ivanliresearch

聯儲局2022加息美股跌500點，係咩？大新2356 440賣盤？國泰293太古19盈警？安踏2020，領展823，醫渡2158。聯儲局議息日美股升定跌？視乎邊個主席。從來加息都唔會震散美股。Big Tech 踩入Creator Economy．投資嘅最強超級必殺技 (Patreon)

Published:

2021-06-18 20:15:21

Edited:

2021-06-19 02:41:06

Imported:

2021-07

Content

快評幾句— 聯儲局2022加息美股跌500點，係咩？

大師冇點你—大新2356 440賣盤？國泰293太古19盈警？安踏2020大過Adidas，領展823破位，醫渡2158 3個月新高

每日一圖— 聯儲局議息日美股升定跌？視乎邊個主席。從來加息都唔會震散美股

Good Read — Big Tech 踩入Creator Economy．投資嘅最強超級必殺技

FB Post Summary — 小時候，鄉愁是一枚小小的郵票，我在凹頭，母親在包頭

1. 馬不停蹄，今日兩個每日一圖都同美國聯儲局議息有關，仲要兩篇Good Read都好好睇

快評幾句— 聯儲局2022加息美股跌500點，係咩？

2. 你睇報導，的確好似係咁。明明話2023做乜又變咗2022？因為聯儲局好多人，呢位仁兄甚至而家係冇投票權嘅。咁以前都試過有啲官員講啲同「大圍」唔同嘅野，一向局方都容許嘅，係咪特登放風試水溫就唔知。

3. 另一方面，喂，500點好多咩？又係嗰句，1%多啲咋喎。

4. 況且，你睇納指相對強勢，一堆科技股仲要有得升（Nvidia破埋頂），唔係咩驚通脹恐慌拋售咯。我覺得係掉轉，殺咗啲reflation trade（通脹重臨受惠股，好多係舊經濟），可能係啲Profit taking，又或者跌幾百點根本唔使理由，一直都話估值相當貴，搵個藉口跌啫。我驚都冇驚過

5. 亦都有話，根本6月中下旬，傳統都係股市弱嘅。呢個好似冇乜科學跟據，但實行起上嚟都幾準，我都貼過幾次。

6. 最後睇下，你見10年美債債息，直頭跌到1.46%（差不多去到今個月低位），早兩日先話1.50%升到1.60%，兩日多啲就嘔突。咁正路地呢個低嘅債息，係有利股市估值的，可能因為咁科技股強。

7. 但同樣哋，美匯指數又強喎。咁即係點？估值始終係應該睇美債，唔係美匯，咁美匯指數主要代表投資者嘅風險胃納，而家咪見到縮咗—但照計只係短期。

大師冇點你—大新2356 440，國泰293太古19，安踏2020，領展823，醫渡2158

8. 港股強過美股，咁又講下。不過篇幅所限講幾句，況且有啲我都冇深入研究。

9. 大新2356（阿媽）同440（仔）急升，當然又係估賣盤或私有化，唔知係咪有風聲漏。上次創興（1111）私有化之前都係有異動。2356 兩千萬股成交，兩億港紙喎！平時？一日百幾萬股，千萬港紙左右咋！

10. 又，創興賣盤呢，0.9倍book。用同樣估值嘅，2356至少18蚊（而家9.74），440就80蚊左右（而家29！）。順手講埋，創興個0.9倍，應用落2356度合理啲，440冇乜可能會去到0.9倍，阿媽同仔仲有各樣holding company discount 嘅問題。而你見盤古初開以嚟，2356估值都係貴過440

11. 問會郁邊隻？唔知，任佢玩，你真係搏嘅最好兩隻買晒。但，個故事講咗N年啦，由我入行等到而家，至少2006年到而家都仲未賣到。永遠等待，永遠嘅等待。

12. 安踏嘛，不多講，昨日講咗，出盈喜嘛。神神地，市值就快大過Adidas．留意我係十幾蚊渣上嚟嘅，但，「完全冇止蝕止賺」，甚至冇斬邊留邊。而家升咗超過十倍，我收唔收得返個成本我都唔care．正面教訓係，股票用嚟坐。負面教訓係：買咁細升十倍都冇乜用（雖然十幾萬都夠我打好多次邊爐）

13. 領展，都係昨日講咗，業績。講真，你著眼於傳媒報，著眼於舊年續租租金跌，或者派息只係升2%，就捉錯用神。股票炒前景嘛！個租明顯見晒底，而仲要咁啱美債債息跌返，領展再升好合理。當然傳媒唔應該成為唱好股價嘅打手，但大家記住，投資係主觀嘢，新聞係（應該）客觀。投資唔主觀，就唔使有交易所，人人睇嗰個圖嗰本年報，都應該係覺得值同一個價。（金句呀，塞錢入你袋）

14. 國泰太古又點？國泰嘅，「好似叫盈警」，但其實係盈喜。今年上半年都預蝕錢（預咗啦），但少過舊年下半年，又少過舊年上半年。爽。

15. 太古嘅，受惠於國泰，原本話上半年會有經常性虧損（未計一次性項目），而家話唔會。仲唔係盈喜？

16. 咁所以，冇話盈喜一定係壞消息，但亦冇話好消息一定要升，升亦不代表你應該買。三樣唔同嘅事。

17. 我睇，個值搏率就相當低。固然大家知炒前景，開返關，去返旅行。但，反映咗唔少啦。點計？畀個參考你。睇返疫情前嘅股價！你睇國泰疫情前，都試過低見8.48，而家返上去，都只係兩成多啲。唔太吸引（當然係主觀）

18. 太古呢？仲衰，疫情前見過68.4，而家上返去，只係一成多啲。當然疫情前有社運，對太古影響又大過國泰好多。

19. 結論？兩隻都唔買

20. 最後，真係嘅「大師冇點你」。介紹返，之前講港股通炒隻醫渡科技，升到3個月新高了。有交代啦。另一隻心通2160冇升咁多，但至少唔使輸錢。不過呢啲都只係滿足下心理，同埋畀你知本人都識短線嘢，實際都係優質股長渣最簡單無敵。

每日一圖— 聯儲局議息日美股升定跌？視乎邊個主席。從來加息都唔會震散美股

21. 既然都係講開議息，今日兩個圖都仲同議息有關

22. 聯儲局議息日美股升定跌？視乎邊個主席。—呢個圖夠晒正，畀你睇到唔同主席所有議息日美股走勢，咁你發現平均係升，好合理，因為股票多數都係升嘅。畀埋議息聲明前後畀你睇（一般美東時間2點半出，股市開緊的）。但最有趣見到伯南克（上手再上手）年代升得最勁，鮑威爾（現任）年代最差。點解？係咪伯南克做得好鮑威爾做得差？梗係唔係。留意下股市嘅估值咯。

23. 從來加息都唔會震散美股—其實都唔使貼出嚟，你大約都記得。但貼埋更好。你話加息驚唔驚？從來唔驚。你睇之前兩次美股見頂係幾時？絶對係加息嘅尾段，減息之前。原因都好簡單，股市炒預期，聯儲局減得息，多數之後都比較大件事。

Good Read — Big Tech 踩入Creator Economy．投資嘅最強超級必殺技

24. Big Tech 踩入Creator Economy— Creator Economy 真係成為buzz word，但香港啲慢人十拍嘅KOL或HR都仲未講。甚麼來的？你訂嘅Patreon咪已經係，我係Creator，你訂嘢，繞過咗Big Tech．其他仲有早排熱過嘅ClubHouse，Newsletter嘅Substack（我成日提），女仔（主要係女）賣相嘅 OnlyFans，名人祝你生日快樂嘅Cameo（本質上同淘寶啲非洲小朋友祝你生日快樂差不多）。Big Tech之前一路都追逐廣告收入，亦實在太好賺，所以留低呢個空白位畀啲細公司上位。而家就開始反攻了。最簡單？當然係買起，或者自己複製一個，不過留意Creator Economy冇乜邊間上市的。BTW，一路都有個不解之謎，就係Patreon係走甩咗蘋果嘅30%稅的，而蘋果當然都知道（因為有其他人魚蛋論：點解我要畀但佢唔使），但蘋果照舊放生佢，原因？唔知。你可以想像下。

25. 投資嘅最強超級必殺技 —又係Charlie Bilello嘅好文，你可以睇咗先，我應該唔會週末專題寫，因為呢篇太短。但可能Facebook Page寫。唔賣關子，咁到底必殺技係乜？你可能估到，就係take pain，捱價。在佢舊文Price of Admission都寫過類似嘅嘢，我亦寫咗兩篇去解（上集，下集），新手讀者記住睇。今篇佢用返幾個例子：你事後個個梗係話買蘋果買NetFlix買Amazon啦，但，當年幾間公司一樣畀人質疑，一樣都高位狂跌。蘋果2018年一季跌三成，Amazon科網跌九成幾之後再升幾千倍，我成日講。但NetFlix仲勁，有兩次75%嘅調整！點止蝕？你事後而家當然話「一早知公司掂」，但當時必定嚇到賴屎。都話啲股票跌5%已經有人問乜事。