買，話知佢市況瘋狂定股災。不停買。

3. 呢度探討一個好簡單嘅問題，可能都好多讀者遇到。就係時機，幾時買。

4. 點解幾時都有呢個問題？正常，人性係咁，我都會。因為未來係不確定嘅，個個都想未卜先知。買完即升嘅，哎吔早知買多啲，早知做盡孖展買。點解沙士唔買樓呢！做乜10年前唔買騰訊呢！買完即跌嘅，頂，早知等跌先買。個個都想咁。固然有啲可笑，但一買完即插，的確唔好受。

5. 咁點捉時間？你問我我就好簡單，幾時都叫你don’t time the market 「星期一開市咪買」。咁如果一般打工仔之類，真係應該咁做的，有閒錢咪拎去買。不一定係月供同一隻，但總之有錢咪買落去，唔理佢好貴，定係股災。不停買，stay invested。呢部份應該幾簡單。

但，如果我係有一舊大錢呢？一下瞓落去摸大頂，點算？我冇得溝貨喎

6. 咁但，有啲情況係，你可能忽然有舊大錢。可能係賣咗樓，或者屋企人剩畀你，或者中咗六合彩，乜都好。或者係儲咗好多年錢，之前一路擺cash，呢排先睇我啲文。舊錢唔係好等用（等用嘅就唔同玩法），但唔知點好。特別係見到個市升咗好多，驚摸頂

7. 咁的確係會好掙扎嘅，因為，擺明個市升咗好多（雖然可以更多），又擺明股票唔平（美股更貴），而又擺明估值係好重要（如果呢三樣嘢你唔知嘅，要多啲睇文了）。咁我一鑊過買晒路去，好易摸頂喎。點好？不如等下先？但又驚唔知等到幾時，渣現金又會輸死。

8. 必要係會有咁嘅掙扎！咁擔心合唔合理？可以點處理？睇落去！

拎住一舊錢嘅掙扎

9. 我當然知事後埋怨冇用，但都告誡返，你不忘要檢討下，點解你會有舊大錢在手？如果真係中六合彩嘅冇得預計，但如果係一路儲錢呀，或者之前唔敢買嘅，咁你最初已經犯咗錯誤了，點解渣咁多現金？早早叫你stay invested

10. 但講返，如果你而家拎住一舊大錢，你嘅心態應該係以下咁：

—估值好貴喎

—升咗咁多，仲有幾多升？

—等調整下先買啦

—收水啦喎，會唔會衰退？到時咪股災？

—而家因為低息啫，到加息點算？

11. 唔好誤會，以上嘅擔心，全部好合理！你完全冇諗過嘅，反而係你未夠小心。唔知道風險，同知道風險但權衡過都照做，係兩樣嘢。

實際上你擔心嘅問題係呢幾個

12. 我地將以上嘅問題再具體化少少，然後用啲數據睇下，到底答案係乜。當然唔會有清晰嘅答案，投資就係用不確定（同埋時間）去換錢。但，大約睇到以往嘅嘢係點。固然好多煩膠鍾意講：過去嘅嘢唔等於會再發生。但，你有冇好強嘅理由話我知唔會再發生？你做乜會約人下星期食飯？你點知你未死佢又未死？你點知你今晚訓覺唔會長眠不起？你老味股市經歷過無數次衰退蕭條，N咁多次金融風暴，甚至兩次世界大戰，甚至美國史上首次本土遇襲（911）。除非你話我知聽日外星人侵略咯（而應該人類都係會印錢解決）。

具體講，大家（合理地）擔心嘅係以下問題

—渣現金嘅機會成本有幾大？

—等到調整可以更低價買到嘅機會有幾多？

—等到熊市你可以比今日更平價買到嘅機會有幾多？

—如果我有預知能力，知道幾時經濟衰退，幾時完，咁會幫到幾多？

—平均成本法勝過我今日訓身買，機會有幾大？

—用利率水平去估市底同市頂，有幾大幫助？

接下嚟一一解答

—渣現金嘅機會成本有幾大？

13. 唔少計法都會當現金係冇利息（即係放落床下底），而反正過去N年都係好低息。但Charlie Bilello唔係當零，佢用3個月嘅聯儲基金票據（你當類似短債，或者同定期存款差不多）

14. 佢話畀你知，1928年開始，現金嘅回報大約係3.4%一年—遠比你想像中高。但當然你估到因為以前嘅高息年代。近十幾年你見到都差不多係零息。咁當然，你最新見到嘅情況不等於永遠，你以可以估之後又會去到10厘息嘅年代，隨你。但就當係3.4%左右，算公道

15. 我地用返呢個回報，睇下歷年現金回報，跑贏股市（呢度用美股標普500指數，之後都係）嘅機會有幾多？

16. 答案？睇你渣幾耐！正如我以前貼過嘅圖（上面第一個），股票渣得越長，贏面越大。

17. 現金跑贏嘅機會，計一年嘅，有31%，不太差。但你渣兩年嘅，就跌到26%，渣得15年嘅，得7%機會。25年嘅，必定跑輸。

18. 睇完機會，睇埋幅度。另一個方法睇，就係持有若干時段，現金會跑輸幾多？一年嘅，輸8%，好似唔係好多，但計落去就勁。10年嘅，你跑輸155%。25年嘅，你會跑輸1300%—即係買股票升13倍，你渣現金只會升少少—而我仲未計通脹。

—等到調整可以更低價買到嘅機會有幾多？

19. 不過我估去到頭嗰先嗰段最尾嘅嘢，大家唔使我講都明白，應該絶大多數人都知渣現金輸死，只係權宜之計，「等幾好時機」。

20. 等咩「更好時機」？哦，「等調整」。「咁如果一路升呢？」。而我唔知你等調整係幾大嘅調整，以前寫文都寫過，美股由舊年3月升到而家，都冇一個10%嘅調整，你睇下錯失咗幾多？仲有，即使只係等5%調整，對上一次，都係大半年前，舊年10月，選總統之前。

21. 仲有，好多人話等調整，但到真係調整時，扯，過半都唔敢買，甚至十個有九個都唔敢買。證據？你睇2020年3月咪知！大調整！大減價呀，美股一個月跌咗33%。「但嗰時怕疫情好大鑊嘛」。我知，但，即係你認為會冇事冇幹個市會大調整畀你買？人哋做乜要賣股票？

22. 以上種種都講過下，咁畀啲新嘢大家，同埋多啲證據。我就當你真係嚴格執行到等調整買，問題係，等到幾時？同埋會唔會升多幾倍先調整10%？又睇下數據

23. 睇歷史咁耐以嚟，以某一日計，將來股市會低過呢一日嘅機會率，大約係74%—即係有大半機會你可以更平買返。聽落幾好。但你要諗埋個損失：剩返嘅26%機會，你永遠都唔會等到更平，而個市一直升升升，你又錯失咗幾多？

24. Charlie 文中用咗1995年嘅例子，你在1995年2 月等5%回調，就等到1996年7月。冇錯，係回咗5%，但都仲比1995年2月時升多咗25%。你根本就係因小失大。

25. 至於2020年嘅例子我上面講過。2020年3月後你想等10%回調嘅，到而家差不多年半都未等到，而美股差不多升一個開。冇咁大貪想等5%嘅，都要等半年，而亦都係已經升多咗好多。

26. 呢度留意好似有啲矛盾，以前寫過，調整/熊市成日有，美股十年牛市（2009-2019）入面都3次回調20%。「咁做乜又話好難等調整？」。答案係：有時你想佢嚟佢偏唔嚟。同埋，到調整嚟時，股市已經比之前升咗好多，所以兩者冇矛盾。

—等到熊市你可以比今日更平價買到嘅機會有幾多？

27. 呢個問題同上面好相似，但講白啲，直頭要熊市，一般嚟講定義係20%回調。雖然現實上我見好多人係睇新聞見到熊市仲驚，驚驚腳沽晒啲股票。但就當你係一個回調20%就撈底嘅人。咁等到熊市，你可以比今日嘅價買得更平，機會有幾多？

28. 答案係：只得20%機會。即係，即使係熊市，都仲有80%機會你買得貴過之前。股市就係咁嘛，長線必升，新嘅高峰一定高過之前，而新嘅底往往都高過舊嘅頂。

29. Charlie用咗2009嘅例子，見到股市見底後，當然個個都驚海嘯第N波，個個都想等回調20%先買？結果？股市一騎絶塵。連升7個月，打後10個月有9個月升，你根本冇機會買。

30. 而家嘅情況一樣，就算跌兩成，都只係返返舊年年中嘅水平！事實上即使而家股市跌一半（海嘯級！），都仲係比2009年時升咗140%！

31. 教訓好明顥，等調整可能等好耐，而調整完嘅價好可能仲貴過你今日買。

—平均成本法勝過我今日訓身買，機會有幾大？

32. 呢部份其實都係我叫讀者做嘅嘢，當你有舊大錢，當然要stay invested，但的確即時訓晒身係比較大風險，因為股市估值貴。

33. 咁可以點？雖然係要stay invested，但你真係可以將啲錢分段咁放入去股票。例如你用120萬，咁可能分兩年，每個月5萬咁買落去？固然冇兩頭利，分得太長就錯失機會，但分得太短又可能摸頂。自己拎個中庸之道

34. 然後畀數字你睇，Charlie嘅計，係假設你分開12個月買。咁同你一次過買落去，分別有幾大？

35. 答案係，只得32%機會，你分散12個月買，會好過一開頭訓落去。

36. 然後佢更加答你，拉長啲，例如拉到36個月，機會更低，只得27%。

37. 仲要留意，個分佈都幾唔平均，呢度呢27%（分開36個月買好過一炮過），上次發生係2008-2011，由2008年尾開始，一炮過一定好過分開36個月

38. 但可能聰明嘅讀者估到問題在邊：咁，因為過去十幾年美股都長升嘛。所以只供參考。

—應唔應該去睇個估值去估市底同市頂？勝算有幾高？

39. 無論用任何方法量度，美股都係相當貴。一個月前嘅舊文提過CAPE嘅概念（cyclically adjusted PE，又，呢篇舊文都講美股好貴，可以去睇）。而家美股嘅CAPE係37倍，比98%嘅時間都貴。都真係驚驚地，所以成日叫你地唔好咁進取。但買當然繼續買，只係唔好借錢。

40. 呢個圖舊文貼過（拿，環環相扣呀！），明顯地呢，估值高時買入去，回報係冇估值低咁好嘅。

41. 咁不如試下捉估值？睇CAPE，平嗰時買，高嗰時沽，睇下會點？理論上應該可行。正如你可以睇CNN Greed and Fear Index，人人好驚時買，人人好貪嗰時沽。咁咪得！

42. 理論上可行？但實際上呢？首先唔好講，好多人都執行唔到，人人恐懼時你打靶。我就當你執行到，咁以上呢啲方法，賺唔賺到錢？

43. 答案係：當然賺到，「因為股票長遠係升嘅」，只不過一般都係仲差過你就咁Buy and Hold

44. 呢度用嘅例子，假設我地在CAPE在史上10%最貴嗰時沽貨，到個估值唔再係最貴嗰10%時買返，咁會點？

45. 答案？一年回報8.8%，都唔太差。「不過標普指數平均一年回報9.6%」，記住，拉開十幾廿年就爭好遠。

46. 可以順手解埋點解會有咁嘅現象。因為嗰句：The market can stay irrational longer than you can stay solvent．人性嚟的，往往係去到最貴嗰時，先升得最癲，煙花爆晒之前最勁，泡沫爆之前嗰一浸升得最多，升到你唔信。太早落車一樣出事。反之亦然，啲友悲觀起上嚟，真係覺得從此世界就玩完。人就係咁嘅動物

47. 況且，仲有個盲點，就係近N年股市估值係屢創新高嘅。你用當時你有嘅數字，可能以為20倍（舉例）已經係最貴10%，但唔知之後咁多年都可以再貴啲，到你N年後睇，20倍就唔係10%。有啲難表達，但你可以諗下運動運目咁，以前跑步游水拎金牌嘅成績，而家可能決賽都入唔到。

48. 史上例子有好多，不一一細講，例如1990年美股估值已經去到當時資料嘅頂10%—然後再升咗3倍，當然之後所謂回調後，股市都仲係高過1990年嘅水平好多。

49. 唔用10%？你可以自己慢慢玩，但一般都好難跑贏大市。我都已經冇講你要好似計安全期咁日日望，人都癲（sorry for bad taste，但即時諗到呢個類比）

50. 當然，唔係話估值唔重要，只係太難捉。至於估值貴時（即係而家！）可以點應對，舊文寫過。拿，環環相扣呀！

—如果我有預知能力，知道幾時經濟衰退，幾時完，咁會幫到幾多？

經濟可能衰退喎，點算？

51. 又問？呢度嘅讀者應該知道答案，「股市同實體經濟係兩回事」。仲有，剛剛咪衰退完咯，唔係話唔會咁快又衰退（雖然都應該唔會咁快）。而係，上一次衰退（2020年），咪正係買股票好時機！邊個話你知衰退要沽貨？

52. 呢度嘅圖見到熊市（跌20%）同經濟衰退嘅關係。兩者唔係同一回事，熊市係多過衰退好多的，好多市熊市並冇衰退伴隨，而有衰退就多數實有熊市，明冇？而的確見到，有經濟衰退一齊嘅熊市，就跌得比冇嘅「普通」熊市多。

53. （離題少少講：Charlie舉嘅例子，1945，1953，1960，1980嘅經濟衰退，都冇熊市。但你大約見到情況：呢啲都係比較遠嘅年代，近幾十年經濟衰退（其實都只有4次），都係有熊市。點解？佢冇解，我相信係因為社會高度金融化，以前資訊亦流通得冇咁快）

54. 好啦，如果我咁神奇，知道幾時衰退幾時完結，衰退時渣CASH，擴張時買股票，咁咪掂？發過豬頭？

55. 如果計晒歷史數字，都係幾發，呢個神奇策略，一年回報10.5%，buy and hold 只得9.6%，咁大家都知，積埋好多年就好大分別。

56. 不過，以上嘅超額回報，差不多全部嚟自你避開1930年代嘅大蕭條。當時股市跌咗86%。打後？我就當你全部知道幾時衰退幾時擴張，一樣跑輸大市！神奇策略只得10.4%回報，而buy and hold有11.5%！

57. 而實際上呢，邊會有人可以有咁嘅超能力？雖然，有都冇乜用。

58. 原因當然係頭先講嘅，股市同實體經濟係兩回事。仲有，有時股票可以忽然無啦啦跌，你以為衰退，原來冇（例如經典嘅2018，但當時好多人都以為經濟衰退）。仲有，有時有衰退，又有熊市，但只係極短—例如2020年。

—用利率水平去估市底同市頂，有幾大幫助？

59. 最後，大家都知而家低息環境。有幾低？10年美債債息雖然彈返唔少，但只係1.6%左右—歷史上有98%時間都冇咁低。

60. 咁好多人都相信，唔多唔少係呢個低息環境造就咗升市。咁到加息咪大鑊？係咪？答案似乎唔係

61. 正如我早兩日貼過嘅圖都話你知，美股幾時見頂？係加息尾段，減息之前！而唔係加息之後會跌。原因？都講過，股市炒前景，而聯儲局加減息往往都係睇前景。到差不多減息之前，當然係大家估到衰退了。

62. Charlie嘅文有提到，你可以睇返史上兩者，關係並唔強。無論10年債息升嘅年份，定係跌嘅年份，回報都係差不多。

63. 咁係咪債息可以不理？當然唔係，但只係並不能咁簡單去睇，你仲要睇埋市盈率之類。用美股PE同10年債息比較去量度有幾貴，個 earnings yield gap model仲係不錯的。舊文寫過。（拿，環環相扣呀！）

結論

64. 現金坐一年，你有30%機會跑贏大市。坐十年，16%跑贏。坐25年，必輸。我仲要未計通脹

65. 現金跑輸股票嘅幅度呢？1 年輸8%，但25年你跑輸1300%。人地啲嘢升13倍，你原地踏步咁滯。

66. 等個格低過而家？都有74%機會等到。雖然好多人到股災又唔敢買。但我當你執行到，問題在邊？問題係嗰26%嘅情況，啲股票升到絶塵，永遠都唔會返去你原本嘅位。而可能係升咗10倍，100倍。

67. 但，你要等5%/10%就難好多。美股舊年3月見底到而家都冇跌過10%，而指數差不多升咗一個開

68. 如果等熊市呢？等20%先買呢？一樣，好多人到時又唔敢買。但當你敢都好，都只有21%機會個價會平過你今日買—股票可以升多3倍之後先跌 20%

69. 平均成本法呢？原來分別不大，甚至係會令你回報低過一炮過即時放入去。但當然呢個因為美股長升長有啦。

70. 用估值去出出入入又如何？估值平時買，估值貴嗰時沽，賺唔賺到錢？當然賺到！因為股票長遠係升的，不過你係跑輸Buy and hold 之嘛！

71. 同樣地，即使你有超能力，知道經濟幾時衰退幾時結束。咁我衰退之前沽貨，擴張嗰時先買股票，咪得咯！答案？一樣會係跑輸大市。點解？因為有時衰退並冇熊市，亦有時唔使衰退都有熊市。而講到尾，股市同實體經濟係兩回事！亦都有時有衰退，有熊市，但只係好短時間（例如2020年）

72. 最後，加息係咪一定震散股市？冇咁簡單。睇數字都見到，美股幾時見頂？係加息嘅尾段，同埋減息之前。點解？因為股票炒前景，減息之前，多數大家都聞到經濟差嘅味道。

================================

Facebook Page：「君子馬蘭頭」ivanlirsesearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。