繼續講聯儲局。不過少字，多圖．領展823 業績（有Excel）．維他奶345業績（有Excel）．安踏2020盈喜．金源677 盈喜update (Patreon)

繼續講聯儲局。不過少字，多圖

領展823 業績 — 都真係冇乜特別，不過我入咗好耐data （有Excel）

維他奶345業績—差呀，但仲係比皇馬巴塞更搵錢！（有Excel）

安踏2020盈喜 — 50倍市盈率之嘛，好貴咩？

金源677 盈喜update，冇乜特別

1. 跟進下先，Mox個referral應該剛完咗，但照計有啲讀者開咗戶口。咁要完成埋消費100先你同我都收到錢的。之後再有好嘢再益大家。

繼續講聯儲局。不過少字，多圖

2. 作為聯儲局主席鮑威爾生涯暫時最重要嘅一次議息會議，講多少少都重要。初步分析昨日已經講咗，今日貼圖為主，會冇頭冇尾。然後你睇報紙要今日（星期五）朝早先出分析，專欄可能再遲一日，真係死得。

3. 我Buy嘅係以上兩個評論，我認為聯儲局做得幾好，又回應咗啲驚通脹嘅人嘅期望，但個加息放到鬼咁遠，實情同冇講過冇乜分別，之後反口都仲得。四兩撥千斤就化解咗。

4. 值得留意嘅係，雖然通脹壓力好似大，但呢個唔係唯一要睇嘅嘢。你可以留意到，之前美國出嘅retail sales係低過預期。最新（星期四晚）嘅首次申領失業救濟數字又高過預期（41.2萬，街估預36萬）

5. 仲有，失業率唔算回得好快，甚至似乎開始冇力

6. 夾埋即係見到，唔似係經濟過熱。咁咩加人工搶人嘅情況，未必會維持好耐。

7. 咁你話，「仲衰，滯脹！」。但，邊個話經濟差股市冇得升？經濟冇力嘅，聯儲局邊使加息？況且而家都只係吹到2023年，大把時間慢慢睇慢慢tune

8. 之後送多幾張圖畀你，費事放去聽日每日一圖咁遲了

9. 留意可以將個點陣圖咁樣放，會更清楚，但當然我冇時間整

10. 彭博呢個可能仲好，留意下點睇。佢係將近幾次點陣圖2022嗰部份抽出嚟再整個圖，睇個進化史。2023亦都係。但同上，我冇咁多時間整。

11. 呢個圖就畀你睇到最新經濟預測點變咯

12. Lastly，雖然星期三晚嘅5年美債債息升幅，在史上都名列前茅

13. 但你見，10年美債債息，昨日咪話1.50%升到1.60%？今日差不多打回原型。呢個對股市絶對係好事，所以你見科技股近排都幾強，見唔見隻Nvidia升極都有？

14. 最後都留意返，近排嘅美匯就幾強，呢個就對股市唔係好事。

15. 講到尾即係點？似乎都係同議息前嘅悶局差不多．但我覺得Big Tech真係值得買。

領展823 業績 — 都真係冇乜特別，不過我入咗好耐data （有Excel）

16. 都真係冇乜特別，但反正冇咁忙，順手入埋啲data，你可以download嚟玩。可以了解間公司多啲。照舊，睇最近4個半年。

17. 乜都唔想理嘅，只睇收入得了。見到收入相當平穩，甚至係有得升，最近半年係近4次半年最高。減租？減乜租？小小就有，但照計嚟緊啲收入冇得點跌。

18. 但你見個「分派前溢利」呢，上落好大。最近4次半年，賺，大蝕，小蝕，賺（希望明我講乜）。之前仲出盈警添。原因？因為啲物業公平值變動。

19. 但留意領展作為一隻房託（REIT），派息唔係睇呢個「分派前溢利」。物業公平值變動之類嘅non cash 嘢唔會計落去，所以你見下面會有個東西將個「分派前溢利」較返正做「可分派總額」，係房託獨有嘅東西，亦係我貼出嚟等大家知多啲嘢嘅原因。

20. 咁你睇個「可分派總額」，就4次半年都差不多，咪話咗啲上落因為物業公平值變動。實際啲租金收入同開支冇乜變。然後，你個派息咪都係冇乜變。

21. 咁，其實都講完，之後嘅派息點都唔會差過之前。一年0.29穩陣，分分鐘有得加（但唔係好快咁上）。現價嘛，股價在高位，3.8%股息，股息仲有機會上，我覺得還好。你見中午出業績，反應都唔大。

22. 最大風險係乜？反而係美債。如果你美債好快抽到上3%甚至4%嘅，咁領展咪唔及引咯。繼續1.5%甚至2%嘅，就好啲。整體？都係普通，但我有持有的。

23. 最後，入面仲有好多其他古靈精怪嘢的，慢慢玩。

維他奶345業績—差呀，但仲係比皇馬巴塞更搵錢！（有Excel）

24. 留意係中午出業績，咁你睇到股價反應，一出完即大插，但之後低位彈返。Attachment 有Excel呀下

25. 講返個嘩眾取寵嘅題，唔知幾時開始講親歐洲球會收入，我都會拎維他奶嚟比。咁你睇到，最高收入嘅球會，一年先66億港紙，疫情前亦唔會過80億。而維他奶一年係做75億生意嘅。呢個當然係收入，然後你話盈利？球會有盈利架咩？

26. 好多人唔知，我幫你show埋出嚟，維他奶大陸嘅收入，早就遠遠超過香港，而家佔成間公司60-70%。

27. 不過睇真啲，維他奶條數實在幾唔掂，雖然我唔知係咪分析員一早知。留意3月年結。

28. 照舊，同上次大家樂一樣，我地睇最近嘅4次半年。見到大家樂最近半年業績大反彈，但維他奶就轉差，當然行業唔同地區都唔同。

29. 先睇收入，19年10月至20年3月嗰半年大跌，好合理，疫情嘛。去到20年4-9月大反彈，諗住掂啦。點知之後嗰半年（20年10月至21年3月）又跌返。最奇怪係大陸嗰度收入大跌，未研究到咩事，可能因為學校停課？你睇毛利嘅情況都差不多。

30. 然後睇個純利，留意下最近半年（20年10月至21年3月）係蝕錢嘅。仲要係拎埋補貼都仲要蝕。留意佢啲補貼唔止香港，大陸都有。另外，唔係全部去晒「其他收入」，有部份直接在員工成本（出糧）扣咗。咁我已話列埋每個半季有幾多補貼了。

31. 不過息呢，都仲係派到嘅。現金情況亦都極強勁，8.4億net cash 的。

32. 整體？股價都係在近期低位，但唔見得好平。10年前5蚊升上嚟的，一度去到成50蚊，諗下預支咗幾多增長？然後最近5年公司嘅利潤，都只係原地踏步。

安踏2020盈喜

33. 呢隻更加係犀飛利，以前我都貼過，我係有持股的，10倍股！但，買得嗰一手，萬幾變16萬又如何（雖然都相當不錯）。

34. 講到尾，隻嘢我係唔信嘅！信就唔只買咁少啦。但真係同我獨特嘅「唔信就要買」哲學相符。而係我係最初信信地，後來唔信，但股價升到我唔信，咁我就有得佢飛，唔會走去「止賺」。

35. 最新搞作？出盈喜。真係唔知真定假，但被踢爆之前都只能相信係真。舊年中期嘅，如果包埋合營公司輸錢，佢就賺16.6億，唔包嘅，就賺23.8億。今年半年呢？計包埋合營輸錢，就賺34.9億，唔包嘅，就賺39.3億。

36. 留意，收市後先出的，股價應該未反映。計邊個數？隨你，拎個中間，當37.1億人仔，即係44.5億港紙，全年就89億港紙，都堅。你望下4500億市值，即係51倍盈率…….未係去到荒謬嘅，但真係買唔落手。

金源677 盈喜update

37. 都幾奇怪，但無論如何，隻金源米業677出完盈喜兩日後又再補充。留意收市後先出的。

38. 上次嘅盈喜，已經寫咗一段，不再重覆。簡單嚟講只係因為啲金融投資嘅公平值起跌。留意公司3月年結，咁舊年（19年4月至20年3月）當然跌得勁，但今年（20年4月至2021年3月）就兩個世界，冇乜特別。

39. 今次補充嘅，兩樣嘢。第一係全年純利3000萬—但，鬼咩，上半年（20年4月至9月）已經賺3000萬，即係下半年（20年10月至21年3月）差不多完全冇錢賺。唔係好消息咯

40. 另外，公司話埋你知，因為疫情，越南Circle K蝕多咗（之前都係蝕錢），直頭做埋減值，成4000萬。咁即係，唔計呢4000萬，下半年差不多就賺4000萬喎（因為計埋應該差不多打平）

41. 整體嚟講，當然唔係好消息，唔好以為盈喜一定好消息。不過，似乎公司又係玩kitchen sinking，衰嘢一鑊打晒落去咁。

42. 但講到尾，公司得嗰10億市值，幾皮嘢成交，都真係唔使分析咁多。只係因為叫做識管理層就留意下，但唔係幫佢哋堆。我一路個疑問都係，點解越南便利店一路都賺唔到錢，明明都開咗好多店喎。

================================

Facebook Page：「君子馬蘭頭」ivanlirsesearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。