ivanliresearch

又話加息震散股市？冇事喎。微軟就快2萬億市值！愛馬士新高。舊年開車好危險。學位溢價見頂？全世界四大社交平台都係Facebook嘅。Network Effect嘅進化，Do You Know What Kills More Dreams Than Failure？Creator Economy 反擊蘋果稅 (Patreon)

Published:

2021-06-21 21:53:12

Edited:

2021-06-21 23:41:14

Imported:

2021-07

Content

快評幾句—又話加息震散股市？冇事喎

大師冇點你—微軟就快2萬億市值！愛馬士新高。

每日一圖— 舊年開車好危險。學位溢價見頂？全世界四大社交平台都係Facebook嘅

Good Read — Network Effect嘅進化，Do You Know What Kills More Dreams Than Failure？Creator Economy 反擊蘋果稅

FB Post Summary — 從缺

1. 週末寫咗篇大作，六千字，理論上可以當兩篇。務必要睇。答咗一個好多人問嘅問題：如果我有舊大錢（例如忽然中六合彩，或者儲咗好耐之前冇投資），咁而家應該點算？明顯股市升咗好多，又相當貴，咁我會唔會一買入去就摸頂？應唔應該等回調？但又驚一路都唔調喎，又明知現金實會跑輸。以上種種問題，篇文都有答你，用咗唔少數據去話你知歷史上係點。固然唔一定簡單重覆，但都好值得參考。例如到底等調整等到嘅機會有幾大？等嘅過程會跑輸幾多？

2. 至於如果唔係有舊大錢（無論係之前冇錢，定一早100% invested）嘅，就比較簡單，例如每個月出糧嘅，有剩錢咪買落去優質股（當然點先優質有時唔係咁易事先知），只買不沽，跌又買升又買，十年八載應該有不錯效果。

3. 另外最後再賣下廣告，之前如果Sign up咗Mox但未完成簽帳要求嘅，唔使擔心。雖然個推廣期過咗，但只要之前Sign up咗嘅，未來廿幾日完成返個簽帳要求，都係會計返獎勵畀你同我的，有圖為證。

快評幾句—又話加息震散股市？冇事喎

4. See？玩死未？星期五講到美股股災（道指跌超過500點），星期一亞洲時段你見日經一度跌超過1000點—超過3%，都幾係嘢，道指先係1.5%唔夠。但道指星期一話咁快就完全收復失地。

5. 詳情可以睇返上星期五嘅快評，但近期啲走勢的確古怪。例如你見星期五，話就話咩驚通脹驚股災，但我懷疑根本係另一樣嘢。你見星期五債息仲要跌，而股票跌得最多係舊經濟股，新經濟反而企得幾硬，好可能係之前炒通脹嘅reflation trade急回，當然亦因為可能係四巫日嘅波動。

6. 掉轉，到星期一晚呢？又完全唔同，債息升返些少喎，咁升得最多係道指，反而納指就冇升得咁多。

7. 短期睇，唔覺得通脹導致加息縮表呢樣嘢會係大風險，除非呢幾個月出啲通脹數據仲係好誇張。否則好可能等到9月嘅議息會議先再有多啲人關注。（7月都有議息，但9月嗰次先又出點陣圖經濟預測之類。

8. 港股方面，相對係企得較硬，跌400點不夠，仲要好多係匯控（5）拖累嘅。點解匯控弱？應該同債息居然唔升仲要跌有關吧，仲有各大銀行都預告定第二季啲trading income 冇第一季咁勁。你見美股都係咁，之前花旗連跌11日！都幾誇張，雖然係每日陰啲。不過啦喎，美國啲銀行股（包括花旗）星期一晚已反彈，跟債息嘛。

大師冇點你—微軟就快2萬億市值！愛馬士新高。

9. 呢隻都耐唔耐講下，上次業績幾靚仔，但好似幾間Big Tech都係，出完亮麗嘅業績就潛水。然後呢排先慢慢升返上嚟，早前Google Facebook 都創咗新高，而家到微軟。留意差不多2萬億市值了，升多2.5%就得，今次應該有機會啦啩。似乎係史上第二間公司可以達到呢個市值（第一間係蘋果），到時又會多啲人關注。留意，之前都唔少機會畀你買的。

10. 至於愛馬士嘛，同歐洲股市一樣，今年升極都有。第N次新高，慎防讀者唔知，大約係4月中時推。你見當時新高我都係照買的，而家兩個月升20%，相當不錯

每日一圖— 舊年開車好危險。學位溢價見頂？全世界四大社交平台都係Facebook嘅

11. 舊年開車好危險—當然唔止開車，做乘客做行人都可能係。記得2020年初爆疫時，有個講法話啲友完全冇得出街，分分鐘少咗機會撞車之類，可能死亡人數不升反跌。後來見到嘅數字就係樓上呢個圖。以每1億里嘅死亡人數嚟計，咁多年都係跌嘅，偏偏係舊年有都幾明顯嘅反彈。點解？好可能因為啲友見冇乜車咪開快啲，又或者疫情下太抑鬱要開快車發泄下。不過留意，呢個係每1億里嘅死亡人數，咁照計舊年總里數都係低咗一截嘅。所以應該都係少咗人死。

12. 學位溢價見頂？— 美國嘅例子，幾有趣嘅圖。讀大學有冇用？唔知。但如果講人工，就應該幾明顯高過冇讀大學嘅人。得意嘅係，在美國呢個溢價係一路升嘅—似乎香港唔係咁，莫非美國並冇多咗好多大學生（呢個必然係減低溢價的），80年代已經好多？可能係。另外亦係工種變化，而家極多工作都要你有大學學位，冇學位嘅，只能搵到比以前更差嘅工。當然仲有留意，女大學生嘅溢價（相對於冇大學嘅女仔）係高過男性嘅，可能同較少女仔有學位有關？或者正如頭先講，冇大學學歷嘅女仔，搵到嘅工作絶大多數都唔會點好pay．好得閒嘅可以睇成個報告，好長，唔止講男女之別，仲有好多嘢。

13. 全世界四大社交平台都係Facebook嘅—應該大家都知，但畫出嚟真係好震憾。頭四個（Facebook自己，Facebook Messenger，Instagram，Whatsapp）都係Facebook嘅，公司點會唔值錢？打後嗰啲都仲爭好遠。甚麼MeWe之類更加不入流。

Good Read — Network Effect嘅進化，Do You Know What Kills More Dreams Than Failure？Creator Economy 反擊蘋果稅

14. Network Effect嘅進化—寫得幾好嘅文，不過留意私募基金Andreessen Horowitz自己投資好多平台（特別係Creator economy），可能賣花讚花香。咁Network Effect應該大家都大約知，就係有唔少平台，越多人用就越強，仲係指數級咁上升，會係天然護城河，新入場嘅好難爭。除咗我成日講嘅Facebook，仲有例如交友網站，或者call車app，都係咁原理。交友嘅，越多女仔咪吸到越多男仔，又同樣吸返更多女仔。Call車一樣，多客咪多司機，又會吸到多客。咁但，呢篇再講深入啲，例如之後會係一路升定衰亡？都仲有不同情況，如果你嘅產品或服務係冇「差異性」，就好危險，例如UBER咁。所以公司先要搞送外賣，雖然都好快畀人抄。咁另一樣，當然就係離開平台嘅成本，而Facebook係將呢樣嘢整到好大的。啲KOL呀，公司呀，經營咗個 Page咁多年，儲咁多人，用咗咁多錢，點會輕易放棄？

15. Do You Know What Kills More Dreams Than Failure？—呢啲勵志雞湯文唔似我作風，不過一飲無妨。有乜嘢畀失敗殺死更多夢想？你可能會答「放棄」，但篇文講係「恐懼」。兩者有啲關係，但未必一樣嘢。篇文教你，真係唔好怕衰。例子可能你都聽過，J. K. Rowling出Harry Potter，畀人拒絶咗12次，第13次先成功。當然佢冇話你知更多更多人係寄極都畀reject。另外亦有講有位仁兄周圍去玩挑戰，例如叫人幫佢漢堡包refill（好似咖啡添飲咁），又或者叫人地整個奧運五環型嘅Doughnut．但又居然有人理佢，而家仲可以出嚟分享經驗

16. Creator Economy 反擊蘋果稅—近期蘋果稅真係熱門話題，當然一切由Epic開始。最新加入群毆嘅係一眾Creator Economy相關嘅平台投資者，或者係Content Creator（不過留意好多文都係Andreessen Horowitz寫，而佢地投資好多平台）。十分簡單，理論上你任何in app畀錢，蘋果都要抽你三成。但，十分奇怪地，Patreon係一個例外，一路都放過佢。